Diospa Palabranmanta yachay

¿Imaynatam yuyarinanchik Jesuspa wañukusqanta?

Kay yachachikuymi kikikipa Bibliaykiwan wakin tapukuynikita contestasunki. Munaptikiqa Jehová Diospa testigonkunam kay tapukuykunamanta yachanaykipaq yanapasunkiman.

1. ¿Wañukusqanta imayna yuyarinanchikpaqmi Jesus nirqa?

Jesusmi qatiqninkunata kamachirqa tantawan hinaspa vinowan tupachisqa cenata ruraspanku wañukusqanta yuyarinankupaq. Tantaqa cuerpon ninanmi, vinoñataqmi yawarnin ninan. (Leey Lucas 22:19, 20.)

Jesuspa servichikusqan tantaqa mana qonchuyoqmi karqa. Chayna tantam allinta tupan Jesuspa mana huchayoq cuerponwan, yaqa llapanpim Bibliaqa huchata tupachin qonchuwan. Jesuspa cuerpon qosqanwanmi Moisespa chaskisqan Kamachikuyman hina animalkuna ofrecesqanku tukurqa (Hebreos 10:5, 9, 10). Vinoqa tupanmi Jesuspa ancha chaninniyoq yawarninwanqa, chay chaqchusqa yawarninwanmi huchanchikmanta pampachasqa kayta atinchik. (Leey 1 Pedro 1:19; 2:24; 3:18.)

2. ¿Haykapitaq Jesuspa wañukusqanta yuyarinanchik?

Jesusqa wañukurqa judiokunapa Pascua fiestan 14 Nisan punchawpim. Judiokunapa tiemponpiqa punchawqa qallariq inti seqaykuytam. 14 Nisan tutatam Jesusqa apostolninkunawan Pascua cenata mikurqaku. Chaymantam huk mosoq fiestata rurachirqa, hinaspam kamachirqa chaynata ruraspanku wañukusqanta yuyarinankupaq. (Leey Lucas 22:14, 15.)

Kunan tiempopi Diospa serviqninkunaqa yuyarinkum Jesuspa wañukusqantaqa, paypa wañukusqanwanmi Diosqa librawanchik huchamantawan wañuymanta (Exodo 12:5-7, 13, 17). Judiokunaqa Pascua fiestataqa ruraqku watapi hukllatam, chaynallataqmi Jesuspa wañukusqantapas yuyarinchik watapi hukllata inti seqaykuy qepata, chay 14 Nisan punchawqa ñawpaq tiempopi judiokunapa calendarionkuman hinam. (Leey Juan 1:29.)

  3. ¿Pikunataq tantata mikunku hinaspa vinotaqa tomanku?

Discipulonkunaman vinoyoq vasota haywarispanmi Jesus nirqa: “Kay vasoqa yawarniywan rurasqay mosoq contratom”, nispa (1 Corintios 11:25). Kay mosoq contratoqa Moisespa chaskisqan Leypi kaq contratopa rantinpim karqa, chay contratotaqa Diosmi israelitakunawan rurarqa. ¿Imaynataq karqa ñawpaq kaq contratoqa? Jehová Diosmi israelitakunata nirqaña kamachisqanta kasukuspankuqa paypa llaqtan kanankumanta (Exodo 19:5, 6). Ichaqa mana kasukusqankuraykum Diosqa huk mosoq contratotaña rurarqa. (Leey Jeremias 31:31.)

Chay contratotaqa Diosmi rurarqa 144.000 runakunawan. Chay aslla runakunawanmi Diosqa anchata bendecin lliw runakunata. Kay contratoraykum wara-waranqantin runakunaqa chaskinqaku wiñaypaq kawsakuyta kay Allpa pachapi. 144.000 runakunamanta wakinninkuqa kay pachapim Jehová Diosta hinallaraq servichkanku. Paykunawan Jehová Dios contratota rurasqanraykum, paykunalla tantata mikunku hinaspa vinota tomanku. Jesuspa yawarninwanmi chay contratotaqa ruranku. (Leey Lucas 12:32; Apocalipsis 14:1, 3.)

4. ¿Imapitaq yanapawanchik Jesuspa wañukusqanta yuyariyninchik?

Jesuspa wañukusqanta sapa wata yuyarisqanchikwanmi Jehová Diospa ancha kuyawasqanchikta chaninchanchik. Kuyawasqanchikraykum Churinta kachamurqa kay Allpaman, chaynapi huchanchikrayku wañunanpaq. Chaynata yuyarispanchikmi yuyaymanananchik wañukusqan imapi yanapawasqanchikmanta, chaynataq Jehová Diosman hinaspa Jesusman agradecekusqanchikta imayna qawachinanchikmantapas. (Leey Juan 3:16; 2 Corintios 5:14, 15.)

Astawan yachayta munaspaqa qawariy ¿Imatapunim Bibliaqa yachachin? libropa 206-208 paginankunata, kay libroqa Jehová Diospa testigonkunapa rurasqanmi.