1, 2. ¿Imanasqataq Diosman asuykuytaqa ancha valorniyoqta qawananchik, hinaspa imanasqataq mañakuymanta Bibliapa yachachisqanta yachananchikpuni?

INTIMANTAPAS lucerokunamantapas aswan taksallam kay Allpa pachanchikqa. “Cielokunatapas [. . .]. Kay pachatapas unanchaq” Jehová Diospaqqa “nacionkunaqa puyñupi puchuruq sutuy yaku hinallam” (Salmo 115:15; Isaias 40:15). Chaywanpas, Bibliaqa ninmi: “Tayta Diosqa llapallan qayakuqninkunapa hichpallanpim kachkan. Confianzawan llapallan qayakuqninkunapa hichpallanpim kachkan Respetaqninkunapa munasqantam ruraykun. Qayakuptinkum uyariykuspa salvaykun”, nispa (Salmo 145:18, 19). Yuyaymanay Bibliapa kayna nisqanpi. Tukuy atipayniyoq Unanchawaqninchikqa hichpallanchikpim kachkan, uyariwasuntaqmi ‘confianzawan llapallanchikpa qayakuyninchiktaqa’. ¡Mayna sumaqmi Diosman asuykuyqa!

² Ichaqa mañakusqanchikta Jehová Dios uyarinanpaqqa munasqanman hinam mañakunanchik. ¿Imaynatataq mañakuchwanqa oracionmanta Bibliapa nisqanta mana yachachkaspanchikqa? Yachananchikpunim imayna mañakuytaqa, chaynintakama Jehová Diosman asuykunanchikrayku.

3. Willarimuy imarayku Jehová Diosta mañakunanchikmanta.

³ Jehová Diospunim payman asuykunanchikpaq kallpanchawanchik. Palabranmi nin: “Amayá imamantapas afanakuychikchu, aswanqa orakuspaykichikyá lliwta Diosman willaychik hinaspayá payman graciasta qoychik. Hinaptinqa Diosninchikmi hawkayachisunkichik runakunapa mana entiendey atinan hawkayaywan. Chaynapim imamantapas mana preocupakunkichikchu nitaq llakikunkichikchu Jesucristowan huklla kasqaykichikrayku”, nispa (Filipenses 4:6, 7). Manachá qepanchachwanchu tukuy ima Unanchasqanpi Munaychakuq Diosman asuykunanchikpaq kallpanchawasqanchiktaqa.

4. ¿Imaraykutaq Jehová Diosta sapa kutilla mañakuyqa payman astawan asuykachiwanchikman?

⁴ Sapa kutilla mañakuptinchiktaqmi Jehová Dioswan amistadninchikpas astawan kallpanchakunqa. Allin sonqoyoq amigokunaqa manam imata necesitaspallankuchu rimanakunku, aswanmi imayna kasqankupi reparanakuspanku rimanakunku. Amistad kayninkum kallpanchakun piensasqankumanta, llakikuyninkumanta hinaspa imayna sientekusqankumanta willarinakuptinku. Chaynam  Jehová Dioswan amistad ruraypas. Kay librowan Bibliata estudiarusqaykiwanmi anchata yacharunki Jehová Diosmanta, sumaq kayninkunamanta hinaspa munayninmantapas. Yacharunkitaqmi Jehová Dioswan amistad ruraytapas. Chaymi oraciontakama hanaq pachapi kaq Taytanchikman llakikuynikitawan sientesqaykikunatapas willakuwaq. Chaynatam Jehová Diosman astawan asuykunki (Santiago 4:8).

5. ¿Imaynanpim yachanchik lliw runakunapa mañakusqankuta Dios mana uyarisqanta?

