1. ¿Imatam Jehova Diosqa prometewanchik?

 JEHOVA DIOSQA niwanchikmi wiñay kawsayta haypanamanta. Wakin serviqninkunam hanaq pachapi kawsanqaku (1 Cor. 15:50, 53). Wakiqninchikñataqmi mana unquspa kusisqa kay pachapi kawsakusunchik (Apoc. 21:3, 4). Chaynaqa, hanaq pachapaq kaspapas utaq kay pachapaq kaspapas llapallanchikmi kusikunchik Jehova Dios allinña kawsakunapaq niwasqanchikmanta.

2. ¿Imanasqataq mana iskayrayanchikchu promesankunata Dios cumplinanmanta?

² Hamuq tiempomanta bibliapi nisqankunaqa cumplikunqam, chaymantaqa manam iskayrayanchikchu Jehova Dios niwasqanchikrayku (Rom. 15:13). Tukuy ima nisqantaqa sumaqtam yachanchik, payqa cumplinqapunim (Num. 23:19). Diospaqa makillanpim kachkan nisqankunata cumplinanpaqqa. Chaynaqa, suyachkanchikqa manam imapas mana kaqtachu, aswanqa cumplikuq kaqkunatam.

3. ¿Imamantam yachasunchik kay yachachikuypi? (Rimarimuytaq Salmos 27:14 nisqanmantapas).

³ Diosninchikqa kuyawasqanchikraykum munan paypi hapipakunanchikta (leey Salmos 27:14). Diosllapi hapipakuspaqa imaña-haykaña kaptinpas hawkallam, kusisqallam hamuq tiempota suyasunchik. Kay yachachikuypim yachasunchik hamuq tiempopaq suyasqanchikkuna imaynata yanapawasqanchikmanta. Puntatam yachasunchik hamuq tiempopaq suyasqanchikkuna imaynanpi botepa llasaq fierron hina kasqanmanta chaynataq casco hina kasqanmanta. Chaymantañataqmi yachasunchik chaykunamanta mana iskayrayanapaq imata ruwanamanta.

4. ¿Imaynanpitaq suyasqanchik kaqkunaqa botepa llasaq fierron hina? (Rimarimuytaq Hebreos 6:19 nisqanmantapas).

⁴ Hebreo iñiqmasinkunaman qillqaspanmi apostol Pablo  ­nirqa suyasqanchik kaqkunaqa botepa llasaq fierron hina kasqanta (leey Hebreos 6:19). Payqa botepi illasqanraykum yacharqa chay llasaq fierroqa boteta hapisqanta. Huk kutipim botepi illachkaptin llumpay wayra rikuriramuptin boteta apaq runakuna chay llasaq fierrokunata chuqarqaku, chaynapi boteta rumiman wayra mana chamcharunanpaq (Hech. 27:29, 39-41). Suyasqanchik kaqkunapas botepa llasaq fierron hinam, yanapawanchikmi imaña-haykaña kaptinpas Diosmanta mana karunchakunapaq. Yanapawanchiktaqmi hamuq tiempopi allinña kawsakunamanta mana iskayrayanapaqpas. Jesuspasriki nirqam kunan tiempopiqa ñakarichisqa kananchikmanta (Juan 15:20). Chaynaqa hamuq tiempopi yuyaymanayqa yanapawanchikmi hinalla ñawpaqman rinapaq.

5. ¿Imataq Jesusta yanaparqa wañunanta yachachkaptinpas?

⁵ Jesustapas suyasqan kaqkunaqa yanaparqam wañunanta yachachkaptinpas. 33 watapim Pentecostes punchawpi, Jesus imayna tarikusqanmanta apostol Pedro Salmos qillqapi leerqa, chaypim nin: “Confianzallawanña suyaspaymi kawsakusaq. Cuerpoytaqa manamá wañusqakunapa kasqanpiqa saqirunkichu, amataqmi cuerpoy ismunantaqa saqinkichu, ñuqaqa tukuy sunquwanmi kasukuyki [...], kuyawaspaykim sunqullayta kusikuywan qayllaykipi huntaykunki”, nispa (Hech. 2:25-28; Sal. 16:8-11). Wañunanta yachachkaspanpas Jesusqa manam iskayrayarqachu taytan kawsarichinanmantaqa hinaspa hanaq pachaman kutispa taytanpa waqtanpi kananmantaqa (Heb. 12:2, 3).

