KUNAN punchaw runakunaqa bibliapa nisqanman hinam manaña agradecekuq kanku, chayna runakunaqa mana allin qawasqam kanku (2 Tim. 3:2). Chayraykum sapakama qawakunanchik imayna runa kasqanchikta.

Jehova Diosqa agradecekuq kananchiktam munan (Col. 3:15; 1 Tes. 5:18). Chayna kayqa allinninchikpaqmi, ¿imaynanpi? Chaymantayá yachaykusun.

Imatapas quykuwaptinchikqa utaq yanapaykuwaptinchikqa kusisqam tarikunchik, ¿imanasqa? Kuyawaspanchik quykuwasqanchikraykum utaq yanapaykuwasqanchikraykum. Agradecekuq kaptinchikqa kusisqam tarikunqa chay yanapaykuwaqninchik runapas, ñuqanchikpas kusisqataqmi tarikusun. Bibliapas willawanchikmi Booz sutiyuq runa yanapaykuptin Rut sutiyuq warmi ancha kusisqa tarikusqanmanta (Rut 2:10-13).

Puntataqa Jehova Diostam agradecekunanchik, tukuy ima quwasqanchikmanta hinaspa tukuypi yanapawasqanchikmanta (Deut. 8:17, 18; Hech. 14:17). Manam iskay-kimsa kutikamallachu Jehova Diostaqa agradecekunanchik. Aswanqa tukuy tiempom yuyaymanananchik ñuqanchikta chaynataq ayllunchikta yanapawasqanchikpi. Chaykunapi yuyaymanaspaqa manam iskayrayasunchu Jehova Dios kuyawasqanchikmantaqa (1 Juan 4:9).

Jehova Diospa yanapawasqanchikpi yuyaymanaspapas mañakuspam agradecekunanchik (Sal. 100:4, 5). Agradecekuq kayqa yanapawasunmi kusisqa kanapaq.

Agradecekuq kaspaqa riqsinakusqanchikkunawanmi huk sunqulla kasunchik. Imapas ruwaykapuwasqanchikmanta agradecekuptinchikqa kusisqam tarikunqaku, hinaspapas riqsinakusqanchik kaqkunawanmi astawan kuyanakusun (Rom. 16:3, 4). Chaymantapas agradecekuq runaqa payta yanapaykusqankuman hinam hukkunata yanapanqa. Chayna kaspanqa kusikuytam tarinqa, Jesuspas nirqam: “Imapas quqmi aswan kusisqaqa imapas chaskiqmantaqa”, nispa (Hech. 20:35).

Huk yachaysapa runapas nirqam: “Ichapas wakinpiqa yanapaykuwasun utaq ñuqanchikpas yanapaykunanchik kanqa”, nispa. Chayna yanapanakuspaqa allinmi kawsakusun (1 Cor. 12:21). Chaynaqa, hukkuna imapipas yanapaykuwaptinchikqa, ¿agradecekunchikchu?

Agradecekuq kaspaqa, sasachakuypi tarikuspapas manam chaypi umayuqllañachu  kasun. Aswanqa hawkallam tarikusun. Apostol Pablopas nirqam: “Señorninchikraykuyá tukuy tiempo kusikuychik”, nispa (Filip. 4:4).

Chaymantapas agradecekuq kaspaqa manam hukpa kaqtaqa munapayasunchu, manataqmi chayllaqa imawanpas piñakusunchu. Agradecekuq kaspaqa manam tukuy imayuq kaytaraqchu munasun, aswanqa kapuqllanchikwanmi kusisqa kawsakusun (Filip. 4:12).

Satanasqa imapas sasachakuyninchikkunawan llakisqallaña kananchiktam munan, chaynapi manaña Diosmanta willakunanchikpaq. Agradecekuq kaymi ichaqa yanapawanchik kusisqa kananchikpaq, chaynataq imaña-haykaña kaptinpas Jehova Diosllapi hapipakunanchikpaq (Gal. 5:22, 23).

Yachanchikmi agradecekuq kayqa allinninchikpaq kasqanta, ichaqa pantaq runa kasqanchikraykum agradecekuytaqa qunqaruchwan. Chaywanpas agradecekuq kaytaqa atichwanmi. Chaypaqqa sapa punchawmi yuyaymanananchik Jehova Diospa yanapaykuwasqanchikpi hinaspa runamasinchikkuna imachallatapas ruwaykapuwasqanchikpi. Chaymantapas qillqachwanmi pim yanapaykuwasqanchikta, chaynapi agradecekunapaq.

Yachaysapa runakunapas ninkum agradecekuq runaqa sasachakuyniyuq kaspapas kusisqa tarikusqanmanta. Chaynaqa agradecekusunyá tukuy imamanta. Bibliapas ninmi: “Tukuy imamantayá Diosman graciasta quychik”, nispa (1 Tes. 5:18; 1 Cron. 16:34).