Señoraykiwan otaq qosaykiwan qaqchanakuspaykichikqa ñawpaqpi imapas ruwasqaykichiktam yuyarichinakunkichik. ¿Imanasqa? Mana pampachanakuyta yachasqaykichikraykum.

Ichaqa imayna pampachanakuytaqa yachawaqchikmi. Chaypaqqa puntatam yachanaykichik imanasqa sasa kasqanta.

Munasqanta ruwananrayku. Wakinkuqa manam señoranta otaq qosanta pampachayta munankuchu chaymanta hapipakuspanku munasqankuta ruwanankurayku otaq kaqmanta qaqchanakuptinku chayta yuyarichispanku upallachinankurayku.

Sientikusqanrayku. Pipas sientirachiwaptinchikqa sasatam qonqanchik. Yaqapaschá pampachasqanchikta nichwan, ichaqa sonqonchikmi hinallaraq nanachkanman hinaspa vengakuytapas munachkanchikman.

Hukmanyasqanrayku. Achkam piensanku casarakuruspaqa sumaqllaña kawsakunankuta. Ichaqa sasachakuy kaptinmi tapukunku: ¿Imaynataq waknaña kuyasqay runaqa mana kaqpaqpas hapinchu piensasqaytaqa?, nispa. Casado vidamanta mana kaqta piensaspam qosanpa otaq señoranpa pantasqallanta qawan hinaspam pampachaytapas mana munanmanchu.

Mana allin piensasqankurayku. Achka runakunam señoranta otaq qosanta pampachaspanqa penqaypi qepanankuta piensanku. Kaynatam ninku:

“Pampachaspayqa, pantasqanta mana kaqpaqpas hapisqaytach qawachichkayman.”

“Pampachaspayqa, tukuy ima ruwawasqantach qonqanay.”

“Pampachaspayqa, hinallach imapas ruwawananta aguantanay.”

Manamá kay qawasqanchikkuna hinachu pampachayqa. Ichaqa sasamá kanman, astawanraqmi casado vidapiqa.

Entiendenaykim pampachay ima ninan kasqanta. Bibliapi “pampachay” niq rimayqa “saqey” ninantaqmi. Chaynaqa manamá tukuy ima pasasqanta llapanpi qonqaruyllachu nitaq pantasqanta mana kaqpaqpas hapiyllachu. Wakinpiqa señoranchikwan otaq qosanchikwan allin kawsakuy munasqanchikpi piensaspam tukuy ima pasasqanta “saqena”.

Mana pampachaptiki ima pasananpi piensay. Casado vidamanta estudiaq runakunam ninku cheqnikuq runaqa astawanmi onqorunman llumpay hukmanyaywan, sonqonwan otaq imawanpas, hinaspapas casado vidanpim sasachakunman. Bibliaqa manam yanqachu kaynata nin: “Aswanqa sumaq sonqo kaspayá kuyapayanakuychik [hinaspa] pampachanakuychik”, nispa (Efesios 4:32).

Pampachay allinpaq kasqantayá piensay. Sapa kuti pampachaq runaqa manam señoranpa otaq qosanpa pantasqankunataqa yuyarinchu, aswanmi allin kaqta piensan señoranmanta otaq qosanmanta, manamá mana allintaqa piensanmanchu. Chay ruwayqa allinmi astawan kuyanakunapaq. (Imatam Biblia yachachin: Colosenses 3:13.)

Imam kaqta piensay. Señorayki otaq qosayki pantaq kasqanta reqsikuspaykim mana sasachakuspalla pampachayta atinki. Huk librom kaynata nin: “Mana chaskisqaykikunata yupaspaykiqa manachá chaskisqaykikunata yupaytaqa atinkichu. ¿Mayqanpi piensaytataq munanki?”, nispa (Fighting for Your Marriage). Yuyariy: iskaynikichikmá pantaq kankichik. (Imatam Biblia yachachin: Santiago 3:2.)

Entiendeq kay. Hamuq punchawkunapi imapas nisqanwan otaq ruwasqanwan sientichisuptikiqa tapukuy: “¿Llumpay mana allinchu karqa? ¿Pampachawanantachu suyanay icha qonqarunayñachu?”, nispa. (Imatam Biblia yachachin: 1 Pedro 4:8.)

Rimana kaptinqa rimay. Hawkalla rimay imanasqa hinaspa imawan sientikurusqaykimanta. Ama nanay simiwanqa rimapayaychu nitaq mana allintaqa señoraykimanta otaq qosaykimantaqa piensaychu, chayqa piñanakuyllatam hatarichinman. Imayna sientekusqallaykita willakuy.