1, 2. ¿Imakunawanmi achka iñiqmasinchikkuna sasachakunku? Hinaspa, ¿ñuqanchikpas imaynam tarikuchwan chayna sasachakuypi kaspaqa?

MUSULLARAQ iñiqmasinchiktam doctorkuna niykurqaku sasa hampiy atina unquywan unqusqanta. 50 watayuq iñiqmasinchiktañataqmi llamkayninmanta patronnin qarqururqa. Chaymi huk llamkayta maskarqa, ichaqa manam tarirqachu. Yuyaq iñiqmasinchikñataqmi llakisqa tarikurqa sipas kasqanpi hina manaña Jehova Diospaq imatapas ruwaspan.

² Kay iñiqmasinchikkuna hina tarikuspaqa ñuqanchikpas llumpayta hukmanyaruspach mana kaqpaqña hina hapikuchwan. Hinaspapas manaña kusisqa kasqanchikraykum iñiqmasinchikkunamantapas karunchakuyta qallaykuchwan.

3. Satanas hina, ¿imaynam runakunaqa kanku?

³ Satanasqa munan imawanpas ñakarinanchiktam. Chaymi Evatapas nirqa kikinpa munasqanta ruwaspanqa kusisqa kananmanta, ichaqa manam chaynachu karqa. Satanasqa yacharqam Diosta mana kasukuspanqa Eva wañurunanmanta. Satanas hinam kunanpas autoridadkuna, apu runakuna chaynataq pantay religionpi umalliqkunapas runamasinchikkunata manaña llakipayankuchu utaqmi mana kaqpaqta hinaña hapinku.

4. ¿Imamantam kay yachachikuypi yachasun?

⁴ Jehova Diosninchikmi ichaqa munan kusisqa kawsakunanchikta, chaymi sasachakuypi tarikuptinchikpas yanapaykuwanchik (Sal. 136:23; Rom. 12:3). Kay yachachikuypim yachasunchik sasa hampiy atina unquywan unquptinchik, imanchikpas pisipuwaptinchik hinaspa manaña musu-sipas kasqanchikrayku  ñawpaqpi hina imatapas manaña ruwaptinchik Jehova Dios imayna yanapawasqanchikmanta. Manaraq kaykunamanta yachaykuchkaspayá puntataraq yachaykusun Jehova Diosninchik ancha kuyawasqanchikta imayna qawachiwasqanchikmanta.

5. ¿Imanasqataq nichwan Jehova Dios anchata kuyawasqanchikmanta?

⁵ Jehova Diosqa anchata kuyawasqanchikraykum unanchawarqanchik (Gen. 2:7). Kuyawasqanchikraykutaqmi pay hina kuyapayakuq, llakipayakuq hinaspa imatapas qukuykuq kananchikpaq unanchawarqanchik (Gen. 1:27). Chayna unanchasqa kasqanchikraykum ‘ovejakunata, vacakunata, purun animalkunata, pawaq animalkunata, chaynataq lamar quchapi tukuy rikchaq animalkunatapas’ makinchikman churaykurqa waqaychananchikpaq (Sal. 8:4-8).

6. ¿Imaynatawanmi Jehova Diosqa kuyawasqanchikta qawachiwanchik?

⁶ Adanwan Eva huchallikuruptinkupas Jehova Diosqa hinallam runakunataqa kuyawarqanchik. Chayraykum huchanchikmanta pampachawananchikpaq sapallan churinta ñuqanchikrayku wañunanpaq kachamurqa (1 Juan 4:9, 10). Jesus wañukusqanraykutaqmi hamuq tiempopi wañuqkunapas kawsarimunqaku (Hech. 24:15). Chaymantapas Jehova Diosqa kuyawasqanchikraykum unquptinchikpas yanapawasun. Manataqmi qunqawasunchu imanchikpas pisiwaptinchikqa nitaq machu-payayaptinchikpas (Hech. 10:34, 35).

7. ¿Imaynatawanraqmi Jehova Diosqa kuyawasqanchikta qawachiwanchik?

