Moisesmanta aswan Atiyniyoqta chaninchasun

“Señor Diosninchikmi castanchikmanta ñoqata hina rikurichipusunkichik huk willakuqta. Chaynaqa kasukuychikyá.” (HECH. 3:22.)

1. ¿Imakunatam runakunaqa ruranku Jesusmanta yachaspanku?

YAQA iskay waranqa wata qepatam huk wawacha nacerqa, chaymi michiqkuna uyarichkaptin achkallaña angelkunapas Diosta alabarqaku (Luc. 2:8-14). Watakuna pasaptinmi hatun runaña karqa. 30 watayoq kaspanmi kimsa wata partellan predicarqa, chayna kaptinpas rurasqanqa runakunapa vidanpim tukuy imata cambiarachirqa. Ñawpaq tiempopi sucedesqanmanta yachaq Philip Schaff sutiyoq runam nin: “Kikinmanta mana imallatapas qellqachkaptinmi runakunaqa yachachisqanmantawan rurasqanmanta librokunata ruranku, takikunata horqonku, chaynataq artistakunapas actuanku, chaykunam qawachiwanchik ancha reqsisqa runakunamantapas paypa rurasqanqa ancha valorniyoq kasqanta.” Chayna admirakuypaq runaqa Jesusmi.

2. ¿Imatam nirqa Jesuspa rurasqanmanta apostol Juan?

² Jesuspa rurasqanmanta qellqaspanmi apostol Juanqa tukuyninpi nin: “Achkallañam kachkan Jesuspa tukuy ima rurasqankunaqa, sichu sapakamamanta qellqaptinkuqa piensasqayman hinaqa manachá kay pachapas haypanmanchu llapa libro churanapaq”, nispa (Juan 21:25). Juanqa yacharqam Jesuspa kimsa wata partenpi nisqanmantawan rurasqanmanta llapallan qellqayta mana atisqanta. Chayna kaptinpas ancha allinmi paypa qellqasqanqa.

3. ¿Imaynatam astawan yachachwan Diospa munaynin rurakunanpaq Jesuspa rurasqanmanta?

³ Mateo, Marcos, Juan hinaspa Lucas librokunamanta Bibliapi wakin librokunapas willawanchikmi Jesuspa wakin rurasqankunamanta, chaykunaqa iñiyninchiktam kallpanchan. Ejemplopaq, ñawpaq tiempopi Diosman sonqo runakunamanta yachasqanchikmi, yanapawanchik Diospa munaynin rurakunanpaq Jesuspa rurasqanmanta allinta entiendenanchikpaq. Wakinmantayá yachasun.

Allin ruraq runakunam qawachirqakuña Jesuspa imayna kananmanta

4, 5. ¿Pikunataq qawachirqakuña Jesuspa imayna kananmanta hinaspa imaynata?

⁴ Jesusmanta rimaq tawa librokunam willakun Moises, David hinaspa Salomonpas Jesuspa imayna kananmanta ñawpaqmantaraq qawachisqankuta, payqa Diospa nombrasqan Reymi. ¿Imapitaq paykunaqa Jesusman rikchakurqaku? ¿Imatam paykunapa vidanmanta yachachwan?

⁵ Bibliaqa ninmi Moisesqa Diosmanta willakuq, contrato ruraq hinaspa libraq kasqanmanta, Jesuspas chaynam. Davidñataqmi oveja michiq hinaspa enemigonkunata venceq allin rey karqa, Jesuspas Diospa llaqtanpi michiqninchik hinaspa mana vencechikuq reymi (Eze. 37:24, 25). Salomonpas Diosman sonqo kaspanqa yachayniyoq reymi karqa, gobiernasqan watakunapipas israelitakunaqa hawkam kawsakurqaku (1 Rey. 4:25, 29). Jesuspas ancha yachayniyoqmi, Bibliapas ninmi ‘Hawkayay Qokuq Kamachikuqmi’ nispa (Isa. 9:6). Paypa rurasqanqa rikchakunmi Diosta ñawpa tiempopi serviqkunapa rurasqankuwan, ichaqa Diospa munaynin rurakunanpaq imakuna rurasqanqa mana igualay atinam. Jesuswan Moises imakunapi rikchakusqankumanta qawasun. Chaynapim Jesuspa rurasqanta astawan chaninchasun.

