ACHKA watakunaña Egiptopi sumaqta kawsaspankum israelitakunaqa achkaman mirarurqaku. Hinaptinmi Joseyta mana reqsiq ñakarichikuq faraonña kamachiyta qallaykurqa. Israelitakuna llumpayña kasqankuta qawaspanmi kamachirqa sirvientekunaña kanankupaq, hinaspa naceq qari wawachakunatapas Nilo mayuman wischunankupaq. Huk israelitam mana manchakuspan canastillapi wawanta tuturakunapi pakaykurqa. Faraonpa warmi churin tariruspanmi, Moiseswan sutichaspan palaciopi uywarqa.

40 watanpi kachkaspanmi Moisesqa sasachakuypi tarikurqa Egiptomanta capataz huk israelitata maqachkaptin harkakusqanrayku, chaymi karu llaqtaman lluptinan karqa. 80 watanpiñataqmi Diosqa Egiptoman kutinanpaq nirqa chaynapi faraon israelitakunata kacharinanpaq.

Faraon mana munaptinmi, Jehová Diosqa Egiptota chunka castigokunawan ñakarichirqa. Sapa castigo kananpaqmi Moisesqa faraonwan rimarqa, chaynapi castigomanta librakunanpaq. Faraonmi ichaqa hatunchakuspan Jehová Diospa chaynataq Moisespa contranpi churakurqa. 10 kaq castigopaqmi Diosqa huk angelta kacharqa llapallan piwi churinkuta wañuchinanpaq. Diosta kasukuspa carneropa yawarninwan punkunkuta llusiq familiakunapa piwinkunallatam angelqa mana wañuchirqachu. Chay pasakusqanta yuyarinankupaqmi israelitakunaqa sapa wata huk kutillata Pascua rurayta qallaykurqaku.

Piwi churin wañukuptinmi faraonqa Moisestawan israelitakunata nirqa Egiptomanta lloqsinankupaq. Chayllam paykunaqa pasakunankupaq alistakururqaku. Faraonmi ichaqa pesapakuspan, tropankunawan guerrapaq carronkunawanpas haypaq rirqaku. Puka lamar qochapa patanman chayaruspankum, paykunaqa piensarqaku israelitakuna mana lluptiy atinankuta. Diosmi ichaqa lamar qochata rakirurqa, hinaptinmi israelitakunaqa chaki allpanta chimparqaku. Faraonwan tropankuna qepanta qatiykuptinkum, Diosqa perqa hina yakukunata tuñiykachirqa hinaptinmi lliw wañururqaku.

Chaymantam israelitakunaqa Sinai orqopi samarurqaku, chaypim Jehová Dios paykunawan huk contratota rurarqa. Vidankupi yanapananpaqmi Moisesnintakama kamachikuykunata qorqa. Diosman sonqo hinaspa kasukuq kaptinkuqa, yanapaspam paykunata servichikunman karqa hukkunatapas bendecinanpaq.

Ichaqa, yaqa lliw israelitakunam Diospiqa mana confiarqakuchu. Chaymi Diosqa 40 wata chunniqpi purichispan castigarqa. Hinaptinmi Moisesqa rantinpi kamachinanpaq, Diosman sonqo Josuey israelitata akllarqa. Israelitakunaqa listoñamá kachkarqaku Abrahanman Diospa prometesqan allpaman yaykunankupaq.

(Exodo; Levitico; Numeros; Deuteronomio; Salmo 136:10-15; Hechos 7:17-36.)