Éxodo 36:1-38
36 Moisesqa nillarqantaqmi: “Bezalelqa Oholiabwan llapa allin yachaq* runakunawan kuskan llank’anqa. Paykunamanmi Jehová Diosqa allin yachayta allin yuyayta qon Jehová Diospa kamachikusqanman jina yupaychana karpata ruwanankupaq”,+ nispa.
2 Chaymantataq Moisesqa Bezalelta Oholiabtawan wajarqan. Wajallarqantaqmi Jehová Diospa yachaywan junt’aykusqan allin yachaq runakunatapas;+ paykunan sonqonkuq kallpachasqan kaspa llank’aq jamurqanku.+
3 Paykunamanmi Moisesqa qorqan yupaychana karpata ruwakunanpaq Israel runakunaq apamusqan llapa ofrendakunata.+ Israel runakunaqa sapa tutamantanmi apamushallarqanku ofrendankuta.
4 Yupaychana karpa ruwayta qallarisqanku qhepallamanmi chay allin yachaq artesanokunaqa qati-qati Moisesman jamuyta qallarirqanku,
5 jinaspa nirqanku: “Israel runakunaqa nishu askhatañan apamushanku Jehová Diospa kamachisqanta ruwanapaqqa”, nispa.
6 Jinan Moisesqa karpa-karpapi llapa runakunaman willachimurqan: “Amaña pi qharipas ni warmipas apamuychisñachu yupaychana karpa ruwakunanpaq ofrendaykichistaqa”, nispa. Chhaynatan jark’arqanku runakuna ofrenda apamunankuta.
7 Diospa kamachisqanta ruwakunanpaqqa askhapunin tukuy imapas kasharqan, puchusharqanraqmi kanpas.
8 Allin yachaq artesanokunan+ chunka telakunawan yupaychana karpata ruwarqanku,+ chay telakunan awasqa karqan ñañuy-ñañu k’antisqa lino q’aytumanta, azul q’aytumanta, azulniraq puka q’aytumanta, k’anchaq puka q’aytumantawan. Chay telakunapin querubín angelkuna bordasqa karqan.+
9 Sapanka telaq largonmi karqan iskay chunka pusaqniyoq codo,* anchontaq karqan tawa codo. Llapan telakunan chay sayaykama karqan.
10 Pisqa telakunatan Bezalelqa jujllaman sirarqan, wakin pisqa telakunatapas jujllamanmi sirarqan.
11 Chay sirasqan pisqa telakunaq jujnin cantonmanmi azul q’aytumanta ninrichasqakunata churarqan, kaqtan ruwallarqantaq juj kaq sirasqan pisqa telakunaq jujnin cantonpipas, chhaynapi iskaynin t’aqa telakuna jap’inachisqa kananpaq.
12 Pisqa chunka ninrichasqakunatan ñaupaq kaq t’aqa telakunaq cantonpi churarqan, pisqa chunka ninrichasqakunatan juj kaq t’aqa telakunaq cantonpipas churarqan, chhaynapi iskaynin t’aqa telakunapi ninrichasqakuna tupanachisqa kananpaq.
13 Ruwallarqantaqmi pisqa chunka qori ganchokunatapas, chaywanmi iskaynin t’aqa telakunata jujllaman tukuchirqan, chhaynapin karpaqa ch’ulla telallayoq karqan.
14 Bezalelqa awallarqantaqmi cabra pelomanta telakunatapas chaywan karpata qatananpaq. Llapanpiqa chunka jujniyoq telakunan karqan.+
15 Sapanka telaq largonmi karqan kinsa chunka codo, anchontaq karqan tawa codo. Llapan chunka jujniyoq telakunan chay sayaykama karqan.
16 Pisqa telakunatan jujllaman sirarqan, wakin soqta telakunatapas jujllamanmi sirarqan.
17 Chaymantataq pisqa chunka ninrichasqakunata churarqan juj t’aqa telakunaq jujnin cantonman, juj kaq t’aqa telakunaq jujnin cantonmanpas pisqa chunka ninrichasqakunatan churallarqantaq, chhaynapi iskaynin t’aqa telakunata jap’inachinanpaq.
