¿Atiwaqchu astakuyta predicaqkunapa aslla kasqan lawman, chaypi predicanaykipaq?

“Estados Unidos nacionpiqa tukuy imayoq hawkallam kawsakurqaniku. Ichaqa qollqepa kanan llaqtapi yachasqayku vidaykupi intuwanankumantam llakikurqaniku. Ñawpaqpim señoraypiwan misionero karqaniku hinaspam yapatawan kusisqallaña chaynataq mana tukuy kapuqniyoq kawsakuyta munarqaniku.”

CHAYNA kawsakuy munasqanmi Ralph hinaspa señoran Pam iñiqmasinchikkunata kallpancharqa 1991 watapi achka sucursalkunaman qellqanankupaq. Paykunaqa predicaqkunapa aslla kasqan lawmanmi riyta munarqaku. México nacionpi sucursalmi nirqaku ingles rimayniyoq runakunata predicanankupaq ancha necesitasqankumanta. Nirqakutaqmi cosechanallapaqña kasqankumanta (Juan 4:35). Chaymi pisi tiempollamanta paykunaqa, 8 hinaspa 12 watayoq churinkunawan astakunankupaq allichakuyta qallaykurqaku.

Diosmanta yachay munaq runakuna

Ralph iñiqmasinchikmi nin: “Llaqtaykumanta astakamuptiykum wakin iñiqmasinchikkuna allinniykuta munaspanku kaynata niwarqaku: ‘Runapa llaqtanpi yachayqa manchakunapaqmi’. ‘¿Imatam rurankichik onqoruspaykichikqa?’ ‘¿Imanasqataq huk nacionmanraq rinkichik ñoqanchik hina rimaqkunata predicanaykichikpaqqa? Chay runakunaqa manam Diosmantaqa yachayta munankuchu’, nispa. Ichaqa ñam tantearurqanikuña rinaykupaq. Chay tanteasqaykuqa ñawpaqmantaraqmi karqa manam qonqayllamantachu. Manataqmi manukurqanikuchu, qollqetapas huñukurqanikum, ima pasawanankumantapas ñawpaqmantaraqmi parlarqaniku”, nispa.

Ralph iñiqmasinchikqa familiantinmi puntata México sucursalman watukuq rirqaku. Chaypim iñiqmasinchikkuna predicananku sitiota mapapi qawaykachispanku nirqaku: “Lliw kaymi predicanaykichikpaq kachkan”, nispa. Paymi familianwan San Miguel de Allende, nisqan llaqtaman astakurqaku, chay llaqtam México llaqtamanta 240 kilometropi kachkan, chaypim huk law nacioniyoq achkallaña runakuna yachanku. Kimsa watallamantam chay llaqtapiqa ingles rimayniyoq 19 predicaqkunawan huk congregacion rikurirurqa. Ichaqa chayllaraqmi qallarichkarqa.

México nacionpiqa huk millon runakunam Estados Unidos nacionmanta kanku. Chaymantapas México nacionniyoq achka estudiantekuna hinaspa estudioyoq runakunam  inglesta rimanku. Ralphmi nin: “Jehová Diostam mañakurqaniku predicaqkuna hamunankupaq. Chaymantapas sapaq cuartoykum karqa predicaq hamuqkunata samachinaykupaq”, nispa (Num. 13:2).

Astawan predicanankupaqmi ima munasqankutapas saqerqaku

Tiempopa risqanman hinam achka wawqe-paninchikkuna predicanankupaq chay lawman chayarurqaku. Paykunamantam karqaku Estados Unidos nacionniyoq Bill hinaspa señoran Kathy, paykunaqa 25 watañam predicaqkunapa aslla kasqan lawkunapi predicarqaku. Castellano rimayta munachkaspankupas Chapala qochapa patanpi Ajijic llaqtamanmi astakurqaku, chaypim Estados Unidos nacionmanta achkallaña jubilasqa runakuna yachanku. Billmi nin: “Ajijic llaqtapiqa kallpanchakurqanikum ingles rimayniyoq runakunata maskaspa predicanaykupaq”, nispa. Chayasqankumanta iskay watallamantam, México nacionpiqa ingles rimayniyoq congregacionqa iskayña karqa.

