1, 2. ¿Imanasqam Marcoswan Timoteoqa iskayrayanmanku karqa Jehova Diosta astawan serviyta?

 MUSU kaspaykiqa segurochá munachkanki Diosta astawan serviyta hinaspa iñiqmasikikunapaq imatapas astawan ruwayta. Anchatamá kusikunchik musukuna hukkunata astawan serviyta munasqankumantaqa (Sal. 110:3). Wakinpiqa ichapas Diosta astawan serviyta iskayrayawaq vidayki imayna kananmanta utaq Diosta maypi servinaykimanta mana yachasqaykirayku. Utaqchá imapipas yanapakunaykipaq nisuptiki “manam atiymanchu” nirqanki manaraq chaypaq listo kasqaykita piensaspayki. Ichaqa manam qamllachu chaynaqa tarikunki.

² Marcoswan Timoteopas qallariypiqa iskayrayarqakuchá. Paykunapas manam yacharqakuchu Diosta maypi serviytaqa, manataqmi experienciayuqchu karqaku. Chaywanpas hukkunaraykum imatapas astawan ruwayta munarqaku. Yaqachusmi Marcosqa suma-sumaq hatun wasipi mamanwan yacharqa punta kaq viajasqanpi riysinanpaq apostol Pablowan Bernabey invitaptinkuqa (Hech. 12:​12, 13, 25). Chaywanpas Marcosqa Diostam astawan serviyta munarqa imayna kawsakusqanta saqinan kaptinpas. Puntatam Antioquiaman rirqa. Chaymantañataqmi Pablotawan Bernabeyta riysirqa karu-karu llaqtakunata viajasqankupi (Hech. 13:​1-5). Timoteopas yaqachusmi tayta-mamanwan yachachkarqa Diosmanta willakuq riysinanpaq Pablo niptinqa. Timoteoqa ichapas piensanman karqa musullaraq kasqanrayku riysinanpaq manaraq listo kasqanta (tupachiy 1 Corintios 16:​10, 11 hinaspa 1 Timoteo 4:12 nisqanwan). Chaywanpas Pablota riysinanpaq tantiakuruspanmi achka bendicionkunata chaskirqa (Hech. 16:​3-5).

3. (1) ¿Imaynatam yachanchik Marcostawan Timoteota Pablo anchata valorasqanta? (Rimarimuytaq 2 Timoteo 4:​6, 9, 11 nisqanmantapas, qawaytaq dibujokunatapas). (2) ¿Ima tapukuykunamantam yachasun?

³ Marcoswan Timoteoqa musullaraq kaspankupas congregacionpiqa  tukuy imapi yanapakuytam yacharqaku. Pablopas paykunataqa anchatam valorarqa. Chaymi wañuchinankutaña yachakuruspanpas paykunawan tupaykuyta munarqa (leey 2 Timoteo 4:​6, 9, 11). ¿Imayna kasqankuraykutaq Pabloqa anchata valorarqa? ¿Imaynatam kunan tiempopi musukuna paykunata qatipakunmanku? ¿Pablopa ima consejonkunataq musukunata yanapanman?

MARCOS HINAYÁ HUKKUNATA YANAPANAYKIPAQ LISTO KAY

4, 5. ¿Imakunatam Marcos ruwarqa iñiqmasinkunata yanapayta munasqanrayku?

⁴ Hukkunata yanapanapaqqa anchatam llamkananchik kanqa, yaqapaschá sasachakuykuna chayamuptinpas hinalla yanapananchik kanqa. Chaytam ruwarqa Marcospas. Iskay kaq viajasqanpi Pablo mana pusayta munaptinqa yaqapaschá Marcosqa llakisqa utaq hukmanyasqa tarikurqa (Hech. 15:​37, 38). ¿Chayraykuchu iñiqmasinkunata manaña yanaparqa? Manamá chaynachu karqa.

