1. ¿Imakunatam ruwananchik Diosta allinta servinanchikpaq?

 JEHOVA DIOSTAQA anchatam kuyanchik. Chaymi, tukuyta ruwanchik allinta servinanchikpaq. Chaynaqa, ¿imakunatam ruwananchik Diosta allinta servinanchikpaq? Allin runa kananchikpaqmi kallpanchakunanchik, ima ruwaykunatapas yachananchikpaqmi kallpanchakunanchik, hinaspapas iñiqmasinchikkunata yanapananchikpaqmi kallpanchakunanchik.

2. ¿Imanasqataq Diospa llaqtanpi ñawparinapaq kallpanchakunanchik?

² ¿Imanasqataq Diospa llaqtanpiqa ñawparinanchik? Kuyapayakuq Jehova Diosninchikta kusichiyta munasqanchikraykum. Payqa anchatam kusikun servinanchikpaq tukuyta ruwaptinchikqa. Chaymantapas, Diospa llaqtanpi ñawparinapaqqa kallpanchakunanchik iñiqmasinchikkunata yanapayta munasqanchikraykum (1 Tes. 4:9, 10). Hayka tiempoña Diosta servispapas ñawpaqman rinapaqmi hinalla kallpanchakunanchik. Chaymantayá yachaykusun.

3. 1 Timoteo 4:12-16 nisqanman hinaqa, ¿imapaqmi Pablo kallpancharqa Timoteota?

³ Pablo punta cartanta Timoteoman qillqaptinqa payqa musullaraqmi karqa. Ichaqa, iñiqkunapi punta apaqñam karqa. Chaywanpas Pabloqa hinallam kallpancharqa Diosta serviyninpi ñawparinanpaq (leey 1 Timoteo 4:12-16). Pabloqa cartasqanpim Timoteota kallpanchakunanpaq nirqa. Nirqam kuyakuq kananpaq, Diospi hapipakunanpaq, allinta kawsakunanpaq. Chaymantapas, allinta leenanpaq, allinta pitapas rimapayananpaq chaynataq allinta yachachinanpaq. Yachaykusunyá Timoteo hina ñuqanchikpas imakunata ruwaspanchik Dios serviyninchikpi ñawparinanchikmanta.

4. Filipenses 2:19-22 nisqanman hinaqa, ¿imanasqataq Timoteoqa Diospa llaqtanpi yanapakurqa?

⁴ ¿Imanasqataq Timoteoqa Jehova Diospa llaqtanpi tukuy imapi yanapakurqa? Allin ruwaq runa kasqanraykum (leey Filipenses 2:19-22). Pablopa nisqanman hinaqa, Timoteoqa karqa mana hatun tukuqmi, Diospi hapipakuqmi, allin llamkaqmi, imatapas allinta ruwaqmi. Iñiqmasinkunatapas kuyakuywanmi rimapayaq, sunqumantam llakipayarikuq. Chaykunaraykum, Pabloqa Timoteota anchata kuyarqa, hinaspam mana iskayrayaspan iñiqmasinkunaman kacharqa (1 Cor. 4:17). Ñuqanchikpas Diospa munasqanman hina allin ruwaq kaspanchikqa, Diospa llaqtanpim tukuy imapi yanapakusunchik (Sal. 25:9; 138:6).

5. (1) ¿Imaynatam yachachwan allin ruwaq runa kanapaq imakunapi kallpanchakuyta? (2) ¿Imatam fotopi sipas ruwachkan hukkunata yanapananpaq?

⁵ Imapi kallpanchakunapaqyá tantiakusun. Chaypaqqa Diostam mañakuchwan imapipas allin ruwaq kananchikpaq. Imapi astawan kallpanchakunanchikta yachanapaqqa kaynatam nikuchwan: “¿Kikillaypa munasqaytachu puntapi churani utaq hukkunata yanapanaypaqchu kallpanchakuni? ¿Piwanpas hawkalla kanaypaqchu kallpanchakuni utaq pitapas pampachanaypaqchu kallpanchakuni?”, nispa. Imapi kallpanchakunapaq iskayrayaspaqa, pitapas tapuchwanmi imapi astawan kallpanchakunapaq (Prov. 27:6).

6. ¿Imaynatam pampachakuq kayta atichwan?

