1. ¿Imaynam Jehova Diosqa tarikun payta servinapaq kallpanchakuptinchik?

 JEHOVA DIOSQA yachanmi sapa punchaw imakuna kusichiwasqanchikta hinaspa imakuna llakichiwasqanchikta (Sal. 37:18). Ima llakipiña tarikuspapas kallpanchakunchikmi Diosta servinapaq. Chayta qawamuspanmi payqa anchata kusikun. Chaymantapas yanapaykuytam hinaspa kallpanchaykuytam munawanchik.

2. ¿Imatam Jehova Diosqa ruwan llakisqa sunquyuqkunapaq? ¿Imatam ñuqanchikpas ruwananchik kuyakuywan cuidawananchikpaq?

² Salmos 147:3 nisqanpim nin llakisqa sunquyuqkunapa ‘heridankutapas Jehova Dios latapawan wataykusqanta’. Chaywanqa nichkan paykunaman asuykuspa kuyakuywan cuidasqanmantam. Kaypi piensarisun: Pipas llumpayta heridakuruspanqa allin doctormanña rispanpas sanoyananpaqqa doctorpa lliw nisqankunatam kasukunan. Chaynam ñuqanchikpas llakisqa sunquyuq tarikuspaqa palabranpi Diospa lliw nisqankunata kasukunanchik. Kasukuptillanchikmi Diosqa kuyakuywan cuidawasunchik. Chaymi kay yachachikuypi yachasun llakisqa sunquyuqkunata palabranpi Dios ima nisqanmanta hinaspa quwasqanchik consejonkunata imayna kasukunamanta.

ANCHA VALORNIYUQ KASQANCHIKTAM NIWANCHIK

3. ¿Imanasqam wakinku piensanku mana imapaq valeq kasqankuta?

³ Yaqa llapallan runakunam runamasinkutaqa mana kuyankuchu. Chaymi tratapanku hinaspa mana imapaq valeq kasqankuta ninku. Iñiqmasinchik Elenam a willakun: “Mana kuyakuq familiapim wiñarqani. Papaymi karqa maqakuqllaña. Sapa punchawmi niwaqku mana imapaq valesqaykuta”, nispa. Yaqapaschá  qamtapas taytayki utaq pi uywasuqnikipas chaynata nisurqanki, maqasurqanki utaq mana pipa kuyasqan kasqaykita nisurqanki. Chayna uywasqa kaspaykiqa manapaschá creewaqchu pipas anchata kuyasusqaykimanta nisuptikiqa.

4. ¿Imatam Jehova Dios niwanchik Salmos 34:18 nisqanpi?

⁴ Mana imapaq valeq kasqaykita runakuna nisuptikipas ama iskayrayaychu Dios kuyasusqaykimantaqa hinaspa valorasusqaykimantaqa. Payqa “llakisqa sunquyuqkunapa hichpallanpim kachkan” (leey Salmos 34:18). “Llumpay hukmanyasqa” kaspaykiqa yuyariy: Jehova Diosqa allin kaqkunata sunquykipi qawasqanraykum serviqnin kanaykipaq akllaykusurqanki (Juan 6:44). Payqa anchatam kuyasunki, chaymi haykapipas hichpallaykipi kanqa yanapaykusunaykipaq.

5. ¿Imatam yachachwan hukkunapa mana allin qawasqan runakunata Jesus llakipayasqanmanta?

⁵ Dios kuyawasqanchiktam astawan entiendechwan Jesuspa ruwasqankunata yuyarispa. Payqa kay pachapi kachkaspanmi hukkunapa mana allin qawasqan runakunata llakipayarqa (Mat. 9:​9-12). Huk warmim ñakarichiqnin unquyninmanta sanoyayta munaspan Jesuspa pachanta llapchaykurqa. Hinaptinmi payqa llakipayaykuspan allin iñiyniyuq kasqanmanta kallpanchaykurqa (Mar. 5:​25-34). Arí, Jesusqa taytan hinamá runakunata anchata kuyarqa (Juan 14:9). Chayraykum manapuni iskayrayawaqchu Dios valorasusqaykimantaqa. Iñiyniyuq kasqaykiraykum hinaspa payta kuyasqaykiraykum Diosninchikqa anchata kuyasunki.

6. ¿Imatam ruwawaq mana valeq kasqaykita sapa kuti piensaspaykiqa?