⁵ Marcosqa primon Bernabeywanmi iñiqmasinkuta yanapaq huklaw llaqtata rirqaku. Chaymanta 11 wata pasaytam Romapi Pablo presochasqa karqa, hinaptinmi Marcosqa kallpanchaykunanpaq chaypi karqa (Filem. 23, 24). Yanapaykusqanmanta anchata agradecekuspanmi Pabloqa nirqa: ‘Marcosqa anchatam kallpanchaykuwarqa’, nispan (Col. 4:​10, 11).

6. ¿Imaynatam Marcosta yanaparqa allin iñiyniyuq iñiqmasinkunawan hukllawakusqan? (Qaway willakuyninta).

⁶ Allin iñiyniyuq iñiqmasinkunawan hukllawakusqanmi Marcostaqa anchata yanaparqa. Romapi Pablowan kasqanmanta qipataqa Marcosqa apostol Pedrowanñam Babiloniapi karqa. Pedrowan anchata kuyachikusqanraykum ‘churin hina’ karqa (1 Ped. 5:13). Kuska kaptinkuchá Marcosmanqa willarqa Jesus kay pachapi kachkaspan tukuy ima ruwasqankunamanta. Chaymi tiempopa risqanman hina Jesuspa vidanmanta rimaq librota qillqarqa. a

7. ¿Imaynatam Sergioqa Marcosta qatipakurqa? (Qawaytaq fototapas).

⁷ Marcosqa Jehova Diostam tukuy tiemponwan servirqa, hinaspapas allin iñiyniyuqkunawanmi hukllawakurqa. ¿Imaynatam  payta qatipakuwaq? Yaqapaschá punta apaq utaq punta apaqpa yanapaqnin kayta munachkanki. ¿Imatam ruwawaq manaraq nombrasuptikiqa? Pacienciakuspaykiyá piensariy Diosta astawan servinaykipaq hinaspa iñiqmasikikunata astawan yanapanaykipaq imakunata ruwanaykipi. Rimarisunchik Sergiomanta. b Payqa kunanqa punta apaqmi. Musuchallaraq kachkaspanmi wiñaymasinkunawan tupachikuq. Paykuna imapipas yanapakunankupaq niptinkum Sergioqa piensaq mana kaqpaqta hina hapisqankuta. Imayna tarikusqanmantam punta apaqkunawan rimarqa. Hinaptinmi paykunamanta huknin nirqa mana pi rikuchkaptinpas hukkunata yanapaypi hinalla kallpanchakunanpaq. Chaymi tantiakururqa yuyaqkunata hinaspa wakin iñiqmasinkunata huñunakuyman pusananpaq. Chay tiempota yuyarispanmi nin: “Hukkunata yanapay imayna kasqantam yacharurqani. Cuentatataqmi qukurqani iñiqmasiykunata imapipas yanapayqa anchata kusichiwasqanta”, nispa.

TIMOTEO HINAYÁ HUKKUNAWAN KUYAKUQ KAY

8. ¿Imanasqataq Pabloqa munarqa Timoteo riysinanta? (Rimarimuytaq Filipenses 2:​19-22 nisqanmantapas).

⁸ Ñakarichisqanku llaqtakunata Pablo kutinanpaqqa mana manchakuq iñiqmasinkuna riysinantam necesitarqa. Chaypaqmi puntata akllarqa allin experienciayuq Silasta (Hech. 15:​22, 40). Chaymantañataqmi Timoteota akllarqa. ¿Imanasqataq munarqa Timoteo musullaraq kachkaspanpas riysinanta? Paymanta allinta rimasqankuraykum (Hech. 16:​1, 2). Pablo yacharqataqmi Timoteoqa runamasinkunawan ancha kuyakuq kasqantapas (leey Filipenses 2:​19-22).

9. ¿Imaynatam yachanchik Timoteoqa iñiqmasinkunata anchata kuyasqanta?