⁵ ¿Uyarinmanchu Jehová Dios lliw runakunapa mañakusqankuta? Qawariy Diosmanta willakuq Isaiaspa kasqan tiempopi mana kasukuq Israel runakunaman kayna nisqanta: “Achka kutita mañakamuwaptikichikpas manam uyarikichikchu qamkunataqa. Yawarwan qachachasqam kachkan makikichikqa”, nispa (Isaias 1:15). Chaymi Diospa munasqanman hina mana kawsaptinchikqa mañakusqanchiktaqa manapunim uyariwasunchu. Uyariwananchikpaqqa Diospa mañawasqanchikkunatam cumplinanchik.

6. ¿Imatam Dios mañawanchik mañakuyninchikta uyariwananchikpaq, hinaspa imaynatam chayta qawachinchik?

⁶ Puntataqa Jehová Diosqa mañawanchik iñiyniyoq kananchiktam (Marcos 11:24). Apostol Pablom qellqarqa: “Mana iñiyniyoq kaspaqa Diostaqa manam agradachwanchu. Diosman asuykuspaqa pay kasqantam creena, creenataqmi maskaqninkunataqa favorecesqanmantapas”, nispa (Hebreos 11:6). Ichaqa cheqappuni iñiyniyoq kanapaqqa manam Dios kasqallantachu yachananchik nitaq mañakuykuna contestasqallantachu yachananchikqa. Iñiytaqa ruraykunawanmi qawachinanchik. Imayna kawsasqanchikpim iñiyninchikqa sutillata qawakunan (Santiago 2:26).

7. a) ¿Imanasqataq Jehová Diosta respetowan mañakunanchik? b) ¿Imaynatam mañakuptinchik humillakuq kasqanchikta chaynataq sonqomantapuni mañakusqanchikta qawachichwan?

⁷ Chaymantapas Jehová Diostaqa humillakuspa hinaspa  sonqomantam mañakunanchik. ¿Manachu Diosmanta tukuy yachasqanchik tanqawanchik kumuykuq sonqowan otaq mana hatunchakuspa payta mañakunanchikpaq? Runakuna mayqan autoridadkunawan rimaspankuqa respetowanmi rimanku kamachikuq kasqankuta reqsikuspanku. Aswanraqchá Jehová Diosta mañakuspaqa ancha respetowanraq asuykunanchik (Salmo 138:6). “Tukuy Atipayniyoq” Diosmiki payqa (Genesis 17:1). Mañakuspaqa imayna rimasqanchikpim menoschakunanchik otaq humillakunanchikpas. Humilde kayninchikmi kallpanchawasun sonqomantapuni mañakunanchikpaq chaynataq mana kutirispa-kutirispa hina nisqallanchikta rimananchikpaqpas (Mateo 6:7, 8).

8. ¿Imaynatam mañakusqanchikman hina rurachwan?

⁸ Hinaspapas Dios uyariwananchikpaqqa mañakusqanchikman hinam rurananchik. Ejemplopaq, ‘sapa punchaw mikunanchikpaq’ mañakuspaqa atisqanchikman hinam kallpanchakunanchik ima llamkaypipas allinta llamkananchikpaq (Mateo 6:11; 2 Tesalonicenses 3:10). Huchapi mana urmananchikpaq mañakuspanchikqa huchaman apaq tukuy mana allinkunamantam karunchakunanchik (Colosenses 3:5). Mañakuyninchikta Dios uyariwananchikpaq imam mañawasqanchikkunata cumplispapas, kay qatiqnin tapukuykunamantam yachananchikraq.

9. ¿Pitam mañakunanchik, pipa sutinpi?

