1, 2. (1) ¿Imataq hucha hinaspa imaynatam huchamanta librasqa kasunchik? (Qawaytaq “Astawan yachanapaq willakuy” niqtapas). (2) ¿Imamantam kay yachachikuypiwan qatiqnin yachachikuykunapi yachasun? (Qawaytaq kay revistapi “Kuyasqayku iñiqmasillayku” niqtapas).

 ¿IMAYNATAM yachachwan Jehova Dios maynata kuyawasqanchikta? Chaypaqqa huchamantawan wañuymanta librawananchikpaq ima ruwasqanmantam yachananchik. Huchamantaqa a manam kikillanchikqa librakuyta atichwanchu. Huchayuq kasqanchikraykum sapa punchaw imapipas pantanchik. Chayraykum llapallanchik wañunchik (Rom. 5:12). Chaywanpas, anchatam kusikunchik Diospa yanapakuyninwanqa huchamantawan wañuymanta librasqa kananchikta yachaspa.

² Diosqa yaqa 6.000 watañam huchayuq kachkaptinchikpas payta servinapaq yanapawachkanchik. ¿Imanasqa? Anchata kuyawasqanchikraykum. Unanchawasqanchikmantapacha kuyawasqanchikraykum tukuyta ruwarqa huchamanta librawananchikpaq. Diosqa yachanmi huchayuq kasqanchikrayku wañuqlla kasqanchikta. Ichaqa manam munanchu wañunanchiktaqa, aswanqa munachkan wiñaypaq kawsakunanchiktam (Rom. 6:23). Arí, munanmi qampas wiñaypaq kawsakunaykita. Chaymi kay yachachikuypi kaykunamanta yachasunchik: ¿Runakunapaq imata ruwananmantam Dios willakurqa? ¿Imatam ñawpaq tiempopi Diosta serviqkuna ruwarqaku huchayuq kachkaspankupas  Diospa chaskisqan kanankupaq? ¿Imatam Jesus ruwarqa huchamantawan wañuymanta librawananchikpaq?

DIOSMI WILLAKURQA RUNAKUNAPAQ IMATA RUWANANMANTA

 3. ¿Imaynanpim Adanwan Evaqa huchayuq rikurirurqaku?

³ Diosqa Adantawan Evata unanchaspanqa munarqa kusisqa kanankutam. Chaymi sumaq huertapi yachanankupaq churarqa, hinaspapas casarachispanmi wawa-churiyuq kanankupaq nirqa. Nirqataqmi enterollan allpa pachanchik Eden huerta hina kananpaq llamkanankupaqpas. Huk sachapa rurunta ama mikunallankupaqmi nirqaqa, chayta mana kasukuspankuqa wañunankum karqa. Ichaqa satanasmi pantachispan huchallirachirqa. Satanasqa manamá kuyarqachu paykunatapas nitaq Diostapas. Adanwan Evaqa tukuy imata quqnin Diosta kasukunankumantaqa satanastam kasurqaku. Chayraykum chay punchawmantapacha yuyaqyaspa wañurqaku. Diospa nisqanman hinamá paykunataqa pasarqa (Gen. 1:​28, 29; 2:​8, 9, 16-18; 3:​1-6, 17-19, 24; 5:5).

 4. ¿Imanasqataq Diosqa huchata llumpayta chiqnin? ¿Imanasqam tukuyta ruwarqa huchamanta librasqa kananchikpaq? (Rimarimuytaq Romanos 8:​20, 21 nisqanmantapas).

⁴ Tukuy chay pasasqankuna llakikunapaq kaptinpas bibliapim Dios qillqachirqa huchata chiqnisqanta entiendechiwananchikpaq. Huchaqariki Diosmanta karunchawaspanchikmi wañuyman apawanchik (Is. 59:2). Chayraykum satanasqa Adantawan Evata hina huchaman tanqawanchik. Payqa piensarqachá Diospa munaynin manaña cumplikunanta. Ichaqa manam entienderqachu runakunata Dios maynata kuyasqantaqa. Diosqa Adanpawan Evapa mirayninkunapaq ima munasqantaqa manam cambiarqachu. Runakunata kuyasqanraykum chaylla willakurqa huchamanta imaynata librananpaq (leey Romanos 8:​20, 21). Wakin runakuna kuyananta chaynataq kasukuy munananta yachasqanraykum tukuyta ruwarqa payman asuykunankupaq hinaspa huchamantawan wañuymanta librakunankupaq. ¿Imatam chaypaqqa kuyakuq taytanchik ruwarqa?

