1. ¿Imanasqataq huñunakuypi rimariyta munanchik?

 ¿IMANASQAM huñunakuykunaman rinchik? Jehova Diosta hatunchanapaqmi (Sal. 26:12; 111:1). Huñunakuypitaqmi kay sasallaña punchawkunapi iñiqmasinchikkunawan kallpanchanakunchik (1 Tes. 5:11). Arí, huñunakuypiqa rimariyta munanchik Jehova Diosta hatunchanapaqmi chaynataq iñiqmasinchikkunata kallpanchanapaqmi.

2. ¿Ima yachachikuykunapim huñunakuyninchikpi rimarichwan?

² Sapa semanam huñunakuypi makinchikta huqarispa rimarichwan. Rimarichwanmi Willakuq qillqanchikta estudiaspanchik utaq chawpi semanapi “Ima yachachikuykunatam tariramunchik” niqpi utaq “Qillqanchikmanta yachanapaq” niqpi utaq huk yachachikuykunapipas.

3. (1) ¿Imakunaraykutaq sasachakuchwan huñunakuypi rimariyta? (2) ¿Imaynatam Hebreos 10:24, 25 nisqan yanapawachwan?

³ Huñunakuyninchikpi rimarispanchikqa lliwmi Jehova Diosta hatunchayta munanchik chaynataq iñiqmasinchikkunata kallpanchaytapas. Chaywanpas kaykunawanmi sasachakuchwan: Ichapas manchapakuq kasqanchikrayku makinchiktaqa mana huqarinchikchu utaq maynataña makinchikta huqariptinchikpas yachachimuq rimarinanchikpaq mana niwanchikchu. Kaykunawan sasachakuptinchikqa apostol Pablopa hebreo kasta iñiqkunaman carta qillqasqanpi yachachikuymi yanapawachwan. Paymi qillqaspan nirqa huñunakuykunapi ‘llapallanchik astawan kallpanchanakunamanta’ (leey Hebreos 10:24, 25). Huñunakuypi imachallatapas rimarisqanchik hukkunata kallpanchasqanta yuyarispaqa manañam  llumpaytaqa manchapakusunchu makinchik huqariytaqa. Hinaspapas, achka kutita mana rimarispanchikpas kusikusunchikmi hukkunapas huñunakuypi rimarisqankuwan (1 Ped. 3:8).

4. ¿Imakunamantam kunan yachasunchik?

⁴ Kay yachachikuypim yachasunchik aslla huñunakuspaqa rimarisqanchikwan imaynata kallpanchanakunamanta. Aslla huñunakuspaqariki astawan rimariytam atichwan. Chaymantapas, yachasunchikmi achka huñunakuspañataq rimariyta lliw munaptinku imaynata kallpanchanakunamanta. Tukunapaqñataqmi yachasunchik kallpanchanakunapaq hina imaynata rimarinamanta.

5. ¿Imatam ruwachwan aslla huñunakuspanchikqa kallpanchanakunapaq?

⁵ Aslla huñunakuspankuqa iskay-kimsallam rimarinankupaqqa makinkuta huqarinku. Wakinpiqa yachachimuqmi unaychataraq suyan pipas makinta huqarinanpaq. Chaymi huñunakuyqa unanman. Chaywanqa wakinqa hukmanyanmankum. ¿Imatam ruwachwan aslla huñunakuspanchikqa? Chayna kaptinqa achka kutikama makinchikta huqarinapaqyá kallpanchakusunchik. Chayta qawawaspanchikmi hukkunapas makinkuta huqariyta munanqaku.

6, 7. ¿Imatam ruwawaq huñunakuypi rimarinaykipaq manchapakuq kaspaykiqa?

⁶ Wakinkupam huñunakuypi rimarinankumanta piensaptillankuraq cuerponkupas “¡ras!” ninraq. Qamtapas chayna pasasuptikiqa ¿imatam ruwawaq? Rimarispa mana llumpayta manchapakunaykipaqmi yanapakuykunata maskawaq, chaynapi rimarispayki hukkunata kallpanchanaykipaq.

