Baalmanta willakuqkunata Elias wañurachisqanta yacharuspanmi, Jezabelqa llumpayta piñakururqa. Hinaspam Eliasman kaynata willachimurqa: “Paqarinmi qamtapas wañuchisqayki”, nispa. Chaymi Eliasqa llumpayta mancharikuspan chunniqman ayqikurqa. Chaypim Diosta mañakurqa: “Wañuruytañam munani”, nispa. Eliasqa pisipasqallaña kasqanraykum sachapa sikinpi puñururqa.

Chaymantam Diospa angelnin rikcharachispan nirqa: “Hatarispayki mikuy”, nispa. Eliasqa yakutawan quñichkaq tantata mikuykuspam kaqlla puñururqa. Kaqmanta rikcharirachispanmi angelqa nirqa: “Allinta mikuy karu-karukama rinaykipaq”, nispa. Mikuykuspanmi Eliasqa rirqa 40 punchaw hinaspa 40 tuta Horeb sutiyuq urqukama. Chaypi kachkaspanmi puñunanpaq machayman yaykururqa. Chaypim Jehova Dios tapurqa: “¿Imatataq kaypi ruwachkanki?”, nispa. Eliasñataqmi nirqa: “Israel runakunam manaña yupaychasunkichu. Qanmanta willakuqkunatapas wañurachinkum. Ñuqatapas wañuchiwanankupaqmi maskawachkanku”, nispa.

Jehova Diosñataqmi nirqa: “Machaymanta lluqsispayki sayay”, nispa. Hinaptinmi llumpayta wayramuyta qallaykamurqa, allpapas kuyurqam, ninapas linwarqam. Chaymantam Eliasqa upallallamanta rimamuqta uyarirurqa, chaymi uyanta tapakuspan machaypa ­punkullanpi sayarqa. Chaypim Diosqa Eliasta tapurqa imanasqa ayqikusqanmanta, Eliasñataqmi nirqa: “Qanmanta willakuqqa ñuqallañam kachkani”, nispa. Ichaqa Diosmi nirqa: “Manam sapallaykichu kachkanki, kachkanraqmi 7.000 yupaychawaqniy Israel runakuna. Rispaykiyá Eliseoman willamuy qampa qipaykiman payña ñuqamanta willakuq kananpaq”, nispa. Eliasqa chayllam kasukurqa. Kasukuptikiqa Jehova Diosmi qamtapas yanapasunki. Qatiqninpim yachasun usyaramuptin imakuna kasqanmanta.