⁶ Imapas tantiakusqanchikta haypananchikpaqyá kallpanchakusun. ¿Imaynatam haypachwan? Haypanapaqqa, imakunapi kallpanchakunanchikpaq tantiakusqanchikman hinam, qillqanchikkunapi maskachwan chaymanta allinta yachananchikpaq. Pampachakuq kanapaq kallpanchakuspanchikqa qillqanchikkunapi maskaspam leechwan. Hinaspam yuyaymanachwan bibliapi pampachakuq runakunapi chaynataq mana pampachakuq runakunapipas. Chaymantapas, Jesusmantam allinta yachachwan, payqa pampachakuq runam karqa (Luc. 7:47, 48). Payqa manam runakunapa pantasqallantachu qawarqa, aswanqa allin ruwasqankunatam. Jesuspa tiemponpi fariseokunam ichaqa “hukkunata mana imapaq valeqta hina qawaqku” (Luc. 18:9). Chaykunata yacharuspanchikqa nikunanchikmi: “¿Fariseokuna hinachu ñuqapas hukkunata  qawani? ¿Allinkuna ruwasqankutachu icha pantasqallankutachu qawani?”, nispa. Pitapas pampachanapaq sasachakuspanchikqa papelpim allinkuna ruwasqanta qillqananchik, hinaspam nikunanchik: “¿Imaynatataq Jesusqa payta qawan? ¿Imapi pantasqanmantapas pampachaykunmanchu?”, nispa. Chaynata ruwananchikpaq kallpanchakuymi yanapawasunchik allin sunquyuq kananchikpaq. Yaqapas qallariypiqa mana allinkuna ruwawasqanchikrayku pampachanapaq sasachakusunchik. Chaywanpas kallpanchakuspanchikqa pampachakuq kaytam atisunchik.

7. ¿Imapaqmi imapas ruway yachaqkunata Jehova Diosqa akllan? (Rimarimuytaq Proverbios 22:29 nisqanmantapas).

⁷ Ima ruwaytapas yachananchikpaqmi tantiakuchwan. Piensarisun hatun huñunakuna wasikunatawan huñunakuna wasikunata ruwaq iñiqmasinchikkunapi. Paykunaqa chaypi llamkaytaqa yacharqaku llamkay yachaq iñiqmasinchikkunawan llamkaspankum. Fotopi qawasqanchikman hinam qaripas, warmipas huñunakuna wasikunata allichayta yachachkanku. ‘Wiña-wiñaypaq kamachiq’ Jehova Diosninchikpas chaynataq ‘gobiernaqkunapapas señornin’ Jesuspas, kay runakunatam akllan llaqtanpi tukuy imata ruwaspanku yanapakunankupaq (1 Tim. 1:17; 6:15; leey Proverbios 22:29). Imapas yachasqanchikkunawan Diospa llaqtanpi yanapakuspanchikqa Jehova Diostam hatunchasunchik (Juan 8:54).

8. ¿Pikunatam tapukuchwan astawan imakunapipas kallpanchakunapaq?

⁸ Imapi kallpanchakunapaqyá tantiakusun. Iñiqkunapi punta apaqkunata utaq llaqtan-llaqtan watukuq iñiqmasinchiktapas tapukunanchikmi, ima ruwaykunapi yanapakunanchikpaq. Allin yachachiq kanapaq niykuwaptinchikñataqmi, imaynata ruwanapaq tapukuchwan. Chaymantañataqmi, chayman hina ruwanapaq kallpanchakunanchik kanqa. ¿Imaynatam ruwachwan? Chaymantayá yachaykusun.

9. ¿Imatam ruwachwan allin yachachiq kanapaq?

⁹ Imapas tantiakusqanchikta haypananchikpaqyá kallpanchakusun. Allin yachachiq kayta munasqanchikpiyá piensasun. Chaypaqqa allintam yachachwan Allin ñawinchaq hinaspa allin yachachiq kanapaq niq qillqanchikmanta. Huñunakuypi yachachinanchikpaq niykuwaptinchikqa, manaraq yachachichkaspanchikmi allin yachachiq iñiqmasinchikta tapukuchwan imakunapi astawan kallpanchakunapaq. Allinta yachachinapaq tiempowan kallpanchakuspanchikqa, allin yachachiqmi kasunchik. Chaymantapas, iñiqmasinchikkunaqa allintam qawawasunchik (Prov. 21:5; 2 Cor. 8:22).

10. ¿Imatam ruwachwan imatapas ruwayta mana atispanchikqa?

