“Kunan mana puriy atisqayqa, ¡manamá wiñaypaqchu!”

Kaytam willakun Sara van der Monde

Runakunam niwan: “Sara, kuyayllapaqmi asiriyniki. ¿Imanasqataq tukuy tiempo kusisqallaña kanki?”, nispa. Ñoqañataqmi suma-sumaq suyakuyniyoq kasqaymanta willani. Kaynatam nini: “Kunan mana puriy atisqayqa, ¡manamá wiñaypaqchu!”, nispa.

PARÍS llaqtapim 1974 kaq watapi nacerqani. Sasachakuywanmi mamay wachakuwarqa, chay qepallatataqmi umaywan onqosqayta yacharurqaku. Chay onqoyniyoq kasqayraykum makiywan chakiyqa ñakayta kuyuq, rimasqaypas yaqa mana entiendekuqmi karqa, chaymantapas wañuymaña onqoywanmi karqani, hinaspapas chayllam ima onqoypas hapiwaq.

Iskay wataypi kachkaptiymi Australia nacionpi Melbourne llaqtaman astakurqaniku. Iskay wata pasaytañataqmi taytayqa ripukuspan mamaytawan saqeruwarqaku. Chaynapimá Dios yanapawasqanta qawarqani. Mamaymi Jehová Diospa Testigon karqa chaymi pusawaq huñunakuykunaman, chaypim Dios kuyawasqanmantawan ñoqapi reparasqanmanta yacharqani. Chaykunam mamaypa kuyakuyninpiwan kallpanchawasqan hawkallata tarichiwarqa tukuy ima manaña puntata hina kaptinpas.

Chaymantapas mamayqa Dios mañakuytam yachachiwarqa. Chay rurayqa manamá rimay hina sasachu, sonqollaypi mañakusqayrayku. Hawkamá tarikuni imaynataña mañakuptiypas Jehová Dios uyariwasqanmanta (Sal. 65:2).

Sasachakuyniykunatam atipani

Pichqa wataypi kachkaspaymi astawan sasachakurqani chakiyta kuyuchinaypaq, chaymi purinaypaqqa llasaq aparatowan yanapachikurqani. Allinta purinaymantaqa tampi-tampillatam ichiq kani. 11 wataypiñataqmi manaña purirqanichu. Hinaptinmi grua nisqa maquinataña servichikurqani camaymanta hoqariwaspan motorniyoq sillaypi tiyachiwananpaq.

Wakinpiqa onqosqayraykum llakisqa tarikuni. Hinaspaymi yuyarini familiaywan kayna nisqaykuta: “Ama llakikuychu mana ruray atisqaykimantaqa, atisqallaykita ruray”, niqta. Chaywan kallpanchakuspaymi atirqani caballopi sillakuyta, botepi riyta, paseoman riyta chaynataq carro manejaytapas. Imapas ruray atisqaytam qawachini dibujaspay, siraspay, bordaspay, colchakunata ruraspay hinaspa mitumanta imachakunatapas ruraspay.

Onqoyniykunaraykum wakinku iskayrayanku yuyayniyoq hina Diosta servinaymanta. 18 wataypim huknin profesoray hikutawarqa wasiymanta ripukuspay mamaypa religionninta saqenaypaq. Niwarqataqmi maypi samapakunayta maskapuwananpaq. Ichaqa mana  manchakuspaymi nirqani iñiyniytaqa mana haykapipas saqenaymanta, nirqanitaqmi kikiymanta imatapas rurayta atispayña wasiymanta lloqsinaymantapas.

Profesoraywan parlasqay qepallatam bautizakururqani Jehová Diospa testigon kanaypaq. Chaymanta iskay wata pasaytam taksa wasiman astakurqani, chaypiqa hawkamá tarikuni.

Qonqaymanta rimapayawasqan

Tiempopa risqanman hinam Dioswan amistadniy yaqalla yanqachakururqa. Huk kutipim ñoqa hina onqoq estudiaqmasiy niwarqa paywan casarakunaypaq, chaymi mana ima niytapas atirqanichu. Chayna niwasqanwanqa kusikurqanimá, wakin sipaskuna hina ñoqapas vida pasaqmasiy kananta munasqayrayku. Ichaqa warmi-qari onqoq kaspaqa manach kusisqaqa kawsaymankuchu. Sapaq religionniyoqtaqmi karqa, chaymi iñiyniyku, imayna kawsayniyku nitaq imam ruray munasqaykupas mana tupaqchu. Chaynaqa, ¿imaynatamá iskayniykuqa kawsaymanku? Ñoqaqa munarqanim Diospa kamachisqanman hina iñiqmasillaywan casarakuyta (1 Cor. 7:39). Chaymi mana sientichispallay chay estudiaqmasiypa niwasqanta qepancharqani.

Manamá pesakunichu chayna rurasqaymantaqa. Manataqmi iskayrayanichu mosoq pachapi Diospa prometesqanman hina kusisqa kawsakunaymantapas (Sal. 145:16; 2 Ped. 3:13). Chaykamaqa, kallpanchakunaymi Jehová Diosman sonqolla kanaypaq chaynataq imayna kasqaywan hawkalla kanaypaqpas.

Anchatam munachkani chay punchaw chayaramuptin mana sasachakuspay wayra hina kayman-wakman puriyta. Hinaptinmi qaparisaq: “Ñawpaqtam mana puriyta atirqanichu, ¡kunanmi ichaqa wiñaypaqña purisaq!”, nispa.