Éxodo 24:1-18
24 Chaymantataq Jehová Diosqa Moisesta nirqan: “Aaronta, Nadabta, Abiuta,+ Israelpi qanchis chunka umalliqkunatawan* pusarikuspa kayman seqamuy. Karullamantaraqmi k’umuykamuwankichis.
2 Qanllan noqa Jehová Diosniykimanqa qayllaykamuwanki. Wakinqa amapunin qayllaykamuwanqakuchu, llaqta runakunapas aman seqamunqakuchu”,+ nispa.
3 Chaymantataq Moisesqa runakunaq kasqanman rispa Jehová Diospa llapa imachus nisqanta paykunaman willarqan, willarqanmi llapa kamachikuykuna qosqantapas.+ Chayta uyarispan llaqtantin runakuna juj nisqalla nirqanku: “Kasukusaqkun Jehová Diospa llapa imachus kamachikusqanta”,+ nispa.
4 Jinan Moisesqa qelqarqan Jehová Diospa llapa imachus nisqanta.+ Tutallamanta sayarispataq Moisesqa orqo k’uchupi juj altarta perqarqan, sayachirqanmi chunka iskayniyoq rumikunatapas Israelpi chunka iskayniyoq aylluman jina.
5 Chaykuna qhepamantaq Moisesqa Israelpi wayna runakunata ajllarqan. Paykunan Jehová Diosman jaywarqanku ruphachina ofrendakunata, sumaq kausay sacrificiokunata ima, chaypaqtaq torokunata ñak’arqanku.+
6 Kuskan yawartan Moisesqa p’ukukunapi jap’irqan, kuskanwantaq altarta ch’aqchurqan.
7 Chaymantataq Moisesqa rimanakuy qelqata* jap’ispa llaqta runakunaman leerqan.+ Chayta uyarispan paykunaqa nirqanku: “Jehová Diospa tukuy ima rimasqantan junt’asaqku, kasukusaqkun paytaqa”,+ nispa.
8 Jinan Moisesqa llaqtantin runakunata yawarwan ch’aqchurqan,+ nirqantaq: “Chay uyarisqaykichis kamachikuykunaman jinan Jehová Diosqa qankunawan rimanakun, kay yawarmi chay rimanakuyta valechin”,+ nispa.
9 Chaymantataq Moisesqa Aaronwan, Nadabwan, Abiuwan, Israelpi qanchis chunka umalliqkunawan kuska orqoman wicharqan.
10 Chaypin Israelpa Diosninta rikurqanku.+ Chaki sarunanmi kashasqa munay zafiro rumi mast’asqa jina, pichasqa cielo jinaraqmi limpio kashasqa.+
11 Payqa manan imanarqanpaschu chay Israel runakunataqa.+ Chay runakunan mosqoypi jina Diosta rikurqanku, chaymantataq mijurqanku ujarqanku ima.
12 Jehová Diosmi Moisesta nirqan: “Kay orqo pataman seqamuy, jinaspa kayllapi qhepakunki. Kaypin qosayki p’alta rumikunata, chaypin qelqasaq kamachikuykunata leykunatawan llaqta runakuna yachachisqa kananpaq”,+ nispa.
13 Jinan Moisesqa yanapaqnin Josuepiwan+ puririrqanku, chaymantaqa Moisesllañan Diospa orqonman wicharqan.+
14 Manaraq wichashaspan Moisesqa umalliqkunata nisqa: “Kutiykamunaykukama kayllapi suyashawankichis,+ kaypin kashanqaku Aaronwan Hurwan.+ Ima quejaykichispas kaqtinqa paykunaman willankichis”,+ nispa.
15 Moisesqa seqashallarqanmi orqo pataman, chay orqotan phuyu pakasharqan.+
16 Jehová Diospa k’anchaynintaq+ kaqlla kasharqan Sinaí orqopi.+ Soqta p’unchaymi phuyuqa orqota pakarqan. Qanchis kaq p’unchaypitaq Diosqa phuyu ukhumanta Moisesta wajamurqan.
17 Orqo patapi Jehová Diospa k’anchayninqa sinchi raurashaq nina jinan karqan Israel runakunapaqqa.
18 Moisestaq chay phuyu ukhuman jaykuspa orqo pataman seqarqan,+ chaypin payqa tawa chunka p’unchayta tawa chunka tutatawan qhepakurqan.+
Uraypi willakuykuna
^ Chaypiqa “kuraq runakunatawan” nillanmantaqmi.
^ Chay qelqapin kashanman karqan Éx 20:22-23:33 textopi kaq kamachikuykuna.
