¿Hayka Testigonkunatam reqsinki? Ichapas vecinoyki, llamkaqmasiki otaq estudiaqmasiki kaniku, yaqapaschá Bibliapa nisqanmanta haykapipas rimarqanchik. ¿Pikunataq kaniku hinaspa imanasqataq iñisqaykumanta willakuniku?

Manam hukniraq runakunachu kaniku. Ñoqayku ukupiqa kanmi tukuy nacionmanta hinaspa castakunamanta, warmikuna, qarikuna chaynataq apupas wakchapas. Jehová Diospa testigon manaraq kaspaykuqa wakinmi sapaq religionniyoq karqaniku, wakinñataq Diospi mana iñiq, ichaqa llapaykum Bibliapa yachachikuyninkunamanta estudianaykupaq tiempochakurqaniku (Hechos 17:11). Yachasqaykuta kasukuspaykum kikiyku tanteakurqaniku Jehová Diosta yupaychanaykupaq.

Bibliapa yachachisqanwanmi yanapachikuniku. Ñoqaykupas pantaqmi kaniku otaq sasachakunikutaqmi ichaqa Diospa yachachisqanman hina kawsanaykupaqmi kallpanchakuniku, chaymi sumaqta kawsakuniku (Salmo 128:1, 2). Hukkunamanpas willanikutaqmi Bibliapi allin yachachikuykuna yachasqaykumanta.

Diospa yachachisqanman hinam kawsaniku. Paypa yachachisqankunamanta Bibliapi yachasqaykum kusisqata kawsachiwanku. Kallpanchawankutaqmi runamasiykuta respetanaykupaq, kuyapayanaykupaq chaynataq mana suwakuq kanaykupaqpas. Yachasqayku otaq tiyasqayku lawpipas manam pitapas sasachanikuchu, familiapipas huk sonqollam sumaqllata kawsakuniku. Yachanikum Diosqa ‘pimanpas mana sayapakuq’ kasqanta chayraykum tukuy nacionmanta kaspapas wawqe-panintin hinalla huk sonqolla kawsaniku, politicapipas manam chaqrukunikuchu. Chaymi Diostaqa huk sonqolla serviniku (Hechos 4:13; 10:34, 35).

• ¿Imaynam kaniku Jehová Diospa testigonkunaqa?

• ¿Imayna kawsanaykupaqmi Bibliaqa yachachiwanku?