⁹ Pablowan viajayta qallaykusqanmantapacham Timoteoqa kikillanmanta preocupakunanmantaqa hukkunamanta astawan preocupakurqa. Chayraykuchá Pabloqa Bereamanta pasakuspanpas Timoteota chaypi saqirqa chayllaraq iñikuqkunata kallpanchananpaq (Hech. 17:​13, 14). Silaspas chay llaqtapim qiparurqa. Paymantapas Timoteoqa tukuy imatachá yacharqa. Tiempopa risqanman hinaqa sapallantañam Timoteotaqa Tesalonica llaqtaman Pablo kacharqa iñiqkunata kallpanchananpaq (1 Tes. 3:2). Chaymanta 15 watam Timoteoqa iñiqmasinkunata servirqa. Paykunata anchata kuyasqanraykum wakinpiqa paykunawan kuska waqarqa (Rom. 12:15; 2 Tim. 1:4). ¿Imaynatam Timoteota musukuna qatipakunmanku?

10. ¿Imaynatam Walter yacharurqa hukkunamanta astawan preocupakuyta?

¹⁰ Walterpas hukkunamanta astawan preocupakuytam yacharurqa. Musullaraq kaspanqa  manam anchatachu yuyaqkunawanqa rimaq. Chaymi huñunakuykunapipas paykunataqa saludaylla-saludaykuq. Punta apaq iñiqmasinchikmi consejarqa yuyaqkunawan rimayta qallarinanpaqqa paykunamanta ima gustasqanta ninanpaq. Consejarqataqmi yuyaq iñiqmasinchikkunapa imamanta rimay munasqankupi piensananpaqpas. Chayna consejasqantam kasukurqa. Walterqa punta apaqñam, paymi nin: “Kunanqa llapallankuwanñam rimani. Hukkunapa sasachakuyninkutapas allintañam entiendeni, chaynapim sapakamapa imapas necesitasqankupi yanapayta atini”, nispa.

11. ¿Imaynatam hukkunamanta astawan preocupakuyta yachawaq? (Qawaytaq fototapas).

¹¹ Qampas hukkunamanta astawan preocupakuytaqa yachawaqmi. Chaypaqyá huñunakuykunapi llapallankuwan rimanaykipaq kallpanchakuy. Imayna kasqankumanta tapuspayki sumaqta uyariykuy. Chayta ruwaspaykiqa pisi-pisimantam yachanki imayna yanapayta. Ichapas cuentata qukunki casarasqa yuyaqkuna JW Library^® nisqanta imayna servichikuyta mana atisqankuta utaq Diosmanta willakuq pipas riysinanta necesitasqankuta. Chaynaqa, ¿atiwaqchu chaykunapi yanapayta? Pipas mana nisuchkaptillayki hukkunata yanapaspaykiqa lliw iñiqkunapa qatipakunanmi kanki.

PABLOPA CONSEJONKUNAM YANAPASUNKI

12. ¿Imatam ruwawaq Timoteoman Pablopa consejo qusqankuna yanapasunaykipaq?

¹² Pabloqa churinta hinam Timoteotaqa kuyarqa, chaymi consejarqa vidanpipas chaynataq Diosta serviyninpipas allin kananpaq (1 Tim. 1:18; 2 Tim. 4:5). ¿Imatam ruwawaq chay consejonkuna qamtapas yanapasunaykipaq? Timoteoman Pablopa cartakuna qillqasqantam leewaq qanman apachimususqaykitapas hina, hinaspam yuyaymanawaq chay consejokunata imayna kasukunaykipi. Wakin consejonkunamantayá qatiqninpi yachaykusun.

13. ¿Imatam ruwanayki tukuy sunquwan Diosta servinaykipaq?

