¿IMAYNATAQ hatun tukuqkunaqa kanku?... ¿Haykallapipas pelotawan mana allinta pukllaptiki pipas nisurqanki: “Ñuqatayá qawakuwayqa allinta yachanaykipaq”, nispa?... Chay nisuqnikiqa hatun tukuchkanmi.

¿Imaynataq tarikunki hukkuna chaynata nisuptiki?... Hinaptinqa, ¿imaynataq hukkunaqa tarikunmanku qam chayna hatun tukuq kaptiki?... ¿Allinchu kanman “ñuqamantayá yachayqa” nispa pitapas niyniki?... ¿Kusikunmanchu Jehova Diosqa hatun tukuq runakunawan?...

Jesuspas riqsirqam chayna hatun tukuq runakunataqa. Chay runakunaqa hatun tukuq kaspankum runamasinkuta mana imapaq valeqta hina qawaqku. Chaymi Jesusqa hatun tukuy mana allin kasqanmanta huk willakuywan yachachirqa.

Chay willakuyqa karqa fariseo runamanta hinaspa impuesto mañaq runamantam. Fariseo runakunaqa Diosmanta yachasqankuwan hatun tukuspankum wakin runakunataqa chiqnipakuqku. Chayna fariseo runa Diospa wasinman Diosta mañakuq risqanmantam Jesusqa willakurqa.

Chaymantapas willakurqam impuesto mañaq runapas Diosta mañakuq risqanmanta. Impuesto mañaq runakunaqa mana allin qawasqam karqaku yaqa llapallanku suwakuna kasqankurayku.

Diosta mañakuspanmi chay fariseo runa kaynata nirqa: ‘Dioslláy, wakin runakuna hina mana kasqaymantam agradecekuyki,  ñuqaqa manam suwakunichu ni ima mana allintapas runamasiypaq ruwanichu. Manataqmi kay impuesto mañaq runa hinachu kani, aswanqa allin ruwaq runa kaspaymi qampi yuyaymananaypaq semanapi iskay kutita ayunani’, nispa. Chay runaqa hukkunamantapas aswan allinpaq hapikuqmi karqa, hinaspapas Diosmanmi chayna kasqanmanta willakuchkarqa ¿aw?...

Impuesto mañaq runam ichaqa mana chaynachu karqa. Payqa karuniqpi sayaykuspanmi hanaq pacha qawariytapas mana munarqachu. Hinaspam qasqunta takakuspanraq Diosta nirqa: ‘Dioslláy, kay huchasapa runallaykitayá llakipayaykullaway’, nispa.

¿Mayqintaq kay iskay runakunamanta Diospa sunqunta kusichirqa? ¿Allin tukuq fariseo runachu, icha huchanta riqsikuq impuesto mañaq runachu?...

Jesusqa nirqam impuesto mañaq runa Diospa sunqun kusichisqanta. Hinaspapas nirqam: “Pipas hatunchakuqqariki humillasqam kanqa, pipas humillakuqñataqmi hatunchasqa kanqa”, nispa (Lucas 18:9-14).

¿Imatataq Jesusqa chay willakuywan yachachichkarqa?... Hatun tukuyqa mana allin kasqantam. Ichapas mana musyakuchkaspalla imapas ruwasqanchikwan hatun tukuq  kasqanchikta qawachichkachwan. ¿Haykallapipas chay pasasurqanki?... Chaypaq apostol Pedromanta rimasun.

Jesusmi willakurqa wañuchisqa kananpaq runakuna hapiruptin apostolninkuna saqirunankumanta. Hinaptinmi Pedroñataq qarillaña nirqa: ‘Llapallanku saqirusuptikipas, ñuqaqa manapunim saqisqaykichu’, nispa. Chaynata nispanmi Pedroqa hatun tukuchkarqa. Paypas Jesustaqa saqirurqamá. Ichaqa 30 kaq yachachikuypim paymanta astawan rimasun (Mateo 26:31-33).

Kunanñataq kayta nisqayki: Ichapas escuelaykipi profesornikichik imamantapas tapusunkichikman, hinaptin qamqa wakinkunatapas llallirisparaq chaylla rimawaq. Ichaqa, ¿allinchu kanman chaylla rimasqaykiwan hukkunamantapas aswan allinpaq hapikuyniki?... ¿Imayna kasqaykitataq chayqa qawachinman?...

Chaytamá fariseo runaqa ruwarqa impuesto mañaq runamanta aswan allin ruwaqpaq hapikuspan. Jesusmi ichaqa nirqa payqa pantaypi kasqanta. Wakinkunamanta aswan allinta imatapas ruwayqa manam paykunamanta aswan allin runa kasqanchiktachu qawachin.

Hinaptinqa, hukkunamanta imatapas aswan allinta yachaspanchikqa, ¿hatun tukunanchikchu?... ¿Pitaq umanchikta quwarqanchik?... Jehova Diosmi. Chay umanchikpi yachasqanchikkunataqa hukkuna yachachiwaptinchikmi utaq ima qillqatapas leespanchikmi yacharqanchik, chaytañataqmi Diospa quwasqanchik umanchikpi takyachinchik ¿aw?...

Chaymi hatun tukunaykimantaqa warmamasikikunata rimarinankupaq imapas ruwasqankumanta kallpanchaykunayki  utaq imapipas yanapaykunayki. ¿Munawaqchu qamtapas chayna pipas yanapasunaykita?...

Chaymantapas yachasqaykipi hinam wakin runakunaqa kallpasapa kanku. Qamqa, ¿wakinkumanta aswan kallpasapachu kanki? ¿Hatun tukunaykichu kallpasapa kasqaykimanta?... Manam. Imapas mikusqanchikwanmi kallpayuqqa kanchik. Diosmi chay mikuykunata qispichin parachimuspan hinaspa intita lluqsichimuspan ¿aw?... Chaymi kallpasapa kaspanchikpas Jehova Diosta agradecekunanchik (Hechos 14:16, 17).

Manam hatun tukuspa kikillankumanta rimaq runakunawan kuska kaytaqa munanchikchu ¿aw?... Jesusmi nirqa: ‘Imaynam qamkunapas munankichik runamasikichik qamkunapaq imapas ruwananta, chaynayá qamkunapas paykunapaq ruwaychik’, nispa. Chaynaqa, runakuna hatun tukunanta mana munaspaqa ñuqanchikpas amayá chay fariseo runa hinaqa hatun tukusunchu (Lucas 6:31).

 Chaymantapas huk kutipim Jesusta huk runa nirqa: “Allin yachachikuq”, nispa. Hinaptinqa, ¿yaqachum Jesus nirqa “arí, allin yachachikuqmi kani”, nispa?... Manam, Jesusqa nirqam: ‘Manam pipas allinqa kanchu aswanqa Diosllam’, nispa (Marcos 10:18). Chaynata nispanmi Jesusqa Jehova Diosta hatuncharqa, Jesusqa mana pantaq runa kaspanpas manam hatun tukurqachu.

Hinaptinqa, ¿pitam ñuqanchikpas hatunchananchik?... Arí, Jehova Diosninchiktam. Paypa tukuy ima unanchasqankunata qawaspam runakunata nichwan: “Kuyawaqninchik Jehova Diosmi kaykunataqa unancharqa”, nispa. Chaynaqa Jehova Diosmantayá maykunapipas runakunaman willakusunchik.