2 Crónicas 26:1-23
26 Chay qhepamantaq llapa Judá ayllu runakunaqa Amasiaspa+ churin Uziasta+ reyta churarqanku papanpa rantinpi kamachikunanpaq. Uziasqa chunka soqtayoq watallanpiraqmi kasharqan kamachikuyta qallarispaqa.
2 Papan Amasiasta p’ampapusqanku qhepatan+ Uziasqa Eloj llaqtata+ qechukapurqan, jinaspa allicharqan. Chhaynapin Eloj llaqtaqa jujmanta Judá aylluq kapurqan.
3 Uziasqa+ chunka soqtayoq watanpi kashaspan Judá ayllupi kamachikuyta qallarirqan, pisqa chunka iskayniyoq watataqmi Jerusalenmanta kamachikurqan. Paypa mamanmi karqan Jerusalén llaqtayoq Jecolías.+
4 Payqa papan Amasías jinan Jehová Diospa munasqanman jina ruwarqan.+
5 Zacariasmi Uziastaqa yachachirqan Dios manchakuyta, chaymi Zacariaspa kausasqan p’unchaykunapiqa Diosta servirqan. Jehová Diosta servisqan tiempopiqa allinmi Uziasqa kausarqan.+
6 Uziasqa Filistea runakunawan maqanakuq rispan+ paykunata atiparqan, jinan Gaj llaqtaq,+ Jafné llaqtaq,+ Asdoj llaqtaq+ perqankunata thunirqan. Chaymantataq mosoq llaqtakunata jatarichirqan Asdoj llaqtaq qayllankunapi, Filistea runakunaq jallp’ankunapi ima.
7 Diosmi Uziastaqa yanapashallarqan Filistea runakunawan maqanakuqtin, Gurbalpi tiyaq Arabia runakunawan maqanakuqtin,+ Meunin runakunawan maqanakuqtinpas.
8 Jinan Anmón runakunaqa+ impuestota Uziasman pagayta qallarirqanku. Chhaynapin payqa aswan atiyniyoqman tukupurqan, allin reqsisqataq kapurqanpas, chaymi paymanta rimayqa Egipto llaqtakunapiraq uyarikurqan.
9 Chaymantapas Uziasqa Jerusalén llaqtapin allin torrekunata sayarichirqan+ Esquina Punku nisqaq ladonpi,+ Wayq’o Punku nisqaq ladonpi,+ Jatun Machón nisqaq ladonpi ima.
10 Chaymantapas ch’inneq ladokunapin ruwarqan torrekunata,+ askha pujyukunata ima; chay pujyukunatan t’oqorqan* askha uywakunayoq kasqanrayku. Chhaynallatataqmi ruwarqan Sefelá ladopipas pampa ladopipas. Uziasmanqa chajra llank’aymi gustaq, chaymi Carmelo orqokunapipas juj orqokunapipas karqan uvas chajrapi llank’aq runankuna, juj chajrakunapi llank’aq runankunapas.
11 Chaymantapas Uziasqa askha soldadokunayoqmi karqan, chay soldadokunaqa guerrapaq imaymana armakunayoqmi karqanku, paykunaqa t’aqa-t’aqapin maqanakuq riqku. Chay soldadokunatan yuparqanku+ secretario Jeielwan+ umalli Maseyapiwan, paykunaq umallintaq karqan reypa juj kaq oficialnin Hananías.
12 Uziaspa allin maqanakuq soldadonkunaq umallinkunaqa iskay waranqa soqta pachaj runakunan karqanku, paykunaqa llapankupas familiakunaq umallinkunan karqanku.
13 Chay umallisqanku soldadokunan karqan 307.500 allin maqanakuq soldadokuna. Chay soldadokunaqa liston kasharqanku guerrapi reyta yanapanankupaq.+
14 Uziasmi chay soldadokunaman qorqan jark’apakuna escudokunata, lanzakunata,+ cascokunata, maqanakuna chalecokunata,*+ flechana arcokunata, warak’anapaq rumikunatawan.+
15 Chaymantapas allin yachaq runakunawanmi Jerusalén llaqtapi ruwachirqan guerrapaq maquinakunata. Chay maquinakunatataq churachirqan torrekunaman+ esquina perqakunaman ima, chay maquinakunawanmi jatun rumikunata warak’aqku flechakunatapas flechaqku. Diosmi Uziastaqa yanaparqan, chaymi payqa atiyniyoqman tukupurqan allin reqsisqataq kapurqanpas.
16 Uziasqa aswan atiyniyoqman tukupuspa jinan jatunchakuyta qallarirqan, chhaynapin sinchi sasachakuykunapi tarikurqan. Uziasqa Jehová Dios contran jatarirqan, chaymi Jehová Diospa wasinta jaykurqan altarpi inciensota q’apachinanpaq.+
17 Jinan sacerdote Azariaswan pusaq chunka Jehová Diospa sacerdotenkunapiwan, mana manchakuspa Uziaspa qhepanta usqhaylla jaykurqanku.
18 Paykunan mana manchakuspa rey Uziasta nirqanku: “¡Uzías, manan qanchu Jehová Diosmanqa inciensota q’apachinayki!+ Inciensotaqa sacerdotekunallan q’apachinanku, paykunallan kanku Aaronpa mirayninkunaqa,+ paykunallan ch’uyanchasqapas kanku. ¡Lloqsiy kaymanta! Dios contran qanqa juchallikushanki, kay ruwasqaykimantaqa manan Jehová Diosqa jatunchasunkichu”, nispa.
19 Uziasqa incienso q’apachinantinmi kasharqan, jinan chayta niqtinku payqa sinchita phiñakurqan.+ Uziasqa sacerdotekunatan k’araqta rimapayasharqan, chayllamanmi mat’inpi lepra* onqoy rijurirqan.+ Payqa sacerdotekunaq ñaupanpin kasharqan, Jehová Diospa wasinpi kaq incienso q’apachina altarpa ladonpi.
20 Uma sacerdote Azariaspas llapa sacerdotekunapas qhawarispankutaq mat’inpi rikurqanku lepra onqoyta. Chaymi usqhaylla Uziasta Diospa wasinmanta orqomurqanku, paypas usqhayllan lloqsimurqan Jehová Diospa castigasqanta reparakuspa.
21 Rey Uziasqa wañupunan p’unchaykaman lepra onqoyniyoq karqan. Chaymi payqa Jehová Diospa wasinmanta t’aqasqa kapurqan, jinan juj wasipi t’aqasqa tiyarqan.+ Chaykaman ichaqa churin Jotán reypa palacionmanta encargakurqan, llapa Judá ayllu runakunatapas juzgarqan.+
22 Uziaspa wakin ruwasqankunataqa Amozpa churin profeta Isaiasmi lliuta qelqarqan.+
23 Chaymantataq Uziasqa ñaupa taytankuna jina wañukapurqan, jinaspa ñaupa taytankunatawan kuskata p’ampapurqanku reykunaq panteonninpi. Paytaqa lepra onqoyniyoq kasqanraykun pampallapi p’amparqanku, manan reykunaq sepulturanpichu. Chay qhepamantaq churin Jotán+ rey kapurqan.
Uraypi willakuykuna
^ Yaqapaschá chay pujyukunataqa qaqakunapi t’oqorqan.
^ Maqanakuna chalecoqa soldadoq qhasqonta pakananpaqmi karqan.