6. ¿Imatataq iñiqmasinchik nirqa suyasqanchik kaqkunamanta?

⁶ Achka iñiqmasinchikkunatam suyasqanchik kaqkunaqa yanaparqa tukuy imata aguantanankupaq. Inglaterra nacionpi iñiqmasinchik Leonard Chinntapas yanaparqam. Paytaqa punta kaq hatun guerrapim carcelman hinarurqaku militar kayta mana munasqanrayku. Manam munarqakuchu piwanpas rimananta, hinaspam mana atisqan llamkaykunapi llamkachirqaku. Chaymanta tiempo pasaruptinmi nirqa: “Aguantanapaqqa tukuy ima suyasqanchikmi yanapawasqanchik. Arí, aguantanaypaqmi yanapawarqa Jesuspa imayna kasqan, apostolkunapa imayna kasqan, Diosmanta willakuqkunapa imayna kasqan chaynataq bibliapi wakin willakuykuna”, nispa. Iñiqmasinchik Leonardpaqqa tukuy ima suyasqankunaqa botepa llasaq fierron hinam karqa. Chaynayá ñuqanchikpaqpas kachun.

7. ¿Imaynam kanchik sasachakuykunata aguantaspaqa? (Rimarimuytaq Romanos 5:3-5; Santiago 1:12 nisqanmantapas).

⁷ Suyasqanchik kaqkunapim astawan hapipakunchik sasachakuykunapi kaspa chaynataq Jehova Dios yanapawaptinchik (leey Romanos 5:3-5; Santiago 1:12). Chayraykum tukuy ima suyasqanchikkunamantaqa mana iskayrayanchikchu. Satanasqa tukuy imawanmi sasachawanchik, ichaqa Jehova Diospa yanapakuyninwanmi chaykunataqa aguantanchik.

8. ¿Imaynanpitaq suyasqanchik kaqkunaqa casco hina? (Rimarimuytaq 1 Tesalonicenses 5:8 nisqanmantapas).

⁸ Bibliapim nin suyasqanchik kaqkunaqa casco hina kasqanmanta (leey 1 Tesalonicenses 5:8). Soldadoqa cascowanqa churakuq umanta mana pakirunankupaqmi, yaqa chaynam suyasqanchik kaqkunapas yanapawanchik satanaspa piensasqanman hina mana piensananchikpaq. Satanasqa sapa punchawmi tukuy imawan yuyayninchikta yanqachayta munan. Chaymi tukuy ima suyasqanchikkunaqa Diosman sunqu kanapaq yuyayninchikpi yanapawanchik.

9. ¿Imaynataq kanku Diospa nisqankunata mana kaqpaqpas hapiq runakunaqa?

⁹ Wiñay kawsayta suyasqanchikqa yanapawanchikmi imatapas allinta tantianapaq. Ichaqa piensasqallanchikpi hapipakuspaqa imapas suyasqanchikmantam iskayrayayta qallaykuchwan. Chaynam pasarurqa Corinto llaqtayuq Diosta serviqkunatapas. Paykunaqa kawsarimuymanta Diospa nisqanmantam iskayrayayta qallaykurqaku (1 Cor. 15:12). Chaymi Pablo nirqa chaymanta iskayrayaqkunaqa aychaman hina kusirikunallankupaq kawsasqankuta (1 Cor. 15:32). Kunan tiempopi runakunatapas Diospa nisqankunaqa manam imapas qukunchu. Chayraykum aychaman hina kusirikuykunallapi kanku. Ñuqanchikmi ichaqa Diospa nisqankunamantaqa mana iskayrayanchikchu. Suyasqanchik kaqkunaqa casco hinam allin yuyayniyuq kanapaq hinaspa Dioswan kuyachikunapaq yanapawanchik (1 Cor. 15:33, 34).

