Diospa llaqtanpi punta apaqkuna
‘Yachachiqmi kanaykichik’ (Heb. 5:12). Chaynatam suma-sumaq yachachiq Jehova Diosqa llapallanchikta niwanchik. Paymi munan paymanta lliw yachasqanchikta hukkunaman yachachinapaq. Mayna sumaqmi ayllunchikkunaman, iñiqmasinchikkunaman hinaspa runamasinchikkunaman Jehova Diosmanta imam kaqta yachachiyqa. Ichaqa, ¿imaynatam allin yachachiq kachwan?
Chaypaq qawaykusun apostol Pablopa Timoteoman qillqasqanta, chaypim nin: “Hinalla kallpanchakuy hukkunapa qayllanpi [ñawinchanaykipaq], hukkunata kallpanchanaykipaq hinaspa yachachinaykipaq”, nispa. Nirqataqmi: “Chaynata ruwaspam kikikipas salvakunki chaynataq uyarisuqnikikunatapas”, nispa (1 Tim. 4:13, 16). Diosmanta willakusqanchikqa pitapas salvanmanmi. Chaymi allinpuni allin ñawinchaq hinaspa allin yachachiq kanapaq kallpanchakuyninchik. Chaypaqmi kay qillqaqa yanapasunki. Qawasunyá imayna kasqanta:
Bibliapa nisqankunam churasqa kachkan, chaykunam sapa yachachikuykunawan allinta tupan.
Jehova Diosmi alli-allin yachachiwaqninchikqa (Is. 30:20). Kay qillqam allinta yanapawasun allin ñawinchaq hinaspa allin yachachiq kanapaq. Ichaqa, imapas yachachisqanchikqa Diosmanta chaskisqanchikmi. Paymi llaqtanmanqa pitapas pusamun (Juan 6:44). Chaymi Jehova Diosta mañakunanchik chuya espiritunwan yanapawananchikpaq. Kallpanchakusun bibliawan yachachinanchikpaq. Yachachisqanchikwanqa Jehova Diostayá hatunchasun ama kikinchiktachu. Tukuyta ruwasun uyariwaqninchikkuna tukuy sunqunkuwan Jehova Diosta kuyanankupaq.
Ima willakuymantapas aswan sumaq willakuyta willakunapaqmi Diosninchikqa niwanchik. Chay ruwaytaqa atisunmá ‘Diospa kallpa quwasqanchikwanqa’ (1 Ped. 4:11).
Llamkaqmasikichik:
Jehova Diospa llaqtanpi punta apaqkuna
