Isaías 34:1-17
34 Yau nacionkuna, qayllaykamuychis jinaspa uyariwaychis.
Yau llaqtakuna, ninriykichista kutirichimuwaychis.
Kay pachapi llapa kaqkuna uyariwaychis,kay jallp’api tiyaqkuna llapaykichis uyariwaychis.
2 Jehová Diosmi llapa nacionkunapaq sinchi phiñasqa kashan,+llapa maqanakuq soldadokunawanmi phiñasqa kashan.+
Llapantan payqa tukuchipunqa,llapantan wañuyman qaraykunqa.+
3 Wañusqakunaqa jawamanmi wijch’usqa kanqa,chaypin millaytaraq asnarinqa,+yawarpas orqokunapin puririnqa.+
4 Cielopi ejercitokunapas ismupunqan,cielopas papel jinan k’uyusqa kanqa.
Llapa ejercitokunan ch’akipunqa,uvas sach’api ch’akipuq raphi jinan kanqa,higos sach’api ch’akipuq higos jinan kanqa.
5 Diosmi nin: “Cielopin espadayta yawarchasaq,+chay espadaywanmi Edomman uraykusaq juicio ruwaq,+chinkachinapaq nisqa llaqtamanmi jaykusaq.
6 Jehová Diospa espadanqa yawarkamallañan kanqa,lliumi wirakamallaña kanqa,+ovejakunaq cabrakunaq yawarninwan yawarchasqan kanqa,ovejakunaq rurunninpi wirawan wirachasqan kanqa.
Bozrapin Jehová Diosqa sacrificiota ruwanqa,Edompin uywakunata ñak’anqa.+
7 Salqa torokunapas paykunawan kuskan wañuchisqa kanqa,malta torokunapas kallpasapakunawan kuskan ripunqa.
Jallp’aqa yawarkamallañan kanqa,polvopas wirawanmi wiswillaña kanqa”, nispa.
8 Jehová Diosqa ñan p’unchayta churanña vengakunanpaq,+ñan juj watata ajllanña Sionpa favorninpi castigananpaq.+
9 Mayunkunaqa* breamanmi tukupunqa,polvonpas azufremanmi tukupunqa,jallp’anpas raurarishaq brea jinan kapunqa.
10 Tutapas p’unchaypas raurashallanqan,q’osñinpas mana tukurikuqmi kanqa.
Watan-watanmi thunisqalla kanqa,manan jayk’aqpas chaynintaqa pipas purinqañachu.+
11 Chaypin pelicanopas erizopas wasichakapunqa,jukupas* cuervopas* chaypin tiyapunqa.
Paymi ch’usaq kasqanta rikuchinanpaq medina waskhata chutarinqa,mana valeq kasqanta rikuchinanpaqtaq plomadata kacharinqa.
12 Manan mayqen autoridadtapas reypaqqa churanqakuchu,umallikunapas chinkachisqan kanqaku.
13 Allin perqasqa torrekunapin kiskakuna wiñapunqa,llaqta perqakunapin kisakuna qorakuna wiñapunqa.
Monte alqokunaq pakakunanmi chayqa kapunqa,+avestruzkunaq tiyananmi kapunqa.
14 Ch’inneqpi puriq animalkunan aullakuq animalkunawan chaypi tupanqa,monte cabran* cabramasinkunawan chaypi wajanakunqaku.
Tuta puriq phalaq animalkunan chaypi tiyanqaku,chaypin paykunaqa wasichakunqaku.
15 Chaypin mach’aqwaypas tiyanqa,chaypin q’esachakuspa runtunta oqllanqa.
Chaypin wamankunapas* orqo chinantin juñukunqaku.
16 Jehová Diospa qelqanpi maskhaychis, chayta kunkawan leeychis.
Manan mayqellanpas faltanqachu,sapankankun orqo chinantin kashanqaku.
Jehová Dios kikinmi chaytaqa kamachikun,espiritunwanmi* chay animalkunataqa juñurqan.
17 Paymi sortean maypi tiyanankuta,makinwanpunin payqa t’aqan maypichus tiyanankuta.
Paykunaqa wiñaypaqmi chaypi tiyapunqaku,llapa mirayninkun wiñay-wiñaypaq chaypi tiyanqaku.
Uraypi willakuykuna
^ Chaypiqa yaqapaschá Bozrá llaqta mayukunamanta rimashan, chay llaqtamantan Edom suyuta kamachikuq.
^ Jukutaqa “tuku” nillankutaqmi.
^ Cuervoqa yana anka jinan. Sayayninmi kuskan metro jina, rafran kicharisqataq juj metro más.
^ Chaypiqa yaqapaschá “cabraman rijch’akuq supaymi” nillanmantaq.
^ Wamanqa anka jinan, ichaqa juch’uyllan.