10. ¿Imaynatataq suyasqanchikkunaqa yanapawanchik llullakunata mana allinpaq hapinapaq?

¹⁰ Tukuy ima suyasqanchikkunaqa yanapawanchiktaqmi Diospa munasqanman hina kawsakuyqa allin kasqanmanta mana iskayrayanapaq. Ichapas pipas ninman: “Ñuqaqa manam wiñay kawsaytaqa haypaymanchu, ñuqaqa manam allin ruwaqchu kani, Diospa munasqanman hina kawsaytaqa manam atiymanchu”, nispa. Elifazpas yaqa chaynatam Jobta nirqa, nirqam: “¿Yaqachu wañuqlla runaqa chuya kanman?”, nispa. Nirqaraqmi: “Diosqa angelninkunamantapas iskayrayanmi, hanaq pachapas Diospaqqa manam chuyachu”, nispa (Job 15:14, 15). ¡Chay nisqanqa llullamá karqa! Satanasmi chayna piensananchiktaqa munan. Chaynata piensaspa suyasqanchikkunamanta iskayrayananchiktam munan. Chaynaqa, chayna piensaykunata saqispayá Diospa nisqankunapi hapipakusun. Amayá iskayrayasunchu Diosninchik wiñaypaq kawsakunanchikta munasqanmantaqa chaynataq chayta haypanapaq yanapawananchikmantaqa (1 Tim. 2:3, 4).

11. ¿Imaynanpitaq pacienciawan suyananchik Diospa niwasqanchikkuna chayamunankama?

¹¹ Wakinpiqa suyasqanchikkunamantam iskayrayayta qallaykuchwan Diospa nisqankuna unamusqanrayku. Ichaqa Diosninchikqa wiña-wiñaypaq kasqanraykum mana ñuqanchik hinachu tiempotaqa qawan (2 Ped. 3:8, 9). Payqa nisqankunataqa cumplinqapunim, ichaqa manapaschá munasqanchik horapichu. Chaynaqa, ¿imataq yanapawachwan Diospa niwasqanchikkuna chayamunankama pacienciawan suyanapaq? (Sant. 5:7, 8).

12. ¿Imatam ruwananchik suyasqanchikkunata chaskinapaq Hebreos 11:1, 6 nisqanman hinaqa?

¹² Jehova Diospi hapipakuspaqa manam iskayrayasunchu suyasqanchik kaqkunamantaqa. Tukuy ima suyasqanchikkunata chaskinapaqqa Diosllapim hapipakunanchik. Payqariki ‘maskaqninkunaman pagapuqmi’ (leey Hebreos 11:1, 6). Jehova Diospi astawan hapipakuspaqa manam iskayrayasunchu nisqankunata cumplinanmantaqa. Chaynaqa, ¿imatataq ruwachwan Dioswan astawan kuyachikunapaq chaynapi suyasqanchikkunamanta mana iskayrayanapaq?

13. ¿Imaynatataq Dioswan kuyachikuyta atichwan?

¹³ Jehova Diosta mañakuspayá palabranta leesun. Diostaqa manam rikunchikchu, ichaqa paywan kuyachikuytaqa atichwanmi. Mañakuspanchikmi paywan rimachwan, payqariki uyariwasunmi (Jer. 29:11, 12). Imapas niwasqanchiktañataqmi uyarinchik palabranta leespanchik chaynataq yuyaymanaspanchik. Ñawpaq tiempopi serviqninkunata waqaychasqanmanta  yachasqanchikmi yanapawanchik suyasqanchikkunamanta mana iskayrayanapaq. Diospa palabranpi tukuy ima qillqa­kusqanqa yachachiwananchikpaqmi qillqasqa kachkan. “Chaynapi tukuy imata aguantaspanchik hinaspa Diospa qillqanwan sunqunchikta tiyaykachispanchik Diospa quwananchikta suyananchikpaq” (Rom. 15:4).

14. ¿Imaynanpitaq yuyaymanananchik hukkunapaq Diospa ruwasqanpi?

