BIBLIAPIM riman kamachiq Belsasarmanta, runakunam ichaqa nirqaku Belsasar runaqa mana haykapipas kawsasqanmanta (Dan. 5:1). Chaytaqa nirqaku Belsasarmanta 1854 watakama imallatapas mana yachasqankuraykum.

1854 watapim ichaqa Inglaterra nacionniyuq ancha riqsisqa runa yacharurqa Belsasarqa ñawpaq tiempopi kawsakusqanta. Payqa Belsasarmanta qillqasqankutam tarirurqa, chay qillqasqankuqa kasqa makinchikpa kaman suytu rumichapi hinam. Chayqa llinku mitumanta ruwasqam kasqa. Chaypim rimasqa Belsasarmanta chaynataq taytan Nabonidomantapas. Chaywanqa manañam ima niytapas atirqakuñachu Belsasar mana haykapipas kawsasqanmanta niqkunaqa.

Bibliaqa nintaqmi Belsasarqa Babilonia nacionpa huk kaqnin kamachiqnin kasqanmanta. Wakin runakunam ichaqa nirqaku yanapakuqlla kasqanmanta. Inglaterra nacionniyuq yachaysapa runapas nirqam Belsasarqa taytan Nabonidopa yanapaqnillan kasqanta. Ichaqa, ¿chaynachu karqa? Manam.

Kaqmantam tarirurqaku huk qillqata. Chaypas kasqa llinku mitumantam, sayayninpas kasqa makinchikpa kaman suytu rumicha sayayllam. Chaypim rimasqa Babilonia nacionta kamachiq Nabonidomanta, chaynataq huk lawman pasakusqanmantapas. Chaynaqa Nabonido huk lawpi kanankamaqa, ¿pitaq kamachirqa Babilonia naciontaqa? Huk qillqapim riman kamachiq Nabonido Babiloniamanta huk lawman pasakuspan churin Belsasartaña kamachinanpaq saqisqanmanta, chaynataq wakin runankunatapas churin Belsasarta yanapanankupaq nisqanmantapas. Arí, taytan Nabonido huk lawpi kanankamam Belsasar kamachirqa. Chaymanta sumaqta yachaq runapas nirqam Daniel qillqapi Belsasar kamachiq kasqanta nisqanqa chiqap kasqanmanta.

Ñuqanchikqa manam iskayrayanchikchu bibliapi Danielpa qillqasqanmantaqa. Danielqariki qillqarqa Jehova Dios yanapaptinmi (2 Tim. 3:16).