Kaytam willakun Elva Gjerde

Yaqa 70 wata ñawpaqtam, huk runa watukamuwaspanku taytayman huk consejota qorqa, chay nisqanwanmi viday cambiarurqa. Chaymantapacham achka runakuna vidaypi anchata yanapawarqaku. Chaymantañataqmi imamantapas astawan chaninchasqay allin amistadta rurarurqani ¿Imamantam rimachkani? Kunallanmi willasqaykichik.

SYDNEY (Australia) lawpim nacerqani 1932 watapi. Tayta-mamay Diospi iñiq kaspankupas manam iglesiamanqa riqkuchu. Mamaymi sapa kuti niwarqa: “Diosqa qawachkasunkim, mana allinta ruraptikiqa castigasunkim”, nispa. Chayraykum Diosta manchakurqani. Chayna kaptinpas yachaytam munarqani Bibliamanta. Semana tukuytam tiay watukamuwaspanku Bibliamanta sumaq willakuykunata willawarqa. ¡Kusikuyllawanñam suyaq kani!

Sipasllaraq kachkaptiymi huk yuyaq señora mamayman tukuy rikchaq librokunata qorqa, chay señoraqa karqa Jehová Diospa testigonmi, taytayñataqmi llapachallanta leerqa. Chay leesqan librokunawan anchata admirakuruspanmi Biblia estudiayta qallaykurqa. Wasipi huk tutan Bibliata estudiachkaspanmi cuentata qokurqa pakallanpi uyarisqaymanta. Camaykiman kutiy niwananpaq kachkaptinmi estudiachiqnin Testigo nirqa: “¿Imanasqataq mana munankichu Elvapiwan estudiananchikta?”, nispa. Chaymantapacham viday cambiarurqa, Jehová Dioswantaqmi sumaq amistadta rurarurqani.

Chaymantam taytaywan huñunakuykunaman riyta qallaykurqaniku, payqa cambiayta qallaykuspanmi imayna kaynin controlakuytapas yacharurqa. Kaymi mamaytawan mayor turiy Frankta yanaparqa huñunakuykunaman riyta qallaykunankupaq. * Tawaykum iñiyniykupi ñawparispayku bautizakurqaniku Jehová Diospa testigon kanaykupaq. Chaymantapacham amistadta rurarqani yuyaq achka cristianokunawan, paykunam vidaypi anchata yanapawarqaku.

VIDAYWAN IMA RURANAYPAQMI TANTEARURQANI

Anchatam munaq kani yuyaq cristianokunawan kayta. Familiaymi Testigokunamanta chayraq yacharurqaku Alice Place sutiyoq iñiqmasinchikpa predicasqanwan, paymi abuelay hina kaspan yachachiwarqa predicayta, yanapawarqataqmi bautizakuyman imayna chayanaypaqpas. Chaymi 15 wataypi bautizakurqani.

Amistadtaqa rurarqanitaqmi Percy hinaspa Margaret Dunham casarasqa yuyaq iñiqmasinchikkunawanpas, paykunam ñoqapi interesakuspanku yanapawarqaku vidaywan ima ruranaymanta tanteanaypaq. Matematica anchata gustawasqanraykum profesora kayta munarqani. Ejemplonmi ichaqa  piensayniyta cambiarurqa. 1930 watamanta qatiqnin watakunapim Letonia nacionpi misionero karqaku. Enteron pachapi iskay kaq hatun guerra qallaykuptinmi Australia Betelman invitarqaku. Misionero kasqankumantam sumaq experienciankuta willakuqku. Yanapakuyninkuwanmi cuentata qokururqani matematica yachachiymantaqa Bibliamanta yachachiy aswan allin kasqanta. Chaymi tantearurqani haykapipas misionera kanaypaq.

Dunhamkunam niwarqaku misionera kanaypaqqa precursoraraq kanaypaq. Chaymi 1948 watapi 16 wataypi kachkaspay Hurstville (Sydney) lawpi kaq congregacionniypi kusisqallaña serviq chunka mozo-sipas precursorkunaman hukllawakurqani.

