1. ¿Imatam ñawpaq tiempopi Diospa wakin serviqninkuna piensarqaku? (Qaway kay paginapi kaq dibujota.)

SACERDOTEKUNAPA jefen Aaronmi Jehova Diospa karpanpa punkunpi inciensota kañananpaq qontichinanta hapispan kachkarqa. Chaypitaqmi kachkarqa Corey hinaspa 250 runakunapas inciensota kañanankupaq qontichinankuta hapispanku (Num. 16:16-18). Piensachwanpaschá llapanku Diosman sonqo kasqankuta. Ichaqa, Coreywan qatiqnin runakunaqa karqaku hatun tukuq, mana kasukuq hinaspa kikillankupaq munaq runakunam. Hinaspam Aaronta sacerdote kayninmanta qarqoyta munarqaku (Num. 16:1-11). Paykunaqa piensarqakum yupaychayninkuta Dios chaskinanmanta. Ichaqa Diospaqqa manam allinchu karqa chayna kasqankuqa. Payqa sonqonchikta qawaq kasqanraykum, iskay uya kasqankuta yacharqa (Jer. 17:10).

2. (1) ¿Imatam Moisesqa willakurqaña? (2) ¿Imaynatam Moisespa willakusqan cumplikurqa?

² Pasaq punchawllatam Moises kaynata willakurqa: “Paqarinmi Tayta Dios qawachiwasunchik pim paypa kasqanta”, nispa (Num. 16:5). Chayna nisqanman hinam, Diosqa sutillata qawachirqa pikuna paypa cheqap serviqninkuna kasqanta chaynataq  mana cheqap serviqninkuna kasqantapas. ¿Imaynatam chayta qawachirqa? ‘Diospa qayllanmanta nina rikuriramuspanmi chay incienso qontichiq [Coreytawan] iskay pachak pichqa chunkan runakunata ruparurqa’ (Num. 16:35; 26:10). Ichaqa Jehova Diosmi Aaronta mana wañuchirqachu, chaywanmi qawachirqa chaskisqan sacerdote kasqanta chaynataq cheqap yupaychaqnin kasqantapas (leey 1 Corintios 8:3).

3. (1) ¿Imam apostol Pablopa tiemponpi pasakurqa? (2) ¿Imatam Jehova Diosmanta yachachiwanchik Coreytawan qatiqninkunata pasasqan?

³ Waranqa pichqa pachak wata pasaytam, apostol Pablopa tiemponpi wakin runakuna cristiano kasqankuta nispankupas pantaykunata yachachirqaku. Ichaqa hinallaraqmi huñunakurqaku iñiqmasinkuwan. Cheqap cristianokunaman otaq ovejakunaman rikchakuspankupas, paykunaqa suwa atoqkuna hinam wakin cristianokunapa iñiyninta hukmanyachichkarqaku (2 Tim. 2:16-18). Apostol Pabloqa yacharqam Coreytawan qatiqninkunata ima pasasqanmanta, chaymi yacharqa Jehova Diosta pipas mana engañay atisqanmanta. Qawasunchik imatam Pablo Timoteoman nirqa hinaspa imatam chaymanta yachachwan.

4. (1) ¿Imatam apostol Pabloqa allinta yacharqa? (2) ¿Imatam Pabloqa Timoteoman nirqa?

⁴ Jehova Diosqa reqsinmi pikuna sonqomanta otaq hawa sonqolla yupaychasqankuta, chaytam apostol Pabloqa allinta yacharqa. Chaymi Diospa yanapakuyninwan Timoteoman huk cartata qellqarqa. Diosta qepanchaqkuna iñiqmasinkunata sasachasqankumanta rimaspanmi, Pablo kaynata nirqa: “Diosmi ichaqa mana kuyuriq cimientota hina churarqa kay pachapi, chaypim nichkan kaynata: [Jehova Diosqa] reqsinmi pim paypa kasqantaqa, chaynaqa [Jehova Diosman] hapipakuqkunaqa suchurikuchunyá mana allin ruraykunamantaqa”, nispa (2 Tim. 2:18, 19).

5, 6. (1) ¿Imanasqataq Pabloqa nirqa “Diosmi [. . .] cimientota hina churarqa” nispan? (2) Pablopa chayna nisqanqa, ¿imaynatam Timoteota yanaparqa?

⁵ Bibliam cimiento niq palabrata servichikun tupanachiyta hina. Wakinpim chay palabraqa tupan ñawpaq Israel nacionpi Jerusalen llaqtawan otaq Diospa munaynin ruwakunanpaq Jesuspa ruwayninwan (Sal. 87:1, 2; 1 Cor. 3:11; 1 Ped. 2:6). Ichaqa, “Diosmi [. . .] cimientota hina churarqa” niq palabrakunaqa huk kutillapim Bibliapi rikurin. Hinaptinqa, ¿imatam Pabloqa chaywan niyta munachkarqa?

