Chile nacionniyoq María Isabel sipascham Diosmanta kusikuywan willakun San Bernardo llaqtapi. Payqa ayllunpiwanmi mapuche castamanta kanku hinaspam kusisqa yanapakurqaku mapudungún otaq mapuche rimayninkupi huk congregacion kananpaq.

Jesuspa wañukusqan punchawta yuyarinapaq mapudungún rimaypi iskay waranqa invitacionkuna aypunamanta willakuyta uyariruspanmi, payqa tapukurqa imayna yanapakunanmanta. Piensarqam huk mozo-sipaskuna estudiaqmasinkunata chaynataq profesorninkuta predicanankupaq ima ruwasqankupi. Tayta-mamanwanmi parlarqa, paykunañataqmi nirqa imayna aypunanmanta pay tanteananpaq. ¿Imatam ruwarqa?

Escuelaman yaykuna hatun punkupi huk invitacionta churananpaqmi escuelanpi cuentallikuqkunawan rimarqa. Chayta ruwananpaq saqespankupas alabarqakuraqmi chayna ruwananpaq tanteasqanmanta. Escuelapi directorqa parlantentakamam chay invitacionmanta willachirqa lista qayanan horapi.

Chaymantapas María Isabelqa profesorkunawanmi rimarqa sapa salonman yaykuspa chay invitacionmanta willananpaq. Chaypim estudiaqmasinkunata tapurqa mapuche castamanta pikuna kasqankuta. María Isabelmi nin: “Ñoqaqa piensarqanim chunkalla otaq chunka pichqayoqlla llapanpi kasqankuta, ichaqa achkamá kasqaku. Llapanpiqa, ¡150 invitacionkunatam aypururqani!”, nispa.

Escuela punkupi invitacionta huk señora qawaruspanmi, tapukurqa chaymanta astawan pi willananmanta. Payqa admirakurqam 10 watayoq sipaschaman pusaspanku paymi willasunki niptinku. Asirispanraqmi María Isabelqa nin: “Payqa piensarqam aswan yuyayniyoqña kasqayta”, nispa. Huk invitacionta qoykuspanmi sipaschaqa pisillata chaymanta willaykurqa, hinaspanmi chay señorata tapurqa maypi yachasqanta tayta-mamanwan rispa Diospa Gobiernonmanta astawan willananpaq. Mapudungún rimaypi predicaq 20 iñiqmasinchikkunam kusisqallaña tarikurqaku, Jesuspa wañukusqan punchawta yuyarinapaq mapuche castamanta chay señora hinaspa 26 runakunapiwan risqankumanta. ¡Kunanqa chay grupom huk sumaq congregacionña kachkan!

Hayka watayoqña kaspapas, ¿yaqachum ñoqanchikpas estudiaqmasinchikta otaq llamkaqmasinchikta invitachwan Jesuspa wañukusqan punchawta yuyarinapaq huñunakuyman, lliw runakunapaq discursoman otaq kimsa punchaw asambleamanpas? Qellqanchikkunapiqa tarisunmi imaynata ruwanapaq yanapawaqninchik sumaq experienciakunata. Jehova Diostapas mañakusun chuya espiritunta qowaptinchik mana manchakuspa runamasinchikman predicanapaq (Luc. 11:13). Imaynata ruwanapaq allinta tanteaspaqa, allinpi tukusqanta qawaspachá admirasqa hinaspa kallpanchasqa tarikusun.