Revistanchikta leeqkunam tapukunku

¿Cheqaptachu Diablo kanman?

Bibliaqa sutillatamá yachachin Satanas kasqanmanta. Bibliapi mana iñiqkunam ichaqa burlakunku chayna yachachisqanmanta. Paykunaqa ninkum, Diabloqa sapakamapa mana allin kayninchikmi nispa.

Arí, achka runakunamá piensanku Diablo mana kasqanta. ¿Imanasqataq chaynata ninchik? Kaypi piensasun: Achka suwakunam yupinkuta chinkachinku mana hapichikuyta munaspanku, chaynapi astawanraq suwakunankupaq. Chaynataqmi Satanaspas, payqa tukuytam ruran mana reqsichikunanpaq chaynapi mana allinkunata hinalla rurananpaq. Jesusmi ichaqa sutillata qawachirqa imarayku runakuna kayna sasachakuypi tarikusqanchikmanta, paymi nirqa “kay pachapi kamachikuq” Diablo kasqanta (Juan 12:31).

Ichaqa, ¿imaynatam Satanasqa rikurirurqa? Qallariypiqa mana huchayoq angelmi karqa. Ichaqa Diospa rantinpi yupaychasqa kaytam munarqa. Anchallataña munaruspanmi Diospa contranpi churakururqa. Chaynapim Diablopi rikurirurqa. Bibliam willawanchik señorninchik Jesucristo Satanaswan kay Pachapi rimasqankumanta. Chaypim qawachirqa ima munasqanmanta, Diablom Jesusta hikutarqa qonqorakuykuspa yupaychananpaq (Mateo 4:8, 9).

Iskay kutikama Dioswan rimasqanpas rikurinmi Job libropi, chaypipas qawachirqam hina chay munasqanta. Qawachintaqmi runakunata Diosmanta karunchananpaq tukuy ima ruray atisqanta, chaynapi payta yupaychanankupaq (Job 1:13-19; 2:7, 8).

Kaypi piensariy: Jehová Dioswan hinaspa Jesuswan Satanas rimaspanqa, ¿imaynataq sapakamapa mana allin kaynillanchikqa kanman? ¿Kanmanchu Diospa chaynataq Jesuspa sonqonpi pisillapas mana allin? Manamá. Hinaptinqa cheqaptapunim Satanasqa kan, hinaspa pasaypaq mana llakipayakuq espiritum, Diostawan Jesustapas mana respetaqmi.

Diablo kasqantaqa sutillatam qawachin kunan tiempopi runakunapa imayna tarikusqankupas. Millonnintin runakunam yarqaymanta wañunku, huklaw nacionkunapim ichaqa puchuruq kawsaykunata ismuchinku. Armakunatapas huñunkum runapura wañuchinakunankupaq. Allpa pachatapas mancharikuypaqmi qachacharunku. Chayna kaptinpas runakunaqa manam musyakuyta atinkuchu imanasqa chayna kasqanmanta. ¿Imanasqa?

Bibliam niwanchik mana iñiq runakunapa ‘yuyayninkuta Diablo tutayarachisqanta’ (2 Corintios 4:4). ¿Imaynatam chayta ruran? Ruranmi mana rikuy atina demonionkunawan. Bibliam nin ‘demoniokunata kamachiqqa’ Diablo kasqanta (Mateo 12:24). Payqa wañuchiq runakunapa mana reqsichikuq jefen hinam. Chay demonionkunatam servichikun mana musyachikuspalla runakunata controlananpaq.

Anchatamá Diosta agradecekunchik, paymi Palabranwan yachachiwanchik Diablo pi kasqanmanta hinaspa pikunata servichikusqanmantapas. Chaynapim cuidakuyta atisunchik toqllankunapi mana wichinapaq. Chaypaqmi Bibliapa kayna nisqanta kasukunanchik: “Diosta kasukuspayá diablopa contranpi qaqa hina sayaychik, chaynapim diabloqa qamkunamanta ayqekunqa” (Santiago 4:7).