Canadá nacionniyoq Ken hinaspa señoran Joanne iñiqmasinchikkunapas, astawan predicanankupaqmi ima munasqankutapas saqerqaku. Hinaspam señoranwan, warmi churin Britannypiwan México nacionman ripukurqaku. Kenmi nin: “Qallariypiqa sasam karqa, manam karqachu qoñi yakupas, luzpas nitaq telefonopas”, nispa. Chayna tarikuspankupas kusikuywanmá Diosta servirqaku. Manapas unaymantam Kenqa siervo ministerialña karqa, iskay wata pasaruptinñataqmi anciano karqa. Qallariypiqa sasataqmi karqa Britanny churinpaqpas, congregacionpi mozo-sipaskuna mana achka kasqankurayku. Ichaqa Salon hatarichiypi yanapakuspanmi tukuy hinastinpi amistadta rurarurqa.

Texas (Estados Unidos) llaqtamanta Patrick hinaspa señoran Roxanne iñiqmasinchikkunapas, kusikurqakum llaqtankupa hichpan nacionllapi ingles rimayniyoq achka runakuna predicanapaq kasqankumanta. Patrickmi nin: “Monterrey llaqtaman rispaykum sientekurqaniku Jehová Diospa pusasqan hina kasqaykuta”, nispa. Pichqa punchawllapi wasinkuta rantikuruspankum predicay munasqanku lawman astakururqaku (Hech. 16:9). México nacionpi llamkapakuy sasa kaptinpas, kallpanchakusqankuqa manam yanqapaqchu karqa, 17 predicaqkunallamantam iskay watapi congregacionña karqa 40 predicaqkunawan.

Jeff hinaspa señoran Deb iñiqmasinchikkunapas munasqankutam saqerqaku astawan predicanankupaq. Estados Unidospi hatun wasinkuta rantikuruspankum México nacionpi Cancún llaqtapi uchuy wasichaman pasakurqaku. Paykunapaqqa asambleankupas sumaq wichqasqa localpim apakuq hinaspapas manam karutachu illaqku. Kunanmi ichaqa 8 horasta illananku karqa ingles asambleaman rinankupaq, hinaspapas pelota haytananku estadiopim rurakunan karqa. Tukuy chay kallpanchakusqankuqa manam yanqapaqchu karqa, 50 predicaqkunawanmi Cancún llaqtapi congregacion rikurirurqa.

 México nacioniyoq wakin iñiqmasinchikkunapas ingles rimaypim predicayta qallaykurqaku. Chaymi Rubén iñiqmasinchikpas San Miguel de Allende llaqtapi ingles congregacion karusqanta yacharuspanku familiantin yanapanankupaq astakururqaku. Paykunaqa amañaspankum inglesta yachananku karqa, chaymantapas karu-karutam (800 kilómetros) sapa semana huñunakuykunaman rinanku karqa. Rubenmi willakun: “Huk law nacionniyoq runakunawan rimayqa sumaqmi karqa, paykunaqa unayña México nacionpi yachaspankupas manam kikinkupa rimayninkupiqa Diosmanta yachachikuytaqa uyarisqakuchu. Wakinninkuqa waqaspankuraqmi agradecekuwarqaku”, nispa. San Miguel de Allende llaqtapi iñiqmasinchikkunata yanaparuspanmi, Rubenqa familiantin Guanajuato llaqtaman astakurqaku precursor kanankupaq. Chaypim yanapakurqaku ingles rimaypi huk congregacion 30 predicaqkunawan kananpaq. Kunanñataqmi Guanajuato llaqtapa hichpanpi Irapuato llaqtachapi ingles rimaq runakunata yanapachkan.

Diosmanta mana uyariq runakunamanmi predicanku

México nacionniyoq achka runakunapas inglestaqa rimankum. Ichaqa paykunata predicayqa sasamá, apu runakuna kaspanku pipas punkunta takaptin sirvientellanku lloqsimusqankurayku. Chaymantapas kikinku punkunkuman lloqsimuspankupas manam rimayta munaqkuchu Jehová Diospa testigonkunawanqa, llaqtapi wakin religionkuna hinalla kasqankuta piensaspanku. Huklaw nacionmanta  predicaqkuna watukuptinmi ichaqa uyariyta munaqku.