Nueva Gales del Sur hinaspa Queensland lawkunapa tawa llaqtankunapim tawa wata predicarqani. Chaypim Bibliamanta yachachirqani Betty Law (casarakuruspanñataq Remnant) sutiyoq kuyapayakuqllaña sipasman, payqa iskay watallawan mayorniymi karqa. Tiempopa risqanman hinam precursora kaspan predicaqmasiy karqa Cowra llaqtapi, chayqa karqa Sydney lawmanta 230 kilometro intipa seqaykunan lawpim. Pisi tiempolla kuska predicaptiykupas hinallam allin amistad kachkaniku.

Chaymantam precursora especial kanaypaq nombraruwaspanku Narrandera sutiyoq llaqtaman rinaypaq niwarqaku, chayqa karqa Cowra lawmanta 220 kilometro intipa seqaykunan lawpim. Chaypi predicaqmasiymi karqa Joy Lennox (casarakuruspanñataq Hunter), paypas iskay watawan mayorniy hinaspa kusisqallaña predicaq precursoram karqa. Chaypiqa ñoqallaykum Testigo karqaniku. Ray hinaspa Esther Irons sutiyoq casarasqa runakunapa wasinpim samapakuq kaniku. Paykunaqa qokuykuqllañam karqaku hinaspapas qari warmanpiwan kimsa warmi warmankunawanmi Diosmanta yachayta munarqaku. Raypas chaynataq qari churinpas ovejakunatam michiqku hinaspapas trigotam tarpuqku chakrapi. Estherwan kimsa warmi warmankunañataqmi pensionta qoqku. Domingonpim Joy hinaspa ñoqa mikuyta ruraq kaniku samapakusqayku familiapaqwan trenpa purinan ñanpi 12 llamkaqkunapaq, paykunapas Ironspa wasinpim samapakuqku. Chaywanmi arriendasqaykumanta wakinta pagaq kaniku. Chaymantam mesata limpiaspayku miski mikuyta mikuchkaq hina Llaqta Cuidaq revistata estudiaq kaniku. Tiempo pasaptinmi soqtanku Narrandera sutiyoq congregacionpi punta Testigokuna karqaku.

1951 watapim Jehová Diospa testigonkunapa asambleanman rirqani, chayqa karqa Sydney llaqtapim. Hatun karpapim misionero kayta munaq precursorkunapaq ancha allin huñunakuy apakurqa, chaypiqa 300 masnin precursorkunam huñunakurqaniku. Brooklyn Betelmanta kaq Nathan Knorr iñiqmasinchikmi sumaqta willarqa Diospa Gobiernonmanta willakuy kay pachapa cantonkama chayananmanta. Llapallaykum sumaq atencionwan uyarirqaniku. Tiempopa risqanman hinam paykunamanta achka precursorkuna Pacífico Sur lawpi hinaspa huk llaqtakunapipas Diospa Gobiernonmanta allin noticiata punta willakuqkuna karqaku. Australiamantam 17 precursorkuna invitasqa karqaniku 19 kaq Galaad Escuelaman rinaykupaq, chaymi apakurqa 1952 watapi. ¡Iskay chunka watallaypim misionera kay munasqayta hayparurqani!

IMAYNA KASQAYTAM CAMBIANAY KARQA

Galaad Escuelaqa manam Bibliamanta yachayniypiwan iñiyllaypichu yanapawarqa, aswanqa imayna kayniypi cambianaypaqpas yanapawarqam. Sipas kaspayqa puramintitam imapipas hikutakuq kani ñoqapa piensasqayman hina imapas rurakunanpaq, mana chayqa hukmanyaruqmi kani, chaynataqmi hukkunawanpas karqani. Huk punchawmi admirasqa qeparurqani iñiqmasinchik Knorr Betelpi llamkaqkunawan pelotapi pukllachkaqta rikuruspay.

Galaad Escuelapi allin experienciayoq profesorkunaqa cuentatachá qokururqaku imayna sientekusqaymanta.  Ñoqapi interesakuspankum yachachiwarqaku ima rurasqaypas piensasqayman hina mana rurakuptinqa mana hukmanyarunaypaq. Pisi-pisimantam entienderqani Jehová Diosqa ancha kuyakuq hinaspa agradecekuq kasqanmanta, Payqa mana atisqanchikkunataqa manam kamachiwachwanchu. Yanapawarqataqmi claseypi kaqmasiykunapas. Paykunamanta huknin amigaymi niwarqa: “Elva ama llumpaytaqa hikutakuychu, pantaptikipas Diosqa manam castigasunkichu”, nispa. Chayna consejawasqanmi sonqoyman chayarurqa.

