¿Imataq Diospa sutin? Kikinmi niwanchik: “Ñuqam Jehova kani: chaymi sutiy”, nispa (Isaias 42:8, Reina-Valera). Bibliapiqa 7.000 masnin kutitam Diospa sutinqa rikurichkan. Wakin bibliakunapim ichaqa Diospa sutinpa rantinpi qillqarunku “tayta Dios” nispallaña. Ichaqa, Jehova Diosninchikqa munanmi sutinmanta qayakunanchikta hinaspa kuyasqan kananchikta (Salmo 105:1).

Diosqa riqsichikuntaqmi: Tukuy atiyniyuqwan, unanchaqwan, taytawan hinaspa llapallan kamachiqwan. Chaykunata rimaspanku hinaspa sutinmantam Jehova Diosta serviqkunaqa qayakuqku (Daniel 9:4).

 ¿Imaynataq Diosqa? Diosqa mana rikuy atinam (Juan 4:24). Chaymi biblia nin Diostaqa ‘mana pi runapas rikusqanmanta’ (Juan 1:18). Bibliaqa niwanchiktaqmi Diosqa kuyakuq hinaspa llakikuq kasqanmanta. Chaymi payqa imapas ruwasqanchikwanqa kusikun utaq llakikun (Salmo 78:40, 41; Proverbios 27:11).

Diospa imayna kayninkunamanta. Diosqa manam pimanpas sayapakunchu (Hechos 10:34, 35). Ancha llakipayakuqmi, mana chaylla piñakuqmi, wiñaypaq kuyakuqmi chaynataq mana llullakuqmi (Exodo 34:6, 7). Chaymantapas, qatiqninpi kaqkunam qawachin Dios hinaqa mana pipas kasqanta.

Diosqa tukuy atiyniyuqmi. Chaymi payqa ima munasqantapas ruwayta atin (Genesis 17:1).

Diosqa ancha yachayniyuqmi. Pay hina yachayniyuqqa manam pipas kanchu. Chayna kasqantam bibliapas nin (Romanos 16:27).

Diosqa allinlla ruwaqmi. “Ruwasqankunapas mana pantayniyuqmi”. Diospiqa “manam ima mana allinpas kanchu” (Deuteronomio 32:4).

Diosqa kuyakuqllañam. Bibliam nin chayna kasqanmanta (1 Juan 4:8). Diosqa manam sasachakunchu kuyakuq kananpaqqa. Chaymi payqa tukuy ima ruwasqanwan kuyawasqanchikta qawachiwanchik.

Diosqa munanmi kuyasqan kananchikta. Diosqa ancha kuyakuq taytanchikmi (Mateo 6:9). Kasukuptinchikqa kuyawasunchikmi (Salmo 25:14). Diosninchikqa yuyawanchikmi, chaymi payqa munan tukuy llakinchikkunata willananchikta (Santiago 4:8; 1 Pedro 5:7).

Jesusqa manam Dioschu. Jesusqa Diospa unanchasqallanmi. Chaymi bibliaqa nin Diospa churin kasqanmanta (Juan 20:31). Tukuy imamantapas puntataqa Jesustam Jehova Diosqa unancharqa, chaymi Jesusqa tukuy ima unanchaypi yanaparqa (Proverbios 8:30, 31; Colosenses 1:15, 16).

 Jesusqa manam haykapipas nirqachu Dios kasqantaqa. Aswanmi nirqa: ‘[Diospa] rantinpim hamurqani, paymi ñuqataqa kachamuwarqa’, nispa (Juan 7:29). Huk kutipim huknin qatiqninta Jesus nirqa: “Richkanim taytayman hinaspa qamkunapapas taytaykichikman, Diosniyman hinaspa qamkunapapas Diosnikichikman”, nispa (Juan 20:17). Chaymantapas, Jesus wañukuptinmi Jehova Diosqa kawsarirachirqa, chaynapi hanaq pachapi atiyta chaskinanpaq (Mateo 28:18; Hechos 2:32, 33).

Jesucristoqa Diosman asuykunapaqmi yanapawanchik

Kay pachamanqa taytanmanta yachachiwananchikpaqmi Jesusqa hamurqa. Kikin Jehova Diosmi niwarqanchik churin Jesusta uyarinanchikpaq (Marcos 9:7). Jesusllam Diostaqa sumaqta riqsin. Chaymi nirqa uyariqninkunaqa Diosta sumaqta riqsinankumanta (Lucas 10:22).

Jesusqa taytan hinam sumaq sunquyuq karqa. Chaymi Jesusqa kaynata nirqa: “Ñuqata rikuwaqniyqa taytaytapas rikurunñam”, nispa (Juan 14:9). Jesusqa lliw runakunawanmi kuyakuqllaña karqa, chayta qawaspankum runakunaqa Diosman asuykurqaku. Jesusmi nirqa: “Ñuqam kani ñan, chiqap kaq chaynataq kawsay quqpas. Ñuqantakamallam pipas taytaymanqa asuykun”, nispa (Juan 14:6). Nirqataqmi: ‘Chiqap yupaychaqkunaqa espirituman hinam chaynataq chiqap kaqman hinam hanaq pacha taytata yupaychananku, hanaq pacha taytaqariki chayna runakunatam maskan’, nispa (Juan 4:23). Arí, Jehova Diosninchikqa, qam hina paymanta yachay munaq runakunatam maskachkan.