⁶ ¿Imatam ruwawaq mana valeq kasqaykita sapa kuti piensaspaykiqa? Jehova Dios valorasusqaykimanta rimaq textokunata bibliapi leespaykim chaypi yuyaymanawaq (Sal. 94:19). b  Imapas tantiasqaykita mana cumpliyta atispaykiqa utaq imatapas hukkuna hina mana ruwayta atispaykiqa ama hukmanyaychu nitaq mana imapaq valeq kasqaykitaqa piensaychu. Diosqa allinta riqsisusqaykiraykum imapas ruway atisqallaykita mañasunki (Sal. 103:​13, 14). Pipas maqasusqaykimantaqa utaq abusasusqaykimantaqa ama piensaychu qam huchayuq kasqaykitaqa. Yuyariy: Diosqa mana allin ruwaqkunatam cuentataqa mañanqa, manam abusasqa kaqkunatachu (1 Ped. 3:12). Warmallaraq kachkaspan llumpay ñakarichisqa Sandram nin: “Jehova Diostam sapa kuti mañakuni paypaq ancha valorniyuq kasqayta yuyarichiwananpaq chaynapi mana valeq kasqayta mana piensanaypaq”, nispa.

7. ¿Imaynatam ñawpaqpi imapas pasasqanchik Diosta servisqanchikpi yanapawachwan?

⁷ Diosqa hukkunata yanapanaykipaqmi servichikusunkiman mana chaypaq hina kasqaykita wakinpi piensaptikipas. ¡Ancha kusikunapaqmi Diosmanta willakusqaykirayku llamkaqmasinpaq hapisusqaykiqa! (1 Cor. 3:9). Ñawpaqpi imapas pasasusqaykiraykum qam hina sasachakuypi tarikuqkunata aswan allinta entiendenki hinaspa llakipayanki, chaymi aswan allinta paykunata yanapayta atiwaq. 3 parrafopi rimamusqanchik Elenam yanapaykuptinku hukkunata aswan allinta yanapananpaq imayna tarikusqanmanta kaynata nin: “Ñawpaqtaqa imapaqpas mana valeq kasqaytam piensaq kani. Kunanmi ichaqa anchata kuyawasqanrayku Dios servichikuwachkan hukkunata yanapanaypaq”, nispa. Elenaqa precursora regular kaspanmi ancha kusisqa tarikun.

PAMPACHAWASQANCHIKMANTA MANA ISKAYRAYANATAM MUNAN

8. ¿Imatam kikin Dios niwanchik Isaias 1:18 nisqanpi?

⁸ Diospa wakin serviqninkunam hinalla hukmanyasqa tarikunku manaraq bautizakuchkaspanku utaq bautizakuruspankuña mana allin ruwasqankumanta. Chaynapi tarikuspaqa ñuqanchikpas yuyarinanchikmi Jehova Dios anchata kuyawaspanchik huchanchikrayku wañunanpaq churin Jesusta kachamusqanta. Chaymi kikin Dios niwanchik: “Ñuqamanyá hamuychik rimanakuykuspa allichanapaq”, nispa. c Niwanchiktaqmi chayta ruwaptinchikqa huchanchikkunata qalaypaqta pampachawananchikmanta (leey Isaias 1:18). Diostam anchata agradecekunchik mana allin ruwasqanchikkunata qunqaspan allin ruwasqanchikta yuyasqanmanta (Sal. 103:​9, 12; Heb. 6:10).

9. ¿Imanasqataq kunan imapas ruwasqanchikpi hinaspa hamuq tiempopaq Diospa prometewasqanchikpi astawan piensananchik?

⁹ ¿Imam yanapasunkiman ñawpaqta mana allin ruwasqaykimanta hinalla hukmanyasqa tarikuptikiqa? Chaypaqqa kunan imapas ruwasqaykikunapiwan hamuq punchawkunapi imapas ruwanaykikunallapiyá piensay. Chaytam apostol Pablopas ruwarqa. Payqa Jesuspa qatiqninkunata ñawpaqta ñakarichisqanmanta pesakuspanpas manam iskayrayarqachu chay ruwasqanmanta Dios pampachaykusqanmantaqa (1 Tim. 1:​12-15). Chayraykum manaña piensarqachu ñawpaqta mana allin ruwasqankunapiqa chaynataq religionninpi ancha riqsisqa kananpaq tukuy ima ruwasqankunapiqa (Filip. 3:​4-8, 13-15). Hukmanyasqallaña kananmantaqa kusikuywanmi Diosmanta willakuq, hinaspapas hamuq punchawkunapi imakuna ruwananpim astawan piensaq. Pablo hinam ñawpaqta imapas ruwasqaykikunataqa mana cambiayta atiwaqchu. Chaywanpas, Jehova Diosta imayna servinaykipim hinaspa  hamuq tiempopaq imapas prometesusqaykipim astawan piensawaq.

10. ¿Imatam ruwawaq imapas ruwasqaykiwan pitapas ñakarichispaykiqa?

¹⁰ Hukmanyasqataqchá tarikuwaq ñawpaqta imapas ruwasqaykiwan hukkunata ñakarichispaykiqa. Chayna kaptinqa pampachaykusunaykipaq mañakuspaykim tukuyta ruwanayki yanapanaykipaq (2 Cor. 7:11). Jehova Diostapas mañakuwaqtaqmi payta yanapananpaq. Diosninchikqa qamtapas chaynataq ñawpaqpi ñakarichisqayki runakunatapas yanapasunkichikmanmi hinalla payta servispa hawka kanaykichikpaq.

