2 Crónicas 20:1-37
20 Chaymantataq Moab runakuna,+ Anmón runakuna,+ wakin amonin* runakunapiwan Jehosafat contra maqanakuq jamurqanku.
2 Jinan Jehosafatman willarqanku: “Sinchi askha soldadokunan jamushanku qocha* ladomanta, Edom jallp’amanta.+ Chay runakunan kashanku En-Guedí+ nisqa Azazón-Tamar llaqtapi”, nispa.
3 Chayta yacharuspan Jehosafatqa sinchita mancharikurqan, jinan kallpachakurqan Jehová Diosta maskhananpaq.+ Chaymi llapa Judá ayllu runakunata kamachirqan ayunanankupaq.
4 Judá ayllu runakunataq juñukurqanku Jehová Diospa yanapayninta mañakunankupaq,+ paykunaqa Judá ayllupi kaq llapa llaqtakunamantan jamurqanku Jehová Diospa yanapayninta maskhaspa.
5 Jinan Jehosafatqa sayaykurqan Jehová Diospa wasinpi kaq mosoq patiopi, payqa sayaykurqan llapa Judá ayllu runakunaq jinallataq Jerusalén llaqta runakunaq ñaupanpin.
6 Chaypin nirqan:
“Ñaupa taytaykuq Diosnin Jehová Dios, qanllan kanki janaq pacha Diosqa,+ qanqa kay pachapi kamachikuqkunamantapas aswan atiyniyoqmi kanki.+ Jinaspapas manan pipas qantaqa atipasunkimanchu, qanqa sinchi atiyniyoqpunin kallpasapapunin kanki.+
7 Qanmi kay jallp’api tiyaq runakunataqa llaqtaykiq ñaupanmanta qarqorqanki, jinaspa amigoyki Abrahanpa mirayninman qopurqanki,+ chaypi wiñaypaq tiyanankupaq.
8 Chhaynapin paykunaqa chay jallp’api tiyapurqanku, jinaspa sutiyki yupaychasqa kananpaq ch’uya wasita ruwapurqasunkiku.+ Paykunan nirqanku:
9 Sichus pipas noqayku contra phawaykamunqa, ima juiciopipas tarikusaqku, mast’arikuq onqoypas kanqa, yarqaypas kanqa, jinaspa sutiykita jatunchanapaq wasiq ñaupanpi qanpa ñaupaykipi ima sayaykusaqku,+ llakisqa sonqowan qanpa yanapayniykita mañakamusaqku chayqa, mañakusqaykuta uyarimuspa librawayku,+ nispa.
10 Egipto llaqtamanta Israel runakuna lloqsimushaqtinkuqa manan munarqankichu Anmón runakunaq, Moab runakunaq, Seír orqo-orqopi+ tiyaq runakunaq jallp’anman jaykunankutaqa, manan munarqankichu chay runakunata tupaykunallankutapas.+ Kunanmi ichaqa chay runakuna noqayku contra sayarishanku.
11 Paykunaqa mana allinwanmi kutichishawanku, jinaspa qowasqaykiku jallp’amanta qarqoyta munashawanku.+
12 Diosnillayku, ¿jinallatachu qhawanki chay runakunata? ¿Manachu paykunata castiganki?+ Noqayku contra jamuq runakunaqa sinchi askhapunin kanku, manan noqaykuqa imatapas ruwayta atiykuchu,+ chaymi qanpa yanapayniykita mañakamuykiku”,+ nispa.
13 Jehosafat mañakushaqtinqa llapa Judá ayllu runakunan Jehová Diospa ñaupanpi kasharqanku. Paykunan kasharqanku esposakunantin, wawakunantin,* juch’uy erqekunantin ima.
14 Chay juñunakuypin kasharqan Jaziel, paymanmi Jehová Diospa espiritun junt’aykurqan. Jazielqa karqan Zacariaspa churinmi, Zacariastaq karqan Benayaq churin, Benayataq karqan Jeielpa churin, Jeieltaq karqan Mataniaspa churin, Mataniastaq karqan Asafpa mirayninmanta Leví ayllu runa.