 Moisesqa, Jesus hinam karqa

6. ¿Imaynatam Pedro qawachirqa Jesusta kasukuyqa ancha allin kasqanta?

⁶ Qawasunchikyá Moisespa willakusqan Jesuspi cumplikusqanmanta, chaymantam apostol Pedro templopi achka judiokunapa qayllanpi rimarqa. Pedrowan Juanmi 33 watapi Pentecostes fiesta qepallata sanoyarachirqaku nacesqanmantapacha suchu runata. Purisqanta qawaspankum runakunaqa ‘admirakurqaku’ hinaspam apostolkunaman asuykuspanku imayna sanoyachisqanmanta tapurqaku. Hinaptinmi, Pedro willarqa Jesucristotakama Jehová Diospa espiritun qosqanwan milagro rurakusqanta. Hinaspam Jesuspi cumplikuq hebreo rimaypi Diospa Palabranmanta willakurqa. Kaynatam nirqa: ‘Abuelonchikkunamanmi Moisespas nirqa kaynata: “Señor Diosninchikmi castanchikmanta ñoqata hina rikurichipusunkichik huk willakuqta. Chaynaqa kasukuychikyá chay willakuqpa lliw nisusqaykichikta”’, nispa (Hech. 3:11, 22, 23; leey Deuteronomio 18:15, 18, 19).

7. ¿Imanasqataq Pedrota uyariqkunapaq mana sasachu karqa willasqanta entiendeyqa?

⁷ Pedrota uyariqkunapaqqa manachá sasachu karqa willasqanta entiendeyqa. Paykunaqa judio kaspankum Moisesta respetarqaku hinaspam kusikuyllawanña suyarqaku Diospa nombrasqan aswan atiyniyoq willakuq chayamunanta (Deu. 34:10). Moiseswan Jesuspas Diospa akllasqanmi karqaku, chayna kaptinpas Jesusqa manam Moises hinachu, aswanmi payqa “Diospa akllasqan cheqap Cristo” karqa (Luc. 23:35; Heb. 11:26).

Jesuswan Moises imakunapi rikchakusqankumanta

8. ¿Imakunapim rikchakunku Moiseswan Jesusqa?

⁸ Jesuspa vidanqa achkapim rikchakun Moisespa vidanwan. Ejemplopaq, wawacha kaptinkum iskayninkuta yaqalla wañurachirqa mana allin ruraq reykuna (Exo. 1:22–2:10; Mat. 2:7-14). Chaymantapas, iskayninkum Egiptomanta lloqsirqaku Dios kamachiptin. Oseasmi Diospa kayna nisqanta qellqarqa: “Israel runakunatam warmallaraq kaptin kuyarqani. Churiytam Egipto nacionmanta qayamurqani”, nispa (Ose. 11:1). Oseasqa rimachkarqam Egiptomanta ‘churin’ otaq israelitakuna lloqsisqankumanta, paykunatam Diospa nombrasqan Moises pusarqa (Exo. 4:22, 23; 12:29-37). Oseaspa nisqanqa cumplikurqataqmi rey Herodes wañukuptin, Joseywan Maria Jesuswan Egiptomanta kutimusqankuwan (Mat. 2:15, 19-23).

9. a) ¿Ima milagrokunatam Moiseswan Jesuspas rurarqaku? b) ¿Imakunapiwanmi paykunaqa rikchakunku? (Qawariy 26 paginapi  “Moiseswan Jesus imakunapiwan rikchakusqankumanta”.)

⁹ Moiseswan Jesusqa milagrokunatam rurarqaku, chaywanmi qawachirqaku Diospa yanapasqan kasqankuta. Bibliapa nisqanman hinaqa Moisesmi pimantapas puntata milagrokunata rurarqa (Exo. 4:1-9). Achka milagrokuna rurasqanmi yakuwan karqa. Ejemplopaq, Diospa atiyninwanmi kaykunata rurarqa: Nilo mayutawan qocharayaq yakukunatam yawaryarachirqa, Puka lamar qochatam iskaypi rakinarachirqa hinaspapas chunniqpim yakuta horqorqa rumimanta (Exo. 7:19-21; 14:21; 17:5-7). Jesuspas yakuwanqa achka milagrokunatam rurarqa. Qallariyninpi milagro rurasqanqa karqa casamientopi yakuta vinopi rikurichisqanmi (Juan 2:1-11). Huk kutipim nisyu-nisyu wayra Galilea qochapi olakunata hatarirachiptin hawkayachirqa, yakupa hawantapas purirqam (Mat. 8:23-27; 14:23-25).  Qatiqnin paginapa recuadronpim Moiseswan Jesus imakunapiraq rikchakusqanta qawachichkan.

