¿Yanapawanchikmanchu wañuqkuna?

ÁFRICA lawmanta huk warmim Tamba sutiyoq qari wawanta hikutan, wañukuq ayllunkunata mañakunanpaq chaynapi allin notata horqonanpaq. * Sicilia (Italia) lawpiñataq, huk nacionkunamanta watukuq runakuna, machaykunapi allin waqaychasqa wañukuq runakunata watukunku. Wakinqa piensankum kaykuna yanapakusqankuta. Nueva York lawpipas kanmi achkallaña layqa ruraqkuna, chaymanmi sapa wata achkallaña runakuna rinku wañukuq amistadninkuwan otaq ayllunkunawanpas rimanankupaq.

Qawasqanchikman hinaqa, tukuy hinastinpim runakunaqa piensanku wañuqkuna yanapakusqanta. Yaqapaschá qampas reqsinki chaykunapi creeq runata otaq kikikipas creenki. Arí llapallanchikmá munanchik kuyasqanchik wañukuqkunawan tupaykuytaqa. Chaymi wakin layqa ruraqkunaqa munachiwanchik wañukuqkunawan rimananchikpaq. Huk revistapim, layqa ruraq warmi nirqa: “Paykunaqa yanapawasunmi qayaptinchikqa”, nispa. ¿Cheqapchu chay kanman? Diospa Palabranmi chaykunamanta sutillata yachachin.

¿Wañukuqkuna musyakunkuchu?

Bibliaqa sutillatam yachachin wañuqkuna imayna tarikusqankumanta. Qaway Eclesiastes 9:5 nisqanta, ninmi: “Wañunanmantam yachanku kawsaqkunaqa. Manam imatapas yachanchu wañuqkunaqa”, nispa. Sientekuyninpas manam kanchu, qatiqnin versiculom nin: “Tukurunñam kuyakuyninqa. Tukurunñam cheqnikuyninqa. Tukurunñam sientekuyninpas. Kay pachapi tukuy ruraykunapiqa manañam kanqachu ima rurananpas”, nispa. Qaway 10 versiculopa nisqantapas, ninmi: “Wañuruspaqa [“Seolman rispaqa”, NM] manañam rurankichu imatapas. Manañam piensankichu imatapas. Manañam yachankichu imatapas. Manañam yuyankichu imatapas”, nispa. Seol palabraqa hebreo rimaymi, chayqa llapallan wañuqkunapa kasqanku sepultura hinam, chaymanmi llapallan wañuqkuna rinku. Bibliaqa rimantaqmi griego rimaypi Hades palabramantapas (kayqa Seol rimaywanqa chaynallam), chaymanmi Jesucristopas wañukuspan pisi tiempolla rirqa (Hechos 2:31).

Jesus kawsaspanqa achka runakunatam yanaparqa, ichaqa yacharqataqmi wañunanta. ¿Suyarqachu payqa wañusqaña kaspan runakunata hinalla yanapayta? Payqa kikinpa wañunantam tupachirqa tutawan, chayqa imatapas mana ruray atina tiempom (Juan 9:4). Jesusqa yacharqam runakuna wañukuspankuqa kawsaqkunata manaña yanapay atisqankuta.

Yaqa chaynallatam yachachirqa, amigon Lazaro wañukuptin puñusqanwan tupachispan (Juan 11:11-13). Pipas puñuspanqa manam hukkunapaqqa imatapas rurayta atinmanchu, manapuni musyakusqanrayku.

Runa wañukuptin, ¿hinallachu almanqa kawsachkan?

Adan huchallikuruptinmi Dios nirqa: “Allpaman kutiykunaykikamam sinchita llamkaspa mikunaykita tarinki. Allpamanta horqosqam kanki. Allpallam kanki, allpallamantaqmi tikrakunki”, nispa (Genesis 3:19). ¿Maypitaq Adanqa karqa manaraq allpamanta Jehová Dios unanchachkaptin? Manam maypipas karqachu. Chaymi “allpallamantaqmi tikrakunki” nispanqa, nichkarqam Adan wañuspan  kaqlla allpaman kutiykunanmanta, manam espiritukunapa kasqanman apasqa kananmantachu. Wañuruspanqa mana kasqanmanmi kutinan karqa. Castigonqa karqa manam huk lawpi kawsakunanpaqchu, aswanqa wañuymi (Romanos 6:23).

