1 Samuel 9:1-27
-
Samuel Saulta reqsisqanmanta (1-27)
9 Benjamín ayllupin+ karqan Quis+ sutiyoq qhapaq runa. Chay runaqa Abielpa churinmi karqan, Abieltaq Zerorpa churin karqan, Zerortaq Becorajpa churin karqan, Becorajtaq Afiaspa churin karqan.
2 Quispa churinmi karqan Saúl,+ payqa munay rijch’ayniyoq waynan karqan. Israel llaqtapiqa manan pipas pay jina munayqa karqanchu. Chaymantapas payqa jatun waynan karqan, jatun runapas rijrankamallan aypaq.
3 Juj p’unchaymi Quispa asnonkuna chinkarurqan, jinan payqa churin Saulta nirqan: “Wawáy, phaway jujnin kamachinchista pusarikuspa asnonchiskunata* maskharamuy”, nispa.
4 Paykunaqa lliu Efraín orqo-orqota Salisá ladokunata iman maskhaq rirqanku ichaqa manan tarirqankuchu. Jinan Salin ladoman rirqanku chaypipas manan tarirqankuchu. Lliu Benjamín ayllupin maskharqanku ichaqa manapunin tarirqankuchu.
5 Zuf jallp’aman chayaspankun Saulqa kamachinta nirqan: “Jaku kutipullasunña, mana chayqa papaymi noqanchismantañataq llakikuyta qallarinman”,+ nispa.
6 Kamachinmi ichaqa nirqan: “Jaqay llaqtapin kan allin respetasqa runa, payqa Diospa profetanmi. Llapa imapas rimasqanqa junt’akunpunin,+ jaku payman rirusun, yaqapaschá payqa niwasunman maypichus asnokunata tarimusunman chayta”, nispa.
7 Saultaq nirqan: “Rispari, ¿imatataq apasun Diospa profetanmanri? Manan juj t’antallanchispas kanñachu bolsonninchispiqa, manan imapas kanñachu apananchispaq”, nispa.
8 Kamachintaq Saulta nirqan: “Jaku rillasun, kashanmi noqaq qolqey.* Chayta qosaq Diospa profetanman, payqa willawasunpunin maypichus asnokunata tarimusunman chayta”, nispa.
9 (Ñaupa tiempopi Israel runakuna Diosta tapuq rispaqa: “Jaku rijuriykunata rikuq runaman risun”,+ nispan niqku. Chay tiempopiqa Diospa profetankunatan “rijuriykunata rikuq runa” nispa niqku).
10 Jinan Saulqa kamachinta nirqan: “Nisqaykiqa allinmi, chhaynaqa jakuyá risun”, nispa. Jinan llaqtata rirqanku Diospa profetanta maskhaq.
11 Chay llaqtaman rishaqtinkun sipaskuna unuta aysaq uraykamushasqaku, paykunatan tapukurqanku: “¿Chaypichu kashanman rijuriykunata rikuq runa?”,+ nispa.
12 Jinan paykunaqa nirqanku: “Arí, chaypin kashan, chayllaraqmi chayaramun. Apurakuychis, sacrificiota jaywaqmi+ llaqta runakunawan yupaychana patata*+ rinqa.
13 Llaqtaman chayaruspaqa tupankichisraqmi, apuray riychis manaraq yupaychana patata mijuq rishaqtin. Runakunaqa manan imatapas mijunqakuchu manachus pay sacrificiota bendecinqa chayqa. Pay bendeciqtinñan llapa invitasqa runakunapas mijunqaku, apuray riychis, aypankichisraqmi”, nispa.
14 Jinan paykunaqa llaqtaman wicharqanku. Llaqta chaupiman jaykuspankutaq Samuelta rikurqanku. Samuelqa yupaychana pataman rinankupaqmi paykunawan tupaq jamusharqan.