 5. ¿Haykapim Diosqa willakurqa runakunata imaynata librananmanta? ¿Pi rikurimunanmantam nirqa? (Rimarimuytaq Genesis 3:15 nisqanmantapas).

⁵ (Leey Genesis 3:15). Adanwan Eva huchallikurusqanku qipallatam Diosqa satanasta nirqa chinkachisqa kananmanta, chay punchawllapitaqmi nirqa runakunata imaynata librananmantapas. Willakurqam ‘warmipa miraynin’ rikurimunanmanta. Chay miraymi satanasta hinaspa tukuy ima sasachakuy rikurichisqanta chinkachinan karqa (1 Juan 3:8). Willakurqataqmi satanas talonninta kachuchkanmanpas hina wañuchinanmantapas. Chayta qawaptinqa Diospa sunqunmi anchata nananan karqa. Ichaqa yacharqam chayqa mana yanqapaq kananta. Yacharqam chay warmipa miraynin ñakarispa wañusqanrayku waranqantin runakuna huchamantawan wañuymanta librasqa kanankuta.

HUCHAYUQ KASPAPAS DIOSPA CHASKISQANMI KARQAKU

 6. ¿Imatam ruwarqaku Abel, Noey hinaspa huk runakunapas Diosman asuykunankupaq?

⁶ ¿Imatam huchayuq runakunaqa ruwananku karqa Diosman asuykunankupaq? Imata ruwanankumantam tiempopa risqanman hina Diosqa pisi-pisimanta willarqa. Adanpawan Evapa warmanku Abelmi Diospi iñikuq punta kaq runa karqa. Payqa Diostam kuyarqa, munarqataqmi sunqun kusichiytapas hinaspa asuykuytapas. Chaymi punta naceq ovejankunata nakaspa Diospaq kañapurqa. ¿Imaynatam chayta Dios qawarqa? ‘Allinpaqmi qawarqa, chaymi qusqantapas chaskirqa’ (Gen. 4:4). Watakuna pasaytam Noeypas hinaspa  Diosta kuyaq huk runakunapas animalkunata nakaspa Diospaq kañapurqaku. Paykunapa qusqantapas Diosqa chaskiykurqam (Gen. 8:​20, 21). Chaywanmi yachakurqa huchayuq runakunapas Diosta kusichiyta hinaspa payman asuykuyta atisqanku. b

 7. ¿Imatam yachachwan Diosta kasukuspan churinta wañuchinanpaq Abrahan tantiarusqanmanta?

⁷ Abrahanpas ancha iñiyniyuq runam karqa. Paytam Dios kamachirqa kuyasqan churin Isaacta wañuchispan ofrendata hina kañapunanpaq. Ichaqa yacharqam chayta kasukuyninqa Abrahanpaq llumpay sasa kasqanta. Chaynata niykuptinqa Abrahanqa llumpaytachá churinmanta llakikurqa. Chaywanpas Diospa nisqanta kasukunanpaqmi tantiarurqa. Churinta wañuchinanpaq kachkaptinmi ichaqa Dios harkakururqa. ¿Imatam yachachwan Abrahanmanta? Diosqa ancha-anchata kuyawaspanchikmi kuyasqan churin wañunanta mana harkakunanchu karqa (Gen. 22:​1-18).

 8. ¿Imatam Dios qawachirqa animalkunata ofrecenankupaq kamachisqanwan? (Rimarimuytaq Levitico 4:​27-29; 17:11 nisqanmantapas).