⁷ Chayna yanapakuytam tariwaq pasaq watakunapi lluqsimuq Willakuq b qillqanchikpi, chaypim kallpanchawanchik allinta preparakunapaq (Prov. 21:5). Leesqaykita allinta entiendespaykiqa mana manchapakuspam makikita huqarinki. Chaymantapas pisi rimayllapim rimariwaq (Prov. 15:23; 17:27). Pisillata rimaspaykiqa manam llumpaytaqa manchapakunkichu. Iñiqmasinchikkunapas rimasqaykitaqa chayllam entiendenqaku. Entiendesqaykiman hina iskay-kimsa rimayllawan rimariptikiqa iñiqmasinchikkunam yachanqaku allinta preparakusqaykita chaynataq entiendesqaykita.

8. ¿Imaynam Jehova Diosqa tarikun huñunakuypi rimarinaykipaq kallpanchakusqaykiwan?

⁸ Kay yachachikuyman hina ruwaspaykipas hinallaraq manchakusqaykirayku huk utaq iskay kutillata rimarispaykiqa, ¿imataraq ruwanaykipaqmi tantiakuwaq? Jehova Diosninchikqa kusikunmi atisqaykiman hina rimarinaykipaq kallpanchakusqaykiwanqa, amayá chaytaqa qunqaychu (Luc. 21:1-4). Payqa atisqallaykita ruwanaykitam munan (Filip. 4:5). Chaynaqa, huñunakuypi atisqallaykiman hina rimarinaykipaqyá tantiakuy, chaytayá ruway. Amataqyá qunqaychu Jehova Diosta hawkayayta qusunaykipaq mañakuytapas. Qallarinaykipaqqa pisi rimayllapi sapa huñunakuypi rimarinaykipaqmi kallpanchakuwaq.

9. Huñunakusqanchikpi achka iñiqmasinchikkuna kaptinqa, ¿imataq pasanman rimariyta munaptinchikpas?

⁹ Congregacionnikipi achka huñunakuspaqa, yaqapas achka rimariyta munasqankurayku qamqa manaña anchatachu rimariyta  atiwaq. Rimarisunchik iñiqmasinchik Danielamanta. c Payqa anchatam munan sapa huñunakuypi rimariyta. Payqa huñunakuykunapi rimarinanpaqmi kallpanchakun Jehova Diosta hatunchananrayku, hukkunatapas kallpanchananrayku chaynataq bibliapi yachachikuykunata mana qunqananrayku. Ichaqa, achka iñiqmasinchikkunapa kasqanpiña huñunakuyta qallaykuptinqa makinta achka kutikama huqariptinpas wakinpiqa yachachimuqqa manam niqchu rimarinanpaq. Chaymi willakun: “Chaywanqa hukmanyasqam tarikurqani, manañapas imapipas yanapakuchkaq hinam tarikurqani. Huñunakuypi rimarinaypaq makiyta achka kutita huqarichkaptiypas yachachimuq rimarinaypaq mana niwaptinmi wakinpiqa piensaq kani ‘llullantam mana munanchu rimarinayta”, nispaña.

10. ¿Imatam ruwawaq huñunakuypi hukllatapas rimariyta munaspaykiqa?

¹⁰ ¿Danielata hinachu haykallapipas pasasurqanki? Chayna pasasuptikiqa nirqankipaschá: “Manañam rimasaqchu, uyariyllañam-uyarikusaq”, nispa. Amayá chaywanqa hukmanyaychu. ¿Imatataq ruwawaq huñunakuypi hukllatapas rimariyta munaspaykiqa? Amayá rimarinaykipaqqa hukllataqa preparakuychu, aswanqa achkatayá. Chaynapim punta kaq parrafokunapi mana rimarispaykipas qatiqninkunapi rimariyta atiwaq. Willakuq qillqanchikta preparakuspaykiqa sapa parrafota leespaykiyá yuyaymanay imaynata lliw yachachikuywan tupasqanpi. Chaynapim imallatapas rimariyta atinki. Huñunakuypi rimarinaykipaqqa sasa entiendena parrafokunatapas allintam preparakuwaq (1 Cor. 2:10). Sasa entiendena parrafokunapiqariki manam lliwchu rimarinankupaq makinkuta huqarinku. Chaywanpas achka semanaña huñunakuypi rimarinaykipaq yachachimuq mana nisuptikiqa ¿imatam ruwawaq? Huñunakuy manaraq qallaykuchkaptinmi yachachimuqta niwaq ima parrafopi rimariy munasqaykita.