15 Jazielmi nirqan: “¡Uyariwaychis llapa Judá ayllu runakuna, Jerusalén llaqtapi tiyaq runakuna, qanpas rey Jehosafat! Jehová Diosmi nisunkichis: Chay sinchi askha runakunaq jamusqanwanqa ama manchakuychischu nitaq khatatataychispaschu,* kay maqanakuyqa manan qankunaqchu aswanpas Diospa maqanakuyninmi.+
16 Chhaynaqa paqarin uraykuychis paykunawan maqanakuq. Paykunan Ziz ñanninta wichamushanqaku, jinan paykunawan tupankichis wayq’o tukuypi, Jeruel ch’inneq chimpanpi.
17 Chay maqanakuypiqa manan qankunaqa maqanakunkichischu, aswanpas maypichus kanaykichisman riychis, chaypi mana manchakuspa sayaychis,+ jinan rikunkichis imaynatachus Jehová Dios salvasunkichis chayta.+ Chhaynaqa Judá ayllu runakuna Jerusalenpi tiyaq runakuna, ama manchakuychischu nitaq khatatataychispaschu,+ paqarin riychis paykunawan tupaq, Jehová Diosmi yanapasunkichis,+ nispa”.
18 Chayta uyarispa jinan Jehosafatqa qonqorikuspa pampaman k’umuykurqan, jinan Judá ayllu runakunapas Jerusalenpi tiyaq runakunapas Jehová Diospa ñaupanpi qonqorikuspa pampaman k’umuykullarqankutaq, chhaynapi Jehová Diosta yupaychanankupaq.
19 Cohatpa mirayninmanta+ Corepa mirayninmanta kaq Leví runakunataq sayarirqanku, jinaspa Israelpa Diosnin Jehová Diosta alto kunkawan jatuncharqanku.+
20 Qhepa p’unchaytaq tutallamanta jatarispa Tecoa llaqtaq+ ch’inneq ladoman rirqanku. Jinan Jehosafatqa runakuna lloqsishaqtin sayaykuspa paykunata nirqan: “¡Uyariwaychis Judá ayllu runakuna, Jerusalén llaqtapi tiyaq runakunapas! Diosniykichis Jehová Diospi confiaychis chhaynapin mana kuyurispa sayankichis, Diospa profetankunapipas confiaychis+ chhaynapin atipankichis”, nispa.
21 Runakunata tapuspataq Jehosafatqa qharikunata ajllarqan takispa Jehová Diosta jatunchanankupaq,+ paykunan ch’uya p’achawan p’achasqa soldadokunaq ñaupanta takispa rirqanku, paykunan takisharqanku: “Jehová Diosta gracias niychis, mana tukukuq munakuyninqa* wiñay-wiñaypaqmi”,+ nispa.
22 Diosta jatunchanankupaq kusisqa takiyta qallariqtinkutaq Jehová Diosqa qonqaylla phawaykurqan Anmón runakunaman, Moab runakunaman, Seír orqo-orqopi tiyaq runakunamanwan. Chhaynapin Judá ayllu contra jamuq runakunaqa paykunapura wañuchinakurqanku.+
23 Anmón runakunawan Moab runakunawanmi Seír orqo-orqopi tiyaq runakuna contra sayarirqanku,+ jinaspa wañuchiyta qallarirqanku, wañuchiyta tukuspataq paykunapurañataq wañuchinakurqanku.+
24 Judá ayllu runakunataq ch’inneqpi kaq torreman chayaspa+ chay runakunaq kasqan ladota qhawarirqanku, jinan rikurqanku chay runakuna wijch’u-wijch’u wañusqa kashasqankuta,+ llapallankun wañupusqaku, manan jujllapas kausasqachu.
