Jesusqa illaqmasinkunawan kuskam Jerico llaqtaman chayarurqa, chaymantaqa huk punchaw puriyllañam Jerusalenmanqa karqa. Jerico llaqtaqa iskayman rakisqam karqa, ñawpaq kaqwan musuq kaq. Chay iskaynin llaqtaqa chimpa-chimpallam karqaku, chaynam rikurirurqa Roma nacionpa tiemponpi. Chaypim llaqtapa kay lawninmanta wak lawninman achkallaña runakunawan Jesus riptin iskay limosnakuq ñawsa runakuna musyarurqaku, huk kaqninpa sutinmi karqa Bartimeo.

Chaymi Bartimeowan hukninqa chayninta Jesus purisqanta musyaruspanku qaparirqaku: “¡Davidpa churin señorllayku, llakipayariykullawaykuyá!”, nispa (Mateo 20:30). Wakin runakunañataqmi upallanankupaq qaqcharqaku, paykunam ichaqa aswan kallpawanraq qaparirqaku. Jesusñataqmi uyariruspan sayarurqa, hinaspam riqmasinkunawan qayachimurqa. Chaymi paykunaqa ñawsakunaman asuykuspa hukninta nirqaku: “¡Ama hukmanyaychu! Hatariy qayachkasunkim”, nispa (Marcos 10:49). Hinaptinmi ñawsaqa hawanpi pachantapas wischuspan kusisqallaña sayarirurqa, hinaspam Jesusman rirqa.

Jesusñataqmi paykunata nirqa: “¿Imatataq munankichik qamkunapaq ruwanayta?”, nispa. Ñawsakunañataqmi nirqaku: “Señor, qawarikuytam munallaniku”, nispa (Mateo 20:32, 33). Chaymi Jesusqa llakipayarikuspan ñawinkuta tupaykurqa, hinaspam hukninta nirqa: ‘Ripukuyña, iñiyniyuq kasqaykiraykum sanoyarunki’, nispa (Marcos 10:52). Hinaptinmi ñawsakunaqa chaylla qawarikuruspa Dios hatunchayta hinaspa Jesus qatiyta qallaykurqaku. Tukuy chayta qawaspam runakunapas Jehova Diosta hatuncharqaku.

Jerico llaqtata Jesus chayna chimpachkaptinmi achkallaña runakuna qatirqaku rikuykuyta munaspanku, payqariki ñawsakunatam hampirurqa. Ichaqa achkallaña runakuna kasqanraykum wakinqa rikuytapas mana atiqkuchu. Chaynam Jerico llaqtapi hinaspa muyuriqnin llaqtachakunapi autoridadkunapaq qullqi mañaypi llamkaqkunapa kamachiqnin Zaqueopas mana rikuyta atirqachu. Taksalla kasqanraykum payqa rikuyta mana atispan Jesuspa risqan lawpi purun higosmanña qispirurqa. Jesusñataqmi sachapa kasqanman chayaruspan Zaqueotaqa sachapi kachkaqta rikururqa, hinaspam nirqa: “Zaqueo apurawman uraykamuy, kunanmi wasikipi samakusaq”, nispa (Lucas 19:5). Hinaptinmi Zaqueoqa chaylla wasinman kallparqa Jesusta chaskinanpaq.

Chayta qawaspam runakunaqa rimapakuyta qallaykurqaku. Paykunaqa mana allinpaqmi hapiqku huchasapa runapa wasinman Jesuspa  risqantaqa. Zaqueoqa autoridadkunapaq qullqita yapa-yapayuqta mañasqanraykum apu karqa.

Chaymi paypa wasinman Jesus yaykuptin runakunaqa nirqaku: “Huchasapa runapa wasinmanmi samapakunanpaq yaykurun”, nispa. Jesusmi ichaqa mana iskayrayarqachu Zaqueo wanakunanmantaqa. Chaymi wanakuspan Zaqueoqa nirqa: “Kapuqniykunamanta partentam wakcha runakunaman qusaq, engañaspay llapa suwakusqaykunatapas tawa kuti mirayniyuqtaraqmi kutichipusaq”, nispa (Lucas 19:7, 8).

Zaqueopa chayna nisqanqa sunqumanta wanakusqantam qawachirqa. Yaqachusmi payqa qillqaspa churasqanrayku musyarqa hayka suwakusqanta, chaymi tawa kuti mirayniyuqta kutichipuyta munarqa. Chayqa Diospa kamachisqanmantapas aswan achkam karqa (Exodo 22:1; Levitico 6:2-5). Chaymantapas Zaqueoqa wakchakunamanmi kapuqninmanta partenta quyta munarqa.

Zaqueopa chayna wanakusqanmanta kusikuspanmi Jesusqa nirqa: “Kunan punchawmi Diosqa kay runata aylluntinta salvaykun, paypas Abrahanpa churinmi. Runapa churinqa hamurqa chinkasqakunata maskaspan salvananpaqmi”, nispa (Lucas 19:9, 10).

Jehova Diosmanta karunchakuqkunatam Jesusqa tupachirqa chinkaruq churiwan, chay rikchanachiymanta willakusqanqa manam unayraqchu karqa (Lucas 15:11-24). Hinaptinmi chay rikchanachiyman hina chiqap kasqan qawakurqa Zaqueopa wanakusqanwan. Chaymi Jesusqa religionkunapi punta apaqkuna hinaspa wakin runakuna ruwasqanmanta rimaptinkupas, hinalla Abrahanpa miraynin runakunata wanakunankupaq yanaparqa.