2 Crónicas 28:1-27
28 Ajazqa+ iskay chunka watanpi kashaspan rey kapurqan, chunka soqtayoq watataqmi Jerusalenmanta kamachikurqan. Payqa manan ñaupa taytan David jinachu Jehová Diospa munasqanman jina ruwarqan.+
2 Aswanpas Israel reykuna jinan mana allinkunata ruwarqan.+ Payqa metalmantan ruwarqan Baal idolokunata.+
3 Chaymantapas Ajazqa Hinón* wayq’opin sacrificiokunata q’osñichiq, chay wayq’opin churinkunatapas sacrificiopi ruphachirqan.+ Chhaynatan Ajazqa millakunapaq kaqkunata ruwarqan imaynan Israel runakunaq ñaupanmanta Jehová Diospa qarqosqan nacionkuna ruwaqku jinata.+
4 Chaymantapas Ajazqa yupaychana patakunapi,*+ moqo patakunapi, k’allmasapa sach’a ukhukunapi iman sacrificiokunata juj dioskunaman q’osñichiq.+
5 Chaymi Jehová Diosqa Judá ayllu runakunata Siria reypa makinman entregarqan,+ chhaynapin paykunata atipaspa askha runakunata Damasco llaqtaman presota aparqanku.+ Chaymantapas Diosqa Israel reypa makinmanmi Judá ayllu runakunata entregarqan, jinan paykunata atipaspa askhatapuni Judá ayllu runakunata wañuchirqanku.
6 Judá ayllu runakunaqa ñaupa taytankuq Diosnin Jehová Diostan saqepurqanku.+ Chaymi juj p’unchayllapi Remaliaspa churin Pecaqa+ pachaj iskay chunka waranqa allin maqanakuq Judá ayllu runakunata wañuchirqan.
7 Efraín ayllumanta allin maqanakuq Zicritaq wañuchirqan reypa churin Maseyata, reypa palacionmanta encargakuq Azricanta, reyman qatiq Elcanatawan.
8 Chaymantapas Israel soldadokunaqa presotan aparqanku Judá ayllumanta iskay pachaj waranqa runakunata, chay apasqanku runakunan karqan warmikunawan wawakunapiwan. Judá ayllu runakunaq kaqninkutapas askhatan Samaria llaqtaman aparqanku.+
9 Jehová Diospa profetan Odejmi Samaria llaqtaman rishaq Israel soldadokunawan tupaq rirqan, paykunatan nirqan: “Ñaupa taytaykichispa Diosnin Jehová Diosmi Judá ayllu runakunawan sinchi phiñasqa kashan, chaymi qankunaq makiykichisman paykunata entregarqan.+ Qankunan Judá ayllu runakuna contra sinchi phiñasqa jatarirqankichis, jinaspa wañuchirqankichis; chay ruwasqaykichistaqa Diosmi rikumushan.
10 Kunantaq qankunaqa Judá ayllu runakunapas Jerusalenpi tiyaq runakunapas kamachiykichis kananta munashankichis.+ Ichaqa manan paykunallachu juchallikurqanku, qankunapas Jehová Dios contran juchallikurqankichis.
11 Kunanqa kay nisqayta uyariwaychis, Jehová Diosmi qankunapaq sinchi phiñasqa kashan, chayrayku preso apamusqaykichis runakunata kutichipuychis”, nispa.
12 Chayta uyarispan Efraín ayllumanta wakin umallikuna maqanakuymanta kutimuq soldadokunawan rimaq rirqanku. Chay umallikunan karqanku: Jehoananpa churin Azarías, Mesilemojpa churin Berekías, Salumpa churin Jeizquías, Adlaipa churin Amasapiwan.
13 Paykunan nirqanku: “Preso apamusqaykichis runakunataqa ama kayman apamuychischu, chayta ruwankichis chayqa Jehová Diosmi juchachawasun. ¿Manachu reparankichis Diosqa Israel runakunapaq sinchi phiñasqa kashasqanta? Juchanchisqa nishupunin. Chhaynaqa, ¿imaraykun kayta ruwaspa astawanraq Israel runakunata juchallichiyta munashankichis?”, nispa.
14 Jinan chay soldadokunaqa preso apamusqanku runakunatapas imaymana qechumusqankutapas qorqanku+ umallikunaman chaypi kaq runakunamanwan.