⁶ Apostol Pablom “Diosmi [. . .] cimientota hina churarqa” niq palabrakunata qellqarqa, Numeros 16:5 versiculonpi Coreymantawan qatiqninkunamanta Moisespa willakusqanmanta rimaspan. Pabloqa, chaykunatam qellqarqa Timoteota kallpanchananpaq hinaspa mana allin runakuna Jehova Diosta mana engañay atisqanta yuyarichinanpaqpas. Pabloqa manam willarqachu “Diosmi [. . .] cimientota hina churarqa” niq palabrakuna ima ninan kasqantaqa. Ichaqa, chayna nisqanwanmi Timoteota kallpancharqa Jehova Diosmanta mana iskayrayananpaq.

7. ¿Imanasqataq mana iskayrayachwanchu Jehova Dios haykapipas allin ruwaq hinaspa confianapaq kasqanmanta?

⁷ Jehova Diospa rimasqankunaqa manam haykapipas cambianchu. Salmo 33:11 nin: ‘Diospa rimasqankunaqa takyan wiña-wiñaypaqmi. Diospa tanteasqankunaqa takyan mana tukuqpaqñam’, nispa. Wakin textokunapas rimanmi Jehova Diosqa gobiernaq, wiñaypaq kuyapayakuq, allin ruwaq hinaspa confianapaq kasqanmanta (Ex. 15:18; Sal. 106:1; 112:9; 117:2). Malaquias 3:6 nin: “Ñoqa [Jehova] Diosqa haykapipas hina kaqllam kani”, nispa. Santiago  1:17 nin: “Diosqa manam cambiakunchu llantuy hinaqa”, nispa.

8, 9. ¿Imatam yachachiwanchik cimientopi qellqasqa kaqkunaqa?

⁸ Ñawpaq tiempopiqa yaqa llapan runakunam wasita hatarichispankuqa cimientonpi qellqaqku. Chaytaqa ruwaqku chay wasi hatarichiq pi kasqanta otaq pi dueñon kasqanta yachanankupaqmi. 2 Timoteo 2:19 nisqanpi “Diosmi [. . .] cimientota hina churarqa” niq palabrakunataqa, Pablom tupanachiyta hina Bibliapi qellqarqa. * Chay cimientopi qellqasqa kaqkunaqa kaynatam nin: 1) “[Jehova Diosqa] reqsinmi pim paypa kasqantaqa”, hinaspa 2) “[Jehova Diosman] hapipakuqkunaqa suchurikuchunyá mana allin ruraykunamantaqa” nispan. Kaymi yuyarichiwanchik Numeros 16:5 nisqan willakuyta (leey).

⁹ ¿Imatam yachachiwanchik cimientopi qellqasqa kaqkunaqa? Yachachiwanchikmi iskay kaqkunata: 1) Jehova Diosqa kuyanmi payman sonqo kaqkunata hinaspa 2) Jehova Diosqa cheqninmi mana allin ruwaykunata. ¿Imatam kayqa yachachiwanchik Jehova Diosta qepanchaqkunamanta?

10. ¿Imaynam wakin cristianokuna tarikurqaku Diosta qepanchaqkunapa imayna kasqankuwan?

¹⁰ Timoteowan Diosman sonqo wakin cristianokunaqa llakisqam kachkarqaku Diosta qepanchaqkunapa imayna kasqankuwan. Wakinkuqa manapaschá entienderqakuchu imanasqa paykuna hinalla congregacion ukupi kasqankuta. Chaymantapas, tapukurqakupaschá sichu Jehova Dios sonqomanta serviqninkunata otaq hawa sonqolla serviqninkunata reqsisqanmanta (Hech. 20:29, 30).

11, 12. ¿Imanasqataq Timoteoman Pablopa carta qellqasqanqa kallpancharqa?

¹¹ Timoteoman Pablopa carta qellqasqanqa anchatachá paytaqa kallpancharqa, yuyarichirqachá Coreytawan qatiqninkunata Jehova Dios chinkarachisqanmanta. Chay ruwasqanwanmi sutillata qawachirqa paykunata mana chaskisqanta. Aarontam ichaqa chaskirqa. Chaywanmi Pabloqa niyta munachkarqa, mana allin cristianokuna congregacionpi kaptinkupas Jehova Diosqa paypaq kaqkunata Moisespa tiemponpi hina reqsisqanta.

¹² Jehova Diosqa manam haykapipas cambianchu, payqa confianapaqmi. Cheqninmi mana allin ruwaykunata, hinaspapas  huchanmanta mana wanakuqkunataqa tiempollanpim cuentata mañan. Jehova Diospi hapipakusqanraykum Timoteota Pablo yuyarichirqa mana allinkunamanta suchurikunanpaq hinaspa cristiano tukuqkunapa contranpi churakunanpaq. *

13. ¿Imamantam mana iskayrayachwanchu?

