Joseywan Mariam, Jesuswan chaynataq wakin warmankunapiwan Nazaret llaqtapi yacharqaku. Joseyqa ayllunta uywananpaqmi carpintero karqa. Payqa Jehova Diospa kamachikuyninmantam ayllunman yachachiq, chaymantapas Diosta yupaychanapaq huñunakuna wasimanmi ayllunta sapa kuti pusaq. Jerusalenmantaqmi sapa wata pascua fiestaman riqku.

12 watanpi Jesus kachkaptinmi Jerusalenman rirqaku pascua fiestaman, chaypim achkallaña runakuna karqaku. Chay fiesta tukuytam Joseywan Mariaqa wasinkumanña kutichkarqaku, paykunaqa piensarqakum wakin ayllunkuwan Jesus risqanta, ichaqa Jesusta mana tarispankum llakisqallaña maskayta qallaykurqaku.

Chaymi Jerusalenman kutirqaku, hinaspam kimsa punchawmantaña Diospa wasinpi utaq templopi tarirurqaku. Chaypim Jesusqa yachachiqkunapa chawpinpi uyarispa tiyachkasqa, hinaspapas tukuytam tapukuchkasqa. Chay yachachiqkunaqa musyarurqakum Diospa kamachikuyninkunamanta sumaqta Jesus yachasqanta, chaymi ima niytapas mana atispanku paykunaña tapuyta qallaykurqaku.

Mariaqa llakisqalla kaspanmi Jesusta nirqa: “Wawalláy, ¿maypitaq karqanki? Maykunapiñach maskamuykikupas”, nispa. Jesusñataqmi nirqa: “¿Manachu yacharqankichik taytaypa wasinpi kanayta?”, nispa.

Chaymantam Jesusqa tayta-mamanwan Nazaretman kutirqa, chaypim Joseyqa Jesusta yachachirqa carpintero kananpaq. Jesusqa wiñaruspanmi astawan yachaysapallaña karqa. Chaynapim Jehova Diospas chaynataq runakunapas kuyarqaku.