11. ¿Imatam Jonasmanta yachachwan? (Qawaytaq qaranpi dibujotapas).

¹¹ Tukuytayá ruway ñawpaqpi imapas mana allin ruwasqaykita manaña kaqmanta ruwanaykipaq. Hinaspapas Diostayá kasukuy maypi hinaspa imaynata servinaykipaq tantiaptinqa. Jonaspa ima ruwasqantam yuyarinayki. Payqa Ninive llaqtaman Dios kamachichkaptinmi ayqikuspan huklawman pasakurqa. Dios corregiptinmi ichaqa kasukuq kayta yacharqa (Jon. 1:​1-4, 15-17; 2:​7-10). Chaymi Diosqa Jonastaqa mana qipancharurqachu. Aswanqa Ninive llaqtata rinanpaqmi kaqmanta kacharqa, hinaptinmi payqa kasukurqa. Ñawpaqpi mana kasukusqanmanta pesakuspanpas mayman rinanpaq Diospa kamachisqantam kasukurqa (Jon. 3:​1-3).

CHUYA ESPIRITUNWANMI SUNQUNCHIKTA TIYAYKACHIN

12. ¿Imaynatam Diosqa sunqunchikta tiyaykachin ima llakipas pasaruwaptinchik? (Rimarimuytaq Filipenses 4:​6, 7 nisqanmantapas).

¹² Ima llakipas pasaruwaptinchikqa Jehova Diosmi chuya espiritunwan sunqunchikta tiyaykachin. Rimarisunchik Ronmantawan Carolmanta, paykunapa warmankum wañurachikurqa. Paykunam willakunku: “Ñawpaqta sasachakuykuna pasawasqankumantapas astawanraqmi karqa chay llaki pasawasqankuqa. Achka tuta mana puñuyta atispaykum Diosta mañakurqaniku, hinaspam Filipenses libropa nisqanman hina hawkaraq tarikurqaniku”, nispa (leey Filipenses 4:​6, 7). Qampas hatun llakipi tarikusqaykirayku hukmanyasqa kaspaykiqa imayna tarikusqaykitayá Diosman lliwta willakuy. Paywanqa parlawaqmi hayka kutitapas chaynataq hayka tiempopas (Sal. 86:3; 88:1). Chuya espiritunta qusunaykipaq Diosta hinalla mañakuptikiqa uyariykusunkipunim (Luc. 11:​9-13).

13. ¿Imaynatam Diosqa chuya espiritunwan yanapawachwan hinalla tukuy sunquwan servinapaq? (Rimarimuytaq Efesios 3:16 nisqanmantapas).

¹³ ¿Ima sasachakuypas pasarususqaykiraykuchu imatapas ruwanaykipaq manaña kallpayuq tarikunki? Hinaptinqa yuyariy: Diosmi chuya espiritunwan kallpanchasunkiman tukuy sunquwan hinalla payta servinaykipaq (leey Efesios 3:16). Rimarisunchik Floramanta. Payqa qusanpiwanmi misionero karqaku. Ichaqa qusan hukwan tupakuruptinmi divorciakururqaku. Floram willakun: “Tuta-punchawmi waqasqallaypi karqani. Chaymi Diosta mañakurqani chuya espiritunwan yanapaykuwananpaq. Qallariypiqa chay llakiyta mana atipanaytam piensarqani. Ichaqa Dios yanapaykuwaptinmi sunquy hawkayaykurqa”, nispa. Floraqa cuentatam qukun Diosqa paypi astawan hapipakunanpaq kallpanchasqanmanta. Manataqmi iskayrayanchu imaña kaptinpas hinalla yanapananmantaqa. Chayraykum nin: “Jehova Diosqa Salmos 119:32 nisqanpi hinam ñuqawanqa ruwarqa, chaypim nin: ‘Ñannillaykipim purillasaq, kamachikuynikikunatam kasukullasaq, qanmi chaypaqqa sunquyta kichaykuwanki’”, nispa.

14. ¿Imatam ruwananchik chuya espiritunwan Dios yanapawananchikpaq?

¹⁴ ¿Imatam ruwachwan chuya espiritunwan yanapawananchikpaq Diosta mañakuruspaqa? Huñunakuykunaman hinaspa Diosmanta  willakuqmi rinanchik. Bibliatapas sapa punchawmi leenanchik, chaynapim allin kaqkunapi piensasun (Filip. 4:​8, 9). Sasachakuypi tarikuq Diospa serviqninkunamanta bibliapi leespaqa yuyaymanasun aguantanankupaq Dios imayna yanapasqanpi. Suqta parrafopi rimamusqanchik Sandram tukuy ima sasachakuykunata pasallarqa. Paymi nin: “Joseymanta bibliapi leesqaymi anchata yanapawan. Payqa ima sasachakuypiña tarikuspanpas utaq yanqamanta ñakarichiptinkupas hinallam Diosman sunqu karqa”, nispa (Gen. 39:​21-23).