¹⁰ Imatapas ruwayta mana yachaspanchikqa amayá hukmanyasunchu. Iñiqmasinchik Garrypas chaynam karqa. Payqa leenanpaqmi sasachakuq. Paymi willakun huñunakuypi leenanpaq niykuptinku anchata pinqakusqanmanta. Ichaqa, mana hukmanyaspanmi hinalla kallpanchakuq. Kunanqa payqa huñunakuykunapiwan hatun huñunakuykunapim yachachin iñiqmasinchikkuna yanapasqanrayku chaynataq qillqanchikkunata allinta estudiasqanrayku.

11. ¿Imatam ruwananchik Diospa llaqtanpi astawan yanapakunapaq?

¹¹ ¿Timoteoqa suma-sumaq yachachiqchu karqa? Bibliapiqa manam chaymantaqa ninchu. Chaywanpas, payqa Pablopa  nisqankunatam kasukurqa. Pisi-pisimantam imapas ruwananpaq nisqankuta allinta ruwarqa, chaymi allin yachachiq karqa (2 Tim. 3:10). Timoteo hina allinta yachachinapaq kallpanchakuspanchikqa tukuypim yanapakuyta atisunchik.

12. ¿Imaynatam hukkuna yanapasurqanki?

¹² Kusisqam tarikunchik hukkuna yanapawaptinchikqa, ¿aw? Unquptinchik hospitalpi hampichikunapaq yanapakuqkuna watukamuwaptinchikqa utaq unquqkunata watukuq iñiqmasinchikkuna watukamuwaptinchikqa, anchatam kusikunchik. Chaymantapas, anchatam agradecekunchik imawanpas llakisqa kachkaptinchik punta apaqkuna sunqunchikta tiyaykachinankupaq watukaykamuwaptinchikqa. Bibliamanta allinta yachachinanchikpaq yanapakuyta necesitaptinchik Diosmanta allinta yachachiq iñiqmasinchik yanapaykuwaptinchikqa anchatam kusikunchik. Jesusmi nirqa: “Imapas quqmi aswan kusisqaqa imapas chaskiqmantaqa”, nispa (Hech. 20:35). Pipas yanapaykuwaspanchikqa kusisqam tarikun. Ñuqanchikpas kusisqam tarikusunchik hukkunata yanapaspanchikqa. Diospaq astawan imatapas ruwayta munaptinchikqa, ¿imakunataq yanapawasun?

13. Astawan yanapakuyta munaspaqa, ¿imatam mana qunqananchikchu?

¹³ Imapipas kallpanchakuyta munaspaqa sumaqtam yachanayki imapi kallpanchakunaykita. Ichapas nichkanki: “Ñuqaqa astawan yanapakuytam munani”, nispa. Chayna kaptinpas ichapas mana yachankichu imapi kallpanchakunaykita. Chaymi allin kanman imapi kallpanchakunaykimanta yachayniki. Allintaqmi kanman chayta papelpi qillqaynikipas.

14. ¿Imanasqataq mana hukmanyananchikchu imapipas yanapakuyta mana atispanchikqa?

¹⁴ Imapipas yanapakuyta mana atispanchikqa, amayá hukmanyasunchu. ¿Imanasqa? Mana makillanchikpi kasqanraykum. Apostol Pablopas Tesalonica llaqtapim yanapakuyta munarqa, ichaqa manam atirqachu. Chiqniqninkunam chay llaqtamanta qarqururqaku (Hech. 17:1-5, 10). Hinapi qipaspanqa wakin iñiqkunatachá wañuypa patanpi churanman karqa. Chaykuna pasasqanwanqa Pabloqa manam hukmanyarqachu, aswanqa tiempopa pasasqanman hinam Timoteota kacharqa  chaylawpi iñiqkunata kallpanchananpaq (1 Tes. 3:1-3). Tesalonica llaqtayuq iñiqkunaqa anchatachá kusikurqaku Timoteo watukuptinqa.