Jesusqa, Diosmanta willakuqmi

10. a) ¿Imakunatam ruraqku Diosmanta willakuqkunaqa? b) ¿Imanasqataq nichwan Moisesqa Diosmanta willakuqmi karqa nispa?

¹⁰ Achka runakunam ninku Diosmanta willakuqkunaqa hamuq tiempomanta willakuqllam karqaku nispa, ichaqa manam chayllatachu ruraqku. Paykunaqa Dios yanapaptinmi willakuqku, willakuqkutaqmi ‘Diospa admirakuypaq rurasqankunamantapas’ (Hech. 2:11, 16, 17). Chaymantapas willakuqkum Diospa munayninmanta hinaspa piñakuyninmantapas. Chaynam karqa Moisespas. Paymi willarqa Egipto nacionta 10 castigowan Dios ñakarichinanmanta.  Chaynataq Sinai orqopim israelitakunaman Diospa Leyninkunata qorqa, willarqataqmi Diospa ima munasqanmantapas. Chayna kaptinpas paymanta aswan atiyniyoq willakuqmi rikurimunan karqa.

11. ¿Imanasqataq ninchikman Jesusqa Moisesmantapas aswan atiyniyoq willakuq kasqanta?

¹¹ Punta pachak watapi manaraq Jesus nacechkaptinmi, Bautizaq Juanpa taytan Zacarias Diosmanta willakuq karqa, chaynaqa karqa churinwan Diospa ima rurananmanta willaspanmi (Luc. 1:76). Bautizaq Juanñataqmi willarqa Moisespa nisqanman hina Diosmanta willakuq Jesucristo rikurimunanmanta (Juan 1:23-36). Jesuspas Diosmanta willakuqmi karqa, hamuq tiempomantam achkata willarqa. Willarqam wañukunanmanta hinaspa maypi, imayna chaynataq pikuna wañuchinanmantapas (Mat. 20:17-19). Chaymantapas willarqam Jerusalen hinaspa templopas purmachisqa kananmanta (Mar. 13:1, 2). Willasqanmanta wakinqa kunan tiempopipas cumplikuchkanmi (Mat. 24:3-41).

12. a) ¿Imaynatam Jesusqa qallarichirqa enteron pachapi predicacion rurakusqanta? b) ¿Imatam ruraspam Jesuspa ejemplonta qatipakuchwan?

¹² Jesusqa Diosmanta willakuq kaspanpas, predicaq hinaspa allin yachachiqmi karqa. Pimantapas astawanmi allin noticiamanta hinaspa Diospa Gobiernonmanta willarqa (Luc. 4:16-21, 43). Chaynataqmi mana tupachiy atina allin yachachiq karqa. Runakunapas paymantam  nirqaku: “Manam pipas pay hinaqa rimarqachu”, nispa (Juan 7:46). Diospa Gobiernonmanta allin noticiatam ganasllawanña willakuq, chaymi qatiqninkunapas kallpanchasqa karqaku chaynata ruranankupaq. Chaynatam qallarichirqa Diosmanta willakuyta hinaspa runakunaman yachachiytapas, chayqa hinallam rurakuchkan entero pachapi (Mat. 28:18-20; Hech. 5:42). Qayna watam yaqa 7 millon testigokuna 1.500 millon horata predicarqaku hinaspa Bibliamanta yachachirqaku. ¿Kallpanchakunkichu tukuy sonqoykimanta chayta ruranaykipaq?

13. ¿Imataq yanapawasun rikchan-rikchanlla kanapaq?

