1 Tesalonicenses 3:1-13
3 Chaymi noqaykuqa manaña aguantayta atispayku noqallaykuña qhepakurqayku kay Atenas llaqtapi,+
2 Cristomanta allin willakuykuna willaypi Diosta serviq iñiqmasinchis Timoteotataq+ qankunaman kachamurqayku allinta sayachinasuykichispaq iñiyniykichispi kallpachanasuykichispaqwan,
3 chhaynapi ama mayqenniykichispas chay sasachakuykuna jawa pisipanaykichispaq. Yachasqaykichis jinapas, chhayna sasachakuykunaqa kanqapunin.+
4 Chaymantapas, qankunawan kashaspaykuqa “imaymana sasachakuykunatan pasasun” niqmá kaykichis riki; chhaynapunitaqmi karqanpas ¿riki?+
5 Chaymi noqaqa manaña aguantayta atispay Timoteota kachamurqani imaynachus iñiyniykichispi kashankichis chayta yachanaypaq:+ “Tentaqpaschá+ paykunata urmachin, chhaynapi llank’asqayku yanqa kanqa”, nispay.
6 Kunanmi ichaqa ña Timoteoqa kutiramunña,+ paymi imaymana allinkunata qankunamanta willawanku, qankunaqa qaqatas iñiypi sayashankichis, munakuypipas allinsi kashankichis, munakuywansi noqaykutapas yuyariwankiku, maytas rikuytapas munashawankiku, imaynan noqaykupas qankunata rikuyta munashayku jinata.
7 Chayraykun wayqeykuna,* llakikuypiña ñak’ariypiña tarikuyku chaypas, qankunarayku chhayna junt’aq sonqo kasqaykichisrayku ima kallpachasqa tarikuyku.+
8 Arí, Señorwan jujllachasqalla kasqaykichisraykun kallpachasqa kashayku.
9 Qankunaqa anchatan kusichiwankiku, chaymi qankunamanta Diosman graciasta qollaykupuni.
10 Tuta-p’unchaymi noqaykuqa tukuy sonqoykuwan Diosmanta rogakushayku qankunawan tupanaykupaq, chhaynapi necesitasqaykichisman jina iñiyniykichispi yanapanaykupaq.+
11 Maytan mañakushayku Taytanchis Dioswan Señorninchis Jesuspiwan qankunaman jamunaykupaq ñanta kichariwanankuta.
12 Chaymantapas, maytan munashayku munakuyniykichista Señorninchis astawanraq yapananta, chhaynapi imaynan noqayku munakuykiku chhaynata qankunapas anchata munanakunaykichispaq,+ jujkunatapas chhaynata munakunaykichispaqwan,
13 chhaynapin sonqoykichispi qaqata sayankichis, Señorninchis Jesús llapa ch’uya kamachinkunawan kuska chayamunanpaqpas*+ Taytanchis Diospa ñaupanpi+ ch’uya mana juchachana kashankichis.
Uraypi willakuykuna
^ Mayninpiqa warmipaq qharipaqwanmi Bibliapiqa “wayqeykuna” nispa nin.
^ Chaypiqa “chayamusqan tiempopipas” nillanmantaqmi. Qhaway Explicasqa simikuna nisqapi “Cristoq chayamusqan tiempo” nisqata.
