32 YACHACHIKUY
¡Jesusqa kamachichkanñam!
Jesusmi hanaq pachapi kamachiyta qallaykurqa 1914 watapi. Chay watamantam kay pachapi gobiernokunapa tukupaynin qallaykurqa. Chaymantam bibliawan kay yachachikuypi yachasunchik. Yachasuntaqmi 1914 watamantapacha kay pachapiqa mana allinllaña kasqanmanta hinaspa runakunapas imaynaña kasqankumanta.
1. ¿Imatam bibliaqa nirqaña Diospa akllasqan haykapi kamachimunanmanta?
Daniel libropim nirqaña ‘qanchis tiempo’ pasaruptin Diospa akllasqan kamachiyta qallaykunanmanta (Daniel 4:16, 17, willakuy). Watakuna pasaytam chay qanchis tiempomanta Jesusqa nirqa “nacionkunapaq akllasqa tiempo” kasqanta, chaynataq paypa tiemponpiqa chay tiempo manaraq tukusqanta (Lucas 21:24). Qanchis tiempoqa 1914 watapim tukurqa, chaymantayá astawan yachaykusun.
2. ¿Imaynam allpa pachanchik chaynataq runakunapas kachkanku 1914 watamantapacha?
Qatiqninkunam Jesusta tapukurqaku: ‘¿Ima señaltaq kanqa chayaramuspa kaypi kasqaykita yachanaykupaq chaynataq kay tiempopa tukupayninmantapas yachanaykupaq?’, nispa (Mateo 24:3). Jesusmi nirqa hanaq pachapi kamachiyta qallaykuptin guerrakuna, muchuykuna, terremotokuna kaypi-chaypi kananmanta (leey Mateo 24:7). Bibliapipas ninmi “tukupay punchawkunapiqa” runakuna mana allinllaña rikurirusqankurayku ‘sasallaña punchawkuna’ kananmanta (2 Timoteo 3:1-5). Bibliapi nisqanqa sutillam kachkan 1914 watamantapacha.
3. ¿Imanasqataq Jesus kamachiyta qallaykuptin kay pachapi sasachakuykuna astawan mirarurqa?
Jesus kamachiyta qallaykusqan qipallatam hanaq pachapi guerra qallaykurqa. Jesusmi pelearqa satanaswan hinaspa demonionkunawan. Satanasqa vencerachikuspanmi demonionkunapiwan kay pachaman wischumusqa karqa (Apocalipsis 12:9, 10, 12). Satanasqa piñasqallañam kachkan chinkachisqa kananpaq pisi tiempollaña kasqanrayku, chaymi runakunata ñakarichichkan enterollan pachapi. Jesus kay pachata kamachimuptinqa hawkañam kawsakusun.
ASTAWAN YACHAYKUSUN
¿Imanasqataq ninchik Jesusqa 1914 watapi kamachiyta qallaykusqanmanta? Chaymantam kaypi yachasun. Yachasuntaqmi imapaq kallpanchakunamantapas.
4. Bibliapi nisqanmi cumplikurqa 1914 watapi
Babilonia llaqtapi kamachiq Nabucodonosormanmi Diosqa imakuna pasananmanta musquyninpi willarqa. Nabucodonosorpa musqukusqanqa puntatam cumplikurqa kikinpi, cumplikurqataqmi Diospa kamachisqanpipas (leeychik Daniel 4:17). a
Leeychik Daniel 4:20-26. Hinaspa dibujokunatapas qawaspa qatiqninmanta rimariychik:
-
A) ¿Imatam Nabucodonosor musquyninpi qawarqa? (Kaqmanta leeykuychik 20 hinaspa 21 versiculokunata).
-
B) ¿Imananankum karqa sachata? (Kaqmanta leeykuychik 23 versiculota).
-
C) ¿Imam pasanan karqa ‘qanchis tiempo’ tukuruptinqa? (Kaqmanta leeykuychik 26 versiculota).
Nabucodonosorpa sueñokusqan sacha hinaspa Diospa gobiernon
NABUCODONOSORPA SUEÑOKUSQAN (Daniel 4:20-36)
Kamachiptin
A) Hatu-hatunta wiñaruq sacha
Manaña kamachiptin
B) ‘Sachata kuchuychik’, chaynayá qanchis tiempo tukunankama kachun
Kaqmanta kamachiptin
C) ‘Kaqmanta kamachiqmi kanki’
Nabucodonosorpi cumplikusqan:
-
D) ¿Piwantaq chay sachaqa tuparqa? (Kaqmanta leeykuychik 22 versiculota).
-
E) ¿Ima pasaruptinmi manaña kamachirqachu? (Leeychik Daniel 4:29-33).
-
F) ‘Qanchis tiempo’ tukuruptin, ¿imaynañam Nabucodonosor tarikurqa? (Leeychik Daniel 4:34-36).
NABUCODONOSORPI CUMPLIKUSQAN
Kamachiptin
D) Babiloniapi kamachiq Nabucodonosor
Manaña kamachiptin
E) Nabucodonosormi locoyarurqa 606 watapi J.t.ñ. b Hinaspam qanchis wata mana kamachirqachu
Kaqmanta kamachiptin
F) Nabucodonosorpa yuyaynin kutiruptinmi kaqmanta kamachirqa
Diospa gobiernonpi cumplikusqan:
-
G) ¿Pipa rantinpi kamachiqkunawantaq chay sachaqa tupan? (Leeychik 1 Cronicas 29:23).
-
H) ¿Ima watamantam manaña kamachirqakuñachu? ¿Imanasqam ninchik Jesus kay pachapi kaptin Diospa rantinpi manaraq pipas kamachisqanta? (Leeychik Lucas 21:24).