Rimasunchikyá México nacionpi Querétaro llaqtapi yachaq Gloriamanta. Paymi nin: “Jehová Diospa testigonkunaqa achka kutipim watukamuwarqaku, ichaqa manam uyariqchu karqani. Familiaykuna hinaspa amistadniykuna sasachakuypi tarikuptinmi ancha llakisqa tarikurqani. Chaymi Diosta mañakurqani yanapaykuwananpaq. Pisi tiempollamantam ingles rimaq señora punkuyta takaykamurqa hinaspam tapuwarqa wasiypi pipas ingles rimaq kasqanmanta. Huklaw nacionniyoq kasqanta qawaykuspaymi, yachanallaypaq nirqani ingles rimasqayta. Bibliamanta rimapayawanankamam piensarqani, ‘¿imatataq kay warmiqa kaypi ruran?’, nispay. Diosta mañakusqayraykum, piensarqani kay señorata yanapawananpaq Dios servichikusqanta”, nispa. Gloriam Biblia estudiayta qallaykurqa hinaspam iñiyninpi ñawparispan ayllun harkakuchkaptinpas pisi tiempollamanta bautizakururqa. Kunanqa Gloriaqa precursorañam, hinaspam qosanwan wawantin Jehová Diosta servichkanku.

Astawan predicaypi kallpanchakuqkunapaq bendicionkuna

Predicaqkunapa aslla kasqan lawpi predicayqa sasaniraqmi, ichaqa achka bendicionkunam kan. Qallariypi rimasqanchik Ralph iñiqmasinchikmi nin: “Bibliatam estudiachirqaniku Gran Bretaña, China, Jamaica hinaspa Suecia nacionniyoq runakunata chaynataq Ghana nacionmanta ancha reqsisqa familiatapas. Wakiqninkunam bautizakuruspanku precursorña kanku. Kay pasaq watakunapim familiaywan rikurqaniku ingles rimayniyoq 7 congregacionkuna rikurisqanta. Iskaynin churiykupas precursorñam ñoqaykuwan kuska karqaku, kunanñataqmi Estados Unidos Betel wasipi llamkachkanku”, nispa.

Kunanqa México nacionpim ingles rimaypi 88 congregacionkunaña kachkanku, chaynallataq achka grupokunapas. ¿Imanasqataq achkallataña yapakururqa? Kaykunaraykum: México nacionpi huklaw nacionniyoq runakunaqa manam haykapipas Testigokunawanqa rimasqakuchu. Wakinqa Diosmantam uyarirqaku, manaña pipas nacionninkupi hina harkakuptinku. Wakinñataqmi jubilasqaña kaspanku tiempoyoq kasqankurayku Bibliata estudiarqaku. Chaymantapas llapallan ingles congregacionkunamantam, yaqa parten predicaqkuna precursor kanku, chaymi congregacionkunaqa astawan yapakurqa.

Bendicionkunam kachkan

Seguromá kachkanchik enteron pachapi runakunata rimayninkupi predicaptinchik uyariwananchikmanta. Kusikunapaqmi iñiyninkupi allin takyasqa wawqe-paninchikkuna: yuyayniyoqpas, mozo-sipaspas, casadopas chaynataq solteropas predicaqkunapa aslla kasqan lawman astakusqankuqa. Sasa kaptinpas Diosmanta yachay munaq runakuna Bibliamanta yachayta qallaykuptinkum anchallataña kusikunku. ¿Qampas atiwaqchu predicaqkunapa aslla kasqan llaqtakunaman astakuyta? * (Luc. 14:28-30; 1 Cor. 16:9). Chaynata ruraspaykiqa achka bendicionkunatam tarinki.