⁹ ¿Pitam mañakunanchik? Qatiqninkunatam Jesus yachachirqa kaynata mañakunankupaq: “Hanaq pachapi Taytayku”, nispa (Mateo 6:9). Chaynaqa, Jehová Diosllatapunim mañakunanchikqa. Ichaqa, Diosqa munanmi sapallan churin Jesucristo pi kasqanta reqsikunanchikta. 5 kaq yachachikuypi yacharusqanchikman hinam, Jehová Diosqa kay Pachaman Churinta kachamurqa huchamantawan wañuymanta librawaqninchik kananpaq (Juan 3:16; Romanos 5:12). Chaymantapas sacerdotekunapa Jefen kananpaqmi akllarun chaynataq tukuy atiytapas Juzgananpaqmi qoykun (Juan 5:22; Hebreos 6:20). Chaymi Bibliaqa niwanchik Jesuspa sutintakamalla  mañakunanchikpaq. Kikinpunim nirqa: “Ñoqam kani ñan, cheqap kaqpas chaynataq kawsay qokuqpas. Taytaymanqa manam pipas chayanmanchu mana ñoqawanqa”, nispa (Juan 14:6). Mañakuyninchikta uyarichikunapaqqa Jehová Diosllatapunim mañakuna Churinpa sutintakama.

10. ¿Imaynanpa mañakusqanchikpichu Diosqa reparanman?

¹⁰ ¿Imaynanpataq mañakunanchik? Jehová Diosqa manam kamachinchu imaynanpata mañakunanchiktaqa. Bibliapa nisqanman hinaqa imaynanpapas mañakuchwanmi: sayanpapas, kumuykuspapas, qonqoranpapas otaq tiyanpapas (1 Reyes 8:22, 23; Nehemias 8:6; Daniel 6:10; Mateo 26:20, 26). Imaynanpapas mañakuymantaqa sonqomanta mañakuymi aswan allinqa. Mañakuchwanmi sonqollanchikpipas, maypi tarikuspanchikpas, imataña ruraspanchikpas hinaspa ima sasachakuykunapiña tarikuspanchikpas. Mañakusqanchikpiqa manapaschá pi runapas reparanqachu, ichaqa Jehová Diosmi uyariwachkanchikpuni (Nehemias 2:1-6).

11. ¿Imakunamantataq mañakuchwan?

¹¹ ¿Imakunamantataq mañakuchwan? Bibliam nin: “Paypa munasqanman hina mañakuptinchikqa uyariwanchikmi”, nispa (1 Juan 5:14). Imamantapas mañakuchwanmi Diospa munasqanman hina kaptinqa. ¿Uyariwanchikmanchu llakikuyninchikkunamanta willakuptinchik? Uyariwanchikpunim. Jehová Diosta mañakuyninchikpi rimayninchikqa amistadninchikwan rimachkaq hinam. ‘Tukuy sonqonchikwanmi paytaqa rimapayachwan’ (Salmo 62:8). Chaymantapas allinpunim chuya espiritunta mañakuyqa allin kaqta ruraypi yanapaykuwananchikpaq (Lucas 11:13). Hinaspapas, yachaytam mañakunanchik ima rurayta munaspapas allinta ruranapaq chaynataq sasachakuykuna atipaypi kallpanchawananchikpaqpas (Santiago 1:5). Huchallikuruspaqa sonqomantapunim mañakunanchik Jesuspa wañukusqanpi iñisqanchikrayku pampachaykuwananchikpaq (Efesios 1:3, 7). Ichaqa amayá kikillanchikpaqqa mañakusunchikchu, aswanqa mañakusunchikyá ayllunchikkunapaqwan iñiqmasinchikkunapaqpas (Hechos 12:5; Colosenses 4:12).

12. ¿Imamantaraqtaq orakuyninchikpi mañakunanchik?

 ¹² Mañakuspanchikqa Jehová Diospa munayninmantaraqmi mañakunanchikqa. Achka razonkunam kachkan kuyakuyninmanta Jehová Diosta alabananchikpaq chaynataq tukuy sonqonchikmanta graciasta qonanchikpaqpas (1 Cronicas 29:10-13). Mateo 6:9-13 nisqanpim tarinchik imayna mañakunapaq Jesuspa yachachisqanta. Chay oracionpim mañakuyta yachachiwanchik Diospa sutin yupaychasqa kananmanta, munaychakusqan hamunanmanta, Munaynin hanaq pachapi hina kay pachapi rurakunanmantapas. Jesusqa Diospa munayninmantaraqmi mañakuytaqa yachachirqa chaymantañam imam necesitasqanchikkunamantaqa. Ñoqanchikpas Diospa munayninmantaraq mañakuptinchikqa mana kikillanchikpa munasqanchikkunapi piensasqanchiktachá qawachisun.

