LLAPALLANCHIKMI munanchik kuyapayakuq runata hina pipas riqsiwananchikta. Ichaqa yaqa llapallan runakunam mana kuyapayakuq kanku (2 Tim. 3:3). ‘Mana allintam’ ninku allinmi nispa, ‘allintañataqmi manam allinchu’ nispa. Chayna piensasqankuman hinam kawsakunku (Is. 5:20). Llapallanchikmi pantaq kanchik, ichapas ñawpaqpi mana allinkunata ruwarqanchik. Chaymi sasachakunchik kuyapayakuq hinaspa allin ruwaq kanapaq. Diospa munayninta unayña ruwaq iñiqmasinchikpas nirqam: “Mana allin warmi kasqaypaqmi hapikuni”, nispa.

Pantaq kaspanchikpas hinaspa ñawpaqpi mana allin kaqkunata ruwaq kaspanchikpas, Diospa chuya espiritunwanqa utaq atiyninwanqa llapallanchikmi kuyapayakuq kachwan. Ichaqa, ¿imaynataq kuyapayakuq runaqa? Chaymantayá yachaykusun.

Kuyapayakuq runaqa allin runam, manam mana allin kaqkunataqa ruwanchu, aswanmi hukkunata imapipas yanapaykum. Kallpanchakuntaqmi hukkunapaq allinkunata ruwananpaq.

Runakunaqa ayllunkupaq utaq kuyasqan runakunapaqmi allin kaqkunata ruwanku. Ichaqa manam chayraykuchu nichwan Diospa munasqanman hina kuyapayakuq kasqankutaqa. Diospa munasqanman hina kuyapayakuq kanapaqqa Jehova Diospa imayna kasqantam yachananchik, hinaspam qatipakunanchikpaq kallpanchakunanchik, manachayqa mana kuyapayakuqmi rikuriruchwan, ¿imanasqa? Llapallanchik ‘huchallikuq’ kasqanchikraykum’ (Ecl. 7:20). Pablopas nirqam: “Aychaypiqa manam ima allinpas kanchu”, nispa (Rom. 7:18).

Jehova Diosmi pimantapas aswan kuyapayakuqqa, payllam imam allin kasqantapas sumaqta yachan. Chaymi bibliapipas paymanta kaynata nin: ‘Qamqa kuyapayakuqmi kanki, qamqa allinlla ruwaqmi kanki’, nispa (Sal. 119:68). Astawanyá yachaykusun Diosninchik kuyapayakuq hinaspa allin ruwaq kasqanmanta.

Diosninchikqa kuyapayakuqmi. Diosllam pimantapas aswan kuyapayakuqqa. Moisesmanmi Dios nirqa: “Lliw kuyakuyniytawan allin kayniytam qawachisqayki”, nispa. Atiynintawan munayniyuq kasqanta hinaspa kuyapayakuq kasqanta qawachispanmi Diosqa nirqaraq: ‘¡Llakipayakuq, kuyapayakuq Diosmi kani, ñuqaqa llampu sunqum kani, mana chaylla piñakuruqmi kani, chiqap kuyapayakuqmi kani! Ñuqaqa waranqantin miraykunakama kuyapayakuqmi kani, mana allin ruwaqtapas, mana kasukuqtapas, huchallikuqtapas pampachaykuqmi kani. Huchayuq runatam ichaqa [...] castigasaq’, nispa (Ex. 33:19; 34:6, 7). Kaypi nisqanman hinaqa Diosqa atiyniyuq hinaspa munayniyuq kaspanpas kuyapayakuqmi. Jesuspas kuyapayakuqmi karqa, ichaqa nirqam: “Manam pipas allinqa [utaq kuyapayakuqqa] kanchu aswanqa hukllam, payqariki Diosmi”, nispan (Luc. 18:19).