Ichaqa tapukunkipaschá: “¿Imanasqataq achka runakuna ninku wañuqkunawan parlasqankuta, uyarisqankuta chaynataq rikusqankutapas?” Enteron pachapi chayna willakusqankuta uyarisqankum, runakunaqa layqakunaman rinku wañukuq familiankuwan otaq amistadninkuwan rimayta munaspanku.

¿Cheqapchu kanman chay nisqankuna? Cheqap kaptinqa, Diospa Palabranpa contranpim rimachkanmanku, Jesusmi nirqa Diospa Palabranqa ‘cheqap’ kasqanta (Juan 17:17). Hinaptinqa manayá wañukuq runakunawanchu rimarqaku. Bibliapas sutillatam qawachiwanchik chayna willakuykunata imayna qawanapaq. Qawasunchik, huk kutipim wañukuq runawan huk runa rimayta munarqa.

Huk reymi wañukuqwan rimayta munarqa

Israelpim rey Saul tropankunapiwan Filistea runakunawan peleananku karqa. Filistea runakunapa campamentonta Saul qawaykuspanmi “mancharikuyllawanña hukmanyarurqa”. Chay tiempopaqqa manañam tukuy sonqonwanñachu Diosta yupaycharqa, chaymi mañakusqanta manaña uyarirqañachu. Manataqmi Diosmanta willakuq Samuelmanpas riyta atirqachu Samuel wañukusqanrayku. ¿Maymantaq rinman karqa? (1 Samuel 28:3, 5, 6.)

Endor sutiyoq llaqtamanmi rirqa, hinaspam wañuqpa espiritun qayaq warmita mañakurqa Samuelwan parlachinanpaq. Chay warmi qayakuptinmi, yaqapas “Samuel” hina rikuriramurqa. Hinaspam Saulta nirqa Filistea runakuna atipananmanta hinaspa churinkunawan paypas chaypi wañunankumanta (1 Samuel 28:7-19). ¿Cheqaptapunichu Saulqa Samuelpa almanwan otaq espiritunwan rimarqa?

Kaypi piensarisun, Bibliapa yachachisqanman hinaqa runa wañuruspanqa ‘allpamanmi’ kutin, ‘tanteasqanpas chinkarunmi’ (Salmo 146:4). Saulwan Samuelpas yacharqakum layqa rurayta Dios cheqnisqanta. Saulpunim Israelmanta lliw layqakunata chinkarachirqa (Levitico 19:31).

Chaymantapas, Samuelpa espiritun hinalla kawsaspanqa, manachá Diostaqa qepanchanmanchu karqa chay layqa warmita kasukuspan Saulwan rimananpaqqa. Diosqa manataqmi Saulpa mañakusqantaqa uyariyta munarqachu, ¿chaychu layqa warmiraq Diosta hikutanman karqa Samuelnintakama rey Saulwan rimananpaq? Manamá. Kay rikuriykusqan “Samuelqa” manam Diospa willakuqninchu karqa. Chayqa Samuelman tukuspan demoniom karqa.

Ichaqa ¿pikunataq kanku demoniokunaqa? Paykunaqa kanku qallariypi Diosta qepancharuq angelkunam (Genesis 6:1-4; Judas 6). Paykunaqa qawawachkanchikmi, yachankum imayna rikchayniyoq kasqanchikta, imayna rimasqanchikta, ima rurasqanchiktapas. Chaymantapas anchatam munanku Bibliapa yachachisqankunata yanqacharuyta. Chaymi Diospa Palabranqa niwanchik layqa ruraykunapi manapuni kananchikpaq, chaykunaqa ‘millakuypaqmi’ (Deuteronomio 18:10-12).  Chaymi rikchan-rikchanlla kananchik, demoniokunaqa pantarunanchiktam munachkan.

Kunanqa, ¿musyakunkichu imanasqam wakinpiqa qonqaymanta rimaykunata uyarinki hinaspa wañukuq aylluykita otaq amistadnikitapas rikurunki? Arí, chaykunaqa demoniokunam kanku. Rikurispanku wakinpi mana imanawaptinchikpas, demoniokunaqa pantachiytam munawanchik (Efesios 6:12). * Ichaqa yuyarisun, Jehová Diosqa kuyawanchikmi, munantaqmi allin kananchikta. Kuyasqanchik wañukuqkuna maypipas hinalla kawsaspanku yanapayta atiwaptinchikqa, ¿imanasqataq Diosqa mana munanmanchu paykunawan parlananchiktaqa? ¿Imanasqataq millakuypaqta qawanman layqa ruraytaqa? (1 Pedro 5:7.) Chaynaqa manam atichwanchu wañuqkunawan parlaytaqa, hinaptinqa ¿pitataq maskananchik yanapakuyta munaspaqa?

