¿PIPAS unquywan ñakariqta riqsinki?... Ichapas qampas wakinpiqa unqurqanki wiksa nanaywan utaq chulliwan. Wakin runakunaqa nisyutam imawanpas unquchkanku. Chaymi kikillanku sayariytapas wakinqa manaña atinkuchu.

Llapa runakunam imallawanpas unqurqanchik. ¿Imanasqataq runakuna unquspa, payayaspa utaq machuyaspa wañunchik?... Chaymanta yachanapaqyá willasqayki Jesuspa hampisqan suchu runamanta.

Capernaum llaqtapi Jesus samapakuchkaptinmi achka runakuna chay samapakusqan wasiman rirqaku. Achkallaña kasqankuraykum wasi kichkirurqa punkuntapas manaña yaykuy atinakama. Chayna kaptinpas runakunaqa hinallaraqmi huntachkarqa. Mana puriy atiq suchu runatapas tawa runakunam wantuspa chayarachirqaku.

¿Imanasqataq chay suchu runataqa Jesuspa chayman aparqaku?... Chay runata Jesus hampirunanta yachaspankum. Ichaqa, ¿imaynatam wasi ukuman yaykuchirqaku huntallaña runakuna kachkaptinqa?...

Kay dibujopi qawaykuy imayna yaykuchisqankuta. Wasi hawanman qispirachispankum qatanta uchkuruspa chayninta chakanapi yaykurachirqaku. ¡Ancha iñiyniyuq runakunam karqaku!

 Chayta ruwaptinkum runakunaqa qawaspanku uyarayachkarqaku. Chakanapi kaq suchu runaqa llapankupa chawpinkupim rikurirurqa. ¿Jesusqa piñakurqachu suchu runata wasi hawanta yaykurachiptinku?... Manam. Aswanqa ancha iñiyniyuq kasqankuta qawaspanmi kusikuspan chay suchu runata nirqa: “Churilláy, huchaykikunaqa pampachasqañam”, nispa.

Wakin runakunañataqmi piñakurqaku “huchaykikunaqa pampachasqañam” nispa Jesuspa rimasqanwan. Chaymi Jesusqa hucha pampachananpaqpas atiyniyuq kasqanta  qawachinanpaq chay suchu runata nirqa: “Hatarispaykiyá chakanaykita huqarispa wasikiman ripukuy”, nispa.

Chaynata Jesus niykuptinmi suchu runaqa sanoyarurqa. Kikillan hatariruspanmi puriyta qallaykurqa. Hinaptinmi llapa runakuna wamaqllaraq chayta rikusqankurayku qawarayarqaku. Chaymi Jehova Diosta hatuncharqaku unquqkunatapas hampinanpaq churinta kachamusqanmanta (Marcos 2:1-12).

¿Imatam Jesuspa kay ruwasqanmanta yachachwan?... Jesusqa unquqkunata hampinanpaq hinaspa hucha pampachananpaq atiyniyuq kasqantam. Yachanchiktaqmi huchasapa runakuna kasqanchikrayku unqusqanchiktapas.

Hinaptinqa, ¿qalay-qalay runakunachu huchasapa runakuna kanchik?... Arí, bibliaqa ninmi huchasapaña nacesqanchikta. ¿Imanasqa?... Nacesqanchik punchawmantapacha pantaq runaña kasqanchikraykum. Chaymi wakinpiqa mana munastin imapipas pantanchik. ¿Pitaq huchayuq karqa huchasapa runakuna kananchikpaq?...

Adanmi. Paymi Diosta mana kasukusqanrayku huchasapa rikurirurqa. Chayraykum churinkunapas chaynaña kanchik. Chaymanta allinta yachanapaqyá tanta ruwana latamanta rimasun.

 ¿Rikurqankichu pillatapas lataman churaspa hornopi tanta ruwasqankuta? ¿Imaynataq tanta lluqsinman taqñusqallaña lata kaptin?... Wiksu-wiksullañachiki lluqsinman ¿aw?...

Adanqa chay taqñusqa latamanmi rikchakun, ñuqanchikñataq chay wiksu-wiksullaña lluqsiq tantaman. Adanqa Diosta mana kasukusqanraykum taqñusqañapas kachkanman hina pantaq runa rikurirurqa. Hinaptinqa, ¿imaynañataq churinkunaqa karqaku?... Chay wiksu-wiksullaña lluqsiq tanta hinam pantaq runakunaña karqaku.

Arí, manam llapallan warmakunapichu pantaq kasqankuqa sutilla qawakun. Ichaqa huchasapa kasqankuraykum haykapipas unqunku hinaspa tiempopa risqanman hina wañunku.

Chayna kaptinpas wakin runakunaqa aswan unquqllañam kanku. ¿Imanasqa? ¿Aswan huchasapa kasqankurayku?... Manam, lliw runakunam huchasapaqa kanchik. Chaymi Diosta serviq utaq mana serviq kaspapas lliw runakuna ima unquywanpas ñakarinchik.

Hinaptinqa, ¿imanasqataq wakin runakunaqa aswan unquqllaña kanku?... Ichapas mana mikuy tarisqankurayku, mana allinkunata mikusqankurayku utaq caramelokunata llumpayta suqusqankurayku. Kanmantaqmi saksayta mana puñusqankurayku, chiripi mana maytukusqankurayku utaq ima unquypas cuerponkupi kasqanrayku.

 ¿Haykapikamataq unquqlla kasun? ¿Haykapikamataq huchasapa runakuna kasun?... ¿Yuyachkankichu Jesuspa chay suchu runawan ima ruwasqanta?... Huchanta pampachaspanmi unquyninmanta hampiykurqa. Chay ruwasqanwanmi qawachirqa qipa punchawkunapipas allin ruwaq runakunapaq chayta ruwananmanta.

Ñuqanchikpas mana allin ruwaykunata qipanchaspaqa hinaspa ima huchatapas mana ruwaspaqa Jesuspa chayna hampisqanmi kasun. Jesusmi hanaq pachamanta kamachispan pantaq runakuna kasqanchikta as-asmanta chinkachinqa. Hinaptinmi unquykunapas manaña kanqachu. Qalay-qalay runakunam manaña unquspa kusisqa kawsakusun.