¹³ Jehová Diosqa prometerqam Moisesman rikchakuq willakuqta rikurichimunanmanta, chaytaqa cumplirqam. ¿Imatam chaymanta piensanki? ¿Manachu kallpanchawanchik Diospa promesankuna cumplikunanpi confianapaq? ¡Kallpanchawanchikmá! Jesuspa ejemplonpi yuyaymanaspaqa rikchan-rikchanllam kasun, allinta tanteaspam imatapas rurasun hinaspapas Jehová Diospa imakuna ruranantam qawan-qawanlla suyasun (1 Tes. 5:2, 6).

Jesucristoqa, Contrato ruraqmi

14. ¿Imanasqataq ninchik Moisesqa contrato ruraqmi karqa nispa?

¹⁴ Moiseswan Jesusqa contrato ruraqmi karqaku. Moisesnintakamam Jehová Diosqa contratota rurarqa israelitakunaman Leyninta qospan. Diospa kamachisqanta kasukuspankuqa, Diospaqmi sapaqchasqa runankuna otaq congregacionnin kanmanku karqa (Exo. 19:3-8). Chay contratoqa hinallam karqa ñawpaq 1513 watamanta cristianokunapa tiemponpi pachak watakama.

15. ¿Imanasqataq Jesusqa Moisesmanta aswan allin contrato ruraq?

¹⁵ Jehová Diosmi ‘cheqap akllasqankunawan’ otaq mosoq nacionwan 33 watapi mosoq contratota rurarqa, paykunaqa hanaq pachaman riy suyaqkunam kanku (Gal. 6:16). Moisesnintakama ñawpaq contrato rurakusqanpiqa Diospa kamachikuyninkunam tabla rumikunapi qellqasqa karqa. Jesusnintakama Diospa mosoq contrato rurakusqanmi ichaqa aswan allin. ¿Imanasqa? Kamachikuyninta sonqonkupi Dios qellqasqanrayku (leey 1 Timoteo 2:5 hinaspa Hebreos 8:10). ‘Cheqap akllasqankunaqa’ Diospa sapaqchasqa llaqtanmi rikurirun, paykunam hanaq pachapi sapaqchasqa gobiernopi kamachimunqaku (Mat. 21:43). Paykunawan mosoq contrato rurakuptinpas manam paykunapa allinnillanpaqchu, allinmi millonnintin runakunapaq hinaspa wañukuq runakunapaqpas, chay contratoraykum bendicionkunata llapallanku wiñaypaq chaskinqaku.

Jesusqa, Salvaqninchikmi

16. a) ¿Imakunata ruraspam Jehová Diosqa llaqtanta Moiseswan salvarqa? b) Exodo 14:13 nisqanman hina, ¿pitaq salvaqninchik?

¹⁶ Egipto nacionmanta israelitakuna lloqsinanku tutatam Jehová Diosqa huk angelta kamachirqa llapallan piwikunata wañurachinanpaq, israelitakunapas llumpay peligropim tarikurqaku. Moisesnintakamam Jehová Dios nirqa salvakunankupaqqa Pascuapi mikunanku carneropa yawarninta punkunkupa iskaynin marconkunapi hinaspa punkupa chakaqninmanpas hinanankupaq (Exo. 12:1-13, 21-23). Israelitakunaqa kasukuspankum churi-wawankunata salvarqaku. Egiptomanta lloqsiruspankum llumpay sasachakuypi tarikurqaku, Egipto tropakunam qepankuta qatirqaku, ñawpaqninmantañataq Puka lamar qocha harkarqa. Kaqllamantam Jehová Diosqa llaqtanta salvarqa Moiseswan lamar qochata iskaypi rakinarachispan (Exo. 14:13, 21).

17, 18. ¿Imanasqataq ninchik Jesusqa Moisesmanta aswan atiyniyoq salvaqninchikmi nispa?

¹⁷ Israelitakunapa kayna salvasqa kasqanku  admirakuypaq kaptinpas, manam igualanchu Churintakama Jehová Dios librawasqanchikmanqa. Chaynatam Jehová Diosqa kasukuq serviqninkunata huchamanta librawanchik (Rom. 5:12, 18). ‘Salvaciontam wiñaypaq rantipuwarqanchik’ (Heb. 9:11, 12). Jesuspa sutinqa “Jehová Diosmi salvaq” ninanmi. Jesusqa manam huchallanchikmantachu librawanchik, qowanchiktaqmi hamuq tiempopaq sumaq kawsakuy suyakuytapas. Huchamanta librawaspanchikmi Jesusqa Diospa piñakuyninmanta salvawanchik hinaspa yanapawanchik Taytanwan allin amistad kanapaq (Mat. 1:21).