Escuelaykuta tukuruptiykum Namibia (África) lawman rinaykupaq pichqata niwarqaku. Pisi tiempollamantam llapaykumanta yaqa 80 runakunata Bibliamanta estudiachirqaniku. Anchatam gustawarqa chay llaqta hinaspa misionera kasqayqa, ichaqa Galaad escuelamanta kaqmasiymi sonqoyta suwaruwasqaña, payqa Suiza nacionpim misionero karqa. Chaymi qatiqnin watata chayman astakuruspay casarakururqaniku. Chaypim congregacionkunata watukuq karqaniku.

HATUN LLAKIPIM TARIKURQANI

Pichqa wataña congregacionkunata watukuq kasqaykumantam, Suiza Betelpi servinaykupaq invitawarqaku. Ancha kusikunapaqmi karqa Betel familiapi ancha experienciayoq yuyaq iñiqmasinchikkunapa parten tarikusqaykuqa.

Chayna kaptinpas, chay qepallamanmi hatun llakipi tarikurqani, qosaymi Jehová Diostawan ñoqata engañaruwarqaku, hinaspam saqeruwarqa. Pasaypaq hukmanyasqam tarikurqani. Imatach rurayman karqa Betelpi yuyaq iñiqmasinchikkuna kuyakuywan mana yanapaykuwaptinkuqa. Paykunaqa rimariyta munaptiymi uyariykuwaqku hinaspapas sapallaypi kay munasqaytam respetaqku. Chaymantapas, hawkayachikuq rimayninkupiwan kuyapayawasqankum yanapawarqa llakipi tarikusqayta aguantanaypaq chaynataq Jehová Diospi astawan confiakunaypaqpas.

Achka sasachakuykunata atipaq yuyaq cristianokunapa pasaq watakunapi yachaywan consejawasqankutam yuyarirurqani. Margaret Dunham sutiyoq iñiqmasinchikmi niwarqa: “Jehová Dios servisqaykipiqa achka sasachakuykunam hamunqa, hatun sasachakuykunaqa hamunqa pipas kuyasqaykimantam. Chaykuna pasasuptikiqa Jehová Diosman hapipakuy. Ama qonqaychu haykapipas: ‘Paytam servichkankiqa manam pantaq runatachu’”, nispa. Paypa consejawasqanmi yanapawarqa sasachakuykuna tarikusqaypi. Manam haykapipas saqekurqanichu qosaypa mana allin rurasqankuna Jehová Diosmanta karunchawanantaqa.

Chaymantañataqmi kutirqani Australiaman precursora hina servinaypaq, chaymantaqa familiaypa yachasqanmanqa hichpallañam karqa. Barcopi viajaspaymi pasajerokunaman Bibliamanta sumaqta willarqani. Paykunamanta hukninmi karqa Noruega nacionmanta Arne Gjerde sutiyoq runa. Chay qepamanmi Sydney llaqtaman watukamuwarqaku. Chayllam iñiyninpi ñawparispan bautizakururqa. 1963 watapim paywan casarakururqani, chaymanta iskay watallamanmi Gary sutiyoq warmayku naceramurqa.

KAQMANTAM HATUN LLAKIPI TARIKURQANI

Ñoqa, Gary hinaspa Arneqa ancha kusisqam tarikurqaniku. Chay qepallatam Arneqa wasiykuta hatunyachirqa yuyaq tayta-mamay ñoqaykuwan yachanankupaq. Ichaqa soqta wata casarasqaña kachkaptiykum, willaykuwarqaku cáncer cerebral nisqawan Arne onqosqanmanta. Radioterapia nisqatam rurarqaku, sapa punchawmi hospitalpi cuidaq kani. Qallariypiqa tumpatam allinyarurqa, chaymantam ichaqa  qonqayllamanta cerebronpi venachan toqyaruptin aswanyarurqa. Semana-imallaña kawsanantam niykuwarqaku. Ichaqa allinyaruspanmi wasiman kutimurqa, chaypim yanaparqani pisi-pisimanta allinyananpaq. Tiempopa risqanman hinam puriytaña qallaykurqa, hinaspanmi congregacionpi anciano kayninpi hinalla yanapakurqa. Ancha kusisqa kaspanmi hawkalla kawsarqa, chayna kasqanmi ñoqatapas yanapawarqa cuidaypi mana sasachakunaypaq.