11. ¿Imatam ruwananchik Filipenses 2:4 nisqanman hinaqa?

¹¹ (Leey Filipenses 2:4). Apostol Pablom iñiqkunata kallpancharqa wakinkupa allinninta maskanankupaq. ¿Imaynatam chay nisqanta kasukuchwan huñunakuypi kaspa? Yuyarinanchikmi  wakinkupas rimariy munasqankuta.

12. ¿Imata ruwaptinchiktaq iñiqmasinchikkunaqa huñunakuypi kallpanchasqa tarikunqaku? (Qawaytaq fototapas).

¹² Amistadninchikkunawan rimaspaqa manam ñuqallanchikchu rimanchik, aswanqa paykunatapas uyariykuytam munanchik. Chaynam huñunakuyninchikpipas llapallankupa rimarisqanta uyariyta munanchik. Chaymi iñiqmasinchikkuna rimarinankupaqqa mana sapa kutichu makinchikta huqarinanchik. Rimarinankupaq saqiptinchikqa kusisqam hinaspa kallpanchasqam tarikunqaku (1 Cor. 10:24). Hukkunapas rimarinankupaq imakuna ruwanamantayá yachaykusun.

13. ¿Imatam ruwachwan wakin iñiqmasinchikkunapas rimarinankupaq?

¹³ Pisillapim rimarinanchik, chaynapi wakin iñiqmasinchikkunapas rimarinankupaq. Chaypaqmi kallpanchakunanku punta apaqkuna hinaspa unayña testigo kaqkuna, chaynapi hukkunapas qatipakunankupaq. Hinaspapas, rimarispanchikqa manam parrafopi lliw ima nisqantachu rimarinanchik. Parrafopa nisqanta lliwta rimaruptinchikqa manañam wakinku rimarinanpaq kanqachu. Chaynaqa kay parrafopa nisqanman hinaqa, rimarispaqa pisillapim rimarinanchik hinaspapas manam tukuy imamantachu rimana. Sichu puntamanta yachachimuq nisunki kay parrafomanta rimarinaykipaq hinaptinqa hukllanmantam rimariwaq, chaynapi hukninmanta pipas rimarinanpaq.

14. ¿Imapim piensarinanchik makinchikta manaraq achka kutikama huqarichkaspa? (Qawaytaq fototapas).

¹⁴ Huñunakuypi rimarinanchikpaq manaraq achka kutikama makinchikta huqarichkaspam piensarinanchik hukkunapas rimarinankupi. Achka kutita makinchikta huqariptinchikqa puntamanta yachachimuqmi piensanman: “Hinataña rimarinanpaq qusaq”, nispa. Hinaptinmi ñuqallanchiktaña niwachwan rimarinapaq manaraq hukkuna rimarichkaptinpas. Chaymantapas wakinmi piensayta  qallaykunmanku “amañapas makiyta huqarisaqñachu” nispa (Ecl. 3:7).

15. (1) ¿Imaynam mana kananchikchu huñunakuykunapi mana rimarispaqa? (2) ¿Yachachimuq iñiqmasinchikqa imatam yuyarinan? (Qaway “ Tapunallapaq kaptin yachachikuykunata imayna ruwanamanta” niqta).

