Jehova Diosmi Jeremiasta akllarqa Juda nacionpi willakuqnin kananpaq. Paytam Dios kamachirqa runakunata mana allin ruwasqankumanta rimapayananpaq. Jeremiasmi ichaqa nirqa: “Diosnilláy, warmallaraqmi kani, runakunapa qayllanpi rimaytapas manchakunim”, nispa. Diosñataqmi nirqa: “Ama pitapas manchakuychu. Ñuqam yanapasqayki hinaspa yachachisqayki imata ninaykipaq”, nispa.

Chaymantapas Jeremiastam Dios nirqa: “Autoridadkunata utaq llaqtapi punta apaqkunata huñuruspaykim qayllankupi allpamanta puyñuta pakiparunki, hinaspam ninki: ‘Kaynam kay Jerusalen llaqtapas kanqa’”, nispa. Chaynata Jeremias ruwaruptinmi autoridadkunaqa llumpayta piñakururqaku, hinaptinmi sacerdote Pasjurqa Jeremiasta maqapaspa makintawan chakinta uchkuyuq tablaman hinarurqa. Jeremiasqa tukuy tutam chaypi karqa, manam kuyuriytapas atirqachu. Paqarinnintin kachaykuptinmi Jeremiasqa nirqa: “Manañam Diosmantaqa willakusaqchu”, nispa. Ichaqa allinta yuyaymanaykuspanmi nikurqa: “Diospa palabranqa nina hinaraqmi sunquypi rupachkan, manam willakuytaqa saqisaqchu”, nispa. Chaymi Jeremiasqa hinalla willakurqa.

Watakuna pasaytam hukña Juda nacionpi kamachirqa. Jeremiastaqa hinallam chiqnirqaku, chaymi sacerdotekunawan Diosmanta yanqa willakuqkunaqa kamachiqpa yanapaqninkunata nirqaku: “Kay runaqa wañunanmi”, nispanku. Jeremiasñataqmi nirqa: “¿Imaynataq mana huchayuq runataqa wañuchiwankichik? Ñuqataqa Jehova Diosmi ­kachamuwarqa uyarisqaykichikkunata willanaypaq”, nispa. Chayta uyariruspankum kamachiqpa yanapaqninkunaqa nirqaku: “Kay runaqa manam wañunanchu”, nispa.

Jeremiasqa hinallam willakurqa, kamachiqpa yanapaqninkunañataqmi piñakuruspanku paykunaña kamachiqta nirqaku Jeremiasta wañuchinanpaq. Kamachiqñataqmi nirqa: “Munasqaykichiktayá ruwaychik”, nispa. Hinaptinmi Jeremiasta mitullaña pozoman wischuykurqaku chaypi chinkaykuspa wañunanpaq.

Kamachiqpa wasinpi nanachikuq Ebed-melecñataqmi kamachiqta nirqa: “Jeremiastam uchkuman wischuykunku, hinapi saqiruptinchikqa wañurunqam”, nispa. Hinaptinmi kamachiqqa Ebed-melecta nirqa 30 runakunata pusarikuspan pozomanta Jeremiasta hurqumunanpaq. Qawasqanchikman hinamá Jeremiasqa mana manchakuspa Diosmanta hinalla willakurqa. Qampas paytayá qatipakuy.