¹⁴ Yuyaymanasunyá imapas nisqanta Dios cumplisqanpi. Rimarisunyá Abrahanmantawan Saramanta. Paykunaqa yuyaqña kasqankuraykum manaña atirqakuchu churi-wawayuq kaytaqa, ichaqa Diosmi nirqa warmachanku kananmanta (Gen. 18:10). ¿Imaynataq Abrahanqa tarikurqa chaynata niptin? Bibliapim nin: “Manam iskayrayarqachu achka nacionkunapa taytan hina kananmantaqa”, nispa (Rom. 4:18). Runapa qawasqanman hinaqa chayqa manam atikurqachu. Ichaqa Abrahanqa Jehova Diospa nisqanmantaqa manam iskayrayarqachu, Diosqa cumplirqamá prometesqantaqa (Rom. 4:19-21). Abrahanmanta bibliapi nisqanwanmi yachanchik Jehova Diosqa imapas nisqanta cumpliq kasqanta.

15. ¿Imaynanpitaq yuyaymanananchik ñuqanchikrayku Diospa ruwasqankunapi?

¹⁵ Yuyaymanasunyá ñuqanchikrayku Je­hova Diospa tukuy ima ruwasqanpi. ¿Yu­yaymanarqanchikñachu Diospa nisqankuna ñuqanchikpi imaynata cumplikusqanpi? Jesus­mi nirqa taytanqa pisipuwaqninchikkunata quwananchikmanta (Mat. 6:32, 33). Nirqataqmi mañakuqninkunataqa atiyninwan yanapawananchikmanta (Luc. 11:13). Jehova Diosqa chay nisqankunataqa cumplirqapunim. Manam chayllatachu cumplirunqa, cumpliruntaqmi pampachawananchikmanta niwasqanchiktapas, ­sunqunchikta  ­tiyaykachinanmanta niwasqanchiktapas chaynataq tiempollanpi mikuchichkaq hina yachachiwananchikmanta niwasqanchiktapas (Mat. 6:14; 24:45; 2 Cor. 1:3). Ñuqanchikrayku Diospa ruwasqankunapi yuyaymanaspaqa manam iskayrayasunchu suyasqanchik kaqkunamantaqa.

16. ¿Imaynanpitaq suyasqanchikkunaqa kuyakuyninpi Diospa quwasqanchik?

¹⁶ Wiñay kawsayqa kuyakuyninpi Diospa quwasqanchikmi, munachkanchikñamá chay punchaw chayamunanta. Manataqmi iskayrayanchikchu chay punchaw chayamunanmantaqa. Suyasqanchik kaqkunaqa botepa llasaq fierron hinam. Sasachakuykunapi kaptinchik, chiqnisqa kaptinchik hinaspa wañuypa patanpi kaptinchikmi aguantanapaq yanapawanchik. Suyasqanchik kaqkunaqa rikchakuntaqmi cascomanpas, yanapawanchikmiriki allin yuyayniyuq kaspa mana allinkunata qipanchanapaq chaynataq allin kaqkunata ruwanapaq. Suyasqanchik kaqkunaqa yanapawanchikmi Diosman astawan asuykunapaq chaynataq kuyawasqanchikmanta mana iskayrayanapaq. Suyasqanchikkunamanta mana iskayrayaspaqa allinmi kasun.

17. ¿Imaynanpitaq kusikunchik suyasqanchikkunarayku?

¹⁷ Roma nacionpi iñiqmasinkunaman qillqaspanmi apostol Pablo nirqa: “Hamuq punchawkunapi imam chaskinaykichikmantayá anchata kusikuychik”, nispa (Rom. 12:12). Pabloqa kusikurqa Diosman sunqu kaspanqa hanaq pachapi wiñay kawsayta chaskinanraykum. Ñuqanchikpas kusikunchikmi suyasqanchikkunarayku. Jehova Diosqariki nisqankunataqa cumplinqapunim. Salmos qillqaqpa nisqanman hinapas “mayna kusisqam Jehova Diospi hapipakuq runaqa [...]. Payqa nisqanman hina haykapipas ruwaqmi” (Sal. 146:5, 6).