¹⁵ Huñunakuypi rimarinankupaq achka iñiqmasinchikkuna makinkuta huqariptinkuqa manapaschá achka kutikamachu rimarisun. Wakinpiqa manapaschá ni huk kutillatapas rimarinapaqqa niwasunchu makinchikta huqarichkaptinchikpas. Chay llakichiwaptinchikpas manam piñakurunanchikchu (Ecl. 7:9).

16. ¿Imatam ruwananchik huñunakuypi rimariqkunata kallpanchaykunanchikpaq?

¹⁶ Achka kutita huñunakuypi rimariyta munaspanchikpas mana atispaqa hukkunapa rimarisqankutam allinta uyarinanchik, chayqa allinmi kanman. Hinaspapas huñunakuy tukuytam rimarisqankumanta felicitaykuchwan. Chay felicitasqanchikqa kanqa huñunakuypi rimarispanchik paykunata kallpanchasqanchik hinam (Prov. 10:21). Arí, hukkunata felicitaykuspanchikqa kallpanchachkanchikmi.

17. (1) ¿Imatam tayta-mamakuna ruwanmanku? (2) Videopi nisqanman hinaqa, ¿ima 4 kaqkunatam ruwananchik huñunakuypi rimarinapaq? (Qaway willakuyta).

¹⁷ ¿Imatawanraqmi ruwachwan iñiqmasinchikkunawan huñunakuypi kallpanchanakunanchikpaq?  Tayta-mama kaspaykiqa warmachaykitam yachachiwaq huñunakuypi atisqanman hina rimarinanpaq (Mat. 21:16). Wakinpiqa huñunakuypim yachanchik casadokuna imawan sasachakusqankumanta utaq Jehova Dios ima huchakunata chiqnisqanmanta. Chayna kaptinpas wakin parrafokunapiqa warmachakunapas rimariytam atinmanku. Chaymantapas, tayta-mamakunaqa warmankutam entiendechinmanku wakinpiqa makinkuta huqariptinkupas imaynanpi yachachimuq rimarinanpaq mana nimunanmanta. Chayta entiendespankuqa manam hukmanyanqakuchu (1 Tim. 6:18). d

18. ¿Imakunamantam rimarichwan ñuqallanchikmanta llumpayta rimanamantaqa? (Rimarimuytaq Proverbios 27:2 nisqanmantapas).

¹⁸ Llapallanchikmi huñunakuypiqa allinta preparakuspa rimarichwan Jehova Diosta hatunchanapaq hina, chaynataq iñiqmasinchikkunata kallpanchanapaq hina (Prov. 25:11). Wakinpiqa imapas pasawasqanchikmantam rimarichwan, ichaqa manam allinchu kanman ñuqallanchikmantaña llumpayta rimayninchikqa (leey Proverbios 27:2; 2 Cor. 10:18). Kikillanchikmanta rimanamantaqa rimarichwanmi Jehova Diosmanta, palabranmanta chaynataq llaqtanmantapas (Apoc. 4:11). Imapas pasawasqanchikmanta rimarinapaq parrafopa tapukuynin kaptinqa rimarichwanmi. Chayna tapukuymi qatiqnin parrafopa iskay kaq tapukuyninpi kachkan.

19. (1) ¿Imaynam tarikusunchik huñunakuypi kaspa iñiqmasinchikkunapi piensaspaqa? (Rimarimuytaq Romanos 1:11, 12 nisqanmantapas). (2) ¿Imaynanpitaq gustasunki huñunakuypi rimariy?

¹⁹ Huñunakuykunapi imaynatapuni rimarinapaq kamachikuykuna mana kaptinpas kallpanchakuchwanmi huñunakuykunapi rimarisqanchik hukkunata kallpanchananpaq hina kananpaq. Chaypaqqa wakiqninchikqa astawan rimarinanchikpaqmi kallpanchakuna kanqa. Wakiqninchikñataqmi achka kutita mana rimarispanchikpas hukkunapa rimarisqankuwan kusikunanchik kanqa. Huñunakuypi kaspa iñiqmasinchikkunapi piensaspaqa llapanchikmanta kallpanchanakuspam kusisqa tarikusunchik (leey Romanos 1:11, 12).