[Willakuy]

[21 kaq paginapi recuadro]

Jubilasqa Testigokunamanta

Gran Bretaña nacionniyoq Beryl sutiyoq señoram Canadá nacionpi hatun negociokunapa directoran karqa. Chaymantapas caballowan carreraqmi karqa, chayraykum 1980 watapi Juegos Olímpicos nisqapi, Canadá nacionpa rantinpi akllasqa karqa. Llamkayninmanta jubilakuruspanmi México nacionpi Chapala llaqtaman qosanpiwan astakururqaku. Sapa kuti restauranteman mikunanpaq rispanmi rikurqa kusisqallaña ingles rimaq jubilasqa runakunata, chaymi asuykuspan pi kasqanta reqsichikuspan tapuq México nacionpi ima rurasqankumanta. Yaqa llapallan rimapayasqan runakunaqa Jehová Diospa testigonmi karqa. Chaymi Berylqa qosanwan tantearurqaku Diosta reqsinankupaq chaynapi chay runakuna hina kusisqa kanankupaq. Achka killa huñunakuykunaman risqanmantam Berylqa Biblia estudiayta qallaykurqa hinaspanmi bautizakuruspan achka wata precursora karqa.

[22 kaq paginapi recuadro]

“Kusikunapaqmi paykunawan llamkayqa”

Iñiqmasinchikkunaqa llumpaytam chaninchanku llaqtankuta saqespanku paykunawan predicasqankumanta. Caribe sucursalmi kaynata nirqa: “Huk law nacionniyoq iñiqmasinchikkuna llaqtankuman ripukuptinkuqa congregacionkunaqa hukmanyarunmanmi. Kusikunapaqmi paykunawan llamkayqa”, nispa.

Bibliapa nisqanman hinaqa ‘achka warmikunam’ allin noticiamanta willakunanku karqa (Sal. 68:11). Chaymi achkallaña paninchikkuna huk llaqtakunapi kusikuyllawanña predicachkanku. Europa lawmanta huk sucursalmi nin: “Achka congregacionkunapim predicaqkunaqa yaqa llapanku warmikunalla kanku. Wakiqninkuqa chayllaraq bautizasqam. Chaymi anchata kusikuniku soltera precursorakuna nacionninkumanta hamuspanku paykunata yanapanankupaq kallpanchakusqankumanta. Paykunawan llamkayqa ancha kusikunapaqmi”, nispa.

¿Imaynatam kay precursorakuna sientikunku huk law llaqtapi yanapakusqankumanta? 35 watanpi Angelica paninchikmi huk law nacionpi predicasqanmanta nin: “Huknin servisqay llaqtapiqa ñankunapas mitullañam karqa, rikurqanitaqmi runakuna ñakariqtapas. Chaymi hukmanyanapaq hina karqa. Ichaqa, anchatamá kusikurqani achka runakunata predicaspay yanapasqaywan. Chaymantapas kallpanchawarqam ñañaykunapa agradecekuwasqanku. Huknin ñañaymi niwarqa huk law nacionmantaraq hamuspay kallpanchakusqaywan paypas precursora kasqanmanta”, nispa.

Yaqa 50 watayoq Sue sutiyoq precursoram nin: “Sasachakuykuna kaptinpas, Diospa bendicionninkunaqa achkallañam. ¡Predicayqa kusikuytam apamun! Predicacionpi sipas iñiqmasiykunawan sapa kuti predicasqayraykum, Bibliawan hinaspa qellqanchikkunawan yanapayta atini imapas sasachakuyninkunata atipanankupaq. Wakinkunam niwanku achka watakuna precursora kasqaypi sasachakuyniykuna imayna atipasqaywan, paykunapas sasachakuyninkunata atipanankupaq. Kayna yanapasqaywanmi kusisqa tarikuni”, nispa.

[20 kaq paginapi mapa]

(Imayna kasqanmanta yachanapaq qaway kay qellqata)

MÉXICO NACION

Monterrey

Guanajuato

Irapuato

Ajijic

Chapala

Chapala Qocha

San Miguel de Allende

Querétaro

MÉXICO LLAQTA

Cancún

[23 kaq paginapi dibujo hinaspa recuadro]

Huklaw nacionniyoq predicasqa runakunaqa, manam haykapipas Diosmanta yachachikuytaqa uyarisqakuchu