2 Reyes 12:1-21
12 Israelpi qanchis wataña Jehú+ kamachikushaqtinmi Jehoasqa+ Judá ayllupi kamachikuyta qallarirqan, tawa chunka watataqmi Jerusalén llaqtamanta kamachikurqan. Jehoaspa mamanpa sutinmi karqan Zibía, Ber-Seba llaqtamanta.+
2 Jehoasqa sacerdote Jehoiadapa yuyaychasqan tiempopiqa Jehová Diospa munasqanman jinapunin lliuta ruwarqan.
3 Yupaychana patakunatan* ichaqa mana chinkachirqanchu,+ chaymi runakunaqa sacrificiokunata jaywaspa diosninkuman q’osñichishallarqanku.
4 Rey Jehoasmi sacerdotekunata nirqan: “Jehová Diospa wasinpaq apamusqanku qolqetaqa qankunan lliuta chaskinkichis:+ sapanka runaq impuesto pagasqanta,+ prometekusqankuman jina qolqe pagasqankuta, tukuy sonqowan Jehová Diospa wasinpaq apamusqankutawan;+ tukuy chaykunaqa ch’uya ofrendakunan.
5 Chay apamusqanku qolqetaqa qankuna kikiykichismi chaskimunkichis, chaykunaqa kanqa wasiq mana allin partenkunata* allichanapaqmi”,+ nispa.
6 Jehoasqa iskay chunka kinsayoq watañan kamachikusharqan, sacerdotekunataq ichaqa Diospa wasinta manaraq allichayta qallarirqankuraqchu.+
7 Chaymi rey Jehoasqa sacerdote Jehoiadata+ juj sacerdotekunatawan wajachispa nirqan: “¿Imaraykun mana allichankichisraqchu Diospa wasinta? Kunanmantaqa manañan qankunachu qolqetaqa chaskinkichis, chaskinkichis chaytaq Diospa wasinta allichanapaq kanqa”,+ nispa.
8 Sacerdotekunaqa allinpaqmi reypa nisqanta qhawarirqanku, chaymi manaña paykunachu runakunamanta qolqeta chaskirqanku, manañataq paykunachu encargakurqanku Diospa wasinta allichanapaqpas.
9 Jinan sacerdote Jehoiadaqa juj cajata apamurqan,+ tapanta t’oqospataq Jehová Diospa wasinman jaykuna paña ladopi churaykurqan altarpa ladonman. Chay cajamanmi punku kichaq sacerdotekunaqa Jehová Diospa wasinpaq runakunaq apamusqanku qolqeta churaqku.+
10 Jehová Diospa wasinpaq apamusqanku qolqe askhaña chay cajapi kasqanta reparaspataq reypa secretarionman uma sacerdoteman ima willamuqku, jinan paykunaqa chay cajamanta qolqeta orqospa* yupaqku.+
11 Chay yupasqanku qolqetataq qoqku Jehová Diospa wasinta allichanankupaq encargakuqkunaman, paykunan chay qolqewan pagaqku Jehová Diospa wasinta allichaqkunaman, carpinterokunaman,+
12 albañilkunaman, rumita ch’eqtaspa llank’aqkunamanwan. Chay qolqewanmi rantillaqkutaq Jehová Diospa wasinta allichanapaq maderakunatapas thupasqa rumikunatapas. Chaymantapas chay qolqewanmi pagaqku wasi allichaypi juj gastokunatapas.
13 Jehová Diospa wasinpaq apamusqanku qolqetaqa manan gastaqkuchu qolqemanta puruñakunata,* nina wañuchina tijerakunata, jatun p’ukukunata, trompetakunata ruwanankupaqqa,+ nitaq Jehová Diospa wasinpaq qolqemanta qorimanta imaymana cosaskunata ruwanankupaqpas.+
14 Chay qolqetaqa qoqku Diospa wasinta allichanankupaq encargakuqkunallamanmi, chay qolqewanmi paykunaqa Jehová Diospa wasinta allichaqku.
15 Llank’aqkunaman paganankupaq qolqe chaskiq runakunapiqa anchatan confiaqku, chaymi mana tapupayaqkuchu imapichus chay qolqeta gastasqankuta.+
16 Juchaman urmasqamanta ofrendapaq+ qolqetawan jucha pampachay ofrendapaq apamusqanku qolqetawanmi ichaqa mana qoqkuchu Jehová Diospa wasinta allichanapaq, aswanpas chay qolqeqa sacerdotekunapaqmi karqan.+
17 Chay p’unchaykunapin Siria rey Azaelqa+ Gaj+ llaqta runakunawan maqanakuq rirqan, jinaspan chay llaqtata atipaspa jap’ikapurqan. Chaymantataq Jerusalén llaqta contrañataq jamurqan.+
18 Chayta yacharuspan Judá ayllu rey Jehoasqa ñaupa taytankunaq Diospaq t’aqasqan ch’uya ofrendakunata juñurqan, chaykunatan t’aqarqanku Judá ayllu rey Jehosafat, Jehoram, Ocozías ima. Chaymantapas juñullarqantaqmi pay kikinpa qosqan ch’uya ofrendakunata, Jehová Diospa wasinpi reypa wasinpipas* valorniyoq cosaskuna waqaychanamanta lliu qoritawan. Tukuy chaykunatan apachirqan Siria rey Azaelman,+ chhaynapin chay reyqa Jerusalenmanta ripurqan.
19 Jehoaspa wakin ruwasqankunaqa lliumi Judá ayllu reykunamanta willaq libropi qelqasqa kashan.
20 Jehoastaqa kamachinkunan pay contra jatarispa+ Bej-Miló*+ nisqapi wañuchipurqanku, Silá nisqaman riq ñanpi.
21 Jehoasta wañuchiqkunaqa karqanku Simeajpa churin Jozacarwan Somerpa churin Jehozabajwanmi.+ Jinan Jehoastaqa ñaupa taytankunatawan kuskata Davidpa Llaqtan nisqapi p’ampapurqanku. Chay qhepamanqa churin Amasiasmi rey kapurqan.+
Uraypi willakuykuna
^ Hebreo rimaypiqa “Alto patakunatan” ninmi. Qhaway Explicasqa simikuna nisqapi “Yupaychana patakuna” nisqata.
^ Chaypiqa “wasiq raqrankunata” nillanmantaqmi. Raqrataqa “laqra” nillankutaqmi.
^ Chaypiqa “bolsakunaman churaspa” nillanmantaqmi.
^ Puruñaqa manka jinan.
^ Chaypiqa “palacionpipas” nillanmantaqmi.