¹³ “Hinallayá anchata kallpanchakuy tukuy sunquwan Diosta servinaykipaq” (1 Tim. 4:7b, qaway willakuyninta). Tukuy sunquwan Diosta servispaqa payman sunqum haykapipas kasun, hinaspapas kusichinapaq kaqkunallatam ruwasun. Manam pipas nacen Diosman sunqu kastinñachu, aswanqa Pablopa nisqanman hinam chaypaqqa ‘anchata kallpanchakuna’. “Anchata kallpanchakuy” nisqantam griego rimaypiqa nichkan “ejerciciota ruway” nispan. Chaytaqa rimaqku llallinakuypi kallpaqkuna practicaspanku sapa punchaw ejerciciota ruwasqankumanta  rimaspanku. Chaypaqqa manam imawanpas distraekunankuchu karqa. Chaynam ñuqanchikpas sapa punchaw kallpanchakunanchik Diospaq kaqkunata ruwananchikpaq, chaynapi allin amistad kananchikpaq.

14. ¿Imapaqmi bibliata leenayki? Willarimuy kamachiq apu musumanta bibliapi leeruspa imakunapi yuyaymananamanta.

¹⁴ Diospaq kaqkunata ruwaymanta hukninmi sapa punchaw bibliata leey. Chaytaqa ruwanayki Dioswan allin amistad kanaykipaqmi. Ichapas leechkawaq kamachiq apu musuwan Jesuspa rimasqanmanta (Mar. 10:​17-22). Chay musuqa yacharqam Jesusqa Diospa akllasqan runa kasqanta. Ichaqa mana ancha iñiyniyuq kasqanraykum Jesuspa qatiqnin kaytaqa mana munarqachu. Chaywanpas Jesusqa kuyakuywanmi rimapayarqa. Chayna kuyakuywan rimapayasqanpim yuyaymanawaq. Payqa munarqamá chay musu allinta tantiakunanta. ¿Imatam chay leesqaykiwan Diosmanta yachawaq? Jesusqa taytantam tukuy imapipas qatipakun. Chaymi Jesuspa nisqanwan yachanki Jehova Diospas chay musuta anchata kuyasqanta (Juan 14:9). Chay musumanta bibliapa willakusqanpi hinaspa imayna tarikusqaykipi yuyaymanaspaykim nikuwaq: “¿Imatam ruwayman Jehova Diosman astawan asuykunaypaq hinaspa hukkunarayku imatapas astawan ruwanaypaq?”, nispa.

15. ¿Imanasqam musukunaqa hukkuna qatipakunankupaq kananku? (Rimarimuytaq 1 Timoteo 4:​12, 13 nisqanmantapas).

¹⁵ “Iñiqkunapa qatipakunanyá kay” (leey 1 Timoteo 4:​12, 13). Pablom Timoteota nirqa allin leeq kananpaq hinaspa allin yachachiq kananpaq kallpanchakuynin ancha allin kasqanta. Consejarqataqmi kuyakuq, Diospi ancha iñiq hinaspa respetakuq kananpaqpas. ¿Imanasqa? Rimaylla-rimanamantaqa imapas ruwasqanchikwanmi hukkunataqa astawan yachachichwan. Ichapas nisunkiman Diosmanta willakuypi astawan kallpanchakunamanta huñunakuypi yachachinaykipaq. Diosmanta willakunaykipaq sapa kuti lluqsispaykiqa mana pinqakuspam iñiqmasikikunatapas chaypaq kallpanchanki. Kikiki chayta ruwasqaykiraykumá uyarisuqnikikunapas kasukunankupaq kallpanchasqa tarikunqaku (1 Tim. 3:13).

16. (1) ¿Ima pichqa kaqkunapim musukunaqa hukkunapa qatipakunanpaq kanmanku? (2) ¿Imakunatam musu ruwanman sumaq rimayniyuq kasqanpi qatipakunapaq kananpaq?

