Josueyqa Jehova Diospa llaqtantam unay wataña pusarqa, hinaspam 110 watanpi wañukurqa. Pay kawsakuchkaptinqa Israel runakunam Jehova Diosta yupaycharqaku. Wañukuptinmi ichaqa Canaan runakuna hinaña taytacha-mamachakunataña yupaycharqaku. Chaymi Diosqa saqirqa Canaan lawta kamachiq Jabin paykunata ñakarichinanpaq. Israel runakunañataqmi Jehova Diosta mañakurqaku yanapaykunanpaq, chaymi payqa Baracta yanapananpaq kacharqa. Baracmi paykunata yanapanan karqa Jehova Diosta kaqmanta yupaychanankupaq.

Chay tiempopim Debora sutiyuq warmi Diosmanta willakuq karqa. Paywanmi Jehova Diosqa Baracman kaynata willachirqa: “10.000 runakunawan Cison wayquman riy. Chaypim Jabinpa tropankunawan peleankichik, chay tropankunapa kamachiqnin Sisarapas wañunqam”, nispa. Baracmi Deborata nirqa: “Riysiwaptikiqa risaqmi”, nispa. Deborañataqmi nirqa: “Riysisaykim, ichaqa manam qanchu Sisarataqa wañuchinki. Jehova Diosmi nirqa Sisarata warmi wañuchinanmanta”, nispa.

Chaymi Baracqa 10.000 runankunawan hinaspa Deborawan Tabor urquman qispirqa. Chayta yacharuspam Sisarapas tropankunawan hinaspa carretankunawan ­Cison wayquman rirqa. Hinaptinmi Deboraqa Baracta nirqa: “Kunanmi Jehova Dios yanapasunki”, nispa. Chaymi Baracqa tropankunawan Tabor urqumanta uraykamurqa Sisarapa runankunawan peleananpaq.

Jehova Diosñataqmi Cison wayquman lluqllata kachaykurqa, chaymi Sisarapa carretankuna mitupi kikñakururqa. Hinaptinmi Baracwan tropankuna Sisarapa runankunata wañurachirqaku. Sisaram ichaqa chakillawan ayqikuspa Jael sutiyuq warmipa wasinpi pakakururqa. Jaelñataqmi lecheta tomaykachispan qataykurqa, Sisaraqa pisipasqa kasqanraykum chaylla puñururqa. Chaymi Jaelqa upallalla asuykuspan estacawan umanpi takaruspa wañurachirqa.

Baracñataqmi Jaelpa wasinpi wañusqataña Sisarata tarirurqa. Chayraykum Baracwan Deboraqa Jehova Diospaq kusikuyllawanña takirqaku, takirqakuqa yanapakuyninwan ñakarichiqninkuta wañurachisqankuraykum. Israel runakunapas 40 watam hawkayaypi kawsakurqaku.