¹³ Ñoqanchiktapas yanapawanchikmanmi Timoteoman Pablopa carta qellqasqanqa. ¿Imaynata? Jehova Diosqa reqsinmi payman sonqo kaqkunataqa hinaspapas ñoqanchikmantam nanachikun. Chaymi Bibliaqa niwanchik: “Diosqa qawamuchkanmi llapallan kay pachapi pasaqkunata chaynapi paypa qayllanpi allin sonqoyoqkunaman atiyninta qawachinanpaq”, nispa (2 Cron. 16:9). Chaynaqa, Jehova Diosta servinapaq tukuy sonqowan ruwasqanchikqa manam yanqapaqchu kanqa, payqa bendeciwasunmi (1 Tim. 1:5; 1 Cor. 15:58).

14. ¿Imayna serviqninkunatam Jehova Diosqa mana chaskinchu?

¹⁴ Pablopa nisqanmi yuyarichiwanchik hawa sonqolla serviqkunata Jehova Dios mana chaskisqanta. Payqa “qawamuchkanmi llapallan kay pachapi pasaqkunata”, qawachkantaqmi pikuna hawa sonqollawan servisqantapas. Proverbios 3:32 nisqanman hinaqa, Jehova Diosqa cheqninmi payta serviq tukuspanku pakallapi hucha ruwaqkunataqa. Paykuna runamasinkuta engañaspankupas, Jehova Diostaqa manam engañankuchu. Bibliaqa ninmi: “Huchankuna pakaq runaqa manam allinchu kanqa”, nispa. Diosqa allin ruwaq kasqanrayku hinaspa ancha atiyniyoq kasqanraykum chaynata nin (Prov. 28:13; leey 1 Timoteo 5:24; Hebreos 4:13).

15. ¿Imatam mana ruwananchikchu, hinaspa imanasqa?

¹⁵ Jehova Diospa yaqa llapallan serviqninkunaqa sonqomantam yupaychanku. Manachusmi pipas llullantaqa hawa sonqollaqa servinmanchu. Ichaqa Moisespa tiemponpiwan punta pachak cristianokunapa tiemponpim chay pasakurqa, kunanpas chaykunaqa kanmanmi (2 Tim. 3:1, 5). Chaywanqa ¿nichkanchikchu Diosman sonqo iñiqmasinchikkunamanta iskayrayanapaq? Manamá. Yanqamantaqa manam iskayrayananchikchu (leey Romanos 14:10-12; 1 Corintios 13:7). Diosman sonqo iñiqmasinchikkunamanta iskayrayayqa Jehova Dioswan amistadninchiktam yanqacharunman.

16. (1) ¿Imatam ruwananchik Jehova Diosta mana hawa sonqolla servinapaq? (2) ¿Imatam yachachiwanchik “ Sonqoykichikta tapukuykuychik” niq recuadro?

¹⁶ Cristianokunaqa ‘sapakamam kikinkupa vidankuta qawakunanku’ (Gal. 6:4). Llapanchikmi pantaq kanchik, chaymi mayqenninchikpas mana musyakuspa hawa sonqollaña Jehova Dios serviyta qallaykuchwan (Heb. 3:12, 13). Chaymi sapa kuti qawakunanchik imayna kasqanchikta. Ichapas kaynata tapukuchwan: “¿Kuyasqayraykuchu hinaspa llapallan kamachiq kasqanta reqsikusqayraykuchu Jehova Diosta servini? ¿Icha sumaq huertapi kusisqa kawsakuyta munaspallaychu?”, nispa (Apoc. 4:11). Kay tapukuykunapi yuyaymanasqanchikqa yanapawasunmi Diosta mana hawa sonqolla servinapaq.

17, 18. ¿Imanasqataq Jehova Diosta sonqomanta servinanchik?

¹⁷ Bibliam nin: “¡Mayna kusisqam mana huchallikuqpaqña Tayta Diospa hapisqan runaqa! ¡Mayna kusisqam tukuy piensasqankunapi  mana engañakullaq runaqa!”, nispa (Sal. 32:2). Diosta sonqomanta serviyqa allinninchikpaqmi. Kunanpas hinaspa hamuq tiempopipas kusisqam tarikusun.

¹⁸ Jehova Diosqa tiempollanpim mana allin ruwaqkunatawan iskay uya kaqkunata pim kasqankuta qawachinqa. Chaynapim sutillata qawasunchik “pim allin ruraqqa kasqanmanta, pim mana allin ruraqpas kasqanmanta, pim Dios adoraq kasqanmantapas chaynataq pim mana adoraq kasqanmantapas” (Mal. 3:18). Manaraq chaykuna pasakuchkaptinqa kallpanchawanchikmi Bibliapa kayna nisqan: “Señorqa cuidachkanmi allin ruraq runakunataqa. Señorqa uyarinmi mañakusqankutaqa” (1 Ped. 3:12).