15 Jinan Israel runakunaq ajllasqanku umallikunaqa sumaqta chaskirqanku preso apamusqanku runakunata, jinaspa soldadokunaq qechumusqankumanta p’achakunata orqospa mana p’achayoq presokunata p’achachirqanku. Paykunan qorqanku usut’akunata, mijunata, ujanata, cuerponkupaq aceitetawan. Chaymantapas pisi kallpayoq runakunatan asnopi sillachirqanku, jinaspa askha palmera sach’akunayoq Jericó llaqtaman aparqanku llaqtamasinkuq kasqanman. Chaymantataq chay umallikunaqa kutimpurqanku Samaria llaqtaman.
16 Chay tiempopin rey Ajazqa Asiria reykunata valekurqan yanapanankupaq.+
17 Edom runakunapas jujmantan jamurqanku Judá ayllu runakunawan maqanakuq, jinan paykunata atipaspa askha runakunata presota aparqanku.
18 Chaymantapas Filistea runakunan+ jamullarqankutaq Judá ayllu runakuna contra, jinan phawaykurqanku Sefelá ladopi+ kaq llaqtakunaman, Négueb ladopi kaq llaqtakunamanwan. Jinan jap’ikapurqanku Bej-Semes llaqtata,+ Ayalón llaqtata,+ Guederoj llaqtata, Socó llaqtata muyuriqninpi kaq llaqtachakunatawan, Timná llaqtata+ muyuriqninpi kaq llaqtachakunatawan, Guinzó llaqtata muyuriqninpi kaq llaqtachakunatawan. Chay llaqtakunapin paykunaqa tiyapurqanku.
19 Jehová Diosmi rey Ajazpa juchanrayku chhaynata Judá ayllu runakunata ñak’arichirqan. Ajazqa Judá ayllu runakunatan juchallichirqan, chaymi Judá ayllu runakunaqa Jehová Diosta yupaychanankumantaqa juj dioskunata yupaycharqanku.
20 Asiria rey Tilgaj-Pilneserqa+ Judá ayllu runakunata yanapananmantaqa aswanpas paykuna contran jatarirqan, chhaynapin paykunata sasachakuyman churarqan.+
21 Rey Ajazqa lliutan imaymanakunata orqorqan Jehová Diospa wasinmanta, reypa wasinmanta,*+ umallikunaq wasinmantawan; chaykunatataq Asiria reyman apachirqan. Chaykunataña apachirqan chaypas pay contran Asiria reyqa jatarirqan.
22 Rey Ajazqa chay sasachakuykunapiña tarikurqan chaypas astawanraqmi Jehová Dios contra juchallikurqan.
23 Damasco runakunan payta atiparqanku,+ chaymi chay runakunaq diosninkunaman sacrificiokunata jaywayta qallarirqan.+ Khaynatan payqa yuyaykurqan: “Diosninkun Siria runakunataqa yanapashan, chhaynaqa noqatapas yanapawananpaq chay dioskunaman sacrificiokunata jaywasaq”,+ nispa. Ichaqa chayta ruwasqanraykun reypas Israel runakunapas aswan mana allinpi tarikurqanku.
24 Chaymantapas Ajazqa Diospa wasinpi kaq imaymana serviciokunatan juñurqan, jinaspan lliuta ñut’urqan.+ Jehová Diospa wasinpa punkunkunatapas wisq’apurqanmi,+ Jerusalén llaqtapitaq sapanka esquinapi altarkunata ruwarqan.
25 Judá ayllupi kaq llaqtakunapipas yupaychana patakunatan ruwarqan, chaypi juj dioskunaman sacrificiota q’osñichinanpaq.+ Chhaynatan payqa ñaupa taytankuq Diosnin Jehová Diosta sinchita phiñachirqan.
26 Ajazpa kausayninmanta wakin willakuykunapas imachus ruwasqankunapas lliumi Judá ayllu reykunamanta Israel reykunamanta willaq libropi qelqasqa kashan.+
27 Chaymantataq Ajazqa ñaupa taytankuna jina wañukapurqan, jinaspa Jerusalén llaqtapi p’ampapurqanku. Ichaqa manan Israel reykunaq sepulturanpichu p’amparqanku.+ Chay qhepamantaq churin Ezequías rey kapurqan.
Uraypi willakuykuna
^ Hebreo rimaypiqa “alto patakunapi” ninmi. Qhaway Explicasqa simikuna nisqapi “Yupaychana patakuna” nisqata.
^ Chaypiqa “palacionmanta” nillanmantaqmi.
