Diospa Palabranmanta yachay

¿Imanasqataq cristianokunaqa bautizakunku?

Kay yachachikuymi kikikipa Bibliaykiwan wakin tapukuynikita contestasunki. Munaptikiqa Jehová Diospa testigonkunam kay tapukuykunamanta yachanaykipaq yanapasunkiman.

1. ¿Ima ninantaq bautizakuyqa?

Dioswan allin amistad kanapaqmi bautizakuna. Chaypaqqa manam wawachallaraq kachkaspanchu pipas bautizakunan Jesuspa qatiqnin kananpaqqa, aswanqa cuenta qokuqmi kanan Diosmanta yachananpaq hinaspa Jesuspa qatiqnin kananpaqpas (Hechos 8:12; 1 Pedro 3:21). Paypa qatiqnin kanapaqqa Bibliatam estudiana hinaspapas paypa kamachisqankunatam kasukuna. (Leey Mateo 28:19, 20.)

Apostolkunapa tiemponpim achka runakuna chaylla yachayta qallaykurqaku Diosmantawan Jesusmanta. Chaytam huk runapas rurarqa, Jesuspa wañukusqanwan salvasqa kananta yacharuspanmi chayman hina rurayta qallaykurqa hinaspam Jesuspa qatiqninña kananpaq bautizakururqa. Kunan tiempopipas allin sonqoyoq runakunaqa chaytam rurachkanku. (Leey Hechos 8:26-31, 35, 36, 38.)

2. ¿Imanasqataq Jesus bautizakurqa?

Jesusqa 30 watayoqmi karqa Bautizaq Juan payta Jordan mayupi bautizaptinqa. Payqa bautizakurqa Taytanpa munayninta rurananpaq tanteasqanta qawachinanpaqmi (Hebreos 10:7). Bautizakusqanwanmi qawachirqa llapa runakunapa huchanrayku vidan qoy munasqanta. Arí, Jesusqa hanaq pachamanta kay pachaman manaraq hamuchkaspanpas qawachirqañam Taytanta kuyasqantawan kasukusqantaqa. (Leey Marcos 1:9-11; Juan 8:29; 17:5.)

  3. ¿Imanasqataq cristianokunaqa bautizakunku?

Jesusqa mana huchayoqmi karqa, ñoqanchikmi ichaqa huchayoqña nacenchik. Chayna kaptinpas, Jesuspa wañusqanwanmi Dioswan allin amistad kayta atichwan (Romanos 5:10, 12; 12:1, 2). Familianpa parten kaytapas atichwanmi (2 Corintios 6:18). ¿Imatam chaypaq rurananchik? Sapallanchikpim Diosman orakunanchik payman qokunanchikpaq, chaypim prometekunchik wañunanchikkama paypa munayninta rurananchikpaq. Chay oracionta ruraspanchikñam qawachinchik Diosman qokusqanchikta lliwpa qayllanpi bautizakuspa. (Leey Mateo 16:24; 1 Pedro 4:2.)

4. ¿Imatam rurawaq bautizakunaykipaq?

Jehová Diospa testigonkunam Bibliamanta yachachinku pipas Diosman asuykuyta munaptinqa. Biblia estudiasqaykiwan huñunakuykunaman risqaykim yanapasunki Diosta kuyasqayki hinaspa iñiyniki aswan allin kananpaq. Chayqa yanapasunkitaqmi allin ruraq kanaykipaqwan allin comportamientoyoq kanaykipaqpas. Kuyakuyniyoq chaynataq iñiyniyoq kasqaykipas yanapasunkim wañunaykikama payman prometekusqaykita cumplinaykipaq. (Leey Juan 17:3; Hebreos 10:24, 25.)

Astawan yachayta munaspaqa qawariy ¿Imatapunim Bibliaqa yachachin? 18 kaq yachachikuyninta, kay libroqa Jehová Diospa testigonkunapa rurasqanmi.