⁸ Pachaknintin watakuna pasaytam Israel runakunata Dios nirqa huchankuta pampachananpaqqa animalkunata nakaspa ofrecenankupaq (leey Levitico 4:​27-29; 17:11). Chaywanmi qawachirqa animalkunamantapas aswan valorniyuq kaqwan runakunapa huchanta wiñaypaq pampachananta. Profetankunawanmi runakunaman willachirqa prometesqa mirayqa ñakarispa wañunanmanta, payqa Diospa ancha kuyasqan churinmi kanan karqa. Paypa wañukusqanqa Diosman ovejata ofrecesqanku hinam kanan karqa (Is. 53:​1-12). Kaypi piensariy: Runakuna huchamantawan wañuymanta librasqa kananpaqmi Diosqa kuyasqan churinta kay allpa pachaman kachamunanpaq tantiarurqa, chaynapi wañukusqanwan qampas salvasqa kanaykipaq.

HUCHAMANTAWAN WAÑUYMANTA LIBRAWANANCHIKPAQ JESUSPA IMA RUWASQANMANTA

 9. ¿Imatam Juan nirqa Jesusmanta? (Rimarimuytaq Hebreos 9:22; 10:​1-4, 12 nisqanmantapas).

⁹ 29 watapi Nazaret llaqtayuq Jesusta rikuruspanmi bautizaq Juan nirqa: “¡Waqaya llapa runakunapa huchanta pampachaq Diospa malta carneronqa!”, nispa (Juan 1:29). Chaywanmi Juanqa nirqa Diospa prometesqan mirayqa Jesus kasqanta. Arí, Jesusmá lliw runakunarayku vidanta ofrecenan karqa. Paypa wañukusqanwanmi runakunaqa huchamantawan wañuymanta chayraq wiñaypaq librakuyta atinanchik karqa (leey Hebreos 9:22; 10:​1-4, 12).

10. ¿Imatam Jesusqa ruwarqa ‘huchasapakunata qayaq’ hamusqanrayku?

¹⁰ Jesusqa kuyakuywanmi yanapaq hucha ruwasqankurayku mana allin sientekuqkunataqa, hinaspam qatiqnin kanankupaq niq. Payqa yacharqam runakunaqa huchayuq kasqanrayku tukuy ima ñakariypi tarikusqankuta. Chaymi kikinmanta asuykuspa huchasapa runakunatapas yanapaq. Kikinmi nirqa: “Sano runakunaqa manam necesitanchu doctortaqa, unquqkunam ichaqa necesitanku”, nispa. Nirqaraqmi: “Hamurqaniqa manam allin runakuna qayaqchu, aswanqa huchasapakunata qayaqmi”, nispa (Mat. 9:​12, 13). Chay rimasqanman hinamá Jesusqa ruwarqa. Huk kutipim chakinta wiqinwan mayllaq huchasapa warmita kuyakuyllawan rimapayaspan pampachaykurqa (Luc. 7:​37-50). Huk kutipiñataqmi Samaria warmiman Diosmanta sumaq yachachikuykunata willarqa huchasapa kasqanta yachaspanpas (Juan 4:​7, 17-19, 25, 26). Chaymantapas, Diospa atiy qusqanwanmi qarikunatapas, warmikunatapas chaynataq warmachakunatapas kawsarichirqa.  Chayna ruwasqanwanmi sutilla karqa huchapa rikurichisqan wañuyta chinkachinanpaq atiyniyuq kasqan (Mat. 11:5).

11. ¿Imanasqataq hatun huchata ruwaqkunapas Jesusman asuykuyta munaqku?

¹¹ Hatun huchata ruwaqkunapas Jesusman asuykuytaqa munaqkum. Paykunaqa yachaqkum asuykuptinkuqa Jesusqa entiendenanta hinaspa llakipayananta (Luc. 15:​1, 2). Chaymantapas, paypi iñiyniyuq kasqankuta qawaspanmi Jesusqa alabaykuq hinaspa yanapaq (Luc. 19:​1-10). Payqa taytan hina ancha llakipayakuqmá karqa (Juan 14:9). Jesuspa rimasqanwan hinaspa ruwasqanwanmi cuentata qukunchik Diosqa anchata kuyawasqanchikta, llakipayawasqanchikta hinaspa huchayuq kachkaptinchikpas payta servinapaq yanapay munawasqanchikta. Jesus chayna kasqanraykum huchasapa runakunaqa vidanta cambiayta munaspanku qatikuyta munarqaku (Luc. 5:​27, 28).