¹⁶ 1 Timoteo 4:12 nisqanpim willawanchik pichqa kaqkunapi musukuna qatipakunapaq kanankumanta. Sapallaykipim sapakamamanta estudiawaq. Punta kaqmantayá rimaykusun. Pablom nirqa “sumaq rimayniyuq” kanamanta. Piensariy hukkunata kallpanchanaykipaq imakunata ninaykipi. Tayta-mamaykita, ¿sapa kuti agradecekuwaqchu qamrayku tukuy ima ruwasqankumanta? Huñunakuykunapipas, ¿kallpanchakuwaqchu kikikipa entiendesqaykimanta rimarinaykipaq? Huñunakuy tukuytañataq, ¿niwaqchu mayqin iñiqtapas yachachimusqanmanta ima gustarususqaykita? Sumaq rimayniyuq kaypi qatipakunapaq kaptikiqa hukkunapas Diosta serviynikipi ñawparisqaykitam sutillata qawanqaku (1 Tim. 4:15).

17. ¿Imakunatam ruwawaq Diosta serviynikipi hinalla ñawparinaykipaq? (Rimarimuytaq 2 Timoteo 2:22 nisqanmantapas).

¹⁷ “Ayqikuyá musu-sipaskunapa munapayasqankumanta, hinaspayá kallpanchakuy allin ruwaq kanaykipaq” (leey 2 Timoteo 2:22). Pablom Timoteota nirqa Diosta serviyninpi hinalla ñawparinanpaqqa hinaspa Diosmanta mana karunchakurunanpaqqa musu-sipaskunapaq munapayasqankunata qipanchananpaq. Ichapas cuentata qukunki  llumpayta pelotawan pukllasqaykirayku, internetpi imatapas qawasqaykirayku hinaspa computadorapi imapipas pukllasqaykirayku Diospaq kaqkunata ruwanaykipaq tiempoyki mana haypasusqaykita. Chaynakuna mana hucha kaptinpas, ¿manachu astawan tiempochakuwaq Jehova Diospaq hinaspa iñiqmasikikunapaq imatapas ruwanaykipaq? Ichapas kikikimanta ofrecekuwaq huñunakunanchik wasita allichaypi yanapakunaykipaq utaq carretachawan Diosmanta willakuq rinaykipaq. Chaykunata ruwaspaykim allin amistadkunata tarinki. Paykunam yanapasunki Diosta serviynikipi hinalla ñawparinaykipaq.

HUKKUNATA YANAPASPAQA BENDICIONKUNATAM CHASKINKI

18. ¿Ima bendicionkunatam Marcoswan Timoteo chaskirqaku?

¹⁸ Marcoswan Timoteoqa kikinkupi piensanankumantaqa hukkunata yanapanankupaqmi tukuyta ruwarqaku. Chaymi achka bendicionkunata chaskispanku kusisqa kawsakurqaku (Hech. 20:35). Marcosqa Diosmanta willakuypi yanapakusqanraykum achka llaqtakunaman chayarqa. Chaymantapas Jesuspa vidanmanta rimaq sumaq librotam qillqarqa. Timoteoñataqmi Pablota yanaparqa achka hawaqpi congregacionkunata rikurichiypi hinaspa iñiqkunata kallpanchaypi. Jehova Diosqa maynatachá kusikurqa Marcoswan Timoteo payta servinankupaq tukuy imata saqisqankuwanqa.

19. ¿Imanasqam Pablopa consejonkunata kasukunayki? ¿Imaynam kasukuspaykiqa kawsakunki?

¹⁹ Diospa atiyninwan cartakunata Pablopa qillqasqanwanmi yachanchik amistadnin Timoteota anchata kuyasqanta. Qamtapas Diosqa anchatam kuyasunki, chaymi munan qipa punchawkunata allinlla hinaspa kusisqa kawsakunaykita. Chayraykumá kallpanchaykiku Pablopa consejonkunata kasukunaykipaq hinaspa iñiqkunata astawan yanapay munaq kanaykipaq. Chaykunata ruwaspaykiqa kusisqam kawsakunki, hamuq tiempopiñataqmi ‘chiqap kawsakuyta’ haypanki (1 Tim. 6:​18, 19).