DIOSMI churinman atiyta qorqa achka milagrokunata rurananpaq, wakintam achka runakunapa qayllanpi rurarqa. Chaynatam Jesus qawachirqa runakunata ancha sasachaq kaqkunata chinkachiy atisqanta. Qawasun wakinta.

Yarqaymanta. Jesusqa punta kaq milagronpi yakuta vinoman tikraspanmi qawachirqa mikuytawan yakuta achkanpi qoy atisqanta. Iskay kutipiñataqmi aslla tantatawan challwakunata achkayachirqa waranqantin runakunata mikuchinanpaq. Kay iskaynin kutipim mikuyqa puchurqa.

Onqoymanta. Jesucristoqa ‘tukuy rikchaq onqoyniyoqkunatam sanoyachirqa’ (Mateo 4:23). Hampirqam ñawsakunata, mana uyariqkunata, wistukunata, leprawan onqoqkunata hinaspa wañuy mañayoqkunatapas. Arí, tukuy ima onqoytam hampirqa.

Llumpay wayra-paramanta. Huk tutam Jesus qatiqninkunawan Galilea lamar qochanta richkaptinku qonqayllamanta sinchi wayra-para qallakuykurqa. Qatiqninkunam llumpayta mancharikurqaku, Jesusmi ichaqa altota qawaspan nirqa: “Hawkayayña”, nispa. Chayllam tukuy imapas hawkayarurqa (Marcos 4:37-39). Huk kutipiñataqmi yakupa hawanta purirqa llumpayta wayramuchkaptinpas (Mateo 14:24-33).

Demoniokunamanta. Demoniokunaqa ancha atiyniyoqmi kanku ñoqanchikmantaqa. Arí, achka runakunatam ñakarichirqaku, achkataqmi mana librakuyta atirqakuchu. Jesusmi ichaqa paykunataqa mana manchakurqachu. Aswanqa paykunam Jesusta rikuspanku katkatataqku, hinaspam ñakarichisqan runamanta lloqsinanpaq niptin utqayllaman kasukuqku.

Wañuymanta. Wañuymantaqa manam pipas lluptiyta atinchikchu, chaymi Bibliaqa sutichan ‘qepallaña chinkachinapaq kaq enemigo’, nispa (1 Corintios 15:26). Wañuqkunata kawsarichiypas manam Jesuspaqqa sasachu karqa, kawsarichirqam huk viudapa wawanta hinaspa huk sipaschatapas. Aswan admirakuypaqmi Lazaro sutiyoq amistadnin tawa punchawña wañusqa kachkaptin, achka runakunapa qayllanpi kawsarichisqanqa. Llumpay cheqniqninkunapas reqsikurqakum Jesus atiyniyoq kasqanta (Juan 11:38-48; 12:9-11).

Ichaqa tiempopa risqanman hinam chay yanapasqan runakunaqa onqospanku wañukurqaku. Hinaptinqa, ¿yanqachu kanman karqa chay milagrokuna? Manam, chayqa qawachirqam Diospa Munaychakuyninmanta willakuykuna cheqap kasqanta. Arí, Diospa churasqan Reyqa chinkachinqam yarqayta, onqoykunata, desgraciakunata, demoniokunata hinaspa wañuytapas. Sutillamá Jehová Diosqa Jesusman atiyta qorqa chayta rurananpaq.

(Mateo, Marcos, Lucas, Juan librokunamanta.)