Sierra Leona nacionmanta Dauda sutiyuqmi willakun: “Warmachallaraq kachkaptiymi aylluywan huk runakuna chakrata qichunakurqaku. Chayta allichanankupaqmi brujota qayachimurqaku. Chay brujom espejota hapiykachispan hukniykuta yuraq mantelwan taparurqa. Chaymi chay tapasqan runaqa katkatataspan sudayta qallaykurqa. Hapisqan espejota qawaykuspanmi qaparirqa: ‘Yuyaq runatam yuraq pachayuqta rikuchkani. Ñuqamanmi kurkunpallaña hamuchkan’, nispa.

Chay mantelwan tapasqa runaqa wañukuq abueloymantam rimachkarqa, chaymi manchakuyllawanña qaparispan nirqa: ‘Nisqayta mana creewaspaykichikqa hamuspaykichikyá kikikichikpuni qawaychik’, nispa. Ichaqa manam pipas asuykurqachu. Chaymantam brujoqa chay latapawan tapasqan runata hawkayananpaq calabaza matipi apasqan yakuwan tukuy rikchaq llaqikunawan challarqa.

Chay espejo hapiq latapawan taparayaq runam nirqa chakraqa ñuqaykupa kasqanta. Nirqam chaynata abueloy nisqanta. Abuelaytapas nirqam mana imamantapas llakikuspan hinalla tarpukunanpaq. Chaynata niptinmi chay qichuyta munaq runakunapas ‘allinmi’ nirqaku. Chaynatam allicharurqaku chay chakramanta sasachakuyta”, nispa.

 Africa lawpim kaykunaqa astawan pasakun. Chaypi hinam enteron pachapi runakunapas wañukuqkunapa alman hinallaraq kawsasqanta ninku. Ninkum wañuqkunapa almanqa wakin runakunata yanapasqanta, wakintañataq ñakarichisqanta. Chay nisqankuqa, ¿chiqapchu? Wañuqkunaqa, ¿hinallaraqchu kawsachkanku? Chay nisqankuqa manam chiqapchu. Chaynaqa, ¿pikunataq kanman chay wañuqkunaman rikchakuspa puriqkunaqa? Chaymanta yachaykusun.