IÑIQKUNAWANMI KALLPANCHAWANCHIK

15. ¿Pikunam anchata kallpanchaykuwachwan? ¿Imaynata? (Qawaytaq fototapas).

¹⁵ Ima sasachakuypipas tarikuptinchikqa iñiqmasinchikkunam ‘anchata kallpanchaykuwachwan’ (Col. 4:11). Diosqa paykunawanmi ancha kuyawasqanchikta qawachiwanchik. Paykunaqa sunqunchiktam tiyaykachin kuska kaysiwaspanchik hinaspa imayna tarikusqanchikmanta willakuptinchik kuyakuywan uyariykuwaspanchik. Ichapas bibliapi mayqin textowanpas kallpanchaykuwanchik utaq ñuqanchikwan kuska Diosta mañakuykunku (Rom. 15:4). d Yaqapaschá mayqin iñiqmasinchikpas Jehova Diospa imayna piensasqanta yuyarichiwachwan, chaynapi sasachakuypi kaspapas hawkalla kanapaq. Iñiqmasinchikkunaqa yanapawachwantaqmi ima mikuyta quykuwaspanchikpas utaq imata ruwaykapuwaspanchikpas.

16. ¿Imatam ruwananchik kanqa pipas yanapawananchikpaqqa?

 ¹⁶ Iñiqmasinchikkuna yanapawananchikpaqqa ichapas kikinchikmanta willakunanchik kanqa. Paykunaqa kuyawanchikmi, hinaspapas yanapaykuytam munawanchik (Prov. 17:17). Ichaqa manapaschá yachankuchu imayna tarikusqanchiktaqa utaq ima necesitasqanchiktaqa (Prov. 14:10). Llumpay llakisqa tarikuspanchikqa allin amistadninchikkunamanmi willakuchwan imayna tarikusqanchikta. Allinmi kanman ñuqanchikpaq ima ruwananta niyninchikqa. Confianza sientekusqanchik punta apaqkunawanmi parlachwan. Wakin paninchikkunaqa unayña Diosta serviq paninchikkunawan parlaspankum confianza sientekunku.

17. ¿Imata ruwaptinchiktaq pipas mana kallpanchawachwanchu? ¿Imatam ruwachwan kallpanchasqa kanapaq?

¹⁷ Iñiqmasinchikkunamantaqa amayá karunchakuychu. Llakisqa kaspaqa sapallanchik kaytapaschá munasun. Ichapas iñiqmasinchikkunaqa mana entiendewasunchu utaq rimasqankuwan sientirachiwasun (Sant. 3:2). Amayá chaykunaraykuqa iñiqmasinchikkunamantaqa karunchakusunchu. Jehova Diosqa paykunawanmi yanapaykuwachwan. Punta apaq iñiqmasinchik Gavinmi depresionwan unqun. Paymi nin: “Yaqa llapanpim amistadniykunawan parlayta utaq paykunawan kayta mana munanichu”, nispa. Chaywanpas Gavinqa tukuytam ruwan mana sapallan kananpaq, chaymi hawkaniq tarikun. Anañataqmi nin: “Tukuy ima pasawasqanraykum hukkunapiqa mana confianichu, chaywanpas ñuqapaq Dios imayna kasqanraykum iñiqmasiykunata kuyanaypaq hinaspa paykunapi confianaypaq tukuyta ruwani. Chay ruwasqaywanmi kusisqa tarikuni, kusikuntaqmi Diospas”, nispa.

PROMETEWASQANCHIKKUNAM KALLPANCHAWANCHIK

18. ¿Imakunam musuq pachapiqa manaña kanqachu? ¿Imamantam mana iskayrayananchikchu?

¹⁸ Jehova Diosqa ñamá chinkachinqaña unquykunataqa hinaspa imapas llakichiwaqninchik kaqkunataqa. Chaykunata yachaspanchikmi anchata kusikunchik (Apoc. 21:​3, 4). Mana allin pasasqanchikkunaqa musuq pachapiqa ‘manañam llakichiwasunñachu’ (Is. 65:17). Yachamusqanchikman hinam Diosqa hukmanyasqa tarikuptinchikpas kallpanchaykuwanchik. Payqa tukuytam quwanchik kallpanchaykuwananchikpaq hinaspa sunqunchikta tiyaykachinanpaq. Chaynaqa, amapuniyá iskayrayasunchu Dios anchata kuyawasqanchikmantaqa (1 Ped. 5:7).