Diosqa respetanmi warmikunata

JESUSQA Taytanpa imayna kasqantam allintapuni qawachirqa. Chaymi nirqa: “Tukuy imatapas manam kikillaymantachu rurani, Taytaypa yachachiwasqallantam ñoqaqa willaykichik”, nispa. Nirqataqmi: ‘Ñoqaqa paypa agradonpaqmi tukuy tiempo rurani’, nispa (Juan 8:28, 29; Colosenses 1:15). Warmikunata Diospa imayna qawasqanta yachayta munaspaqa Jesuspa imayna kasqanmantam yachananchik.

Jesuspa vidanmanta estudiaq achka runakunam ninku warmikunata Jesuspa respetasqanqa kay tiempopaqpas allin kasqanta. ¿Imaynanpi? ¿Yanapanmanchu warmikunata Jesuspa yachachisqan?

Warmikunata Jesuspa imayna qawasqanmanta

▪ Manam qariwan puñunallankupaqchu qawarqa. Religionpi umalliq judiokunapa piensayninpiqa warmikunam qarikunata huchapakuyman aysaq. Chaymi kamachiqku hukkunapa qayllanpi qarikuna warmikunawan  mana parlanankupaq chaynataq warmikuna umankuman sukupawan churakuspa hawaman lloqsinankupaqpas. Jesusqa manam haykapipas nirqachu warmikunaqa runakunapa qayllanpi mana rimanankutaqa nitaq mana imapas ruranankutaqa. Aswanmi controlakuyta yachachirqa mana munapayaspa warmikunata qawanankupaq (Mateo 5:28).

Chaymi nirqa: “Warminmanta rakikuruspan huk warmiwan casarakuq runaqa huchallikunmi punta kaq warminpa contranpi”, nispa (Marcos 10:11, 12). Jesusqa manam yachachiqkunapa piensasqankuman hinachu piensarqa, paykunaqa yachachiqkum warminkumanta imallamantapas divorciakuyqa allin kasqanta (Mateo 19:3, 9). Yaqa lliw judiokunapaqmi hukwan pierdekuyqa mana huchachu karqa. Warmikuna hukwan pierdekuptinmi ichaqa hatun hucha karqa. Jesusmi ichaqa qawachirqa hukwan pierdekuyqa warmipaqpas qaripaqpas hatun hucha kasqanta.

Kunan tiempopas warmikunata respetanapaq: Jehová Diospa testigonkunapa huñunakusqankupiqa respetowanmi qarikunaqa warmikunawan rimanku. Chaymi Diosta serviq qarikunaqa kallpanchakunku yuyayniyoq warmikunawan mamankuwan hina rimanankupaq, sipaskunawanñataq paninkuwan hina (1 Timoteo 5:2).

▪ Yachachinanpaqmi Jesusqa tiempochakurqa. Jesuspa tiemponpi yachachiqkunaqa manam munarqakuchu warmikunaman yachachinankutaqa. Jesusmi ichaqa paykunaman Diosmanta yachachirqa hinaspam ima piensasqankumantapas willakunankupaq kallpancharqa. Payqa manam piensarqachu yanukunallankupaq kasqankutaqa. Mana chayna kasqantam payqa qawachirqa Lazaropa panin Mariaman yachachispan (Lucas 10:38-42). Turin Lazaro wañukuptin Jesuspa tapusqanta allinta contestasqanwanmi Martapas qawachirqa Diosmanta yachachikuykuna entiendesqanta (Juan 11:21-27).

Chay tiempopi warmikunaqa yaqa llapankum qari wawayoq kayta munaqku chaynataq wawanku ancha reqsisqa kanankuta otaq Diosmanta willakuq kanankutapas. Chaymi Jesusta huk warmi nirqa: “¡Mayna kusisqaraq wachakusuqniki hinaspa ñuñusuqniki warmiqa!”, nispa. Jesusñataqmi qawachirqa Diosta kasukuyqa aswan allin kasqanta (Lucas 11:27, 28). Chaynapim yachanchik judiokunapa nisqankumantapas Diospa nisqanman hina warmikunapa kawsasqankuqa allinpuni kasqanta (Juan 8:32).

Kunan tiempopas warmikunata respetanapaq: Warmikunapa huñunakuypi rimarisqankuqa hukkunatapas kallpanchanmi. Diosmanta yachachiq qarikunaqa respetankum  Diospa agradonpaq hina allin ruraq warmikunatapas, hukkunapa qayllanpi parlaspa otaq sapallankupi parlaspapas (Tito 2:3). Diosta serviq warmikunaqa yanapakunkum Jehová Diospa Gobiernonmanta allin noticiakuna willakuypi (Salmo 68:11; qawariy 9 kaq paginapi  “¿Warmikuna rimanankutachu apostol Pabloqa harkakurqa?” niq yachachikuyta).

▪ Jesusqa valorarqam warmikunata. Jesuspa tiemponpiqa qari wawakunatam astawan kuyaqku. Talmud qellqapim nin: ‘Mayna kusisqam qari wawayoqkunaqa, mayna llakisqam warmi wawayoqkunaqa’, nispa. Wakin tayta-mamakunapaqmi warmi warmankuqa llumpay sasachaqnin karqa, casarakunankupaqpas achkatam pagaqku, manataqmi yuyaqyaptinku cuidaqninkuta hinachu qawaqku.

Jesusmi ichaqa wawakunata kuyaq, warmitapas qaritapas. Nain llaqtayoq viudapa qari wawantam kawsarirachirqa chaynallataq Jairo sutiyoq runapa warmi churintapas (Marcos 5:35, 41, 42; Lucas 7:11-15). Sanoyachirqataqmi demoniopa unayña ñakarichisqan warmitapas hinaspapas nirqam “Abrahampa mirayninmanta” kasqanta. (Lucas 13:10-16). Chayna nisqanwanmi qawachirqa iñiyninpi suni takyasqanta chaynataq wakin warmikunapas ancha valorasqa kasqanta (Lucas 19:9; Galatas 3:7).