Diosqa allinlla ruwaqmi. Kuyapayakuq kasqanraykum Diosqa allinkunata ruwan. Bibliapas ninmi: ‘Diospa kuyapayakuyninqa llapallan runakunapaqmi, tukuy unanchasqankunatam llakipayaspa  waqaychan’, nispa (Sal. 145:9). Kuyapayakuq kasqanraykum llapallanchikta chaynallata qawawanchik, hinaspam kawsananchikpaqpas tukuy imata quwanchik (Hech. 14:17). Kuyapayakuq kasqanraykutaqmi huchanchiktapas pampachawanchik. Chaymi bibliaqa Diosmanta nin: ‘Ancha kuyapayakuqmi kanki, hucha pampachaqmi kanki’, nispa (Sal. 86:5). Diosqa ‘allin kawsakuqkunamanqa’ tukuy ‘allinninkunatam quwasun’ (Sal. 84:11).

Kikinman rikchakuqta Diosninchik unanchawasqanchikraykum kuyapayakuq hinaspa allin ruwaq kaytaqa atichwan (Gen. 1:27). Chaymi biblia niwanchik: “Allinkuna ruwayta [utaq kuyapayakuq kayta] yachaychik”, nispa (Is. 1:17). Chaynaqa, ¿imakunatam ruwananchik kuyapayakuq kananchikpaq?

Puntataqa Diostam mañakunanchik chuya espiritunwan yanapawananchikpaq (Gal. 5:22). Diosqa chuya espiritunwanmi yanapawasun kuyapayakuq kananchikpaq, yanapawasuntaqmi mana allinkunata chiqninanchikpaqpas (Rom. 12:9). Bibliaqa ninmi ‘allin kaqta ruwananchikpaq hinaspa rimananchikpaq’ yanapawananchikmanta (2 Tes. 2:16, 17).

Chaymantapas Diospa palabrantam ñawinchananchik. Ñawinchaptinchikqa Diosmi yanapawasun ‘lliwpaq allin ruwayta yachananchikpaq’ hinaspa ‘allinkunata ruwananchikpaq’ (Prov. 2:9; 2 Tim. 3:17). Bibliata ñawinchaspanchikqa hinaspa yuyaymanaspanchikqa allin kaqkunawanmi sunqunchikta hinaspa yuyayninchikta huntachisun. Chay ruwayninchikqa yanapawasunmi ima sasachakuypi tarikuptinchikpas allin kaqkunata ruwananchikpaq (Luc. 6:45; Efes. 5:9).

Kallpanchakunanchiktaqmi, ‘allin ruwaqkunapa ruwasqankuta’ qatipakunanchikpaqpas (3 Juan 11). Bibliapim willawanchik pikunata qatipakunamanta. Puntataqa qatipakunanchikmi Jehova Diosninchikta hinaspa señorninchik Jesusta. Qatipakuchwantaqmi Tabita sutiyuq warmita hinaspa Bernabeytapas (Hech. 9:36; 11:22-24). Chaypaqmi paykunamanta astawan yachananchik. Paykuna hinam kallpanchakunanchik ayllunchikkunata hinaspa iñiqmasinchikkunata tukuypi yanapananchikpaq. Hukkunapaq allinkunata ruwasqankuraykum Tabitatawan Bernabeyta Diosqa tukuy imapi yanapaykurqa. Chaynallatam ñuqanchiktapas yanapaykuwasun.

Qatipakuchwantaqmi kunan tiempopi allinkuna ruwaq runakunatapas. Qatipakuchwanmi punta apaqkunata, paykunaqa anchatam llamkanku, hinaspapas kuyapayakuqmi kanku. ‘Allinkunata ruwaq’ warmi iñiqmasinchikkunatapas qatipakuchwanmi (Tito 1:8; 2:3). Roselyn sutiyuq  iñiqmasinchikmi kaynata willakun: “Kuyasqay ñañaymi pisipasqaña kaspanpas iñiqmasinchikkunata yanapananpaq tukuyta ruwan. Payqa kuyapayakuqmi hinaspa imanpas haywakuykuqllañam”, nispa.

Jehova Diosmi niwanchik allin ruway munaqllaña kananchikpaq (Amos 5:14). Chayna kaspanchikqa kasukusunmi lliw kamachikuyninkunata, imataña ruwaspapas munasqaman hinam ruwayta munasun.