18 Ruwallarqantaqmi pisqa chunka cobre ganchokunatapas, chaywan iskaynin t’aqa telakunata jujllaman tukuchinanpaq.
19 Chay karpapaqmi ruwallarqantaq puka teñisqa oveja qaramanta juj qatanata, ruwallarqantaqmi foca qaramanta juj qatanatapas, chaywan oveja qara pataman qatananpaq.+
20 Chaymantataq Bezalelqa marcokunata ruwarqan, jinaspa sayachirqan.+ Chay marcokunaqa acacia sach’a tablakunamantan+ ruwasqa karqan.
21 Sapanka marcoq sayayninmi karqan chunka codo, anchontaq karqan juj codo kuskan.
22 Chaymantapas sapanka marcon karqan iskay juch’uy chakikunayoq, iskayninmi karqan chimpa-chimpapura. Llapan marcokunatan chhaynatakama ruwarqan.
23 Yupaychana karpaq lloq’e ladonpaqmi* ruwarqan iskay chunka marcokunata.
24 Chay marcokunapaqtaq tawa chunka sayanakunata ruwarqan, chaykunaqa qolqemanta ruwasqan karqan. Sapanka marcopaqmi iskay sayanakunata ruwarqan t’oqoyoqtakama chayman marcokunaq chakinta kabichinanpaq.+
25 Chay karpaq paña ladonpaqpas* iskay chunka marcokunatan ruwallarqantaq.
26 Ruwallarqantaqmi chay marcokunapaq qolqemanta tawa chunka sayanakunatapas. Sapanka marcopaqmi iskay sayanakunata ruwarqan.
27 Karpaq qhepanpaqtaq inti jaykuy ladopaq soqta marcokunata ruwarqan.+
28 Ruwallarqantaqmi karpaq qhepa esquinankunapaq iskay marcokunatapas.
29 Chay iskaynin marcokunaq uranmi anchorisqa karqan, jawantaq ñaupaq ninriq kasqanpi jujllaman juñusqa karqan. Chhaynan iskaynin esquinakunapas karqan.
30 Llapanpiqa pusaq marcokunan karqan, qolqemanta chunka soqtayoq sayanakunantin. Sapanka marcopaqmi karqan iskay sayanakuna.
31 Ruwallarqantaqmi acacia sach’amanta k’aspikunatapas. Pisqan karqan karpaq jujnin ladonpi marcokunapaq.+
32 Pisqataq karqan karpaq juj kaq ladonpi marcokunapaq. Karpaq qhepanpi inti jaykuy ladopi marcokunapaqpas pisqan kallarqantaq.
33 Marcokunaq kuskan qhatantan pasachirqan juj k’aspita, chay k’aspiqa juj cantomanta juj kaq cantokaman pasarqan.
34 Ruwallarqantaqmi qori ninrikunatapas, chaynintan pasachirqan ruwasqan k’aspikunata. Chaymantapas llapa marcokunatan qoriwan forrarqan, k’aspikunatapas qoriwanmi forrarqan.+
35 Bezalelqa ruwallarqantaqmi cortinatapas.+ Chaytan ruwarqan azul q’aytumanta, azulniraq puka q’aytumanta, k’anchaq puka q’aytumanta, ñañuy-ñañu k’antisqa lino q’aytumantawan. Chay cortinapin bordarqan querubín angelkunata.+
36 Chay cortinata warkunanpaqmi ruwarqan acacia sach’amanta qoriwan forrasqa tawa columnakunata. Ruwallarqantaqmi qori ganchokunatapas, columnakuna sayananpaq qolqe sayanakunatapas.
37 Karpa jaykunapaqmi ruwallarqantaq juj cortinata, chay cortinaqa azul q’aytumanta, azulniraq puka q’aytumanta, k’anchaq puka q’aytumanta, ñañuy-ñañu k’antisqa lino q’aytumantawan awasqan karqan.+
38 Ruwallarqantaqmi pisqa columnakunatapas ganchokunantinta. Chay columnakunaq umantan jap’inakunantinta qoriwan forrarqan. Sayanankunaqa pisqantinmi cobremanta ruwasqa karqan.
Uraypi willakuykuna
^ Hebreo rimaypiqa “yachay sonqoyoq” ninmi.
^ Juj codoqa yaqa kuskan metro jinan karqan (44,5 cm). Qhaway “Astawan yachanapaq B14” nisqata.
^ Hebreo rimaypiqa “uray ladonpaqmi” ninmi.
^ Hebreo rimaypiqa “wichay ladonpaqpas” ninmi.
