WILLAKUYKUNATA ñawinchaptinchik, uyariptinchik utaq qawaptinchikqa, ¿imamantam chaypi willawanchik? Maqanakuspa runakuna wañuchinakusqankumantam. Ichapas qampas ñakarichkanki unquywan utaq aylluyki wañukuptin.

Tapukuy:

• ¿Ñuqapas chaynataq aylluypas sasachakuypi kanaykutachu Diosqa munarqa?

• ¿Maypim yanapakuyta tariyman sasachakuyniyta allichanaypaq?

• ¿Haykapipas kanqachu hawkayay kay allpa pachapi?

Kay tapukuykunamantam biblia yachachin.

• Manañam pipas waqanqachu, machu-payayanqachu nitaq wañunqachu (Apocalipsis 21:4).

• “Wistukunam luwichu hinaraq pawaykachanqaku” (Isaias 35:6).

• ‘Ñawsakunam qawarikunqaku’ (Isaias 35:5).

•  Wañuqkunam kawsarimunqaku (Juan 5:28, 29).

• Manañam pipas unqunqañachu (Isaias 33:24).

• Llapanchikpaqmi kawsaykuna qispinqa (Salmo 72:16).

Yaqapaschá kay qillqapa qallariyninpi kaqta ñawinchaspaykiqa nirqanki kayqa musquy hinalla kasqanmanta. Ichaqa Diosmi niwanchik pisi tiempollamantaña kay allpa pacha chayna kananmanta hinaspapas bibliam yachachiwanchik imaynata Dios ruwananmanta.

Bibliaqa niwanchiktaqmi kusisqa kawsakunanchikpaq imata ruwananchikmanta. Yuyaymanay imakuna llakichisusqaykimanta. Ichapas aylluykipi sasachakuykuna kachkan, qullqiki mana kanchu, unquchkanki utaq aylluyki wañukuptin ñakarichkanki. Ichaqa ama llakikuychu, bibliam yanapasunki chay sasachakuykunata atipanaykipaq. Bibliaqa kay tapukuykunamantam yachachin:

• ¿Imanasqam ñakarinchik?

• ¿Imaynatam sasachakuykunata atipachwan?

• ¿Imaynatam ayllunchikwan kusisqa kawsakuchwan?

• ¿Maypim wañuqkunaqa kachkanku?

• ¿Tupaykusunchu wañukuq ayllunchikkunawan?

• ¿Diosqa tukuy ima nisqantachu ruwanqa?

 Kay qillqata ñawinchaspaykiqa yachaytachá munachkanki imamanta bibliapa yachachisqanta. Kay qillqapa yanapakuyninwanqa atinkim bibliamanta yachayta. Kay qillqapi tapuykunam yanapasunki bibliata aswan allinta entiendenaykipaq. Waranqantin runakunam bibliamanta yachayta munanku Jehova Diospa testigonkunawan. Qampas chaytachá munachkanki, ¿aw? Jehova Diosmi yanapasunki bibliamanta yachanaykipaq kallpanchakuptikiqa.