13. ¿Unaytachu icha pisi tiempollatachu Bibliaqa kamachin mañakunanchikpaq?

¹³ ¿Unaytachu mañakunanchik? Sapallanchikña otaq hukkunawanña mañakuptinchikpas Bibliaqa manam ninchu mañakuyninchik unay tiempo otaq pisi tiempolla kananmantaqa. Pisi tiempollapas mañakuchwanmi mikunapaq mañakuchkaq hina otaq unay tiempopas mañakuchwanmi sapallanchikpi Diosman sonqonchikta kicharichkaq hina (1 Samuel 1:12, 15). Ichaqa Jesusmi iskay uyakunata condenarqa runakuna qawanallankupaq una-unayta mañakuptinku (Lucas 20:46, 47). Jehová Diosqa manam uyarinchu chayna mañakuqkunataqa. Aswanqa uyarinmi sonqomantapuni mañakuqkunata. Imapas necesitasqanchikman hina chaynataq imayna tarikusqanchikman hinam unaytapas otaq pisi tiempollatapas mañakunanchikqa.

14. Willarimuy ima ninantaq “tukuy tiempoyá Diosta mañakuychik” nispa Bibliapa nisqanmanta, hinaspa imapaq favorecesqam kanchik.

¹⁴ ¿Hayka kutitam mañakunanchik? Bibliam niwanchik: ‘Tuta punchaw qayakuychik’, “Tukuy tiempoyá Diosta mañakuychik”, nispa (Lucas 18:7; Romanos 12:12; 1 Tesalonicenses 5:17). Chay ninanqa manam tukuy punchaw manaña tukuyta  mañakuychu. Aswanqa sapa punchaw Jehová Diosta mañakuymi, kuyakuyninmanta agradecekunanchikpaq, ñanninpi purichiwananchikpaq, hawkalla tarichiwananchikpaq chaynataq kallpanchawananchikpaqpas. Jehová Diostaqa hayka kutikamapas mañakuchwanmi unayta otaq pisi tiempollatapas. ¡Ancha favorecesqam chaywanqa kanchik! Jehová Dios mañakuyta chaninchaspanchikqa sapa kutillam maypi kaspañapas imayna kaspañapas hinalla paytaqa mañakusun.

15. ¿Imanasqataq sapallanchikpi mañakuptinchik otaq hukkunapa mañakuyninkutapas uyarispa “amen” nispa tukunanchik?

¹⁵ ¿Imaraykum amen nispa mañakuyninchikta tukunanchik? Amen ninanqa “chaynayá kachun” otaq “arí” ninanmi. Bibliapiqa tarinchikmi ejemplokunata chayna nisqankumanta sapallankupi otaq runakunapa qayllanpi mañakuyta tukuspanku (1 Cronicas 16:36; Salmo 41:13). Sapanchikpi “amen” nispaqa qawachichkanchikmi mañakusqanchik sonqomantapuni kasqanta. Achka runakunapa qayllanpi (upallalla otaq rimarispa) chayna nisqanchikmi qawachin mañakuqpa mañakusqan rurakunanpaq munasqanchikta (1 Corintios 14:16).

16. ¿Imamantataq mana iskayrayachwanchu Diosta mañakuspaqa?

¹⁶ ¿Contestawanchikchu Jehová Dios mañakusqanchikta? ¡Contestawanchikpunim! Achka razonmi kan oracionkunata ‘Uyariykuq’ Diosninchik wara-waranqantin runakunapa mañakusqankuta contestasqanpi confiakunanchikpaqqa (Salmo 65:2). Mañakusqanchiktaqa imaynanpatapas contestawanchikmanmi.