Kunan tiempopas warmikunata respetanapaq: Asia lawpim ninku warmi wawa uywayqa hukpa chakranta parqoy otaq harpay hina kasqanta. Diosta serviq tayta-mamaqa manam chaynatachu piensan. Warmankutaqa educaspam allinta uywanku, warmitapas qaritapas.

▪ Jesusqa confiarqam warmikunapi. Juiciopipas judiokunaqa sirvientekunapa rimasqanta hinam mana valeqpaq hapiqku warmikunapa testigakusqankutaqa. Chaymi Josefo sutiyoq runapas nirqa: ‘Warmikunapa testigakusqanqa mana valeqpaqmi karqa’, nispa.

Jesusmi ichaqa mana chaynatachu piensarqa. Payqa warmikunatam akllarqa kawsarisqanmanta willakunankupaq (Mateo 28:1, 8-10). Chay warmikunaqa rikurqakum Jesusta imayna ñakarichisqankuta chaynataq pampasqankutapas, apostolkunapas iskayrayarqakum warmikunapa willakusqankuwanqa (Mateo 27:55, 56, 61; Lucas 24:10, 11). Kawsarisqanmanta willakunankupaq warmikunata akllasqanwanmi Jesusqa qawachirqa qarikuna hina warmikunapas valorasqanta kasqankuta (Hechos 1:8, 14).

 Kunan tiempopas warmikunata respetanapaq: Huñunakuykunapi yachachiq qarikunaqa iñiqmasin warmikunapa nisqankuta uyarisqankuwanmi respetasqankuta qawachinku. Casarasqakunapas señorankupa nisqanta atencionwan uyarispankum respetasqankuta qawachinku (1 Pedro 3:7; Genesis 21:12).

Warmikuna kusisqa kawsanankupaq

Jesusta qatipakuqkunaqa warmikunatam respetanku Diospa kamachisqanman hina (Genesis 1:27, 28). Diosta serviq qosakunaqa manam intuchikunkuchu warmikunata mana respetaq runakunapa piensayninkuwanqa. Aswanmi kallpanchakunku Diospa nisqanman hina señorankuwan kusisqa kawsakunankupaq (Efesios 5:28, 29).

Chaynam pasarqa Yelena sutiyoq iñiqmasinchikwanpas, Bibliata manaraq estudiaspanqa hukmanyasqam tarikurqa mana llakipayakuq qosanpa ñakarichisqanwan. Qosanmi wiñarqa warmikunata mana llakipayaq familia ukupi chaynataq warmikunata mana respetaq runakunapa kasqanpi. Yelenam nin: “Biblia estudiasqaywanmi yacharurqani Diosqa kuyawaqniy, valorawaqniy chaynataq llakipayawaqniy kasqanta, chaynapim kallpanchasqa tarikurqani. Qosaypas Bibliata estudiaspan imayna kayninpi cambianantam yacharqani”, nispa. Tiempopa risqanman hinam qosanqa Biblia estudiayta qallaykurqa hinaspam bautizakurqa Jehová Diospa testigon kananpaq. Yelenam nin: “Controlakuytañam yacharun, yacharunikutaqmi pampachanakuytapas”, nispa. Nintaqmi: “Bibliapa yachachikuyninkunaqa yanaparuwanmi casado vidaypi kuyasqa hinaspa amparasqa sientekunaypaqpas”, nispa (Colosenses 3:13, 18, 19).

Yelena hinam Jehová Diosta serviq wara-waranqantin runakuna kallpanchakunku Bibliapa yachachisqanman hina casado vidankupi kusisqa kawsakunankupaq. Iñiqmasinkupa respetasqan hinaspa consuelasqanmi tarikunku (Juan 13:34, 35).

Diosta serviqkunaqa pantaq kasqankutam reqsikunku. Ichaqa yachankum Jehová Diosta kasukuptinkuqa tukuy mana allinmanta librasqa kanankuta. ¡Mayna kusikuypaqmi chayqa! (Romanos 8:20, 21.)

[9 kaq paginapi recuadro]

 ¿Warmikuna rimanankutachu apostol Pabloqa harkakurqa?

Apostol Pablom nirqa: ‘Warmikunaqa upallallam kananku huñunakuypiqa’, nispa (1 Corintios 14:34). ¿Ima niytataq chaywanqa munarqa? ¿Mana allin yachachiqchu karqaku? Manam, warmikunapa Diosmanta willakusqankutaqa allinpaqmi qawarqa (2 Timoteo 1:5; Tito 2:3-5). Corinto llaqtapi cristianomasinkunaman cartaspanmi apostol Pablo consejarqa huñunakuypi yachachiqtaqa upallalla llapallanku uyarinankupaq (1 Corintios 14:26-30, 33). Yaqapaschá wakin cristianakunaqa Diosmanta astawan yachay munasqankurayku yachachiq rimachkaptin tapukuqku, chay tiempopiqa chayna ruraytam yachaqku. Chaqwata mana ruranankuraykum Pabloqa warmikunata kallpancharqa imamantapas astawan yachay munasqankuta wasinkupiña qosankuta ‘tapukunankupaq’ (1 Corintios 14:35).

[8 kaq paginapi dibujo]

[10 kaq paginapi dibujo]

Jesusmi kawsarisqanmanta apostolninkunaman willakunanpaq Magdala llaqtayoq Mariata kamachirqa

[11 kaq paginapi dibujo]

Diospa kamachisqanta kasukuqkunaqa warmikunatam respetanku