⁷ Jehova Diosqa anchata kuyawasqanchikrayku chaynataq allin sunquyuq kasqanchikta yachasqanraykutaqmi paymanta allinta yachananchikpaq yanapaykuwarqanchik (Juan 6:44). Bibliapas niwanchikmi ‘Diosman asuykuptinchikqa paypas asuykuwananchikmanta’. Arí, Diosqa paymanta chayllaraq yachayta qallaykusqanchikmantapacham tukuypi yanapawarqanchik (Sant. 4:8). Kunankamapas hinallam Jehova Diosqa tukuy imawan yanapallawachkanchik. Pantaptinchikpas kuyawasqanchikraykum rimapayaykuwanchik (Prov. 3:11, 12). Tukuy kaykunawanmi musyanchik taytanchik Jehova Diosqa anchata kuyawasqanchikta.

8. Salmo 18:27-29 nisqanqa, ¿imaynatam yanapawanchik sasachakuypi tarikuptinchik?

⁸ Kamachiq Davidqa manam iskayrayarqachu Jehova Dios kuyasqanmatawan yanapasqanmantaqa. Chaymi payqa hukkuna yanqamanta kamiptinpas mana chayllaqa hukmanyarurqachu (2 Sam. 16:5-7). Ñuqanchikpas manam iskayrayananchikchu Jehova Dios ima sasachakuypiña tarikuptinchikpas yanapaykuwananchikmantaqa (qaway Salmo 18:27-29). Jehova Diospa yanapayninwanqa imaña-haykaña kaptinpas kusisqam payta yupaychasun (Rom. 8:31). Qatiqninpiyá yachaykusun unquptinchik, imanchikpas pisipuwaptinchik utaq machu-payayaptinchik imayna Dios yanapawasqanchikmanta.

9. Sasa hampiy atina unquywan unquspaqa, ¿imaynam tarikunchik?

⁹ Sasa hampiy atina unquywan unquspanchikqa muspaypi hinam tarikunchik hinaspapas manam ima ruwaytapas atinchikchu. Pinqakunchiktaqchá chayna unqusqallataña runakuna qawawananchiktapas. Unqusqanchikta runakuna mana yachaptinkupas llakisqam tarikunchik manaña ñawpaqta hinañachu imatapas ruwayta atisqanchikrayku. Ichaqa  Jehova Diosmi yanapaykuwanchik. ¿Imaynata?

10. Proverbios 12:25 nisqanman hinaqa, ¿imam yanapawasun mana llumpayta hukmanyarunapaq?

¹⁰ Unquptinchik pi iñiqmasinchikpas kuyakuywan rimapayaykuwaptinchikqa kallpanchasqam tarikunchik (qaway Proverbios 12:25). Chaynallataqmi Jehova Diospas. Payqa kallpanchasqa tarikunanchikpaqmi bibliawan rimapayawanchik (Sal. 31:19; 41:3). Chaymi sapa punchaw bibliata ñawinchananchik, hinaptinqa Jehova Diosqa yanapaykuwasunmi mana llumpayta hukmanyarunapaq.

11. ¿Imam iñiqmasinchik Jorgeta yanapaykurqa?

¹¹ Iñiqmasinchik Jorgem musu kasqanmantapacha sasa hampiy atina unquywan unqullarqa. Paymi willakun: “Kay unquyqa punchawkuna pasasqanman hinam llumpayta ñakarichiwaq. Chaymi hukmanyasqa tarikurqani. Pinqapakuqtaqmi kani runakuna unqusqallataña qawawaptinkupas. Chayraykum Jehova Diosta tuta-punchaw mañakullaq kani yanapaykuwananpaq”, nispa. ¿Imaynatam Jehova Diosqa yanapaykurqa? Paymi nin: “Biblia ñawinchasqaytaqa chayllam qunqaruq kani, chaymi iñiqmasinchikkuna niwarqaku iskay-kimsa versiculokunallataña ñawinchanaypaq. Niwarqakutaqmi atisqayman hinalla Salmos qillqata ñawinchanaypaqpas, chaypi Jehova Dios llaki sunquyuqkunata imayna yanapasqanmanta qillqasqa kasqanrayku. Salmos qillqataqa sapa punchawmi kuti-kutirispa ñawincharqani. Chaymi yanapawarqa unquyniywan mana llumpayta hukmanyarunaypaq. Iñiqmasinchikkunapas watukamuwaspankum kusisqallataña tariwaqku. Chayna kasqaysi paykunatapas kusichiq. Chaykunawanmi musyakurqani Jehova Diosqa unquptiypas mana qunqaruwasqanmanta”, nispa.