Watakuna risqanman hinam tayta-mamay wañukurqa. 1986 watapiñataqmi Arneqa astawanraq onqorurqa, chaymi Sydneymanta astakurqaniku montes Azules lawman, chaypim karqaniku amistadniykupa hichpallanpi. Chaymantam Gary casarakururqa Diosman sonqo Karin sutiyoq iñiqmasinchikwan. Yaqa huk-iskay killa qepamanmi paykuna niwaptinku yachasqaykumanta tumpa waklawninman tawayku astakurqaniku.

Arneqa wañukunankamam 18 killa camallapi karqa. Imay horapas cuidanata necesitasqanraykum wasiymanta mana ancha lloqsiqchu kani. Sapa punchaw Bibliatawan qellqanchikkunata iskay hora estudiasqaymi yanapawarqa chayna tarikusqayta aguantanaypaq. Congregacionniymanta yuyaq cristianokunam kallpanchawarqa watukamuwaspanku, paykunamanta wakinninkuqa ñoqa hinam sasachakuykunata pasasqaku. Arnem wañukurqa 2003 watapa abril killanpi, payqa segurom karqa hamuq tiempopi kawsarimunanmantaqa.

ANCHA ALLIN YANAPAWAQNIY

Sipas kasqaymantam ima munasqaypas allin lloqsinanta munaq kani, ichaqa yacharurqanim wakinpiqa munasqayman hina imapas mana lloqsinanta. Achka bendicionkunatam vidaypi chaskirqani, ichaqa pasaruwarqataqmi iskay hatun llakikunapas: huknin qosaymi pierdekururqa hukninñataqmi cancerwan wañukurqa. Kay sasachakusqay tiempopiqa achka runakunam consejawarqaku hinaspa consuelawarqaku. Chayna kaptinpas ancha yuyayniyoq Jehová Diosmi ancha allin yanapawaqniyqa karqa (Dan. 7:9). Palabranwanmi imayna kasqaypi yanapawarqa, hinaspapas misionera kaptiymi sumaq bendicionkunawan favoreceykuwarqa. Sasachakuykunapi tarikuptiypas kuyapayawaspanmi sumaqta kallpanchawarqa (Sal. 94:18, 19). Iñiqmasinchikkunapawan familiaypa kuyawasqanku hinaspa consuelawasqankupas anchatataqmi yanapawarqa, iñiqmasinchikkunamanta wakin yanapawaqniykunaqa karqaku yuyaqkunam. Paykunaqa “sasachakuy tiempopipas [turi-ñañay] hinaraqmi” karqaku (Pro. 17:17).

Diosta serviq Jobmi kaynata nirqa: “Machuyaruqña runakunapim kachkan yachayqa. Unay watayoq runakunapim kachkan entiendeyqa”, nispa (Job 12:12). Vidaypi piensarispaymi cuentata qokuni chayna nisqan cheqap kasqanmanta. Yuyaq runakunam sumaq consejonkunawan yanapawarqa hinaspa consuelawarqa, yanapawarqakutaqmi paykunawan allin amistad kanaypaqpas. Ancha favorecesqam tarikuni yuyaq cristianokunawan allin amistad kasqaymanta.

80 wataypiñam kachkani, kunanqa ñoqañam yuyaqqa kani. Imakuna pasawasqanmi yuyaqmasiykunapa imapas necesitasqankupi interesakunaypaq yanapawan, chaymi gustawan paykunata watukuy hinaspa yanapaykuypas. Kusikunitaqmi mozo-sipaskunawan kaspaypas. Paykunapas anchatataqmi kallpanchawanku hinaspa kusichiwanku. Imapipas consejanaypaq niwaptinkuqa ancha kusikuywanmi yanapaykuni.

[Willakuy]

[14 kaq paginapi foto]

Ñoqa hinaspa Joy Lennox, Narrandera llaqtapi precursora kaspayku

[15 kaq paginapi foto]

1960 watapi Elvapiwan Suiza Betelpi Diosman sonqo iñiqmasinchikkuna

[16 kaq paginapi foto]

Arneta cuidaspan