¿Imaynataq hanaq pachapi kawsakuyqa?

WAKIN runakunam ninku: “Hanaq pachapi imayna kawsakuy kasqanmantaqa manam yachayta atichwanchu, willawananchikpaq chaymanta mana pipas hamusqanrayku”, nispa. Ichaqa, ¿cheqapchu chay kanman? Juan 6:38 nisqanman hinaqa Jesusmi nirqa: “Hanaq pachamanta[m] hamurqani”, nispa. Religionkunapi punta apaqkunatapas nirqam: “Qamkunaqa kankichik kay pachallamantam, ñoqañataqmi kani hanaq pachamanta”, nispa (Juan 8:23). Hinaptinqa qawasunchikyá imatam señorninchik Jesucristo kaymanta yachachirqa.

‘Hanaq pachapi Taytay’ nispanqa, Jesusqa sutillatam qawachichkarqa Jehová Dios hanaq pachapi kawsasqanmanta (Mateo 12:50).

Runakunaqa telescopio nisqawan qawaspankupas chaynataq achka kutipi Killapa kasqanman rispankupas, Jehová Diostaqa manam haykapipas rikurqakuchu (Juan 1:18). ¿Imanasqa? Señorninchik Jesucristo nisqanman hina Diosqa espiritu kasqanrayku (Juan 4:24).

Bibliapa nisqanman hinaqa, espiritu kaqkunaqa runakunamanta aswan atiyniyoqmi. Manam aychayoq tulluyoqchu, chayraykum mana rikuytapas nitaq llapchaytapas atichwanchu. Chaymi hanaq pachapi Taytanwan kawsasqanmanta Jesucristo rimaspanqa, nichkarqam espiritu kasqan tiempomanta (Juan 17:5; Filipenses 3:20, 21). Arí, espiritu hina Dioswan kuska Jesuspa yachasqan sitiotam Diospa Palabranqa sutichan ‘hanaq pacha’ nispa. Hinaptinqa, ¿imaynataq chaypi kawsakuyqa kanman?

Hanaq pachaqa achkallaña llamkaypa kasqanmi

Diospa palabranqa yachachinmi hanaq pachapi achkallaña llamkay kasqanmanta. Chaypim yachanku Diosman sonqo millo-millonnintin angelkuna (Daniel 7:9, 10). Hinaspa imayna kayninkupipas manam chaynallachu kanku. ¿Imanasqam chaynata ninchik? Enteron pachapiqa manam tarichwanchu iskay runakuna imayna kayninkupi chaynalla kasqankutaqa, hinaptinqa chaynachá hanaq pachapi angelkunapas kanku. Angelkuna chayna sapakama kachkaptinkupas, Diospa Palabranqa ninmi llapallanku yanapakuspanku huk sonqolla hawka llamkasqankuta. ¡Chayna  kawsakuyqa manamá kay Pachapiqa qawakunchu!

Bibliaqa yachachintaqmi angelkunaqa achka llamkayniyoq kasqankuta, ninmi: “Angelkuna, Tayta Diostayá alabaychik. Kallpasapakuna, payllatayá alabaychik. Kamachisqan ruraqkunayá alabaychik. Nisqankunata kasukuqkunayá alabaychik. Llapallan tropankuna, Tayta Diostayá alabaychik. Munasqanta ruraspa serviqninkuna, payllatañayá alabaychik”, nispa (Salmo 103:20, 21). Chayna imaymana llamkayninkuwanqa mayna kusisqachá tarikunku.

Manaraq kay pacha unanchasqa kasqanmantapacham, angelkunaqa una-unay watakunaña Diosta servichkanku. Arí, kay Pachata Jehová Dios unanchaptinmi, llapallan angelkunaqa ‘qaparillawanña kusikurqaku’ (Job 38:4, 7). Paykunamanta huk kaqnin angelnintam tukuy imata Jehová Dios unanchaspan yanapaqnin kananpaq churarqa (Colosenses 1:15-17). Hinaptinqa, ¿angelkuna hinachu runakunapas hanaq pachapi kawsanankupaq unanchasqa karqaku?

¿Hanaq pachapi kawsanapaqchu unanchasqa karqanchik?

Yachamusqanchikman hinaqa, manaraq kay Pacha unanchasqa kachkaptinmi, angelkunaqa hanaq pachapi Diosta servichkarqakuña. Hinaptinqa, manam chaypi kananchikpaqchu runakunaqa unanchasqa karqanchik. Adantawan Evatam Jehová Dios kaynata nirqa: “Wawa-churiyoqyá kaychik, kay pachamanyá huntaychik”, nispa (Genesis 1:28; Hechos 17:26). Diospa tukuy kawsaq unanchasqankunamantaqa, Adanqa manam chaynallachu karqa, payqa kay Pachapi kawsaspanmi Jehová Diosta reqsispan serviyta atinman karqa. Chaymi Diospa Palabran kaynata nin: “Tayta Diospam hanaq pachaqa. Kay pachatañataqmi runakunaman qorqa”, nispa (Salmo 115:16).

Chayraykum runakunaqa yanqallamantaqa wañuyta mana munanchikchu. Manataqmi wañunapaqchu unanchasqa karqanchik. Aswanmi wañunchik Jehová Diosta Adan mana kasukusqanrayku. Diosman sonqo kaspanqa manam haykapipas wañunmanchu karqa (Genesis 2:17; Romanos 5:12).

Chaymantapas Jehová Diosqa manam haykapipas Adantaqa nirqachu hanaq pachaman rinanpaqqa. Manataqmi kay Pachataqa unancharqachu chaypi runakuna allinta ruraptinku hanaq pachamanña pusananpaq. Aswanqa munarqam kay Pachapi wiñaypaq kawsanankuta. Chay munayninqa hinallataqmi kunankama kachkan, Bibliam nin: “Allin ruraq runakunam allpataqa dueñoyanqaku. Paykunaqa chaypimiki wiñaypaqraq kawsakunqaku”, nispa (Salmo 37:29). Chaynaqa runakuna hanaq pachaman mana rinankupaq unanchasqa kaptinkuqa, ¿imanasqataq Jesucristoqa apostolninkunata nirqa hanaq pachaman rinankupaq? ¿Nichkarqachu llapallan allin runakuna hanaq pachaman rinankuta?