15 Juj p’unchay ñaupaqtan, Saúl manaraq chayamushaqtin, Jehová Diosqa Samuelta nisqaña:
16 “Paqarinmi kay horasta jina Benjamín ayllumanta+ juj runata kachamusayki, paytan ajllanki Israel llaqtayta umallinanpaq.+ Paymi llaqtayta Filistea runakunamanta libranqa. Noqaqa rikushanin llaqtaypa may sufrisqanta, waqasqanpas kaykamaraqmi chayamuwan”,+ nispa.
17 Saulta Samuel rikuruqtintaq Jehová Diosqa Samuelta nirqan: “Kay runan llaqtaytaqa kamachinqa, paymantan noqaqa rimapayarqayki”,+ nispa.
18 Saultaq llaqta punkupi Samuelman qayllaykurqan, jinaspa tapurqan: “¿Maypin rijuriykunata rikuq runa tiyan?”, nispa.
19 Jinan Samuelqa Saulta nirqan: “Noqan kani chay runaqa. Jaku, ñaupayta riy yupaychana pataman. Kunan p’unchayqa noqawan kuskan mijunkichis,+ paqarintaq ripunkichis. Tukuy imachus yachay munasqaykitapas willasaykin.
20 Kinsa p’unchayñan asnokunataqa maskhashanki,+ amaña chay asnokunamanta llakikuyñachu ñan tarirunkuña. Chaymantapas, ¿piqpataq Israel llaqtapi llapa qhapaq kaqkunari? ¿Manachu chaykunaqa qanpa, taytaykiq familiankunaq ima?”,+ nispa.
21 Chayta uyarispan Saulqa nirqan: “¿Imaraykutaq chhaynatari niwanki? Noqaqa Benjamín ayllullamantan kani, chay aylluqa Israelpi llapa ayllukunamantapas aswan juch’uyllan.+ Familiaypas Benjamín ayllupi llapa familiakunamanta aswan juch’uyllan”, nispa.
22 Samueltaq Saultawan kamachintawan mijunanku wasiman pusaspa llapa invitasqa runakunamanta aswan allin tiyanapi tiyaykachirqan. Chaypiqa yaqa kinsa chunka runakunan kasharqanku.
23 Chaymantataq Samuelqa wayk’uqta nirqan: “Waqaychanaykipaq aycha qosqayta apamuy”, nispa.
24 Jinan chay wayk’uqqa chakanninta enterollanta Saulman servimurqan. Samueltaq Saulta nirqan: “Mijuykuy, kayqa qanpaqmi waqaychasqa karqan. Kunan p’unchay mijunaykipaqmi waqaychachipurqayki: Invitasqaykunan kanqa, nispa”. Jinan Saulqa Samuelwan kuska chay p’unchay mijurqan.
25 Chaymantataq paykunaqa yupaychana patamanta+ llaqtaman uraykamurqanku, jinaspa Samuelpa wasin pataman seqaspa chaypi astawan rimarqanku.
26 Qhepantin p’unchaytaq tutallamanta jatarirqanku. P’unchayamushaqtinmi Samuelqa Saulta wajarqan: “Alistakullayña ripunaykipaq”, nispa; Saulqa wasi patapin kasharqan. Jinan Saulqa alistakurqan, jinaspa iskayninku jawaman lloqsimurqanku.
27 Llaqtamanta lloqsispa urayman jaykushaqtinkun Samuelqa Saulta nirqan: “Kamachiykita+ ñauparichiy, qantaq ichaqa qhepakullay, Diospa niwasqantan willayta munashayki”, nispa. Jinan Saulqa kamachinta ñauparichirqan.
Uraypi willakuykuna
^ Hebreo rimaypiqa “china asnonchiskunata” ninmi.
^ Hebreo rimaypiqa “cuarto siclo pesaq qolqey” ninmi. Juj sicloqa 11,4 gramostan pesaq. Qhaway “Astawan yachanapaq B14” nisqata.
^ Hebreo rimaypiqa “alto patata” ninmi. Qhaway Explicasqa simikuna nisqapi “Yupaychana patakuna” nisqata.