-
I) ¿Maypi hinaspa haykapim Diospa gobiernonqa kaqmanta kamachiyta qallaykurqa?
DIOSPA GOBIERNONPI CUMPLIKUSQAN
Kamachiptin
G) Israel nacionpi Diospa churasqan kamachiqkuna
Manaña kamachiptin
H) Jerusalenmi kañasqa karqa 607 watapi J.t.ñ. Chaymantaqa manañam Israel llaqtapi kamachiqkunataqa Diosqa churarqachu 2.520 wata pasanankama
Kaqmanta kamachiptin
I) Jesusmi 1914 watapi hanaq pachapi kamachiyta qallaykurqa
¿Hayka watataq qanchis tiempoqa?
Bibliaqa yanapawanchikmi entiendenapaq. Apocalipsis qillqapim nin kimsa tiempo parten 1.260 punchawkuna kasqanta (Apocalipsis 12:6, 14). Chaymi qanchis tiempoqa 2.520 punchawkuna. Bibliapiqa wakinpim nin huk punchawqa huk wata kasqanta (Ezequiel 4:6). Chaymi Daniel libropi qanchis tiempokunamanta rimaspanqa 2.520 watakuna kasqanmanta nichkan.
5. 1914 watamantaqa imapas manañam allinñachu karqa
Jesusmi nirqa kamachiyta qallaykuptin kay pachapi sasachakuykuna astawan kananmanta. Leeychik Lucas 21:9-11 hinaspa qatiqninmanta rimariychik:
-
Leesqanchikpi nisqanman hina, ¿imakunatataq rikurqanki utaq uyarirqanki?
Apostol Pabloqa tukupay tiempopi runakuna imayna kananmantam nirqaña. Leeychik 2 Timoteo 3:1-5 hinaspa qatiqninmanta rimariychik:
-
Leesqanchikpi hinaqa, ¿runakunapa imayna kasqantataq qawanki?
6. Jesusqa kamachichkanñam, chaynaqa ¿imapaqmi kallpanchakunanchik?
Leeychik Mateo 24:3, 14 hinaspa qatiqninmanta rimariychik:
-
Jesus kamachisqanrayku, ¿ima ruwaymi enteron pachapi apakuchkan?
-
¿Imaynatam qampas yanapakuwaq?
Jesusqa hanaq pachapim kamachichkanña, manapas unaymantam kay pachatapas kamachimunqaña. Leeychik Hebreos 10:24, 25 hinaspa qatiqninmanta rimariychik:
-
“Diospa punchawnin” chayamunantaña yachasqanchikrayku, ¿imapaqmi kallpanchakunanchik?
Runakuna salvakunankupaq ima yanapananmanta yachaspaykiqa, ¿imatam ruwawaq?
WAKIN RUNAKUNAM NISUNKIMAN: “Jehova Diospa testigonkunaqa, ¿imanasqataq llumpayta rimanku 1914 watamanta?”, nispanku.
-
Chaynata nisuptikiqa, ¿ima niwaqtaq?
YUYARIYKUSUN
Bibliapa nisqan cumplikusqanwan hinaspa sasachakuykuna kasqanwanmi yachanchik Jesus kamachisqantaña. Kamachisqanmantam runakunaman willakunanchik hinaspa huñunakuykunamanpas rinanchik.
¿Ima niwaqtaq?
-
Daniel libropi qanchis tiempokuna nisqan pasaytaqa, ¿pitaq Diospa gobiernonpi kamachiyta qallaykurqa?
-
¿Imanasqataq mana iskayrayankichu 1914 watapi Jesus kamachiyta qallaykusqanmanta?
-
Jesus kamachisqanmantaña mana iskayrayaspaykiqa, ¿imakunapaqmi kallpanchakunayki?
ASTAWAN YACHANAYKIPAQ
1914 watamanta runakuna imaynaña kasqankumanta yachanaykipaq kayta leeykuy.
“La era en que los valores decayeron radicalmente” (¡Despertad!, abril de 2007)
Mateo 24:14 nisqan imayna cumplikusqanta yachasqanmi huk runata kallpancharqa bibliata estudiananpaq, willakusqanmanta kay yachachikuypi leey.
“Béisbol niq pukllaymi anchata gustawaq” (Willakuq, 2017–3 kaq)
Daniel 4 capitulopa nisqanqa ¿Diospa gobiernonmantachu rimachkan? Yachaykunaykipaq kayta leeykuy.
“¿Haykapimantataq Dios kamachiyta qallaykurqa? (Punta kaq)” (Willakuq, octubre 2014)
¿Imanasqam ninchik Daniel libropi ‘qanchis tiempo’ nisqanqa 1914 watapi tukusqanta?
“¿Haykapimantataq Dios kamachiyta qallaykurqa? (Iskay kaq)” (Willakuq, noviembre 2014)
a “Astawan yachanaykipaq” niqpa tukupayninpi iskay yachachikuykunata leeykuy.
b Jesuspa tiemponmanta ñawpaqtaraq kasqanta yachanapaqmi churanchik J.t.ñ. Jesuspa tiemponmanta qipakunaman kasqanta yachanapaqñataqmi churanchik J.t.
Kaykunatapas leeykuy
TAPUKUYKUNA
¿Imaynatam Jehova Diospa testigonkunaqa bibliamanta yachachinku?
Jehova Diospa testigonkunaqa runamasinchiktam yanapaniku bibliamanta sumaqta yachanankupaq. Munasqayki bibliawanmi estudiawaq hinaspapas invitawaqmi aylluykikunata chaynataq amistadnikikunatapas.
