Allin kaqta ruwaq runakunaqa allintam yachanku imam allin utaq imam mana allin kasqanta. Imaña kaptinpas hinallam allin kaqta ruwanku, hukkuna mana qawaptinpas allin kaqta ruwanankupaq tantiakusqankuman hinam allin kaqta ruwanku.

Kunanqa escuelapi, takikunapi, videokunapi hinaspa televisionpi tukuy ima rikurisqanmi warmakunata pantachin imam allin utaq imam mana allin kasqanta yachanankuta. Chaymi iskayrayanmanku imam allin kasqanmanta.

Warmakunaqa musu-sipasyasqanku tiempopim aswanraq sasachakunku. La charla padre e hijo sutiyuq libropim nin: “Chay watankuman chayaspankuqa musumasinwanmi, sipasmasinwanmi, radiokunapi rimasqankuwanmi utaq televisionpi qawasqankuwanmi hikutasqa kanku. Chayraykum puntamantaraq yachanankuña imam allin utaq imam mana allin kasqanta. Chaynapi estudiaqmasinkunapa contranpi kaptinpas imapipas allinta tantiakunankupaq”, nispa. Arí, manaraq musu-sipasyachkaptinmi warmakunataqa imam allin utaq imam mana allin kasqanmanta allinta yachachina.

Yachachisqayki yuyayninpiwan sunqunpi takyananpaqyá yanapay

BIBLIAPIM NIN: “[Yuyayniyuqkunam] yacharunku imapipas allinta tantiayta, chaymi imam allin utaq mana allin kaqtapas allintaña yachanku”, nispa (Hebreos 5:14).

• Imam allin utaq imam mana allin kasqantayá yachachiy. Niwaqmi ima suwakuy kasqanta hinaspa hukkunamanta mana allin rimay mana allin kasqanta hinaspa imaynata hukkunata llakipayanankupaqpas. Chaymi allimanta yachanqa imam allin hinaspa imam mana allin kasqanta.

• Niy imarayku allin kaqta ruwanankumanta. Parlapayayá allin kaqta sunqumanta ruwananpaq. Niwaqmi: “¿Imanasqataq mana allin runa kayqa mana allinchu? ¿Imanasqataq llullakuptikiqa amistadnikikuna karunchakunman? Utaq, ¿imanasqataq llullakuyqa utaq suwakuyqa mana allinchu?”, nispa.

• Niy allin kaqta ruwayqa allinninkupaq kasqanmanta. Ichapas niwaq: “Mana llullakuspaykiqa hinaspa mana suwakuspaykiqa confianza runam kanki utaq kuyakuqllaña kaptikiqa runakunam qanwan kusisqa kanqaku”, nispa.

Lliw aylluyá allin ruwaq kaychik

BIBLIAPIM NIN: “Hinallataqyá qawachiychik imayna runa kasqaykichiktapas”, nispa (2 Corintios 13:5).

• Wasikichikpi allin ruwaq kanaykichikpaqmi kallpanchakunaykichik. Chayna kaptikichikqa mana iskayrayaspam churi-wawaykichik ninqa:

  •  “Ñuqaykuqa manam llullakunikuchu”, nispa.

  • “Wasiypiqa manam pipas maqakuqqa nitaq qaqchakuqqa kanchu”, nispa.

  • “Ñuqaykupaqqa manam allinchu kamikuqllaña kayqa”, nispa.

Chayna kaptinqa warmaykichikmi yachanqa allin kaqta ruwayqa llapaykichikpaq allin kasqanta, chaynapim ima yachachisqaykichiktaqa kamachikuyta hinaqa mana qawanqakuchu.

• Escuelapi imapas pasakusqanmantayá utaq radiopi hinaspa televisionpi imapas uyarikusqanmantayá warmaykita rimapayay. Niwaqmi: “¿Imatataq qam ruwawaq karqa? utaq ¿imatataq ñuqanchik wasipi kaqkuna ruwachwan karqa?”, nispa.

Allin kaqta ruwaypi ama iskayrayananpaq yanapay

BIBLIAPIM NIN: “Allin concienciayuqyá kaychik”, nispa (1 Pedro 3:16).

• Warmaykita alabaykuy allin kaqta ruwaptinqa. Niwaqmi: “Manam llullakurqankichu, chaywanmi ñuqa anchata kusikuni”, nispa. Warmaykichik ima mana allin ruwarusqanmanta willasuptikichikqa manaraq rimapayachkaspa utaq manaraq qaqchachkaspayá willasusqaykichikmanta agradeceykuychik.

• Mana allinta ruwaruptinkuqa rimapayay. Warmaykichiktayá yachachiychik mana allinta ruwaspankuqa sasachakuypi tarikunankumanta. Warmakunaqa yachanankum imakuna kikinkupaqpas hinaspa wasipi kaqkunapaqpas mana allin kasqanmanta. Wakin tayta-mamakunaqa manam warmanku sientichiyta munankuchu, ichaqa chaykunamanta clarota rimayqa yanapanqam imam allin utaq imam mana allin kasqanta sumaqta yachanankupaq.