2 Reyes 24:1-20
24 Jehoiaquinpa kamachikusqan p’unchaykunapin Babilonia rey Nabucodonosorqa+ paywan maqanakuq jamurqan, chhaynapin Jehoiaquinqa kinsa wata paypa serviqnin kapurqan. Qhepamanmi ichaqa Nabucodonosor contra sayarirqan.
2 Jinan Jehová Diosqa suwa t’aqa soldadokunata Jehoiaquin contra kacharqan, chay soldadokunan karqanku Caldea runakuna,+ Siria runakuna, Moab runakuna, Anmón runakuna ima. Chay soldadokunatan Diosqa kacharqan Judá aylluta ch’usaqyachinankupaq. Chaykunaqa pasasharqan profetankunawan Jehová Diospa willachisqanman jinan.+
3 Jehová Diospa kamachisqanman jinan chayqa Judá ayllu runakunata pasarqan. Paymi Judá ayllu runakunata ñaupanmanta wijch’uyta munarqan+ Manasespa+ juchallikusqanrayku,
4 mana juchayoq runakunatapas wañuchisqanrayku.+ Manasesqa Jerusalén llaqtapin askha runakunata wañuchirqan, chaymi Jehová Diosqa paykunata mana perdonayta munarqanchu.+
5 Jehoiaquinpa kausayninmanta wakin willakuykunapas tukuy ruwasqanpas lliumi Judá ayllu reykunamanta willaq libropi qelqasqa kashan.+
6 Chaymantataq Jehoiaquinqa ñaupa taytankuna jina wañukapurqan,+ chay qhepamantaq churin Joaquín paypa rantinpi rey kapurqan.
7 Babilonia reymi Egipto reypa jallp’anta qechurqan Egipto mayumanta+ Éufrates mayukama,+ chaymantapachan Egipto reyqa manaña soldadonkunata kacharqanchu juj llaqtakunawan maqanakunankupaq.+
8 Joaquinqa+ chunka pusaqniyoq watanpi kashaspan Judá ayllupi rey kapurqan, kinsa killataq Jerusalén llaqtamanta kamachikurqan.+ Mamanpa sutinmi karqan Nejustá, Jerusalén llaqtayoq Elnatanpa ususin.
9 Joaquinqa taytan jinan Jehová Diospa cheqnisqan ruwaykunata ruwallarqantaq.
10 Chay tiempokunapin Babilonia rey Nabucodonosorpa soldadonkunaqa Jerusalén llaqtata maqanakuq rirqanku, chaymi Jerusalén llaqtata muyuykurqanku.+
11 Kamachinkuna llaqtata muyuykushaqtinkun Babilonia rey Nabucodonosorqa Jerusalén llaqtaman chayamurqan.
12 Jinan Judá ayllu rey Joaquinqa lloqsirqan mamanwan, serviqninkunawan, oficialninkunawan,* palacionpi kaq autoridadkunawan ima+ Babilonia reyman entregakunankupaq.+ Babilonia reyqa pusaq wata kamachikuyninpin paykunata Babiloniaman presota apapurqan.+
13 Babilonia reyqa Jehová Diospa wasinmanta reypa wasinmantawanmi* valorniyoq cosaskunata llapanta orqorqan.+ Chaymantapas Jehová Diospa wasinpaq rey Salomonpa ruwasqan qorimanta serviciokunatan llapanta ñut’upurqan.+ Chaykunaqa pasarqan Jehová Diospa willachisqanman jinapunin.
14 Babilonia reyqa Jerusalén llaqtapi tiyaq llapa runakunatan apapurqan: oficialkunatapas,*+ kallpasapa allin maqanakuq soldadokunatapas, rumiwan maderawan llank’aqkunatapas, fierrowan llank’aqkunatapas.+ Payqa chunka waranqa runakunatan apapurqan, nishu wajcha* runakunallatañan saqerqan.+
15 Chhaynatan Babilonia reyqa Joaquinta+ Jerusalén llaqtamanta Babiloniaman apapurqan,+ chaymantapas apallarqantaqmi mamanta, reypa esposankunata, reypa palacionpi autoridadniyoq runakunata, allin respetasqa runakunata ima.
16 Babilonia reypa apasqan runakunaqa allin kallpasapa allin maqanakuq runakunan karqanku. Paykunamantan karqanku qanchis waranqa soldadokuna, rumiwan maderawan fierrowan llank’aqkunataq waranqa karqanku.
17 Chaymantataq Babilonia reyqa Joaquinpa tion+ Mataniasta paypa rantinpi reyta churarqan, sutintataq cambiapurqan Sedequías+ nispa.
18 Sedequiasqa iskay chunka jujniyoq watanpi kashaspan rey kapurqan, chunka jujniyoq watataqmi Jerusalén llaqtamanta kamachikurqan. Paypa mamanmi karqan Amutal,+ Lifná llaqtayoq Jeremiaspa ususin.
19 Sedequiasqa Jehoiaquin+ jinan Jehová Diospa cheqnisqan ruwaykunata ruwarqan.
20 Jehová Diosqa sinchi phiñasqan kasharqan Jerusalén llaqta runakunapaqpas Judá ayllu runakunapaqpas, chaymi paykunata ñaupanmanta wijch’upurqan.+ Qhepamantaq Sedequiasqa Babilonia rey contra jataripurqan.+
Uraypi willakuykuna
^ Chaypiqa “reypa churinkunawan” nillanmantaqmi.
^ Chaypiqa “palacionmantawanmi” nillanmantaqmi.
^ Wajchataqa “pobre” nillankutaqmi.
^ Chaypiqa “reypa churinkunatapas” nillanmantaqmi.