15. Iñiqmasinchik Tedmanta rimarispa willakamuy imanasqa mana huk ruwayllapi Diosta servinamanta.

¹⁵ Allintam yanapawachwan Tesalonica llaqtapi kachkaptin Pablota ima pasasqanmanta yachayqa. Ñuqanchikpas, ¿imatam ruwachwan chayna kallpanchakuchkaptinchik imapas pasaruptin? (Ecl. 9:11). Imapas atisqanchiktam hinalla ruwananchik. Chaynam pasarqa iñiqmasinchik Tedwan chaynataq Hiediwanpas. Paykunaqa unqurusqankuraykum betelmanta lluqsirqaku. Ichaqa Jehova Diosta kuyasqankuraykum kallpanchakurqaku hinalla servinankupaq. Paykunaqa precursor regularmi karqaku. Chaymantam precursor especial karqaku. Iñiqmasinchik Tedtaqa llaqtan-llaqtan watukuqpa rantinpi yanapakunanpaqmi yachachirqaku. Ichaqa yuyaqña kasqanraykum chaytaqa saqinan karqa. Qallariypi hukmanyaruspankupas, kallpanchakurqakum atisqankuman hinalla Jehova Diosta servinankupaq. Tedmi nin: “Jehova Diosta servinapaqqa manam huk ruwayllapichu yanapakuna kasqa”, nispa.

16. ¿Imatam yachachwan Galatas 6:4 nisqanmanta?

¹⁶ Imapas manam makillanchikpichu. Jehova Diosqa kuyawanchik manam imapipas yanapakusqanchikraykuchu. Manataqmi hukmanyananchikchu hukkuna hina mana yanapakuspaqa. Iñiqmasinchik Hiedipas ninmi: “Hukkunawan tupachikuspaqa manam kusisqachu kasunchik”, nispa (leey Galatas 6:4). Chaynaqa, imapas ruwayninchikta manaña atispanchikqa, Diosta servinanchikpaq chaynataq iñiqmasinchikkunata yanapananchikpaq kallpanchakusunchik. *

17. ¿Imatam ruwawaq astawan yanapakuyta munaspaykiqa?

¹⁷ Mana manukuspa kapuqllanchikwan kusisqa kawsakuspanchikqa, atichwanmi tukuy imapi yanapakuyta. Chaynaqa, kunanmantayá atisqanchikman hina imapipas yanapakunapaq kallpanchakusun. Chaynapi hamuq tiempopi hukkunapi yanapakunapaq. Precursor regular kayta munaspanchikqa ichapas puntata kallpanchakuchwan precursor auxiliar kanapaq. Utaq iñiqkunapi punta apaqkunapa yanapaqnin kayta munaspanchikqa, ichapas kallpanchakuchwan Diosmanta astawan willakunapaq, yuyaqkunatawan unquqkunata watukunapaq. Kunan imapipas yanapakusqanchikqa, hamuq tiempopi imatapas ruwanapaqmi yanapawasun. Imaña-haykaña kaptinpas tukuy sunqumantayá  Jehova Diosta servisun (Rom. 12:11).

18. ¿Imatam iñiqmasinchik Beverleymanta yachachwan? (Qaway dibujota).

¹⁸ Imapipas yanapakunanchikpaqqa manam nichwanchu: “Llumpay yuyaqñam kani”, nispaqa. Iñiqmasinchik Beverleypa ima pasasqanpiyá yuyaymanasun. Payqa 75 watanpiñam kachkan. Unqusqanraykum payqa manaña puriyta atirqañachu, ichaqa Jesuspa wañukusqan punchawta yuyarinapaq invitaciontam aypukuyta munarqa. ¿Imatam payqa ruwarqa? Atisqanman hina invitacionta aypukunanpaqmi kallpanchakurqa. Chay atisqallanta ruwasqanwanmi kusisqa tarikurqa. Kallpanchakusqanwanmi qatipakunapaq hina karqa. Jehova Diosqa anchatam kusikun yuyaq iñiqmasinchikkunapa atisqallankuta ruwasqankuwanqa (Sal. 71:17, 18).

19. ¿Imakunapim kallpanchakunanchik ñawpaqman rinanchikpaq?

¹⁹ Imatapas haypay atisqanchikpiyá kallpanchakusun. Jehova Diospa munasqanman hina allin ruwaq runayá kasunchik. Imatapas allinta ruwanapaqyá kallpanchakusunchik. Chaynapi hinalla Diosta servinanchikpaq, llaqtanpi yanapakunanchikpaq chaynataq iñiqmasinchikkunata astawan yanapanapaqpas. * Chaykunata ruwaptinchikqa Jehova Diosmi bendeciwasun, llapallankutaqmi qawanqaku Timoteo hina ñawpaqman risqanchiktapas (1 Tim. 4:15).