Hukkunapaq allin kaqkunata ruwanapaqqa manam tukuy imakunataraqchu ruwananchik. Kaypi yuyaymanasun: Imapas tarpusqanchik allin wiñananpaqqa, manam achka yakuwanchu huk kutillata parqurunchik, aswanmi as yakullawan sapa kuti parqupayanchik. Ñuqanchikpas allinkunataqa manam huk kutillatachu ruwarunanchik, aswanmi imachallatapas hukkunapaq sapa kuti ruwananchik.

Bibliam niwanchik allinkunata ruwanapaq listollaña kananchikpaq (2 Tim. 2:21; Tito 3:1). ‘Runamasinchikpa allinninpaq kaqkunata hinaspa kallpanchasqa kanankupaq kaqkunata ruwananchikpaqqa’, paykuna imayna tarikusqankuta yachanapaqmi qawariykunanchik (Rom. 15:2). Imachallanchiktapas haywanakuykunanchikmi (Prov. 3:27). Qayaykanakunanchikmi wasinchikpi motechallatapas kachuykunanchikpaq. Pipas unquptinqa watukuykunanchikmi, mana atispaqa telefonowanmi qayaykunanchik utaq cartachatapas apaykachinanchik. ‘Kallpanchakunanchiktaqmi allin rimaykunata rimananchikpaq, chaynapi uyariqnikichikkunapa allinninpaq kananpaq’ (Efes. 4:29).

Jehova Dios hinam llapallan runapaq allinkunata ruwananchik. Wakchatapas, aputapas llapallantam yanapananchik. Chaymi lliw runaman Diosmanta willananchik. Jesuspa nisqanta kasukuspam chiqniwaqninchikunapaqpas allin kaqkunata ruwananchik (Luc. 6:27). Kuyapayakuq kayninchiktaqa hinaspa hukkunapaq allinkunata ruwananchiktaqa manam ‘ima kamachikuypas’ harkawachwanchu (Gal. 5:22, 23). Sasachakuypiña kaspapas utaq chiqnisqaña kaspapas allinkunata hinalla ruwaspaqa runakunatam yanapasun bibliamanta yachanankupaq, Diosninchiktapas hatunchasunmi (1 Ped. 3:16, 17).

Bibliam nin: ‘Allin ruwaq runaqa [...] allin ruwasqanwanmi kusikunqa’, nispa (Prov. 14:14). Arí, kusisqam kasun allinkunata ruwasqanchikrayku runakuna ñuqanchikpaqpas allinkunata ruwaptinku (Prov. 14:22). Allinkunata manaña ruwawaspanchikpas paykunapaq allinkunata hinalla ruwaptinchikqa rumi sunqu kaspankupas llampu sunquyarunmankum (Rom. 12:20).

Achkam willakunku mana allinkunata ruwasqankuta saqispanku allinkunataña ruwasqankurayku kusisqaña kawsakusqankumanta. Nancy sutiyuq warmipas kaynatam willakun: “Hukwan-hukwanmi kakurqani, manam imapas qukuwarqachu. Ichaqa Diospa nisqanman hina iman allin kasqanmanta yacharuspaymi allinkunataña ruwarqani. Chaymi kusisqaña karqani, kunanqa allinñam kawsakuni”, nispa.

Kuyapayakuqqa kananchik taytanchik Diosta kusichinanchikpaqmi. Allinkuna ruwasqanchikta runakuna mana yachaptinpas Diosqa yachanmi. Payqa qawamuchkanmi tukuy ima ruwasqanchiktaqa hinaspa munasqanchiktapas (Efes. 6:7, 8). Kuyapayakuq utaq allin runa kaspanchikqa ‘Diospa kuyakuynintam chaskisun’ (Prov. 12:2). Chayraykuyá hinalla kallpanchakusun kuyapayakuq utaq allin runa kananchikpaq. “Llapallan allin ruwaqkunapaqmi kanqa” ‘hatunchasqa kay, respetasqa kay hinaspa hawka kaypas’ (Rom. 2:10).