25 Jinan Jehosafatqa soldadonkunapiwan chay runakunaq kasqanman rirqanku tukuy imaymana kaqninkuta apamunankupaq. Chay wañusqa runakunaq kasqanman chayaspataq tarirqanku ancha valorniyoq cosaskunata p’achakunata ima. Chay runakunaq kaqninta qechusqankuqa sinchi askhapunin karqan, chaymi mana q’epiytapas atirqankuchu,+ kinsa p’unchaypin astaytapas tukurqanku.
26 Tawa kaq p’unchaypitaq Beracá wayq’opi juñukurqanku, chaypin Jehová Diosta jatuncharqanku.* Chayraykun chay wayq’ota suticharqanku Beracá*+ nispa, chhayna sutichasqan kunankamapas kashan.
27 Chaymantataq Judá ayllu runakunapas Jerusalenpi tiyaq runakunapas Jehosafatpa umallisqan kusisqa Jerusalén llaqtaman kutipurqanku. Enemigonkuta Jehová Dios atipasqanraykun paykunaqa kusisqa kasharqanku.+
28 Jerusalén llaqtamanmi chayarqanku cuerdayoq tocanakunata, arpakunata,+ trompetakunata+ tocaspa. Chaymantataq Jehová Diospa wasinman rirqanku.+
29 Israel runakunaq enemigon contra Jehová Dios maqanakusqanta yacharuspan llapa nacionmanta runakunaqa Diosta manchakurqanku.+
30 Chhaynapin Judá ayllu runakunaqa Jehosafatpa kamachikusqan tiempopi thaj tiyarqanku, Diosninmi Jehosafat-taqa llapa enemigonkunamanta thajpi tiyachirqan.+
31 Jinan Jehosafatqa Judá ayllupi kamachikushallarqan. Payqa kinsa chunka pisqayoq watanpi kashaspan rey kapurqan, iskay chunka pisqayoq watataqmi Jerusalenmanta kamachikurqan. Paypa mamanmi karqan Silipa ususin Azubá.+
32 Jehosafatqa papan Asá+ jinan ruwarqan, payqa Jehová Diospa munasqanman jinan lliutapas ruwarqan.+
33 Chaywanpas yupaychana patakunataqa* manan chinkachirqanchu.+ Judá ayllu runakunaqa manan tukuy sonqowanchu kallpachakurqanku ñaupa taytankuq Diosninta servinankupaqqa.+
34 Jehosafatpa wakin ruwasqankunapas lliumi qelqasqa kashan Ananipa+ churin Jehupa+ qelqasqankunapi. Chay qelqakunan kashan Israel reykunamanta willaq libropi.
35 Chay qhepamantaq Judá ayllu rey Jehosafatqa Israel rey Ocoziaswan rimanakurqan. Ocoziasqa mana allinkunatan ruwaq.+
36 Jehosafatqa Ocoziaswanmi rimanakurqan barcokunata ruwanankupaq, chhaynapi chay barcokuna Tarsisman+ rinanpaq, chay barcokunatan ruwarqanku Ezión-Gueberpi.+
37 Ichaqa Maresá llaqtamanta Dodavauq churin Eliezermi kayta Jehosafat contra profetizarqan: “Ocoziaswan rimanakusqaykiraykun Jehová Diosqa lliu ruwasqaykita thuninqa”,+ nispa. Jinan chay barcokunaqa p’akikapurqan,+ chhaynapin Tarsismanqa mana rirqanñachu.
Uraypi willakuykuna
^ Chaypiqa yaqapaschá “wakin meunita” nillanmantaq.
^ Chaypiqa “mar Muerto” nisqa qochamantan rimashanman.
^ Hebreo rimaypiqa “churikunantin” ninmi.
^ Khatatataytaqa “kharkatiy” nillankutaqmi.
^ Qhaway Explicasqa simikuna nisqapi “Mana tukukuq munakuy” nisqata.
^ Hebreo rimaypiqa “bendecirqanku” ninmi.
^ Beracá sutiqa “bendeciy” ninantan nin.
^ Hebreo rimaypiqa “alto patakunataqa” ninmi. Qhaway Explicasqa simikuna nisqapi “Yupaychana patakuna” nisqata.