17. ¿Imaynanpitaq nichwan Jehová Diosqa angelninkunatawan serviqninkunatam kunakun mañakusqanchikta contestawananchikpaq, nispa?

¹⁷ Jehová Diosqa angelninkunatawan serviqnin runankunatapas valekunmi mañakusqanchikta contestawananchikpaqqa (Hebreos 1:13, 14). Bibliamanta yachay munaq mañakuqkunapa orakusqanku qepallatam Jehová Diospa serviqninkuna  watukuykurqaku. Chayna pasakusqanmi qawachin Diospa Munaychakusqanmanta allin noticiakuna willakuypi angelkuna yanapakusqankuta (Apocalipsis 14:6). Sasachakuypi tarikusqanchikmanta mañakuptinchikpas, Jehová Diosqa mañakusqanchiktam contestamuwanchikman huk cristianomasinchikta yanapaykuwananchikpaq kallpanchamuspan (Proverbios 12:25; Santiago 2:16).

18. ¿Imaynatam Jehová Dios chuya espirituntawan Palabrantapas servichikun serviqninkunapa mañakusqankuta contestamunanpaq?

¹⁸ Jehová Diosqa contestamuwanchiktaqmi mañakusqanchiktaqa  chuya espirituntakama chaynataq Palabrantakamapas. Sasachakuykunata atipanapaq mañakuptinchikqa chuya espiritunwanmi yanapaykuwanchikman hinaspapas kallpanchaykuwanchikmanmi (2 Corintios 4:7). Imapas ruraypi allinta tanteanapaq mañakuptinchikqa Palabrantakamam yanapawanchik. Yaqapaschá sapallanchikpi Bibliata estudiaspa otaq Bibliamanta rurasqa kayna qellqakunata estudiaspa tarisun Bibliapa textonkunapi yanapawaqninchik yachachikuykunata. Chaymantapas Bibliapa yachachikuyninkunamantam yuyarichiwanchikman, huñunakuykunapi tarikuptinchik otaq ñoqanchikmanta nanachikuq congregacionpi ancianokuna consejawaptinchikpas (Galatas 6:1).

19. ¿Imatam yuyarinanchik wakin kutikunapi mañakusqanchikta Jehová Dios mana contestawasqanchikta hina qawaptinchikqa?

¹⁹ Wakin kutikunapiqa ichapas rikchakuwanchikman mañakusqanchikta Jehová Dios mana chaylla contestawasqanchikta, ichaqa manam chayraykuchu nichwan, manam uyariwanchikchu, nispaqa. Jehová Diosqa munayninman hinam tanteasqan tiempopipuni contestawasunchik. Payqa yachanmi imam necesitasqanchikkunata chaynataq imayna yanapaykuwananchiktapas. Wakin kutikunapiqa hinalla ‘mañakunanchikta’, ‘maskananchikta’ hinaspa hinalla ‘qayakunanchiktam’ saqenman (Lucas 11:5-10). Chaynata ruraspanchikqa  qawachisunchikmi tukuy sonqowan mañakusqanchikta chaynataq cheqap iñiyniyoq kasqanchiktapas. Manapaschá reparasunchu mañakusqanchikta Jehová Dios contestawasqanchiktaqa. Kaypi piensarisun, sasachakuypi kasqanchikmanta Jehová Diosta mañakuptinchikqa manapaschá sasachakuyninchiktaqa allicharunqachu, ichaqa aguantananchikpaqmi kallpata qowasunchik (Filipenses 4:13).

20. ¿Imaraykutaq tukuy sonqowan sapa kutilla mañakunanchikpuni?

²⁰ Ancha agradecesqam kachkanchik tukuy ima Unanchawaqninchik Tayta Dios llapallan qayakuqninkunapa hichpallanpi kasqanmanta (Salmo 145:18). Chaynaqa sapa kutillayá, tukuy sonqowan mañakusunchik. Chayna kaptinqa kusisqapunim kasunchik oracionta Uyariq Jehová Diosman astawan asuykunanchikmanta.