¹⁸ Huchanchik pampachasqa kasqanraykum librasqa kasunchik onqoymanta hinaspa wañuymantapas. Kaymanta astawan entiendenapaqqa yuyarisun Jairopa 12 watayoq churin wañukuptin wasinman Jesus riptin ima pasasqanmanta. Jairotam Jesus kaynata nirqa: “Ama llakikuychu, ñoqapi confiakuptikiqa churikiqa sanoyanqam”, nispa (Luc. 8:41, 42, 49, 50). Nisqanman hinam sipaschata kawsarichimurqa. ¡Maynatachá tayta-mamanqa kusikurqaku! Ñoqanchikpas maynatachá kusikusun Jesuspa ‘qayasqanta uyarispanku llapallan wañuqkuna kawsarimuptinku’ (Juan 5:28, 29). Mana iskayrayaspam nichwan, Jesusqa Salvaqninchikmi nispa (leey Hechos 5:31; Tito 1:4; Apo. 7:10).

19, 20. a) ¿Imapaqmi yanapawasun Moisesmantapas Jesuspa aswan Atiyniyoq kasqanpi yuyaymanayqa? b) ¿Imamantam qatiqnin estudiopi yachasunchik?

¹⁹ Ñoqanchikpas predicaspa chaynataq yachachispam runakunata yanapachwan Jesus salvananpaqqa (Isa. 61:1-3). Moisesmanta aswan atiyniyoq Jesuscristo ñoqanchikpa favorninchikpi rurasqanpi yuyaymanasun, chaynapim mana allin ruraq runakunata puchukachikptin salvasqa kananchikpi astawan confiasun (Mat. 25:31-34, 41, 46; Apo. 7:9, 14).

²⁰ Moisesmantaqa aswan admirakuypaq milagrokunatam Jesucristo rurarqa, chaymi payqa Moisesmanta aswan atiyniyoq. Willakusqanwan contrato rurasqanqa lliw runakunatam yanapan, salvasqa kasqanchikpas wiñaypaqmi kanqa. Jesusmantaqa astawanmi yachachiwachwan Diosta ñawpaq tiempopi wakin serviqkunapas. Qatiqnin estudiopim yachasun Davidmanta hinaspa Salomonmanta Jesus imanasqa aswan Atiyniyoq kasqanta.

Yuyarisunchik

¿Imanasqataq ninchik Jesusqa Moisesmantapas aswan atiyniyoq . . .

• willakuq kasqanta?

• contrato ruraq kasqanta?

• salvaq kasqanta?

[Kay yachachikuypa tapukuyninkuna]

[26 kaq paginapi dibujo hinaspa recuadro]

  Moiseswan Jesus imakunapiwan rikchakusqankumanta

□ Allin reqsisqa kasqankutam saqerqaku Jehová Diosta hinaspa Paypa llaqtanta servinankupaq​—(2 Cor. 8:9; Fili. 2:5-8, NM; Heb. 11:24-26)

□ Diospa akllasqanmi karqaku​—(Mar. 14:61, 62; Juan 4:25, 26; Heb. 11:26)

□ Diospa sutinpim rimarqaku​—(Exo. 3:13-16; Juan 5:43; 17:4, 6, 26)

□ Llampu sonqo hinaspa humillakuq runam karqaku​—(Num. 12:3; Mat. 11:28-30)

□ Jehová Diosmi paykunawan runakunata mikuchirqa​—(Exo. 16:12; Juan 6:48-51)

□ Juezkuna hinaspa Diospa kamachikuyninmanta yachachiqmi karqaku​—(Exo. 18:13; Mal. 4:4; Juan 5:22, 23; 15:10)

□ Diospa llaqtanpim confianza runa karqaku​—(Num. 12:7; Heb. 3:2-6)

□ Jehová Diospa kasukuq testigonmi karqaku​—(Heb. 11:24-29; 12:1; Apo. 1:5)

□ Wañukuptinkum cuerponkuta Dios chinkarachirqa​—(Deu. 34:5, 6; Luc. 24:1-3; Hech. 2:31; 1 Cor. 15:50; Jud. 9)