12. ¿Imam yanapawasun Jehova Dios kuyawasqanchikmanta mana iskayrayanapaq?

 ¹² Jehova Diosqa yachanmi imawanpas unquspanchik llumpayta ñakarisqanchikta. Chaymi yanapaykuwananchikpaqqa tuta-punchaw qayakullananchik. Chaymantapas bibliata sapa punchaw ñawinchaspanchikmi yuyaymananchik Jehova Diosqa unquqkunamanta ancha llakikusqanta. Kaykunam yanapawasun Jehova Dios kuyawasqanchikmanta mana iskayrayanapaq (Sal. 84:11).

13. ¿Imaynam tarikuchwan llamkayninchikmanta patronninchik qarquruwaptinchik?

¹³ Wasinpi kaqkunamanta nanachikuqkunaqa munankum imankupas mana pisipunanta. Yuyaymanasun kaypi: Qunqaymantam llamkayninchikmanta patronninchik qarquruwachwan. Huk llamkayta maskaspapas manam tarichwanchu. Chaywanqa llumpaytach hukmanyaruchwan, ¿aw? Chaynaqa, ¿imam yanapawachwan mana chayna tarikunapaq?

14. ¿Imanasqataq Jehova Diosqa tukuy ima nisqanta ruwan?

¹⁴ Jehova Diosqa tukuy ima nisqantam ruwan (Jos. 21:45; 23:14). ¿Imanasqa? Pinqaypi mana qipananraykum. Hinaspapas payqa niwarqanchikñam payman sunqu kaqkunata mana haykaqpas saqiwananchikmanta. Chaynaqa Jehova Diosqa manamá llullakuwachwanchu (Sal. 31:1-3). Chaymantapas niwasqanchikta mana ruwaptinqa iskayrayaytach qallaykuchwan. Taytanchikqa chaytaqa manamá munanchu. Chaymi paytaqa mana imapas harkanchu pisipuwaqninchikta quwananchikpaqqa. Manataqmi imapas harkanchu paymanta hinalla yachanapaq tukuy ima yanapakuykuna quwananchikpaqpas (Mat. 6:30-33; 24:45).

15. (1) Ñawpaq tiempopi iñiqkunaqa, ¿ima sasachakuypim tarikurqaku? (2) Salmo 37:18, 19 nisqanman hinaqa, ¿imamantam mana iskayrayananchikchu?

 ¹⁵ Jehova Dios tukuy ima nisqanta ruwasqanpi yuyaymanaspaqqa, manam iskayrayasunchu imanchikpas pisipuwaptinchik quykuwananchikmantaqa. Ñawpaq tiempopipas Jehova Diosqa Jesuspa qatiqninkunamanmi pisipuqninkunata quykurqa. Chay tiempopim iñiqkunata chiqniqninkuna wañuchiyta munarqaku, chaymi paykunaqa huk law llaqtakunaman ripukurqaku (Hech. 8:1). Paykunaqa mayna llakisqachá tarikurqaku mana wasiyuq, mana chakrayuq chaynataq mana imayuq qiparusqankurayku. Ichaqa Jehova Diosqa manamá paykunataqa qunqarurqachu. Chayraykum paykunaqa sasachakuypi tarikuspankupas kusisqa karqaku (Hech. 8:4; Heb. 13:5, 6; Sant. 1:2, 3). Jehova Diosqa ñuqanchikmanpas pisipuwaqninchiktaqa quykuwasunmi (qaway Salmo 37:18, 19).