12. ¿Imatam Jesus willakurqa imayna wañunanmanta?

¹² Jesusqa yachakurqam wañuchinankuta, chaymi achka kutipi qatiqninkunaman willarqa qipanchasqa kananmanta hinaspa qirupi warkuspa wañuchinankumanta (Mat. 17:22; 20:​18, 19). Juanpa hinaspa profetakunapa willakusqanwantaqmi yacharqa vidanta qusqanrayku llapa runakunapa huchan pampachasqa kananmanta. Chaymantapas willakurqam wañukusqan qipata ‘tukuy rikchaq runakunata kikinman pusananmanta’ (Juan 12:32). Jesuspi iñiqkunaqa hinaspa payta qatipakuqkunaqa Jehova Dios kusichiytam atinmanku karqa, hinaspaqa ‘huchamantam librasqaña’ kanmanku  karqa (Rom. 6:​14, 18, 22; Juan 8:32). Tukuy chaykunaraykum Jesusqa mana manchakurqachu ñakarichispa wañuchinankutaqa (Juan 10:​17, 18).

13. ¿Imaynatam Jesusta wañurachirqaku? ¿Imanasqam Jehova Diosqa churin ñakarinanta mana harkakurqachu? (Qawaytaq dibujotapas).

¹³ Jesustaqariki amigollanmi traicionarurqa, mana allin runata hina hapiruspankum insultarqaku, yanqamantam tumparqaku, hinaspapas wañunanpaq sentenciaruspankum llumpayta maqarqaku. Chaymantañataqmi qiruman warkuruspa soldadokuna wañurachirqaku. Jesusqa taytanta kasukusqanraykum tukuyta aguantarqa. Chaywanpas taytanpa sunqunmi astawan nanarqa llumpayta ñakarichisqankuta qawamuptin. Anchata kuyaspanpas hinaspa ancha atiyniyuq kaspanpas manam churin ñakarinantaqa harkakurqachu. ¿Imanasqa? Anchata kuyawasqanchikraykum. Jesusmi nirqa: “Diosqa ancha-anchatam runakunata kuyarqa, chaymi sapallan churinta kachamurqa haykam paypi iñiqqa mana wañunanpaq, aswanqa wiñaypaq kawsakunanpaq”, nispa (Juan 3:16).

14. ¿Imatam Jesuspa wañukusqanwan yachanki?

¹⁴ Jesuspa wañukusqanwanmi yachanchik huchayuq runa kachkaptinchikpas Diosqa Adanpa mirayninkunata ancha-anchata kuyawasqanchikta. Qamtapas Diosqa anchatam kuyasunki. Payqariki huchamantawan wañuymanta librasunaykipaqmi churin Jesus wañunanta saqirqa sunqun anchata nanachkaptinpas (1 Juan 4:​9, 10). Huchayuq kachkaptinchikpas Diosqa llapallanchiktam yanapayta munawanchik payta servinapaq. Munantaqmi hamuq tiempopiqa manaña huchayuq kananchiktapas.

15. ¿Imatam ruwananchik Jesuspa wañukusqanwan pampachasqa kanapaq?

¹⁵ Kuyasqan churin Jesuspa wañukusqallanwanmi Diosqa huchanchikta pampachawanchikman. Ichaqa, ¿imatam ruwananchik Dios pampachawananchikpaq? Chaymantam bautizaq Juanpas hinaspa Jesuspas nirqaku: “Diospa gobiernon hichparamusqanraykuyá huchaykichikmanta wanakuychik”, nispa (Mat. 3:​1, 2; 4:17). Chaynaqa, huchanchikmantam wanakunanchik Diosninchikman asuykuyta hinaspa pampachawananchikta munaspaqa. Ichaqa, ¿imaynataq wanakuyqa? ¿Imaynatam pantaq kachkaspapas wanakuspaqa Diospa sunqun kusichiyta atichwan? Chaymantam qatiqnin yachachikuypi yachasunchik.