Llapanchikpaq cheqap yanapakuy

Yachamusqanchikman hinaqa, manam imapipas wañuqkunaqa yanapawanchikmanchu. Chaymantapas, paykunawan rimayta munaspaqa manam atisunchu, hinaspapas ancha sasachakuypim tarikusun. ¿Imanasqa? Jehová Diostam qepanchachkachwan hinaspapas demoniokunapa makinpim churakuchkachwan.

Bibliam ichaqa niwanchik Unanchawaqninchik Jehová Dios allin yanapakuq kasqanmanta. Payqa ancha atiyniyoqmi, wañuymantapas librawachwanmi (Salmo 33:19, 20). Payqa listom kachkan yanapawananchikpaq, qowanchiktaqmi cheqap suyakuytapas layqakunapa mana ruray atisqanta.

Rimamusqanchik Tambaqa yacharurqam layqa runakunapa llulla rimasqanku Diospa cheqap yachachisqanwan mana tupasqanta. Layqakunaqa nirqakum, examen qosqanpi allin kananpaqqa wañukuqkunaman ofrenda qonanta. Paymi ichaqa Jehová Diospa testigonkunawan Biblia estudiayta qallaykusqanrayku, yacharqaña wañuqkuna imayna tarikusqankumanta, yacharurqataqmi demoniokunapa toqllankunamantapas. Chaymi layqakunaman rinanpaq maman hikutaptin nirqa: “Manam risaqchu mamay. Mana atispayqa watamanmi astawan kallpanchakusaq”, nispa.

¿Imataq pasarurqa? ¡Payqa llapallankumantam aswan allintaraq horqorurqa! Mamanmi admirasqallaña kaspan layqakunapi hapipakusqanta saqerurqa, manañam rimarqañachu ofrendakuna qoymantapas. Tambaqa musyakururqataqmi wañuqkunapa almanta tapuyqa Bibliapa yachachisqanman hina mana allin kasqanta (Isaias 8:19). Allintam entienderurqa Diospa munaynin rurayqa haykapipas allinninchikpaq kasqanta (Salmo 1:1-3).

Kunanqa, ¿imatataq nichwan wañukuqkunamanta? ¿Suyachwanchu kaqllamanta tupaykuyta? Kawsaq runakunata Jehová Dios yanapaspanpas, wañukuq runakunata yanapananpaqpas prometerqam. Qaway willakuq Isaiaspa nisqanta: “Wañuqnikikunam kawsarimunqa. [. . .] Allpapa ukunpi kaqkuna qaparimuychik. Hatarimuspa kusikuyllawanña qaparimuychik”, nispa (Isaias 26:19). Hinaptinqa, wañukuq runakunaqa kawsarimunqakum.

Piensariy, ¡mayna kusikuychá kanqa millonnintin runakuna kawsarimuptinkuqa! Bibliam niwanchik chay punchaw chayamunanta Jehová Dios munasqanta (Job 14:14, 15). Amayá chaymantaqa iskayrayaychu, rurakunqapunim. Jesuspas chay suyakuymantaqa segurom karqa. Yachachirqataqmi wañuqkunaqa Jehová Diospaq hinalla kawsachkanmankupas hina kasqankuta (Lucas 20:37, 38).

Qampas, ¿munawaqchu Jesus hina chay suyakuymanta seguro kayta? * Chaynaqa, kallpanchaykikum Bibliamanta astawan yachanaykipaq. Pisi-pisimanta yachaspaykim musyakunki kawsaqkunatawan wañuqkunata Jehová Dios yanapay atisqanta. Yachankitaqmi promesankunaqa ‘confiakunapaq hinaspa cheqap’ kasqanta (Apocalipsis 21:4, 5).

[Willakuykuna]

[19 kaq paginapi suti rikuylla kaq willakuy]

Llapallanchikmá munanchik kuyasqanchik wañukuqkunawan tupaykuytaqa

[20 kaq paginapi dibujo]

¿Willakuq Samuelqa wañukusqanmantachu kutiramurqa rey Saulwan rimananpaq?