16. Machu-payayaruspaqa, ¿imaynam tarikuchwan?

¹⁶ Machu-payayaruspaqa manañam musu-sipas kasqanchikpi hinañachu imatapas ruwanchik, chaymi hukmanyayta qallaykuspa mana kaqpaqta hinaña hapikuchwan. Nichwantaqmi: “Diospas qunqaruwanñam”, nispa. Kamachiq Davidpas machuyaruspanmi chayna tarikullarqa (Sal. 71:9). Chayna hukmanyasqa tarikuptinchikqa, ¿imaynatam Jehova Diosqa yanapaykuwanchik?

17. ¿Imatam yachachwan iñiqmasinchik Yenimanta?

¹⁷ Yuyaqña iñiqmasinchik Yenitas punta apaqkuna niykusqaku huñunakusqanku wasiman rinanpaq. Chaypis yachachinanku kasqa imayna huñunakusqanku wasita allichanankupaq. Ichaqa payqa manas riyta munasqachu. Payqa nikusqas: “Payañam kani, sapallayñataq kanipas. Imaya chaykuna  ruwaytaqa atisaq, yanqañachiki risaqpas”, nispa. Chaywanpas iñiqmasinchikqa rinanpaqsi tantiakurusqa. Ichaqa manaraq richkaspansi Jehova Diosta sunqumanta mañakullasqa. Chay punchawpipas payqa hinallas hukmanyasqa kasqa. Ichaqa chaypi cuentallikuq iñiqmasinchikpa rimarisqansi anchata kallpanchaykusqa. Paymi willakun: “Cuentallikuq iñiqmasinchikmi niwarqaku: ‘Jehova Diosqa anchatam kusikun atisqanchikman hina sunqumanta imachallapipas yanapakuptinchikqa’, nispa. Chayta uyariruspaymi wiqiy atiparuwaptin waqayta qallaykurqani, hinaspapas musyakurqanim iñiqmasinchikpa nisqanwan Diosninchik kallpanchawasqanmanta”, nispa. Yeniqa ninraqmi: “Iskayrayastinmi rirqani, wasiymanmi ichaqa kutirqani kallpanchasqa hinaspa kusisqa”, nispa.

18. Machu-payayaruspapas, ¿atichwanraqchu Jehova Diosta kusichiytaqa, imanasqa?

¹⁸ Machu-payayaspanchikpas atichwanraqmi imachallapipas yanapakuytaqa (Sal. 92:12-15). Jesuspas nirqam tukuy sunqumanta atisqanchikman hina imapipas yanapakuptinchikqa, Jehova Dios anchata kusikusqanmanta (Luc. 21:2-4). Musu-sipas kasqanchikpi hinaña imatapas mana ruwayta atispapas atichwanmi Jehova Diosmanta atisqanchikman hina willakuytaqa. Mañakuchwantaqmi iñiqmasinchikkunapaqpas, hinaspapas iñiqmasinchikkunatam kallpanchachwan hinalla Diosman sunqu kanankupaq. Jehova Dios kusisqa kananpaqqa manam achkataraqchu ruwananchik, aswanqa sunqumanta atisqanchikman hinallam (1 Cor. 3:5-9).

19. ¿Imatam yachachiwanchik Romanos 8:38, 39 nisqanqa?

¹⁹ Kusisqam tarikunchik kuyakuq taytanchik Jehova Diosta yupaychaspanchik. Payqa manam runakuna hinachu mana kaqpaqta hina hapiwanchik. Aswanqa munayninta ruwaspa kusisqa kawsakunanchikpaqmi unanchawarqanchik (Apoc. 4:11). Sasa hampiy atina unquywan unquptinchik, imanchikpas pisiwaptinchik utaq machu-payayaptinchikqa, runakunaqa mana kaqpaqta hinam hapiwanchik. Jehova Diosmi ichaqa mana chaynachu, payqa manam qunqawanchikchu (Heb. 11:16, 38). Bibliapas niwanchikmi imaña-haykaña kaptinpas Jehova Diospa kuyakuyninmantaqa mana imapas rakiwananchikmanta (qaway Romanos 8:38, 39).